Tin teig trub 31

yaa-Kopq pyauj laa-Baan

1yaa-Kopq haid kxvq laa-Baan Eei txn vopq. ninb Bua kxvq, “yaa-Kopq Rcv Revg aa tia Eei Jaab tivb ka'naaiq. ninb putq zxib taaib maaib Eei Euvb Euvg se yem Bua Eei tia taaib.” 2yaa-Kopq yaag zia'q tu'q laa-Baan Eei eij leid maiq Navq zinb Daavg uaq nx, Pyruj Zamq haig a'q.

3 zyruq kxvq Buaj yaa-Kopq, “Rwrnj meib Eei Zyenb Ze'q Eei teib puv uaq og. yia xij Zauj meib yem.”

4yaa-Kopq zyrug pun waag mivb Buaj laa-sen Zauj le-aa taaib ninb Eei pa'ki yuvb yem Eei Zyavq. 5yaa-Kopq kxvq Buaj ninb Eei auq Bua, “yia pwatg meib Eei tia Eei eij leid Zauj yia maiq Navq zinb Daavg. mq paag yia Eei tia Eei Tinb huvb Zauj yia yem. 6meib Bua yaag hiuq tu'q yia lovg Revg Qa'q Tevj meib Bua Eei tia zruj kov. 7mq paag meib Bua Eei tia Zxg Pyenj yia. ninb Tiuq yia Eei kovb zinb tu'q zyepg Rung a'q. mq paag Tinb huvb maiq pun ninb zruj haiq Euvg hxig yia. 8sij kxvq ninb kxvq, ‘yuvb maaib tyemq Eei xij zu'g funj meib Eei kovb zinb,’ yetg zuvq yuvb Fiag txn maaib tyemq Eei Navq. sij kxvq ninb kxvq, ‘yuvb pen xij zu'g funj meib Eei kovb zinb,’ zyavb kwanb yuvb zyrug Kuvj Fiag txn pen Eei Navq. 9Navq naaig, Tinb huvb zx'q meib Eei tia Eei pwrng scvb Kuq pun yia Revg mig a'q.

10“yuvb scv Eei zyavb hog, yia Beij pwatg Tiuj yuvb Eeid Eei yuvb kruq, maaib teij pen Eei, maaib teij maaib tyemq Zru Eei, maaib teij maaib tyemq mwrng Eei. 11Beij pwatg Jyenq Eei zyavb hog, Tinb huvb Eei finb myenb heug yia, ‘yaa-Kopq aag.’ yia tau, ‘oij! yia yem naaiq og.’ 12ninb kxvq, ‘mavg kaaj maa'b! Tiuj yuvb Eeid Eei yetg zuvq yuvb kruq maaib teij pen Eei, maaib teij tyemq mwrng Eei, maaib teij tyemq Zru Eei, weig zu'g laa-Baan zruj pun meib Eei yetg zuvq yia pwatg Revg. 13yia se Tinb huvb, tovb yem Betg-en hing Zwrtq pun meib pwatg uaq taub. yem Betg-en meib lyepg nxm la'pyeiq ton Jyenq toj yrub fuvj pun yia,#Tin teig trub 28:18-22 yaag yem uaq lcvd Jiad vcvg waag. mivb a'q. ib zang Zwrtq naaiq nxm teib puv Rwrnj meib Zwrtq seij Eei teib puv.’+”

14laa-sen Zauj le-aa tau yaa-Kopq, “yia Bua Eei tia Eei Jaab tivb ib zang zuvq maiq maaib yia Bua Ripg Eei pwrng. 15ninb zruj pun yia Bua Navq penj kanb fivj myenb nx. ninb yaag maaig yia Bua Eei mGxvq taaib yaag na'q Revg mig a'q. 16Tinb huvb pun meib tu'q yia Bua Eei tia Eei ka'naaiq se penj yia Bua Eei yaag penj yia Bua Eei fu'Jweiq Eei. ib zang Tinb huvb Navq haiq nx Buaj meib, kunq Navq uaq nx zruj.”

17yaa-Kopq zyrug Beng zyavj ka'naaiq. ninb pun ninb Eei aub Jweiq keb Jyenq lxb Txb, 18yaag zung Jyenq scvb Kuq mivb Daavg. cvj txb Jyenq ninb yem patg-Daan-aa-lam zxng tu'q taaib Eei yetg zuvq ka'naaiq Zwrtq Jauq Rwrnj Kaa-naa-an teib puv, ninb Eei tia, i-sakg, uaq.

19uaq zang laa-Baan Zwrtq mivb Japq ninb Eei pa'ki yuvb pyei. laa-sen pavg uaq nxm zyavb hog nimg ninb Eei tia yem pyauq zavg Eei miub favj. 20yaa-Kopq yaag Duaq ninb Eei ovb taa, aa-lam myenb, laa-Baan, weig zu'g ninb pivj Jyenq pyauj, maiq Buaj. 21ninb txb Jyenq ninb maaib Eei yetg zuvq ka'naaiq pyauj Jiaj zi'g yu-fe-titg Daaib, huvj Jyenq ki-le-aatg Eei Bovb aiq txvj mivb.

laa-Baan zung yaa-Kopq

22yaa-Kopq pyauj mivb tu'q pua Nxi, laa-Baan Zivj hiuq tu'q. 23ninb zyrug txb Jyenq ninb Eei kxb yrud mivb zung. zung siag Nxi zyrug zung zaaig yem ki-le-aatg Eei Bovb aiq txvj. 24uaq mwrnd laa-Baan#31:24 hipq-lu waag kxvq aa-lam myenb, laa-Baan. Beij pwatg Tinb huvb taaib kxvq Buaj ninb, “faij fim og. maiq kunq lovj fai Zyruq, maiq tuvq kxvq haiq Euvg pun yaa-Kopq.”

25laa-Baan zung zaaig yaa-Kopq uaq zang, yaa-Kopq Zxv Jyenq Dopg liub yem ki-le-aatg Eei Bovb aiq txvj. laa-Baan Zauj kan ninb mivb Eei kxb yrud yaag Zxv Jyenq ninb Bua Eei Dopg liub uaq.

26laa-Baan kxvq Buaj yaa-Kopq, “meib fuvg Navq naaiq zruj? meib Duaq yia cvj kwaaiq Jyenq yia Eei sia'q pyauj Navq Bx'q Jaaj Zaavq tu'q taaib Eei msia'q txn nx. 27meib fuvg Navq naaiq nx Duaq yia, pivj Jyenq pyauj yaag maiq Buaj yetg Jruj yia? sij kxvq yia hiuq nx, yia zruj naug Eitg pun myenb paauj Ruv, Bx'q lxb Bx'q Rod, Patq taanb paab, fuvj meib Bua Fyenb yrub Eei Zwrtq Jauq. 28meib lyemb maiq pun yia tu'q zom yia Eei fun Zauj yia Eei sia'q. naaiq meib zruj Eei Jauq za'kevb Vovj haig. 29ib zang meib yem yia Eei puab Diaq. yia xij zruj haiq Euvg hxig meib se zruj tu'q Eei. mq paag a'Mwavj meib Eei tia Eei Tinb huvb poj Beij Buaj yia, ‘maiq kunq lovj fai Zyruq, maiq tuvq kxvq haiq Euvg pun yaa-Kopq.’ 30yia hiuq tu'q meib Eei Hruq xij Rwrnj meib Eei tia Eei pyauq Zivj taaib pyauj. mq paag meib weig haiq tiug nimg yia yem pyauq zavg Eei miub favj?”

31yaa-Kopq tau laa-Baan, “yia kamb Riaj meib xij zx'q meib Eei sia'q Rwrnj. 32mq paag meib Eei miub favj c'q, sij kxvq lxd pwatg yem haiq taub, maiq tuvq lyrub ninb Eei mcvg a'q. txv Jyenq yia Bua Eei zwavj kxb yrud sru Zwrtq meib Eei haiq Euvg ka'naaiq, kunq zx'q Rwrnj a'q.” yaa-Kopq maiq hiuq tu'q laa-sen nimg ninb Eei tia Eei miub favj.

33laa-Baan zyrug pia'g yaa-Kopq Eei Dopg liub Zauj le-aa Eei Dopg liub Zauj uaq teij i taub nrub peid Eei Dopg liub sru mq paag sru maiq Zwrtq ninb Eei miub favj. ninb yem le-aa Eei Dopg liub Zwrtq taaib cvj pia'g laa-sen Eei Dopg liub. 34laa-sen zx'q uaq teij yem pyauq zavg Eei miub favj tapq Jyenq lxb Txb Eei txj. ninb kanb c'q, zweid Jyenq kub vwaaig. laa-Baan sru Revg laa-sen Eei Dopg liub mq paag lxd maiq pwatg. 35laa-sen kxvq Buaj ninb Eei tia, “aa tia aag, meib maiq tuvq nrud yia og. yia hxpg zu'g Jiad sin zipq tia, mq paag yia Eei sinb yeng Tauj, yia Jiad maiq tu'q sin.” laa-Baan sru Revg ka'naaiq yaag lxd maiq pwatg ninb yem pyauq zavg Eei miub favj.

36yaa-Kopq Qiaj Jiad haig zyrug kxvq laa-Baan, “yia zruj haiq Euvg txvg meib, zi'g zwid meib, meib Zivj Qa'q zung Jyenq yia taaib? 37meib sru Revg yia Eei ka'naaiq meib pwatg haiq Euvg zeid meib Eei ka'naaiq? zx'q Zwrtq taaib an Jyenq naaiq maa'b! pun meib Eei myenb Zauj yia Eei myenb lomb Rxib mavg. ninb Bua zyrug hiuq tu'q yia Zauj meib, haiq taub zruj hxpg.

38“yia Zauj meib yem tu'q Eig zyepg Havj a'q. meib Eei pa'ki yuvb Zauj yuvb maiq Baav Jiaj txn. yetg taub meib Eei pa'ki yuvb kruq fai yuvb kruq yia maiq Eang Jiaj. 39sij kxvq Yiab ka'naaiq vaatg, yia maiq txb mivb pun meib mavg. yia kanb lcvd Dxtq Navq. Janb za'g nimg haiq Euvg, maiq kunq luvb Nxi zang fai luvb mwrnd zang, meib zuvq heug yia kanb Tipq. 40luvb Nxi zang yia tiaq Eutg Pwi, tiaq yua'q. luvb mwrnd zang yaag tiaq Jwavq, kwavg mFxmb Jaaj. 41yia Navq naaiq nx Zauj meib yem pwavq Eig zyepg Havj. yia zruj kov zyepg feij Havj pyetq meib Eei i taub sia'q lovg. cvj zruj Ju'q Havj pyetq meib Eei scvb Kuq. meib Zxg Tiuq yia Eei kovb zinb tu'q zyepg Rung mig a'q. 42sij kxvq maiq zeid yia Eei tia Eei Tinb huvb, apg-laa-ham Eei Tinb huvb, tovb i-sakg zavg Eei Tinb huvb,#31:42 faan za'g hipq-lu waag kxvq “i-sakg kamb Riaj uaq taub”. Zauj yia yem nx, meib zuvq pun yia Kuvb puad pc'g zauj Eei Zwrtq Navq. mq paag Tinb huvb pwatg yia Eei Krub zivb Zauj yia Eei puad zruj Eei kov. a'Mwavj ninb zyrug paaq Jyenq meib.”

yaa-Kopq Zauj laa-Baan lcvd Jiad vcvg waag

43laa-Baan tau yaa-Kopq, “naaiq teij sia'q se yia Eei sia'q. naaiq teij fu'Jweiq yaag yia Eei. naaiq teij yuvb kwanb Zauj pa'ki yuvb kwanb yaag yia Eei. meib pwatg Jyenq Eei yetg zuvq se yia Eei. ib Nxi yia haib zruj haiq Euvg Tevj yia Eei sia'q Zauj ninb Bua Eei fu'Jweiq? 44taaib maa'b! meib Zauj yia xij zu'g lyepg Jiad vcvg waag weig Tevj Bua i taub zruj zxvb zevj.”

45yaa-Kopq zyrug zx'q nxm la'pyeiq lyepg Jiad taaib ton Jyenq zruj Javb hog, 46cvj Buaj ninb Eei myenb, “Raud la'pyeiq taaib maa'b!” ninb Bua zyrug Raud la'pyeiq taaib Dwi Jyenq a'q. Dwi liud, ninb Bua zyrug lomb Rxib yem uaq la'pyeib Dwi Eei ka'Len Eang Naavj. 47laa-Baan Zwrtq uaq nxm txvj Eei Buaj heug ye-kaa-saaj-haaj-Du-Taa,#31:47 ye-kaa-saaj-haaj-Du-Taa se aa-laam waag kxvq “zruj zxvb zevj Eei la'pyeib Dwi”. mq paag yaa-Kopq Zwrtq Buaj heug kaa-le-etg.#31:47 kaa-le-etg se hipq-lu waag kxvq “zruj zxvb zevj Eei la'pyeib Dwi”.

48laa-Baan kxvq, “ib Nxi naaiq Dwi la'pyeiq zruj Bua i taub Eei zxvb zevj.” weig naaiq uaq nxm txvj heug kaa-le-etg. 49cvj tu'q Buaj heug mitq-paa,#31:49 mitq-paa Eei eij leid se zuaq mavg Eei txvj. weig zu'g laa-Baan kxvq, “Bua leib Gxi txig mq paag Toq zyruq yem meib Zauj yia Bua Bu'Dovj zuaq Jyenq. 50sij kxvq meib zruj to'g yia Eei sia'q, fai Zwrtq liud yia Eei sia'q meib cvj kanb lovg taub auq, maiq kunq yia maiq hiuq, Javj Jyenq og, maaib Tinb huvb Tevj meib Zauj yia zruj zxvb zevj.”

51laa-Baan cvj kxvq Buaj yaa-Kopq, “mavg kaaj, naaiq se yia Dwi Eei la'pyeiq Zauj ton Jyenq Eei la'pyeib tovg yem meib Zauj yia Bu'Dovj. 52naaiq Dwi la'pyeiq Zauj naaiq nxm la'pyeib tovg zruj zxvb zevj Tevj Bua Javj zu'g, yia maiq Jiaj meib uaq puv zruj haiq Euvg hxig meib. meib yaag maiq Jiaj naaiq puv zruj haiq Euvg hxig yia. 53Toq apg-laa-ham Eei Tinb huvb Zauj naa-ho Eei Tinb huvb, tovb ninb Bua Eei tia Eei Tinb huvb, Tevj Bua tunj sig.”

yaa-Kopq zyrug zyavq Jyenq tovb ninb Eei tia, i-sakg, zavg Eei Tinb huvb#31:53 peiq mavg Tin teig trub 31:42. Eei Buaj lcvd Jiad vcvg waag. 54ninb yaag yem uaq nxm Bovb aiq lovg scvb Kuq ziag pun Tinb huvb yaag heug ninb Eei kxb yrud taaib lomb Rxib Eang Naavj. Eang liud, ninb Bua zyavb mwrnd yem uaq nxm Bov. 55ta'Eeig Dxm Ryruq Eei, laa-Baan zom ninb Eei sia'q Zauj ninb Eei fun yaag pwav waag ninb Bua, zyrug Zwrtq Jauq Rwrnj pyauq a'q.

Currently Selected:

Tin teig trub 31: IuMiNOR

Highlight

Copy