SAN MARCOS 2

Jesús aptakmelcheseyam énxet apkelyakseykekxa megkamopwána eltakheykha

(Mt 9.1-8; Lc 5.17-26)

1Nano' axta temék aptakhémo makham Jesús ma'a tegma apwányam Capernaum. Legáxchek axta amya'a apwákxo m'a apxagkok, 2apchaknákxeyk axta énxet apxámokma, axta exnawok ma'a átog; apkeltennáseyha axta amya'a ektakmela Jesús xa énxet'ák nak. 3Keñe axta apsókasa énxet apkelyakseykekxa megkamopwána eltakheykha hawók nápakha énxet'ák. 4Wánxa agkok, mopwancha'ak axta apyepetchegwokmoho Jesús, hakte apxámok axta énxet ma'a, keñe axta apyagkaxkata néten tegma ekpayhókxa axta apkenmágkaxa Jesús. Xama axta appenchesa apyagkaxkatma néten tegma, apweykásenteyk axta yetlo aptaháno m'a énxet apkelyakseykekxa megkamopwána axta eltakheykha. 5Xama axta apwet'a Jesús ekyetna melya'áseyam xa énxet'ák nak, aptahak axta apcháneya ektaha axta apháxamap se'e:

—Hatte, megkólyakmagkásekxak xép aptémakxa mey'asáxma.

6Nápakha énxet'ák apkelxekmóso apnámokkok ektémakxa segánamakxa axta entahak elchetamso apwáxók se'e, cham'a apheyncha'a axta m'a: 7“¿Háxko ektahakxa megyeka nak aptaha appeywa xa ektaha nak? Enmexma Dios xa aptahakxa nak appeywa. Dios apwánxa apagkok apmopwána meyakmagkásekxék nentémakxa mólya'asáxma.” 8Ñohok axta eyke apyekpelcha Jesús ektahakxa elchetamso apwáxók xa énxet'ák nak. Aptahak axta apkelmaxneyeyncha'a s'e:

—¿Yaksak ektaha ektaha nak elchetamso kélwáxok xa? 9¿Yaksak enyahamo antehek agának énxet apkelyakseykekxa megkamopwána nak eltakheykha: ‘Megkólyakmagkásekxak ektémakxa nak mey'asáxma exchep’, enxeykel'a antehek agának se'e: ‘Exnekxa néten, emekxa aptaháno, exeg’? 10Axekmósek sat ko'o ekyetna apmopwána meyakmagkásekxék ektémakxa melya'asáxma énxet'ák apheykha náxop ma'a ektaha nak Apketche énxet.

Keñe axta aptaha apcháneya énxet apkelyakseykekxa megkamopwána axta eltakheykha s'e:

11—Ektahak seyáneya exchep se'e, etnamha, emekxa aptaháno, emyekxa apxagkok.

12Yetlókók axta apheykekxa néten nápakta'awo' énxet'ák, apmákxeyk axta aptaháno, aptekkek axta m'a. Ekeso eñamakxa ekpelakkasa axta apkelwet'a apyókxoho énxet'ák xa. Aptahak axta apkelpeykáso Dios se'e:

—Magweteyk makham negko'o katnehek xa ektaha nak.

Jesús apwóneykha Leví

(Mt 9.9-13; Lc 5.27-32)

13Apmeyákxeyk axta makham Jesús neyáwa wátsam ekpayhegwayam; apkelmahágkek axta énxet'ák aphakxa Jesús, keñe axta apkelxekmósa Jesús xa énxet'ák nak. 14Neyseksa apxega axta apwet'a Leví, Alfeo apketche. Axta aphak ma'a apkelmomakxa axta cha'a selyakye yakwayam kólmések wese' Roma. Aptahak axta Jesús apcháneya s'e:

—Hétlogma.

Apkempákxeyk axta néten Leví, keñe axta apyetlawa.

15Aptáswokmek axta apto Jesús yetlo apkeltámeséyak ma'a Leví apxagkok, apxámok axta anhan énxet apheyncha'a nekha mésa, cham'a énxet'ák apkelmomo axta selyakye yakwayam kólmések wese' Roma, tén han ma'a énxet'ák elmasagcha'a apkeltémakxa nak, hakte apxámok axta énxet apyetlo Jesús ma'a. 16Xama axta apkelwet'a énxet'ák fariseos, tén han ma'a énxet'ák apkelxekmóso axta apnámokkok ektémakxa segánamakxa, cham'a appasma axta aptéyak Jesús apyókxoho xa énxet'ák nak, aptahak axta apkelmaxneyeyncha'a Jesús apkeltámeséyak se'e:

—¿Yaksak ektaha appasma nak aptéyak apkelxekmóso kéxegke énxet'ák apkelma nak selyakye yakwayam kólmések wese' Roma, tén han ma'a énxet'ák melya'asáxma nak?

17Apleg'awók axta Jesús xa. Aptahak axta apkeláneya s'e:

—Mopmenyék pánakte egyap ma'a énxet'ák apkelyennakte nak, wánxa m'a énxet'ák apkelháxamap nak. Axta ko'o aweyk yakwayam alwónmakha énxet apkelpéwomo nak, wánxa m'a énxet melya'asáxma nak.

Ektémakxa manto nento nelpeykáso enxoho Dios

(Mt 9.14-17; Lc 5.33-39)

18Xama ekhem axta metókagkok aptéyak apkelpeykáso Dios énxet'ák apkelyetlo axta aptémakxa Juan el Bautista, tén han ma'a énxet'ák apkelyetlo axta apkeltémakxa fariseos. Nápakha énxet'ák axta apya'aweykxak Jesús. Aptahak axta apkelmaxneyeyncha'a s'e:

—¿Yaksak ektéma meláneykegko nak cha'a exchep apkeltámeséyak ma'a manto nak nento ólpeykeshok Dios? Metawagkek cha'a aptéyak elpeykeshok Dios ma'a énxet'ák apkelyetlo nak aptémakxa Juan, tén han ma'a énxet'ák apkelyetlo nak apkeltémakxa fariseos.

19Aptahak axta apchátegmowágko Jesús se'e:

—¿Metawagkek enxeykel'a aptéyak énxet'ák kéláneyeykha epásegwók elyamhopma m'a apha enxoho nepyeseksa énxet yakwayam nak kalyamhápok? Apheyk agkok nepyeseksa énxet yakwayam nak kalyamhápok, mopwanchek metawagkok aptéyak. 20Wánxa agkok, kammok sat eyke ekhem yakwánxa kólyentemekxak énxet yakwayam nak kalyamhápok, keñe sat metawagkek aptéyak.

21“Megkólwanchek kólyepetchesha apáwa aphápak kélyepetchásencha'a enxoho m'a apáwa nápakha aphaxnagkok nak, hakte ketchetsék etnekxak kélyenyesa enxoho m'a apáwa nápakha aphaxnagkok nak, keñe eyánchesagkohok apkelyeptamap ma'a apáwa aphápak nak. 22Megkólwanchek nahan kólyetmok vino axnagkok ma'a aksok empe'ék apák kélyetmomol'a, hakte kalpaxkátek vino axnagkok xa aksok empe'ék apák nak, keñe keymasaxkohok keygkenaxchek ma'a vino, keñe anhan kalesók ma'a aksok empe'ék apák nak. Kólyátem cha'a vino axnagkok ma'a aksok empe'ék axnagcha'ák kélyetmomol'a.

Jesús apkeltámeséyak apnakxeyák hótahap apyexna

(Mt 12.1-8; Lc 6.1-5)

23Xama ekhem apkellókasamakxa apkelyampé énxet'ák judíos axta apweynchámeyha Jesús neyseksa aksok kélcheneykekxexa. Neyseksa apkelxega axta apnakxeygkok hótahap apyexna#Dt 23.25. apkeltámeséyak. 24Aptahak axta apkelmaxneyeyncha'a énxet'ák fariseos se'e:

—Elano, ¿yaksak ektaha apkelánegko nak apkeltámeséyak xép ma'a aksok megkólhayo nak anlának ekhem nellókasamakxa nelyampé?

25Wánxa agkok, aptahak axta apchátegmowágko Jesús se'e:

—¿Yagkólyetseteyk kéxegke weykcha'áhak aptémakxa axta David, cham'a eyakhama axta meyk yetlo apkelxegexma'a, ektéma axta meyke aptéyak? 26Aptaxnegwokmek axta David Dios tegma appagkanamap apagkok, cham'a aptémakxa axta makham apkemha apmonye appasmo apkelmaxnéseso Dios énxet'ák apagkok Abiatar, aptáswokmek axta pan kélpagkancheso axta Dios, cham'a kélhayo axta aksa etawagkok ma'a énxet'ák appasmo nak apkelmaxnéseso Dios énxet'ák apagkok.#Lv 24.9. Apkelmeyásegkek axta anhan David ma'a énxet'ák ektaha axta apkelxegexma'a.#1 S 21.1-6.

27Aptahak axta anhan appeywa Jesús se'e:

—Enxet axta kélláneso xa ekhem nellókasamakxa nelyampé nak, háwe axta ekhem nellókasamakxa nelyampé kélláneso énxet. 28Ekeso eñamakxa apkepwagko nak elának aksok ekhem nellókasamakxa nelyampé m'a aptaha nak Apketche énxet.

Currently Selected:

SAN MARCOS 2: LEGN

Highlight

Copy