SAN MATEO 26

Ekhémo mók apkelpakmeyesma énxet'ák yakwayam yának emakpok Jesús

(Mr 14.1-2; Lc 22.1-2; Jn 11.45-53)

1Xama axta apsawha apkeltennáseykha énxet'ák Jesús, aptahak axta apkeláneya apkeltámeséyak se'e:

2—Kélya'ásegkok kéxegke eyéméxko ánet ekhem yakwayam kalanaxchek ma'a ekhem melwagkayam nak énxet'ák judíos kéltéma nak Pascua,#Ex 12.1-27; Dt 16.1-8. cham'a yakwánxa sat kólának emakpok aptaha nak Apketche énxet yakwayam kólyepetchesek aksok ektegyéso.

3Apchaknákxeyk axta énxet'ák apkelámha apmonye'e nak appasmo apkelmaxnéseso Dios énxet'ák apagkok ma'a Caifás apxagkok, cham'a Caifás aptaha axta apkemha apmonye appasmo apkelmaxnéseso Dios énxet'ák apagkok. Axta anhan ma'a énxet'ák apkelámha apmonye'e nak apchakneykekxexa énxet'ák judíos. 4Apkeláneykxeyk axta apkelpakmeyesma yakwayam emok Jesús yetlo apkelyexamakpoho, keñe anhan yának emátog. 5Aptahak axta apkelpakmeta s'e:

—Manlanyek sat eyke nepyeseksa énxet apxámokma ekhem mólwagkayam nak, yakwayam enxoho mennegkesexma énxet'ák.

Xama kelán'a expakháseso sokmátsa apkátek Jesús

(Mr 14.3-9; Jn 12.1-8)

6Apheyk axta Jesús tegma apwányam Betania, Simón apxagkok, cham'a apkeltamhomakpo axta negmasé ektepelchamáxche egyempehek áto'; 7Yo'ókmek axta Jesús xama kelán'a aphakxa nekha mésa. Sókok axta xama sokmátsa elánamáxche axta axagkok meteymog ekwesey nak alabastro, enókok agko' axta m'a. Kexpakhásesek axta apkátek#Lc 7.37-38. Jesús ma'a sokmátsa nak. 8Xama axta apkelwet'a Jesús apkeltámeséyak ektaha xa, apkellókek axta. Aptahak axta apcháneya s'e:

—¿Yaksak ektaha ektawáseyncha'a nak xa sokmátsa nak? 9Tásek axta eykhe kólyenyekxak ekmomnáwa agko' xa sokmátsa nak, yakwayam enxoho kólpasmok ma'a énxet'ák meyke nak aksok apagkok.

10Apleg'awók axta Jesús xa. Aptahak axta apkeláneya apkeltámeséyak se'e:

—¿Yaksak ektaha kélya'asa nak exma xa kelán'a nak? Tásek setnésesakxa ko'o xa. 11Exmakha sat cha'a kélnepyeseksa kéxegke énxet'ák meyke nak aksok apagkok,#Dt 15.11. wánxa agkok maxek sat eyke cha'a ko'o kélnepyeseksa kéxegke. 12Penchásók elana yakwánxa nak ko'o katnehek selatawanya ektahakxa nak sexpakhágwa'a sokmátsa xa kelán'a nak. 13Kaxénaxchek sat nahan cha'a ekyókxoho yókxexma kéltennágkaxa enxoho cha'a tásek amya'a setnésesamakxa xa kelán'a nak. Sat ektahakxa agkok megkólwagkayam xa ektaha nak. Nakso' xa sektahakxa nak sekpeywa seláneya kéxegke.

Judas appelakkaseso apkenagko emakpok Jesús

(Mr 14.10-11; Lc 22.3-6)

14Apmahágkek axta aphágkaxa apkelámha apmonye'e appasmo apkelmaxnéseso Dios énxet'ák apagkok xama Jesús apkeltámeséyak, apkeñama axta nepyeseksa doce Jesús apkeltámeséyak, cham'a apwesey axta Judas Iscariote. 15Aptahak axta apkeláneya s'e:

—¿Háxko sat ekwánxa helmések selyakye sekmésa enxoho ko'o kéxegke Jesús.

Apyanmagkasek axta treinta sawo selyakye elmomnáwa. 16Keñe axta aptegyeyncha'a Judas yakwánxa etnésesek yának emok Jesús xa énxet'ák nak.

Nempasmo ektakmela

(Mr 14.12-25; Lc 22.7-23; Jn 13.21-30; 1 Co 11.23-26)

17Wokmek axta eyeynókxa ekxega ekhem aptámákpexa axta pan meyke kempáseyak, apkelmeyákxeyk axta apkeltámeséyak aphakxa Jesús. Aptahak axta apkelmaxneyeyncha'a s'e:

—¿Háxko sat yának anlánegwók nentéyak ekhem Pascua mólwagkayam nak?

18Aptahak axta apchátegmowágko Jesús se'e:

—Kólmohok apxagkok xama énxet ma'a nepyeseksa tegma apwányam. kóltehek sat kólának se'e: ‘Aptahak xeyk sẽláneya negko'o sẽlxekmóso s'e: Chágketwokmek kaxwo' ekhem yakwánxa amátog ko'o. Amhagkok sat ko'o apxagkok xép yakwayam alánegwók nentéyak ekhem Pascua mólwagkayam nak yetlo seltámeséyak.’

19Aptamhágkek axta anhan apkeltámeséyak ma'a aptahakxa axta apcháneya Jesús, apkelánegkek axta nahan aptéyak ekhem Pascua melwagkayam axta.

20Xama axta ekyaktésa, apheyk axta xamo' Jesús doce apkeltámeséyak nekha mésa; 21Aptahak axta apkeláneya neyseksa aptéyak se'e:

—Kélxama sat kólának amaxchek kéxegke. Nakso' xa sektahakxa nak seláneya kéxegke.

22Kelapwámegkók agko' axta apkeltámeséyak apkelleg'a xa, xama axta apmákpok aptaha apkelmaxneyeykha Jesús se'e:

—Wese', ¿ko'oya sat?

23Aptahak axta apchátegmowágko Jesús se'e:

—Sat yának amaxchek ko'o m'a sekyásáso exchek xamo' pan kañe' sokpayhe.#Sal 41.9. 24Katnehek sat aptaha nak Apketche énxet ma'a ektémakxa nak ekxeyenma eknaktáxésamaxche weykcha'áhak; wánxa agkok, sagkók agko' sat eyke katnehek kéllegasáseykegkoho m'a ektaha nak apkeltémo emakpok aptaha nak Apketche énxet. Tásek axta eykhe metyemek xa énxet nak.

25Keñe axta appakmeta Judas, aptaha axta apkeltémo emakpok Jesús. Aptahak axta apkelmaxneyeyncha'a s'e:

—Sẽlxekmóso, ¿ko'oya sat?

—Cháxa aptahakxa nak appeywa —axta aptahak apchátegmowágko Jesús.

26Neyseksa aptéyak axta apmak pan Jesús, apmések axta ekxeyenma apwáxok Dios, keñe axta apyepta, apkelmeyásegkek axta anhan apkeltámeséyak. Aptahak axta apkeláneya s'e:

—Kólma, kóltaw, keso sekyókxoho ko'o s'e.

27Keñe axta apma anhan egheykok, apmések axta makham ekxeyenma apwáxok Dios, keñe axta apmésa apkeltámeséyak. Aptahak axta apkeláneya s'e:

—Kólyenák kélyókxoho s'e, 28hakte cháxa éma ahagkok ko'o xa,#Ex 24; Zac 9.11. ektaha nak ekteméseso ekmámnaksoho m'a ekhémo mók nelpakhetchásamáxkoho nak Dios,#Jer 31.31-34. cháxa peya nak kayegkenaxchek yakwayam enxoho meyakmagkásekxék Dios ektémakxa melya'asáxma apyókxoho énxet. 29Eltennásek eyke ko'o kéxegke peya meynekxók cha'a ko'o vino elánamáxche nak anmen yámet ekyexna, ekwokmoho sekyenawo xamo' kéxegke vino axnagkok ekyetna nak ma'a aptémakxa nak Wese' apwányam Dios.

Jesús apxeyenma Pedro peya etnehek hó magya'áseyak

(Mr 14.26-31; Lc 22.31-34; Jn 13.36-38)

30Apkelmeyákxeyk axta egkexe Olivos natámen apkelmeneykmaso negmeneykmaso eñama nak Salmos. 31Aptahak axta apkeláneya Jesús apkeltámeséyak se'e:

—Kélyókxoho sat kamaskok kéltaha mehelya'áseyam ko'o keso axta'a nak. Hakte temegkek eknaktáxésamaxche weykcha'áhak se'e: ‘Wakhek sat ko'o keláneykha nekkések, keñe sat yexpaknek ma'a nekkések.’#Zac 13.7. 32Wánxa agkok, ekxátekhágwokmek sat agkok ko'o, sekweykekxa emonye sat atnehek ko'o m'a Galilea, keñe sat kólwakxak kéxegke axayo'.#Mt 28.16.

33Aptahak axta apchátegmowágko Pedro s'e:

—Kamaskok sat eykhe etnehek apcháyo exchep selxegexma'a, megkamassehek eyke ko'o seyáyo exchep.

34Aptahak axta apcháneya Jesús se'e:

—Antanxo sat katnehek xép mexeyenma sekwesey keso axta'a nak, amonye elpáwá tat'a. Nakso' xa sektahakxa nak sekpeywa seyáneya exchep.

35Aptahak axta Pedro s'e:

—Watsaphok sat eykhe xamo' xép, megkamassehek eyke sekxeyenma apwesey exchep.

Hawók axta anhan aptahakxa apkelpakmeyesma apyókxoho apkeltámeséyak.

Jesús apteme nempeywa nelmaxnagko yókxexma Getsemaní

(Mr 14.32-42; Lc 22.39-46)

36Apmeyákxeyk axta Jesús yetlo apkeltámeséyak yókxexma eltamhomaxchexa axta Getsemaní. Aptahak axta apkeláneya apkeltámeséyak se'e:

—Kólhakha sekxo' se'e. Amhagkok sekxo' ko'o mók nekha atnegwók nempeywa nelmaxnagko.

37Apyentegkek axta Pedro tén han apkánet Zebedeo apketchek. Awanhek axta elapwayam Jesús, teyekmek axta anhan apwáxok. 38Aptahak axta apkeláneya s'e:

—Eyeykhágwokmók ko'o selapwayam máxa entahak sétsapa enxoho. Kólhakha sat se'e. Nágkólnakten aksa, helwahánho sat matyenma.

39Yetlókók axta apxega Jesús apmahágko yámmakhawo, apháxegwokmek axta ekwokmoho aptekxeya ekpayhakxa nápát xóp. Aptahak axta aptaha nempeywa nelmaxnagko s'e: “Táta, apwanchek agkok xép, nágyána aksa añegkohok ko'o yakwánxa nak hetnehek ekyetchesamaxkoho nak xama egheykok negya aksok ekmáskel'a, momenyék ko'o kalanaxchek ma'a sekmamenyého ahagko' nak, wánxa m'a apmopmenyého nak xép.”

40Keñe axta apmeyákxo makham aphágkaxa apkeltámeséyak. Apwetágweykxeyk axta apnaktena. Aptahak axta Jesús apcháneya Pedro s'e:

—¿Megkólwancheya exchek megkólnaktena ekweykmoho xama hora selwéhenawo selhaxneykha ko'o? 41Kólleyxmakha, nágkólnaktén, kólteme nempeywa nelmaxnagko yakwayam enxoho megkahapwék kéxegke ekyekkónma. Kélmenyék eykhe kóllának kéxegke ekpayhawo nak anlána', kélyelkáxkók eyke.

42Aptakháwok axta makham Jesús. Aptahak axta aptaha nempeywa nelmaxnagko s'e: “Táta, mowanchek agkok ko'o sektakhésawo xa peya nak añegkoho', katnehek sat ma'a apkepmenyého nak katnehek xép.”

43Xama axta apmeyanto makham aphágkaxa apkeltámeséyak, apwetágwakteyk axta makham apnaktena, hakte mopwancha'ak axta menaktena. 44Apkexakkek axta aksa aptemegwákxo makham nempeywa nelmaxnagko, apheyásók axta apteme nempeywa nelmaxnagko m'a aptahakxa axta cha'a appeywa. 45Keñe axta apmeyákxo makham aphágkaxa axta apkeltámeséyak. Aptahak axta makham apkeláneya s'e:

—Kélnaktenchek neykel'a makham kéxegke kéllókasa kélyampé. Wokmek kaxwo' yakwánxa kólmések aptaha nak Apketche énxet ma'a énxet'ák melya'asáxma nak. 46Nók, kólchaknekxa néten; keto' apwa'akxa m'a ektaha axta apkeltémo amaxchek ko'o.

Jesús apmomap

(Mr 14.43-50; Lc 22.47-53; Jn 18.2-11)

47Neyseksa appakmeyesma Jesús axta apwokmok Judas, aptaha axta apkeñama nepyeseksa m'a doce Jesús apkeltámeséyak. Apxámok axta énxet apkelxegexma'a apwokmo m'a, yetlo apkelmeykha sókwenakte, yámet axta anhan apkelmeykha. Enxet'ák apkelámha apmonye'e appasmo apkelmaxnéseso Dios énxet'ák apagkok axta apkeláphaso, tén han ma'a énxet'ák judíos apkelámha apmonye'e nak kélakneykekxexa. 48Nano' axta apkeltennasa Judas énxet'ák yakwánxa etnehek yakwayam enxoho elya'asagkohok apkelxegexma'a aptémakxa Jesús. Aptahak axta apkeláneya s'e: “Enxet sekpetsesakxa enxoho ko'o, sat kólmok ma'a.” 49Apyo'ókmek axta Judas apkenmágkaxa Jesús. Aptahak axta appeykesa s'e:

—¡Xép nak sẽlxekmóso! Appetsesek axta. 50Aptahak axta apchátegmowágko Jesús se'e:

—Emók, epekhaksoho elának ma'a apmoko nak elának.

Keñe axta apkelakxegakmoho nahan ma'a nápakha Judas apkelxegexma'a, keñe axta apma Jesús xa énxet'ák nak.

51Yetlókók axta anhan apleklo sókwenakte apagkok xama Jesús apkeltámeséyak, apyakténchesek axta apeykok apkemha apmonye appasmo apkelmaxnéseso Dios énxet'ák apagkok apkeláneykha. 52Aptahak axta apcháneya Jesús se'e:

—Yakxegkásekxa axagkok sókwenakte apagkok, hakte apyókxoho énxet ektaha nak apkelmeykha sókwenakte apkennapmap, sókwenakte nahan kannápok. 53¿Ya ey'ásegkok xép seyewagko ko'o almaxnak Táta yakwayam hepasmok, keñe heyaphásesek ko'o apkelásenneykha apxámokma apagko' keso kaxwo' nak? 54Ektemék agkok ko'o xa, megkatnehek ma'a ektémakxa nak ekxeyenma eknaktáxésamaxche weykcha'áhak, ekxeyenma eyéméxko katnehek xa.

55Yetlókók axta apteme apkelmaxneyeykha Jesús énxet'ák se'e:

—¿Yaksak ektaha kélsokmoho nak kéxegke sókwenakte tén han yámet selya'awa yakwayam helmok máxa énxet ekmaso aptémakxa eltemesásak? Yókxoho ekhem axta ko'o selxekmóso énxet kañe' tegma appagkanamap,#Lc 19.47; 21.37. axta nahan helmák kéxegke. 56Wánxa agkok, temék eyke yakwayam enxoho katnehek ma'a ektémakxa axta eknaktáxésamaxche weykcha'áhak, cham'a apkelxeyenma axta énxet'ák ektaha axta Dios appeywa apkellegaso.

Apyenyókek axta aksa apxakko' Jesús apkeltámeséyak apkenyahágko ektaha axta xa.

Jesús kélyentama aphágkaxa énxet'ák ekyawe kéláyo nak

(Mr 14.53-65; Lc 22.54-55,63-71; Jn 18.12-14,19-24)

57Caifás apxagkok axta apyentamákxak Jesús ma'a énxet'ák ektaha axta apma, cham'a Caifás aptaha axta apkemha apmonye appasmo apkelmaxnéseso Dios énxet'ák apagkok. Axta apchaknákxak énxet'ák apkelxekmóso axta ektémakxa segánamakxa m'a, tén han ma'a apkelámha apmonye'e nak énxet'ák judíos. 58Axta etétegkohok Pedro apyetlawa kélya'asakxa Jesús, axta apwokmok ma'a ekyawakxal'a apwáxok tegma, apkemha apmonye appasmo apkelmaxnéseso Dios énxet'ák apagkok axta apxagkok ma'a. Aptaxnegwokmek axta, aphakmek axta aphágkaxa sẽlpextétamo aptakmelcheso tegma appagkanamap yakwayam enxoho étagkohok yakwánxa katnehek.

59Aptegyáha axta amya'a megkamámnaksoho yakwayam yának emátog Jesús ma'a énxet'ák apkelámha apmonye'e axta appasmo apkelmaxnéseso Dios énxet'ák apagkok, tén han ma'a énxet'ák ekyawe axta kéláyo. 60Apxámok axta eykhe énxet apkelwayam apteme cha'a apkelmopwána amya'a apxéna Jesús, wánxa agkok, axta eyke elwetákxak yakwánxa etnésesek. Nano' axta entahak apkelwokmo anhan apkánet énxet. 61Aptahak axta apkelpeywa s'e:

—‘Ewanchek ko'o ategkesek se'e Dios tegma appagkanamap apagkok nak, keñe axátekhásekxak makham antanxo ekhem’#Jn 2.19. —axta aptemék appeywa xa énxet nak.

62Apkempákxeyk axta néten énxet apkemha apmonye axta appasmo apkelmaxnéseso Dios énxet'ák apagkok. Aptahak axta apkelmaxneyeyncha'a Jesús se'e:

—¿Megyátegmowagkeya ektahakxa nak apxénamap xép? ¿Yaksak xa ektahakxa nak apxénamap xép?

63Wánxa agkok, apwanmakkek axta eyke aksa Jesús. Aptahak axta apcháneya énxet apkemha apmonye appasmo apkelmaxnéseso Dios énxet'ák apagkok se'e:

—Yetlo sekxeyenma apwesey Dios memassegwayam ko'o, eltamhok heltennaksek xép ekmámnaksoho agko'. Hẽltennés negko'o aptaha enxoho exchep Mesías, aptaha nak Dios Apketche.

64Aptahak axta apchátegmowágko Jesús se'e:

—Cháxa aptahakxa nak appeywa exchep. Eltennásek nahan ko'o xa kéxegke peya kólwetak exek ekpayhókxa apkelya'asamakxa Dios ekha apyennakte m'a aptaha nak Apketche énxet, tén han kólwetak exyók neyseksa yaphopé m'a néten.#Dn 7.13.

65Keñe axta apkelyepta aptaxno m'a énxet aptaha axta apkemha apmonye appasmo apkelmaxnéseso Dios énxet'ák apagkok magkenatcheso megkalcha apwáxok ma'a aptahakxa axta appeywa Jesús. Aptahak axta appakmeta s'e:

—¡Enmexma Dios aptahakxa nak appeywa xa énxet nak! Megkeyméxchek kaxwo' antegyekxohok énxet ektaha apya'áseykegkoho aptémakxa. Kélleg'ak kéxegke aptahakxa nak appeywa enmexéncha'a Dios; 66¿háxko ektahakxa elchetamso kélwáxok kéxegke?

Aptahak axta apkelátegmowágko énxet'ák se'e:

—Apsexnánémap apagko'. Kéméxchek yetsapok.#Lv 24.16.

67Keñe axta kélexpakha'a kélyamánog nápát, kéltekpagkek axta nahan cha'a. Keñe axta nápakha énxet aptekpagkasa cha'a nápát.#Is 50.6. 68Aptahak axta apcháneya s'e:

—¡Xép apteme Mesías, ey'asagkoho' xa ektaha nak ektekpaga!

Pedro apteme hó magya'áseyak Jesús

(Mr 14.66-72; Lc 22.56-62; Jn 18.15-18,25-27)

69Apheyk axta Pedro kañe' ekyawakxa apwáxok tegma, keñe axta ekyo'ókmo xama kelán'a kélásenneykha. Entahak axta eyáneya s'e:

—Etnohok axta cha'a exchep apxegexma Jesús apkeñama nak Galilea.

70Axta eyke exénak Pedro nápakta'awo' énxet'ák. Aptahak axta se'e:

—May'ásegkok ko'o ektahakxa nak ekpeywa seyáneya.

71Keñe axta apmeyákxo Pedro átog. Wet'ak axta makham mók kelán'a kélásenneykha. Entahak axta eláneya énxet'ák ektaha axta apheykha m'a:

—Cháxa aptéma axta cha'a apxegexma Jesús xa, cham'a apkeñama nak Nazaret.

72Axta exénak makham Pedro, aptahak axta aptemésesa ekmámnaksoho appeywa s'e:

—¡May'ásegkok ko'o m'a énxet nak!

73Axta kanéwo, keñe axta kélyo'ókmo Pedro. Axta apyo'ókmok ma'a énxet'ák ektaha axta apheykha m'a. Aptahak axta apcháneya s'e:

—Nakso' aptaha exchep apkelxegexma'a m'a énxet'ák nak. Hakte negyekpelchawók nahan negko'o ektémakxa nak appeywa exchep.

74Apyennaktésekmók axta appeywa Pedro apxéna eñásesagkohok Dios metnaha enxoho ekmámnaksoho appeywa. Aptahak axta s'e:

—¡May'ásegkok ko'o m'a énxet nak!

Chakhawók axta anhan ekpáwa xama tat'a kennawo', 75keñe axta ekxénwákxoho apwáxok Pedro aptémakxa axta apkenagkama Jesús se'e: ‘Antanxo sat katnehek mexeyenma exchep sekwesey amonye ekpáwa tat'a.’ Keñe axta aptepa Pedro m'a, axta yeyságkohok apwana.

Currently Selected:

SAN MATEO 26: LEGN

Highlight

Copy