SAN JUAN 8
8
Kelán'a elané megkatnaha atáwa
1Apmeyákxeyk axta Jesús néten egkexe ekwesey axta Olivos; 2mók ekhem axta entahak, keñe axta apmeyákxo Jesús axto'o agko' ma'a tegma appagkanamap. Apya'aweykteyk axta énxet'ák, keñe axta apha Jesús yakwayam elxekmósek xa énxet'ák nak.
3Apyentamokmek axta xama kelán'a énxet'ák ektaha axta apkelxekmóso ektémakxa segánamakxa tén han ma'a fariseos, cham'a kelán'a ektaha axta kélweteykegkoho elané megkatnaha atáwa, apkenegkesekmek axta nepyeseksa énxet'ák. 4Aptahak axta énxet'ák apcháneya Jesús se'e:
—Sẽlxekmóso, keso kelán'a ektaha exchek kélweteykegkoho elana megkatnaha atáwa s'e, pók énxet xeyk pathetágkok. 5Xeyenmék segánamakxa eñama nak Moisés eltémo ólyetnak meteymog agakhek kelán'a ektéma nak xa.#Lv 20.10; Dt 22.22-24. ¿Háxko etnehek xép appeywa?
6Apmokók axta eykhe ékkónek Jesús énxet'ák aptaha apcháneya xa, yakwayam enxoho esexnena'. Wánxa agkok, apháxahánteyk axta eyke Jesús, keñe axta aptáxesa apophék xóp. 7Apkelenxanakmók axta eyke apkelmaxneyeykha Jesús xa énxet'ák nak, keñe axta apkempákxo makham néten Jesús, aptahak axta apkeláneya s'e:
—Apyetneyk agkok kélxama kéxegke melané mey'asáxma xama enxoho, eyenhe apmonye meteymog xa kelán'a nak.
8Keñe axta apháxahánto makham Jesús aptáxesakxo makham apophék xóp. 9Xama axta apkelleg'a aptahakxa appeywa Jesús xa énxet'ák nak, xama axta apmákpok apkeltakháwo, apkelwányam axta apmonye'e apkeltakhémo. Xama axta aphákxo apxakko' Jesús, tén han ma'a kelán'a, 10apkempákxeyk axta néten, keñe axta aptaha apkelmaxneyeyncha'a kelán'a s'e:
—¿Háxko apkelmahágkaxa énxet'ák? ¿Mékoya xama apxeyenma eyéméxko katsapok xeye'.
11Entahak axta eyátegmowágko kelán'a s'e:
—Wese', méko xama enxoho.
Aptahak axta makham apcháneya Jesús se'e:
—Mowanchek nahan ko'o xa axének eyéméxko katsapok xeye'; katakhekxa kaxwo', nágkalánekxa megkay'asáxma.
Jesús apteme elseyexma keso náxop
12Apkeltennáseyha axta makham Jesús énxet'ák. Aptahak axta s'e:
—Ko'o sekteme elseyexma keso náxop;#Mt 5.14; Jn 9.5. énxet ektahakxa enxoho setleykha ko'o, keytek sat ma'a elseyexma ekyennaktésamo nak egnenyek, metyesha sat neyseksa ekyaktesóxma.
13Aptahak axta fariseos apcháneya Jesús se'e:
—Apxénamakpoho apagko' aptahak xép xa aptahakxa nak apkeltenneykha. Méko katnésesek nakso' xa aptahakxa nak apkeltenneykha exchep.#Jn 5.31.
14Aptahak axta apchátegmowágko Jesús se'e:
—Sekxénamaxchekxoho ahagko' eykhe ektahak ko'o, háwe eyke eyakhémo xa sektahakxa nak sekpeywa. Hakte ekya'ásegkok ko'o m'a señamakxa axta, ekya'ásegkok nahan ma'a yakwánxa nak amhagkok. Akke kólya'ásegkok kéxegke. 15Kéltemék cha'a kéxegke kélyekpelchémo kélmók ekhawo m'a ektémakxal'a apyekpelchémo pók énxet. Matnehek eyke ko'o sekyekpelchémo xama énxet enxoho; 16ektemék agkok ko'o sekyekpelchémo énxet, nakso' nahan katnehek ma'a sektahakxa enxoho sekyekpelchémo, hakte matnehek ko'o exakko' sekyekpelchémo énxet. Táta eyke anhan atnehek sekxegexma, aptaha axta seyáphaso ko'o. 17Xeyenmék eyke segánamakxa kélagkok kéxegke ektaha ekmámnaksoho apkelxeyenma m'a apkánet énxet enxoho, cham'a ekhawo enxoho mók apkelpakmeyesma. 18Ko'o ahagko' cha'a atnésesek ekmámnaksoho m'a sektahakxa enxoho sekpeywa, nakso' nahan etnésesek sexeyenma ko'o m'a Táta, aptaha axta seyáphaso ko'o.
19Entahak axta amya'a apcháneyákpo s'e:
—¿Háxko aphakxa apyap xép?
Aptahak axta apchátegmowágko Jesús se'e:
—Mehelya'ásegkok ko'o kéxegke, megkólya'ásegkok nahan ma'a Táta; kaxtemek axta selya'áseykegkoho kéxegke, kólya'asagkohok axta m'a Táta.
20Cháxa aptahakxa axta apkeltenneykha Jesús neyseksa apkelxekmóso énxet'ák kañe' tegma appagkanamap xa, cham'a ekheykegkaxa axta cha'a yántéseksek kélxátamo axta cha'a aksok kélméso Dios. Méko axta eyke ekma Jesús, hakte axta kawokmok makham ekhem.
Megkólwanchek kólmahagkok kéxegke yakwánxa nak amhagkok
21Aptahak axta makham Jesús apkeláneya énxet'ák se'e:
—Axog sat ko'o, helchetmok sat kéxegke, wánxa agkok kóletsapok sat eyke kéxegke neyseksa kéllané megkólya'asáxma. Megkólwanchek sat kólmahagkok kéxegke m'a yakwánxa nak amhagkok ko'o.
22Aptahak axta apkelpakmeta judíos se'e:
—¿Peyk enxeykel'a yakhakpekxak xa énxet nak? La'a apxéna nak magkegwagko ólmahagkok ma'a yakwánxa nak emhagkok.
23Aptahak axta Jesús apkeláneya judíos se'e:
—Kéxegke kélteme kéleñamakxa kélagko' keso náxop, ko'o eyke sekteme señamakxa ahagko' ma'a néten; kéxegke kélteme kéleñamakxa kélagko' keso náxop, háwe eyke ko'o señamakxa ahagko' keso náxop. 24Ekeso eñamakxa seltennasa exchek kéxegke peya kóletsapok neyseksa kéllané megkólya'asáxma; hakte kélya'áseykmek agkok kéxegke sektaha ko'o m'a sektahakxa exchek seláneya kéxegke, kóletsapok sat neyseksa kéllané megkólya'asáxma.
25Keñe axta ektaha amya'a kélmaxneyeyncha'a Jesús se'e:
—¿Yaksak énxet xép?
Aptahak axta apchátegmowágko Jesús se'e:
—Chakhók alenxanmohok selpakhetcheso kéxegke. 26Xámok eykhe yakwayam altennásekxohok kéltémakxa kéxegke, xámok eykhe nahan yakwayam alsexnenak kéxegke. Ekmámnaksoho eyke aksok apxeyenma m'a aptaha axta seyáphaso ko'o, altennaksohok cha'a ko'o énxet'ák apheykha náxop ma'a seklegaya nak cha'a aptémakxa appeywa m'a aptaha axta seyáphaso ko'o.
27Axta eyke elya'ásegkok apxéna Apyap Jesús xa énxet'ák. 28Ekeso eñamakxa aptaha axta apkeláneya Jesús énxet'ák se'e:
—Kélya'ásekxek sat agkok néten kéxegke m'a ektaha nak Apketche énxet, kólya'ásegwók sat kéxegke sektaha ko'o m'a sektémakxal'a alának kéxegke, kólya'ásegwók sat nahan megkatnaha selané exakko' sektamheykha; wánxa aksa cha'a ko'o atnehek sekpeywa m'a ektémakxa nak sexekmóso ko'o Táta. 29Sekxegexma ko'o ma'a aptaha axta seyáphaso; meheyenyewek nahan exakko' Táta, hakte alának cha'a ko'o m'a ekleklamókxa nak apwáxok alána'.
30Apxámok axta énxet apteme mey'áseyam Jesús aptaha apkeltenneykha xa.
Dios Apketchek tén ma'a énxet elma nak mólya'asáxma
31Aptahak axta Jesús apkeláneya judíos ektaha axta apteme melya'áseyam se'e:
—Kélyaheykekxók agkok kéxegke sektémakxa nak cha'a sekpeywa, kóltehek sat kéxegke ekmámnaksoho seltámeséyak; 32kólya'ásegwók sat kéxegke ma'a amya'a ekmámnaksoho nak, katnésesek sat kéxegke megkólmomaxche xa amya'a ekmámnaksoho nak.
33Aptahak axta apkelátegmowágko énxet'ák se'e:
—Negko'o nenteme Abraham aptawan'ák neptámen,#Mt 3.9; Lc 3.8. mehẽltemésesók nahan negko'o nelmomaxche xama enxoho; ¿Yaksak ektaha apxéna nak xép peya hẽltemesesek mólmomaxche?
34Aptahak axta Jesús apkeláneya énxet'ák se'e:
—Apyókxoho énxet'ák apkeláneyak nak melya'asáxma, apteme elma melya'asáxma, nakso' xa sektahakxa nak sekpeywa seláneya kéxegke. 35Enxet ektaha nak apmomap, megkawegkók appaxkeykha m'a ekheykha nak wese' apxagkok, keñe m'a ektaha nak wese' apketche megkamassegwomek apha xamo' enchána. 36Aptemésesek agkok kéxegke megkólmomaxche m'a ektaha nak Dios Apketche, kóltehek sat nakso' megkólmomaxche.#Gá 5.1,13. 37Ekya'ásegkok ko'o kéltaha kéxegke Abraham aptawan'ák neptámen; wánxa agkok, kélmenyék eyke hélakhek kéxegke, hakte megkólmák ma'a sektémakxa nak cha'a sekpeywa. 38Axénhok cha'a ko'o m'a ektémakxa axta sexekmóso Táta, kólteme nahan kéxegkáxa, kóllána cha'a m'a aptahakxa enxoho apkeláneya kélyap.
39Aptahak axta énxet'ák apcháneya Jesús se'e:
—¡Abraham negko'o egyap!
Wánxa agkok, aptahak axta apchátegmowágko Jesús se'e:
—Nakso' agkok kéltaha kéxegke Abraham apketchek, kóllána m'a apkeláneya axta cha'a Abraham. 40Nakso' eykhe m'a sektémakxa nak cha'a seltennaso kéxegke ektaha axta selxekmóso ko'o Dios, akke kólhaxanmak kélmáheyo hélakhek ko'o. Axta eyke etnék Abraham xama enxoho xa ektaha nak. 41Kaxhok cha'a kéllané aksok kéxegke m'a ektémakxa nak cha'a aksok apkelané kélyap.
Aptahak axta apkelátegmowágko énxet'ák se'e:
—¡Háwe negko'o meyke egyepmeyk. Yetneyk negko'o xama Egyap, cham'a aptaha nak Dios.!
42Aptahak axta apchátegmowágko Jesús se'e:
—Nakso' agkok kéxegke kélyap ma'a Dios, helásekhohok axta ko'o kéxegke, hakte eñamak ko'o m'a Dios, keso sekwaya nak. Háwe ko'o sekwé ahagko', ekwa'ak axta ko'o aptaha seyáphaso m'a Dios. 43¿Yaksak ektaha megkólewagko nak kólya'asagkohok sektahakxa nak seltenneykha ko'o? Hakte megkólmenyék kóleyxhok sekpeywa ko'o. 44Kelyekhama' kélyap kéxegke; cha'a kéleñamak kéxegke m'a, kóllenxanmok nahan cha'a kóllának eyámenyéxa enxoho kóllának ma'a. Ekyetno ekyógkexma axta entemék kelyekhama' sekxo' agko'. Megkameykha cha'a m'a amya'a ekmámnaksoho nak, megkatnehek nahan cha'a ekmámnaksoho ekpeywa. Temék agkok cha'a ekmowána amya'a, katnehek cha'a m'a ektémakxal'a cha'a; hakte ekmowána amya'a m'a, cha'a keñamak negmowána amya'a m'a. 45Elya'ásekmek eyke kéxegke, hakte ekmámnaksoho aksok sekxeyenma ko'o. 46¿Yaksak énxet apyetna kélnepyeseksa kéxegke apmopwána exekmósek ekyetna ko'o may'asáxma? Ektemék agkok cha'a ekmámnaksoho sekpeywa, ¿yaksak ektaha selya'ásekmo nak cha'a kéxegke? 47Enxet ektahakxa enxoho Dios énxet apagkok, yeyxhok ma'a amya'a eñama nak Dios, háwe eyke kéxegke Dios énxet'ák apagkok, ékeso eñamakxa megkólmoko nak kóleyxho Dios appeywa.
Aphegkek axta Cristo meykexa Abraham
48Aptahak axta judíos apcháneya Jesús se'e:
—Payhawo' neyke agkok nentahakxa nak nempeywa nenxéna exchep aptaha apkeñama Samaria, tén han ekha apwáxok kelyekhama'.
49Aptahak axta apchátegmowágko Jesús se'e:
—Méko ko'o kelyekhama' xama enxoho, wánxa eyke sektéma seyáyo m'a Táta keñe kéxegke kéltéma meheláyo ko'o. 50Momenyék ko'o katakmelmakha sexeyenma énxet, yetneyk eyke m'a apmopmenyého nak katakmelek ko'o sexeyenma énxet, cham'a aptémol'a cha'a apyekpelchémo énxet. 51Enxet ektahakxa enxoho apkelyaheykekxoho sekpeywa megyetsepek sat. Nakso' xa sektahakxa nak seláneya kéxegke.
52Aptahak axta apkelátegmowágko judíos se'e:
—Nakso' nentemesásak kaxwo' negko'o ekyetna apwáxok xép kelyekhama'. Apketsepmeyk axta Abraham, apsawhomakpók nahan apkeletsapma m'a énxet'ák ektaha axta apkellegaso Dios appeywa, keñe exchep aptaha appeywa s'e: ‘Enxet ektahakxa enxoho apkelyaheykekxoho sekpeywa, megyetsepek sat.’ 53¿Apyeykhágweykmók enxeykel'a exchep Abraham aptaha nak egyap nano' negko'o? Apketsepmeyk axta m'a, apsawhomakpók nahan apkeletsapma m'a apyókxoho énxet'ák ektaha axta apkellegaso Dios appeywa. ¿Apkeneykeya etnahak xép meyke ekhémo?
54Aptahak axta apchátegmowágko Jesús se'e:
—Takmeláha agkok sekpeywa sekxénáxchekxoho ahagko', chakhók katakmelmakha sekpeywa. Táta eyke m'a ektakmalma nak cha'a sexeyenma ko'o, cham'a kélxeyenma nak kéxegkáxa aptaha Dios kélagkok. 55Akke kólya'ásegkok kéxegke m'a Dios, ko'o eyke ekya'ásegko', ekxénchek agkok ko'o may'ásegko m'a Dios, sekmowána amya'a atnehek, ekhawo kéltémakxa nak kéxegke; nakso' eyke ko'o sekya'ásegkoho m'a Dios, elyaheykekxók nahan ma'a appeywa. 56Payhekxeyk axta apwáxok Abraham kélyap nano' kéxegke hakte peyk axta etagkohok yakwánxa katnehek sekwé ko'o keso náxop; apwet'ak axta, awanhek axta anhan ekpayheykekxa apwáxok.
57Aptahak axta énxet'ák judíos apcháneya Jesús se'e:
—Apxénchek nak xép apwetaya Abraham, mewokmok makham xép cincuenta apyeyam apagkok.
58Aptahak axta apchátegmowágko Jesús se'e:
—Ekhegkek#Ex 3.14; Jn 8.24; 10.30-33; 13.19. axta ko'o meykexa Abraham. Nakso' xa sektahakxa nak seláneya kéxegke.
59Keñe axta apkelma meteymog peya elyetnak Jesús xa énxet'ák nak; wánxa agkok apxeganakmek axta eyke aksa Jesús nepyeseksa xa énxet'ák nak, aptekkek axta kañe' tegma appagkanamap.
Currently Selected:
SAN JUAN 8: LEGN
Highlight
Share
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
