SAN JUAN 7

Apkelyáxeg apagko' apkelya'áseyam Jesús

1Apweynchámeyha axta Jesús yókxexma Galilea natámen xa. Axta emokók exek ma'a Judea, hakte énxet'ák judíos axta apketámak apmoko yakhek ma'a. 2Chágketwokmek axta ekhem apkelpakxeneykegkaxa#Lv 23.34; Dt 16.13. axta cha'a judíos aksok áwa' melwagkayam apkeltémakxa axta cha'a apyepmeyk nano'. 3Aptahak axta apcháneya apkelyáxeg Jesús se'e:

—Ney exnekxa aksa s'e. Emyekxa' sat makham ma'a Judea, yakwayam enxoho étak aksok apkelané exchep ma'a apkeltámeséyak apheykha nak ma'a. 4Apmenyék agkok etnehek énxet kélyekpelchémo, méxakpók elának aksok. Elának nahan nápakta'awo' énxet'ák xa aksok apkelana nak, hakte apkelanak xép xa ektéma nak.

5Wokmók axta anhan apkelyáxeg apya'áseyam Jesús. 6Aptahak axta apkeláneya Jesús se'e:

—Megkawokmok makham ekhem yakwánxa amyekxak ko'o m'a kaxnók kéxegke, kélwanchek kólmeyekxak ekhem kélmokókxa enxoho kólmeyekxak. 7Mopwanchek etaknók kéxegke énxet'ák apkeleñamakxa apagko' nak keso náxop; hetaknawhok eyke ko'o, hakte tásek ko'o sekxekmóso eyesagko m'a aksok apkeláneyak nak. 8Kólmohok kéxegke m'a apchaknákxexa nak énxet, maxñehek sat ko'o, hakte megkawokmok makham ekhem yakwánxa amyekxa'.

9Aphákxeyk axta Jesús Galilea natámen apteme appeywa xa.

Jesús apmaheyak ekhem melwagkayam axta judíos apkeltémakxa apyepmeyk nano'

10Xama axta apkelwegkepa apkelyáxeg, keñe axta anhan apmahágko Jesús ma'a apchaknákxexa axta énxet'ák, apyexákpók axta eyke, axta exekmowáseykpohok énxet'ák. 11Apketamchek axta eyke énxet'ák judíos Jesús ma'a apchaknákxexa axta énxet. Aptahak axta cha'a apkelpakmeta s'e:

—¿Háxko kexaha apmahágkaxa m'a énxet nak?

12Apxénákpek axta cha'a Jesús nepyeseksa énxet'ák. Nápakha énxet axta cha'a aptahak apxéna Jesús se'e: “Méko aptémakxa m'a énxet nak”; keñe axta nápakha énxet'ák aptaha cha'a apxéna Jesús se'e: “Sagkek aptémakxa m'a énxet nak. Apkelyexancháseykha cha'a énxet'ák.”

13Apkelyexákpók axta eyke cha'a énxet'ák apxéna Jesús, hakte judíos axta apcheykpok.

14Aptaxnegwokmek axta Jesús tegma appagkanamap neyseksa apchakneykekxa énxet. Apkelxekmósek axta énxet'ák ma'a. 15Aptahak axta apkelpakmeta judíos ekpelakkasa apkelleg'a ektahakxa apkelxekmóso Jesús se'e:

—¿Háxko ektahakxa apya'ásegkoho nak ekyókxoho aksok meykexho kélxekmóso xa?

16Aptahak axta apchátegmowágko Jesús se'e:

—Háwe selxekmóso ahagko' ko'o s'e ektémakxa nak selxekmóso, cha'a keñamak ma'a aptaha axta seyáphaso ko'o. 17Apmokók agkok elának xama énxet Dios apmopmenyého, apwanchek ékpelkohok ektaha eñama Dios se'e ektémakxa nak selxekmóso, tén han ékpelkohok ma'a sektaha enxoho selxekmóso ahagko'. 18Enxet ektahakxa enxoho apkeltenneykha m'a ektahakxa enxoho elchetamso apwáxok, eltennaha cha'a yakwayam enxoho katakmelek apxeyenma énxet; keñe m'a énxet apkeltémo nak katakmelek apxénamap ma'a ektaha axta apcháphaso, ekmámnaksoho cha'a katnehek apkeltenneykha xa, méko nahan katnehek xama aksok kélxéncháseykekxoho aptémakxa.

19“¿Háweya axta Moisés ma'a apmésama axta kéxegke segánamakxa? Akke kólyaheykekxohok kéxegke kélxama enxoho xa segánamakxa nak. ¿Yaksak ektaha kélmoko nak hélakhek ko'o?

20Aptahak axta apkelátegmowágko énxet'ák se'e:

—¿Yaksak ekmoko kakhek xép? ¡Kelyekhama' taxnak apwáxok xép!

21Aptahak axta apkeláneya Jesús se'e:

—Kélyókxoho axta pelakkásak kélwet'a kéxegke m'a xama aksok selana axta ekhem nellókasamakxa nelyampé. 22Apkeltémok axta cha'a Moisés kóllának kéxegke kélkahaso kélyenyekhamol'a egyempehek,#Lv 12.3. háwe eykhe Moisés aptekkeso xa sẽlkahaso kélyenyekhamol'a egyempehek, kélyepmeyk nano' axta eyke ektaha aptekkeso xa.#Gn 17.10. Kólyenyekháseshok cha'a kéxegke apyempehek xama sakcha'a kólkahaksek, megkóleyxek ma'a ekhem nellókasamakxal'a nelyampé. 23Megkóleyxek cha'a kéxegke ekhem nellókasamakxa nelyampé kólyenyekhásesek apyempehek sakcha'a kélkahasa enxoho, yakwayam enxoho kólsawhohok kóllának ma'a eltémókxa nak antehek Moisés segánamakxa apagkok. ¿Yaksak ektaha séltaknawe nak kélwet'a sektakmelchesakmo#Jn 5.9. énxet apháxamap ekhem nellókasamakxa nelyampé? 24Nágkólteme aksa kélyekpelchémo kéxegke m'a aksok kéláneyakxa enxoho katnék. Kéltemék agkok cha'a kélyekpelchémo, kóltakmelcheshok cha'a kélteme kélyekpelchémo.

Jesús apxeyenma apkeñamakxa

25Nápakha énxet'ák apkeleñama Jerusalén axta aptahak aptegyeyncha'a amya'a s'e:

—¿Háweya énxet apketagkakpo nak yakwayam kólakhek xa? 26Cháxa, méxakpoho apkeltennasa énxet'ák. Méko nahan eyátegmowágko. ¿Enxeykel'a ey'ásekmok kelwese'e egagkok aptaha nakso' Mesías xa énxet nak? 27Negya'ásegkok eyke negko'o apkeñamakxa xa énxet nak. Apxegakmek sat agkok Mesías méko sat kay'asagkohok apkeñamakxa.

28Xama axta apleg'a Jesús xa, aptahak axta apyennaktésawo appeywa neyseksa apkelxekmóso énxet'ák kañe' tegma appagkanamap se'e:

—Elyekpelchawók neyke kéxegke, kélya'ásegkok neyke anhan señamakxa. Háwe axta ko'o sekxegayam ahagko', ekxegakmek axta ko'o aptaha seyáphaso m'a ekpayhawo nak kóltehek kéláyo, cham'a megkólya'ásegko nak kéxegke. 29Ko'o eyke ekya'ásegkok, hakte eñamak ko'o m'a, axta anhan seyáphaso m'a.

30Keñe axta peya eykhe emakpok Jesús, méko axta eyke ekpaknegwokmoho, hakte axta kawokmok makham ekhem apagkok. 31Apxámok axta énxet apteme mey'áseyam Jesús. Aptahak axta nahan cha'a apkelpakmeta s'e:

—¿Xámok enxoho sat eykel'a katnehek apkelané Mesías aksok sempelakkaso agweta' apwa'a enxoho, megkaxók sat kexaha ekwánxa nak apkelané xa énxet nak?

Enxet'ák fariseos apkelenxányam emok Jesús

32Apkelleg'ak axta amya'a fariseos ektahakxa apkelpeywa énxet'ák apxéna Jesús, apkeláphásek axta sẽlpextétamo apkeleñama tegma appagkanamap xa énxet'ák fariseos tén han ma'a apkelámha apmonye'e apkelmaxnéseso apnámokkok, yakwayam enxoho emok Jesús. 33Keñe axta aptaha Jesús apkeláneya énxet'ák se'e:

—Yakwatakxoho sat axek ko'o kélnepyseksa kéxegke, keñe sat amyekxak makham ma'a aphakxa nak ektaha axta seyáphaso. 34Hélchetmok sat kéxegke, mehelwetekxeyk sat eyke, hakte megkólwanchek sat kólmahagkok ma'a yakwánxa nak axek ko'o.

35Keñe axta aptaha apkelpakhetcháseykpoho énxet'ák judíos se'e:

—¿Háxko apmokókxa emhagkok apxéna nak magwanchek agwetekxa'? ¿Enxeykel'a peyk emhagkok ma'a apheykegkaxa nak judíos apkekhegwayam nak mók nekha, yakwayam enxoho elxekmósek énxet'ák melya'áseyak nak Dios? 36¿Yaksak kexaha apxéna aptaha exchek segáneya s'e: ‘Hélchetmok sat kéxegke, mehelwetekxeyk sat eyke, hakte megkólwanchek sat kólmahagkok ma'a yakwánxa nak axek ko'o’?

Yegmen segmésamo nak ekyennakte egnenyek

37Wokmek axta ekhem apchayókxa apagko' axta énxet'ák judíos, ektemegwánxa néxa apchakneykekxexa axta m'a.#Lv 23.36; Nm 29.35. Apkempákxeyk axta néten Jesús ekwokmo xa ekhem nak. Aptahak axta apyennaktésawo appeywa s'e:

—Hem sat agkok enchakhak énxet, hey'óta ko'o, agkések sat ko'o yegmen yakwayam ének.#Jn 4.10-14. 38Ekhawo ektémakxa nak eknaktáxésamaxche s'e, katyapok sat yegmen ekyennaktésamo egnenyek apwáxok énxet apteme enxoho mehey'áseyam ko'o.#Ez 47.1; Zac 14.8.

39Axta apxénak Jesús ma'a énxet ektahakxa enxoho apteme mey'áseyam peya exkak Espíritu, hakte axta eweyk makham Espíritu. Axta anhan kóltemésesók apcheymákpoho Jesús ma'a.

Apkexpanchásamap énxet'ák

40Xama axta apkelleg'a aptahakxa appeywa Jesús nápakha énxet'ák, aptahak axta apkelpakmeta s'e:

—Nakso' nak aptaha Dios appeywa aplegaso xa énxet nak.

41Keñe axta nápakha énxet aptaha apkelpeywa s'e:

—Cháxa Mesías xa.

Keñe axta nápakha énxet aptaha apkelpakmeta s'e:

—Háwe, mopwanchek eyke yenyék Galilea Mesías. 42Xeyenmék eknaktáxésamaxche peya etnehek Mesías David aptáwen neptámen,#2 S 7.12-13; Sal 89.3-4; 132.11-12. tén han peya yenyék ma'a nátegma Belén,#Mi 5.2. cham'a apkeñamakxa axta anhan David.

43Keñe axta apkexpáncháseykpo énxet, Jesús axta ñokxa apxénákpo. 44Nápakha énxet axta apmoko exnésók Jesús ma'a sẽlpextétamakxa, méko axta eyke ekhésakmo.

Kelwese'e apya'áseyam Jesús

45Apkeltakháwók axta makham sẽlpextétamo aptakmelcheso tegma appagkanamap apkelmeyákxo m'a aphágkaxa axta fariseos, tén han ma'a aphágkaxa axta apkelámha apmonye'e nak apkelmaxnéseso Dios énxet'ák apagkok. Entahak axta amya'a kélmaxneyeyncha'a sẽlpextétamo s'e:

—¿Yaksak ektaha mekólyentamanto nak?

46Aptahak axta apkelátegmowágko sẽlpextétamo s'e:

—Méko xama énxet ekhawo apkeltenneykha ektahakxa nak apkeltenneykha m'a énxet nak.

47Aptahak axta fariseos apkeláneya sẽlpextétamo s'e:

—¿Kél'awoya apkelyexanchásencha'a kéxegkáxa m'a énxet nak? 48¿Enxeykel'a anhan elya'ásekmok Jesús ma'a apkelámha apmonye'e egagkok nak, tén han ma'a fariseos? 49Dios sat emasesók xa énxet'ák nak, hakte melya'ásegkok ektémakxa nak segánamakxa.

50Appakmetchek axta xama fariseo apwesey axta Nicodemo, cham'a apya'áyekmo nak Jesús.#Jn 3.1-2. Aptahak axta apkeláneya énxet'ák se'e:

51—Magwanchek negko'o agának emakpok énxet manleg'a enxoho sekxo' aptahakxa appeywa ekhawo m'a eltémókxa nak antehek segánamakxa egagkok, yakwayam enxoho kólya'asagkohok ektémakxa aksok apkelané.

52Aptahak axta apkelátegmowágko énxet'ák se'e:

—¿Xépya nahan apkeñama Galilea? Eltámesap ektémakxa nak eknaktáxésamaxche, ékpelchágwók sat xép metyapma Dios appeywa aplegaso apkeñama m'a Galilea. 53Keñe axta apkelmeyákxo apxanák xa énxet'ák nak.

Currently Selected:

SAN JUAN 7: LEGN

Highlight

Copy