SAN JUAN 6

Jesús apkelmeyáseyak aptéyak cinco mil énxet

(Mt 14.13-21; Mr 6.30-44; Lc 9.10-17)

1Apmeyákxeyk axta Jesús neyp wátsam ekpayhegwayam ekwesey nak Galilea cham'a kéltémakxa nak han Tiberias, natámen xa. 2Apxámok axta énxet apyetleykekxa Jesús ma'a, hakte apkelwet'ak axta apkelana aksok sempelakkaso nak agweta', cham'a apkeltakmelchesekmo axta apkelháxamap. 3Keñe axta apchánta Jesús néten egkexe, aphakmek axta yetlo apkeltámeséyak ma'a. 4Chágketwokmek axta ekhem melwagkayam axta énxet'ák judíos, keltéma axta Pascua. 5Xama axta apkenmexo Jesús, apwet'ak axta apxáma énxet apyetlo. Aptahak axta Jesús apcháneya Felipe s'e:

—¿Háxko sat antegyásók aptéyak xa énxet apxámokma nak?

6Apkeltamhok axta ey'asagkohok Jesús ektahakxa apchátegmoweyak Felipe aptaha apcháneya xa, hakte apya'ásegkok axta Jesús yakwánxa etnésesek xa énxet apxámokma nak. 7Aptahak axta apchátegmowágko Felipe s'e:

—Megkawakxók nahan doscientos ekhem nak nentamheykha antegyek nento, yakwayam enxoho kawakxohok cha'a ketsék pók xa apyókxoho nak.

8Keñe axta aptaha anhan apcháneya Andrés Jesús se'e, cham'a Andrés aptaha axta anhan Jesús apkeltámeséyak, Simón Pedro axta anhan apyáxeg xa:

9—Yetneyk xama sakcha'a apyetna nak cinco pan se'e, tén han ánet kelasma, megkawakxók eyke apyókxoho énxet xa.

10Aptahak axta apchátegmowágko Jesús se'e:

—Kólána hana exmakha apyókxoho xa énxet'ák nak. Xámok axta anhan pa'at ma'a, apháha axta anhan xa énxet'ák nak. Cinco mil axta apyókxoho. 11Apkelmeyk axta Jesús pan, keñe axta apmésa ekxeyenma apwáxok Dios, apkelmeyásegkek axta anhan énxet'ák ektaha axta apheykha m'a. Hawók axta anhan aptemésesakxa kelasma, apkelmeyásegkek axta ekwánxa enxoho apmopmenyého. 12Xama axta apkelyakkanakmo énxet'ák, aptahak axta apkeláneya Jesús apkeltámeséyak se'e:

—Kólmekxa pan nápakha'a apketkók apkeleymomap nak, yakwayam enxoho megkóltawasha xama enxoho.

13Apyekhakxeyk axta Jesús apkeltámeséyak xa pan nápakha'a nak, doce axta wokmok elláneykegkoho aksok kélxata, cham'a cinco pan axta sekxo'. 14Xama axta apkelwet'a énxet'ák aksok sempelakkaso agweta' apkelané Jesús, aptahak axta apkelpakmeta s'e:

—Neykexa nakso' Dios appeywa aplegaso apxénamakpo nak ewa' náxop xa.

15Apyekpelchék axta Jesús peya emakpok yakwayam kóltemésesek wese' apwányam, keñe axta apxegákxo makham apkenátweykxo m'a néten egkexe yakwayam exnók apxakko' ma'a.

Jesús apxega néten yegmen

(Mt 14.22-27; Mr 6.45-52)

16Xama axta ekyaktésa apkelmeyákxeyk axta Jesús apkeltámeséyak ma'a wátsam ekpayhegwayam, 17apkelchenátwekxeyk axta yántakpayhe apkelmeyákxo neyp wátsam ekpayhegwayam yakwayam elwakxak ma'a Capernaum. Yáktések axta exma, axta eyke ewákxak makham Jesús aphágkaxa. 18Keñe axta ektepa exchahayam ekyennakte agko' neyseksa wátsam ekpayhegwayam, elyawa axta entahak elyakyahayam. 19Xama axta ekwokmo cinco kilómetros apkelxega, seis kilómetros esenhan, apwet'ak axta apxegakmo Jesús néten yegmen apya'awa m'a yántakpayhe. Apkelakak axta anhan apkeltámeséyak. 20Aptahak axta apkeláneya Jesús apkeltámeséyak se'e:

—Náhelé', ko'o neykhe s'e.

21Apmokók axta eykhe yenátchesek yántakpayhe apkeltámeséyak, ñohok axta eyke ekwákxo neyáwa apkelchánte, cham'a apkelmeyákxexa axta.

Enxet'ák apketamso Jesús

22Mók hem axta entahak apkelya'ásegwokmo énxet'ák apheykekxa axta neyáwa apkelchánta Jesús apkeltámeséyak ma'a yántakpayhe ekyetna axta xama agko' ma'a, tén han apkelya'ásegwokmo metnaha apkelxegexma'a Jesús ma'a apkeltámeséyak. 23Keñe axta anhan elwákxo yántakpayhe keto' ma'a aptókakpexa axta pan natámen apméso ekxeyenma apwáxok Dios ma'a Wese' egegkok. Axta keleñamak ma'a tegma apwányam Tiberias. 24Xama axta apwet'a énxet'ák méko Jesús ma'a, tén han méko m'a apkeltámeséyak, apkelchánteyk axta xama yántakpayhe apkelmeyákxo nahan ma'a tegma apwányam Capernaum yakwayam ektamok Jesús.

Jesús apteme pan apyennaktésamo egnenyek

25Xama axta apkelwákxo neyáwa xa énxet'ák nak apwetágweykxeyk axta Jesús ma'a. Aptahak axta apkelmaxneyeyncha'a énxet'ák Jesús se'e:

—Sẽlxekmóso, ¿Yaksak axta ekhem apwakto s'e?

26Aptahak axta apkeláneya Jesús se'e:

—Elchetamchek kéxegke, hakte kéltokagkek axta ekwokmoho kélyakkanakmo, háwe eñama kélya'áseyak ektémakxa m'a aksok sempelakkaso agweta' selana axta ko'o. Nakso' xa sektahakxa nak seláneya kéxegke. 27Nágkóltemeykha aksa yakwayam kóltegyek ma'a nento eksawhomáxkohol'a, akke tásek kóltemeykha yakwayam kóltegyek ma'a nento ekyennaktésamo nak egnenyek ektaha nak han megkamassegwayam. Cháxa nento peya nak egkések kéxegke ektaha nak Apketche énxet xa, hakte apkelkahásek axta Dios Egyap xa.

28Aptahak axta énxet'ák apkelmaxneyeyncha'a Jesús se'e:

—¿Háxko antehek antemeykha yakwayam anlának ma'a apkeltémókxa nak anlának Dios?

29Aptahak axta apchátegmowágko Jesús se'e:

—Cha'a apmenyék kóltehek kéxegke megkólya'áseyam Dios ma'a ektaha axta apcháphaso.

30Aptahak axta énxet'ák apkelmaxneyeyncha'a Jesús se'e:

—¿Yaksak aksok sempelakkaso agweta' apwanchek henxekmósek xép, yakwayam enxoho magya'asók negko'o negwet'a enxoho? ¿Háxko ektémakxa aptamheykha exchep? 31Apteykegkek axta ẽlyepmeyk nano' maná m'a yókxexma meykexa énxet,#Ex 16.4,15. ekhawo ektémakxa nak eknaktáxésamaxche s'e: ‘Apmések axta Dios nento eñama néten yakwayam etawagkok xa énxet'ák nak.’#Sal 78.24.

32Aptahak axta apchátegmowágko Jesús se'e:

—Háwe axta Moisés apméso kéxegke nento eñama néten, Táta axta eyke aptaha apméso kéxegke m'a nento ektaha nak ekmámnaksoho eñama néten. Nakso' xa sektahakxa nak seláneya kéxegke. 33Cha'a pan segmésamol'a cha'a Dios ma'a apwéweykento axta apkeñama néten, egkéshok nahan cha'a elyennakte apnenya'ák énxet apheykha nak keso náxop.

34Aptahak axta énxet'ák apkelmaxneya Jesús se'e:

—Wese' hegmes cha'a negko'o xa pan apxéna nak.

35Aptahak axta apkeláneya Jesús se'e:

—Ko'o sekteme pan apyennaktésamo nak apnenyek énxet, kéxegke ektahakxa enxoho sey'eykekta' ko'o, megkakhekxék sat cha'a meyk, keñe m'a ektahakxa enxoho mehey'áseyam ko'o, megkakhekxék sat cha'a ekhem. 36Ektemék xeyk seláneya kéxegke, elwet'awók eykhe, elya'ásekmek eyke. 37Apyókxoho énxet ektaha nak segkéso ko'o Táta hey'ótak cha'a ko'o, matakheksók sat nahan ko'o m'a énxet ektahakxa enxoho sey'eykekta'. 38Háwe axta ko'o yakwayam alánegwak aksok sekmámenyého ahagko' sekwaya señama m'a néten, wánxa aksa yakwayam alának ma'a ektémakxa nak apmopmenyého Táta aptaha axta seyáphaso ko'o. 39Mopmenyék ko'o axñánegkesek xama énxet ektaha axta segkéso m'a aptaha axta seyáphaso, wánxa aksa apkepmenyého axátekhásók ma'a ekwokmo sat néxa ekhem. 40Apmenyék ko'o Táta keytek ekyennakte apnenya'ák megkatnegwayam enéxa m'a apyókxoho énxet ektaha nak apkelanyo Dios Apketche, cham'a apteme nak han mey'áseyam, ko'o sat nahan anakxétekhasók ma'a ektemegwokmo sat néxa ekhem.

41Ekeso eñamakxa apyennegkesa axta exma judíos megkalcha apwáxók ma'a aptahakxa axta appeywa Jesús, axta ñokxa aptaha appeywa Jesús se'e: “Ko'o sekteme pan apwéweykenta apkeñama néten.” 42Aptahak axta anhan apkelpakmeta s'e:

—¿Háweya Jesús José apketchel'a xa? Negya'ásegkok negko'o m'a apyap, negya'ásegkok nahan ma'a egken. ¿Yaksak ektaha apxéna nak apwéweykento apkeñama néten?

43Aptahak axta Jesús apchátegmowágko s'e:

—Kólwates kélpakméteykha aksa. 44Méko kawának hey'ótak ko'o mehentegkásento enxoho m'a Táta aptaha axta seyáphaso ko'o; axátekhásók sat ko'o ektemegwokmo sat néxa ekhem. 45Temék ekxeyenma Dios appeywa apkellegaso weykcha'áhak apagkok se'e: ‘Dios sat elxekmósek apyókxoho énxet'ák.’#Is 54.13. Apyókxoho énxet ektaha nak apháxenmo appeywa Táta, cham'a eltámeye nak eñama Táta, hey'ótak cha'a ko'o.

46“Méko xama énxet apwetaya Dios xama enxoho; wánxa apwetaya m'a aptaha axta apkeñama Dios. 47Enxet apteme nak mey'áseyam, yetneyk ekyennakte apnenyek. Nakso' xa sektahakxa nak sekpeywa seláneya kéxegke. 48Ko'o sekteme pan apyennaktésamo nak egnenyek. 49Apteykegkek axta maná kélyepmeyk nano' kéxegke m'a yókxexma meykexa énxet, wánxa agkok, axta eyke kahaxanmak apkeletsapma; 50akke ko'o ekxénak ma'a pan apwéweykenta nak apkeñama néten; kéxegke ektahakxa enxoho kélto xa pan nak megkóletsepek sat. 51Ko'o sekteme xa pan memassegwayam nak apwéweykento axta apkeñama néten; énxet ektahakxa enxoho apto xa pan nak megyetsepek sat. Sekyókxoho ahagko' ko'o m'a pan peya nak agkések kéxegke, yakwayam enxoho egkések elyennakte apnenya'ák apyókxoho énxet'ák apheykha nak keso náxop.

52Apkelpakhetcháseykpok axta énxet'ák judíos. Aptahak axta apkelpakmeta s'e:

—¿Háxko katnehek hegmések aphápetek yakwayam antók?

53Aptahak axta apkeláneya Jesús se'e:

—Agkok koltáwak kéxegke aphápetek ma'a ektaha nak Apketche énxet tén han megkólyena enxoho éma apagkok, méko sat katnehek ekyennakte kélnenya'ák kéxegke. Nakso' xa sektahakxa nak sekpeywa seláneya kéxegke. 54Enxet ektahakxa enxoho apto ahápetek ko'o, tén han ektahakxa enxoho apya éma ahagkok, cháxa ekyetna ekyennakte apnenyek megkatnegwayam enéxa xa; axátekhásók sat nahan ma'a ektemegwokmo sat néxa ekhem. 55Nakso' ekteme nento m'a ahápetek nak ko'o, nakso' nahan ekteme negya m'a éma ahagkok nak ko'o. 56Enxet ektahakxa enxoho apto ahápetek ko'o, tén han ektahakxa enxoho apya éma ahagkok ko'o, hépetkohok sat cha'a ko'o, eypetkohok sat nahan cha'a ko'o xa. 57Yetneyk ekyennakte egnenyek ma'a Táta aptaha axta seyáphaso ko'o, Táta anhan keñamak ekyennaktama egkenyek ko'o; ekhawo nahan ektémakxa énxet ektahakxa enxoho apto ahápetek ko'o, étak sat ekyennakte apnenyek eñama ko'o. 58Ekxénak ko'o m'a pan apwéweykento axta apkeñama néten. Mexnawok ma'a maná apteykegko axta kélyepmeyk nano' kéxegke xa pan nak, cham'a maná megkahaxanma axta aptéyak apkeletsapma; kéxegke ektahakxa enxoho kélto xa pan nak, megkatnegwomek sat néxa ekyennakte kélnenyek.

59Cháxa apkelxekmósa axta Jesús apchakneykekxexa énxet'ák judíos tegma apwányam Capernaum xa.

Amya'a segmésamo ekyennakte egnenyek megkatnegwayam enéxa

60Xama axta apkelleg'a ektahakxa apkelxekmóso Jesús, apyókxoho énxet ektaha axta apkelyetlo aptahak axta apkelpakmeta s'e:

—Magwanchek agmok takha' xa aptahakxa nak appeywa; ¿yaksak awanchek kalyahakxohok xa aptahakxa nak appeywa?

61Apyekpelchágwokmek axta Jesús apkelpakmétencha'a énxet'ák judíos megkalcha apwáxók ma'a aptahakxa axta appeywa. Aptahak axta Jesús apkelmaxneyeyncha'a s'e:

—¿Yagkalchak kélwáxok kéxegke kélleg'a sektahakxa nak sekpeywa? 62¿Háxko katnehek kélwet'a enxoho makham emyekxak ektaha nak Apketche énxet ma'a apkeñemékxa axta? 63Espíritu apteme segméso ekyennakte egnenyek. Mékoho eyke katnehek axakko' enxoho negyókxa. Espíritu m'a seltennasa exchek kéxegke tén han ma'a ekyennakte egnenyek nak. 64Apyetneyk eyke makham kélnepyeseksa kéxegke apteme nak apya'áseyam xa.

Nano' axta apya'áseykegkoho Jesús ma'a énxet'ák ektaha axta apkelya'áseyam, nano' axta anhan apya'áseyak ma'a énxet apmáheyo axta etlakkasesek yának emakpok Jesús. 65Aptahak axta makham appeywa Jesús se'e:

—Ekeso eñamakxa sektaha axta seláneya kéxegke, mopwanchek hey'ótak ko'o énxet mehentegkásento enxoho Táta.

66Cháxa eyeynókxa axta apkelwáteseyak apkelyetlo Jesús nápakha énxet'ák xa, massék axta apkelyetloncha'a Jesús. 67Aptahak axta Jesús apkelmaxneyeyncha'a doce apkeltámeséyak se'e:

—¿Kéxegkeya nahan kélmoko kólxog?

68Aptahak axta apchátegmowágko Simón Pedro s'e:

—Wese', ¿yaksak agya'ammok negko'o? Xép appeywa ekteme amya'a ekyennaktésamo egnenyek megkatnegwayam enéxa. 69Magya'ásekmok negko'o exchep appeywa. Negya'ásegkok nahan negko'o aptaha exchep Dios Appagkanma.#Mt 16.16; Mr 8.29; Lc 9.20.

70Aptahak axta apchátegmowágko Jesús se'e:

ko'o axta selyéseykha kéxegke xa doce nak. Wánxa agkok, kelyekhama' eyke kélxama kéxegke.

71Judas axta apxénak Jesús aptaha appeywa xa, cham'a Simón Iscariote apketche, hakte Judas axta m'a peya axta etlakkasesek yának emakpok Jesús, aptaha axta eykhe apkeñama nepyeseksa doce Jesús apkeltámeséyak.

Currently Selected:

SAN JUAN 6: LEGN

Highlight

Copy