Luuka 10

ɄYɨɨsʉ isuungʼa avakongi isitsigo lekelakʉpamato na vavɨlɨ

1Kʉmbele, ʉNtwa ʉYɨɨsʉ akavahala avakongi avange isitsigo lekelakʉpamato na vavɨlɨ (72). Avo akavasuungʼa vavɨlɨ vavɨlɨ mu vʉtsenge na mu vʉtsenge ni mbasu tsyoni ʉkwʉ aasumbilwe ʉkʉlʉta ʉmwene, pakʉta valongole. 2Akavavʉʉla akata, “Isiinu mu kɨlɨmɨla simotiike, napeene avanya kʉbena vadebe. Pwʉ lɨno munʼdoove ʉmwenembene, asuungʼe avaanu avange va kʉbena mu kɨlɨmɨla kya mwene. 3Lɨno mulʉtage, mwɨlolelage, ndikʉvasuungʼa ndi syana sya ngʼolo isyʉ sigenda pagatinagati pa ngʼekeeva. 4Mwɨlekelwe ʉkʉgega indalama, pange ʉnsuku, pange isilaatu sya kwandʉlania. Wʉ musaamusa avaanu mu nzɨla, musaamusaage kʉnʉ mwilola ʉnsɨkɨ. 5Ikange, wʉ mukwingila mu nyumba jya muunu, mutengʉlage ʉkʉnsaamusa muteetsage, ‘ɄNgʉlʉve avape ʉlʉnotsehetso mu nyumba ʉmʉ.’ 6Angave ʉmwenenyumba ikʉvʉʉpɨlɨla kʉ lʉnotsehetso, apo ɨnyumba ɨjyo jʉjiiva nʉ lʉnotsehetso. Apeene, angave ʉmwenenyumba nikʉvʉʉpɨlɨla kʉ lʉnotsehetso, apo ʉlʉnotsehetso lusigala nʉʉnyie. 7Mwɨlekelwe ʉkʉhamahaama. Apeene, ɨnyumba ɨjyʉ vikʉvʉʉpɨlɨla, mutaamage muumwa nʉ kʉlya ɨkyakʉlya ɨkyʉ vikʉvapa, ʉlwakʉva ʉmbombi anogye ʉkʉtangɨlwa syoni isyʉ ilonda ʉkʉva nasyo. 8Mungiingile mu vʉtsenge vʉninie, na venevʉtsenge vangavʉʉpɨlɨle nʉ lʉhekelo, mulitsage ɨkyakʉlya ɨkɨveetsaga ɨkyʉ vikʉvapa. 9Avatamu ʉwʉ mwʉvale mu vʉtsenge ʉwa, muvaponiage. Muvavʉʉlage muteetsage, ‘ɄLʉdeeva lwa Ngʉlʉve lʉhegelye kwanyie.’ 10Napeene, mungiingile mu vʉtsenge, vangabeele ʉkʉvʉʉpɨlɨla, wʉ mulʉtɨngʼania mu nzɨla tsa veene, muteetsage, 11‘Nalwene ʉlʉsumbe lwa vʉtsenge wiinyo ʉlʉlɨ mu silʉnde siitu, tukungʼuuna pakʉta kɨve kɨmanyilo kwanyie ʉkʉta ʉNgʉlʉve alavahɨga. Ikange, mulʉmanye ʉkʉta ʉLʉdeeva lwa Ngʉlʉve lʉhegelye kwanyie!’ 12Ndikʉvavʉʉla ʉkʉta ɨkɨgono kya vʉhɨgi, avaanu va vʉtsenge ʉwa valaava nʉ vʉkʉvɨlwa ʉvʉvaha, ʉkʉlʉtɨɨlɨla ʉvʉkʉvɨlwa wa vaanu va kʉ Sodoma!”#10:12 Sodoma ɄNgʉlʉve aahɨgile avaanu va vʉtsenge ʉwa kʉ nongwa jya mbiivi tsa veene (Vʉtengʉlɨlo 19:24-29).

ɄYɨɨsʉ ikʉvatanila avaanu va vʉtsenge vʉdatu avaabeelile ʉkʉmwɨdɨka

(Mataayo 11:20-24)

13“Muswe vʉvʉle ʉnyie nyɨ vaanu va vʉtsenge wa Kolazini, nʉʉnyie nyɨ va vʉtsenge wa Betisaida ʉlwakʉva isidego isyʉ ndɨvombile kwanyie, syale sive sivombiike mu vʉtsenge wa kʉ Tilo nʉ wa kʉ Sidoni,#10:13 Kolazini na Betisaida waale vʉtsenge wa Vayahudi. Avaanu va vʉtsenge ʉvʉ vʉvɨlɨ vɨɨvonaga ʉkʉta vavalatse ʉkʉlʉtɨɨlɨla avaanu va vʉtsenge ʉvʉnge ndʉ wa Tilo nʉ wa Sidoni. Vɨɨvonaga ewo pakʉva aveene vaale Vayahudi, ikange vaahalilwe nʉ Ngʉlʉve vave vaanu va mwene. avaanu va mu vʉtsenge ʉwa vaale viweesa ʉkʉpela imbiivi. Vaale viweesa ʉkʉvonia ʉkʉpela imbiivi tsa veene kʉ nzɨla jya kʉswala amagunila nʉ kwɨbaka ɨlyela. 14Lɨno, pa kɨgono kya vʉhɨgi, ʉvʉpala waanyie vʉlaava vʉvaha, ʉkʉlʉtɨɨlɨla kʉ vaanu va kʉ Tilo na va kʉ Sidoni! 15Najyʉnyie nyɨ vaanu va mu Kapelenaumu, mukɨvona ʉkʉta mulasika kʉkyanya kwa Ngʉlʉve! Baako, najɨlaave ewo! Apeene mulataagwa kʉ vʉswe.”

16Pwʉ ʉYɨɨsʉ akavavʉʉla avakongi va mwene valya akata, “Ʉmuunu ʉvɨ ikʉvapʉlɨka ʉnyie, jiiva ikʉmmʉlɨka ʉne, nʉ vɨ ikʉvabeela ʉnyie, jiiva ikʉmbeela ʉne. Ikange ʉvɨ ikʉmbeela ʉne, jiiva ikʉmʼbeela ʉDaada ʉvɨ ansuungʼile ʉne.”

Avakongi isitsigo lekelakʉpamato na vavɨlɨ vivuja nʉ lʉhekelo

17Kʉmbele, avakongi va Yɨɨsʉ isitsigo lekelakʉpamato na vavɨlɨ (72)#10:17 Isitsigo lekelakʉpamato na vavɨlɨ Mu sitabu isinge sya katale sya Vʉvɨge ʉVʉvalatse jɨvɨgilwe isitsigo lekelakʉpamato (70). vakakilivuka vahowiike. Vakambʉʉla ʉYɨɨsʉ vakata, “Gwe Ntwa viitu, natsyene imepo imbiivi wʉ tukʉtsiswɨma kʉ litaawa lyako, tsikʉtwɨdɨkɨla!” 18ɄYɨɨsʉ akavaanda akata, “Ndɨkambwene ʉSetano#10:18 ɄSetano aaswɨmilwe ʉkʉhʉma kʉkyanya kwa Ngʉlʉve (Yesaya 14:12). ndɨ nzasi itʉmbʉka ʉkʉhʉma kʉkyanya. 19Lola, ndɨvapye amaka ga kʉndema ʉntavangwa mu tsyoni. Kʉ nzɨla jya maka ago jʉmukadaga inzoka ni singomilevʉli, ikange nakɨkavepwo ɨkɨɨnu kya kʉvalematsa. 20Napeene, nʉpwʉ jɨngave muhekela ʉlwakʉva imepo imbiivi tsikʉvɨɨdɨkɨla, mwɨlekelwe ʉkʉhekela pɨɨlyo lyene, ɨlɨlʉtɨɨlye siitso muhekelage ʉlwakʉva amataawa giinyo ʉNgʉlʉve avɨgile kʉkyanya muve vaanu va mwene.”

Ʉlʉhekelo lwa Yɨɨsʉ

(Mataayo 11:25-27; 13:16-17)

21Ʉnsɨkɨ gʉʉgwa, ʉMepo ʉMbalatse akampa ʉYɨɨsʉ ʉkʉhekela siitso, pwʉ akata, “Gwe Daada, ʉve veeve Ntwa ʉNgʉlʉve va kʉkyanya na paasi, ndikʉkʉsaana. Ndikʉkʉsaana ʉlwakʉva amamenyu aga ʉvasihile avaanu avanya lʉhala na vamanyi, apeene ʉvavoniitse avaanu avadebe. Ʉgolwise Daada, itso tsivye ndʉwʉ ʉnogilwe.” 22Akatsova ikange akata, “ɄDaada vango amye syoni. Kange nakʉli ʉvɨ ammanyile ʉMwana, apeene jyʉ Daada mwene. Ikange, nakʉli ʉvɨ ammanyile ʉDaada, apeene jyʉ Mwana, nʉ muunu ʉvaveetsaga ʉvɨ ʉMwana inogwa ʉkʉmbonia.”

23Pwʉ ʉYɨɨsʉ akavakilivukila avakongi va mwene akavavʉʉla akata, “Mulɨ vagatalʉsu ʉnyie nyɨ vaanu nyɨ mukʉtsivona itsi! 24Ndikʉvavʉʉla ʉkʉta, vaalekwo avanyamalago vongosu na vakʉlʉdeeva ʉwʉ vaanogwagwa ʉkʉtsivona itsʉ mukʉtsivona ʉnyie, napeene navaatsivone. Ikange vaanogwagwa ʉkʉpʉlɨka itsʉ mupʉlɨka ʉnyie, napeene navaapʉlɨke.”

Ɨkɨhwananitso kya Nsamaliya ʉnya kɨsa

25Baaho, ʉmmanyisi mpamato va ndagɨlo, akɨɨma akambʉʉtsa ʉYɨɨsʉ pa vʉsumbe wa kʉnʼgela akata, “Gwe Mmanyisi, ndɨvombe kɨki pakʉta ndɨkave ʉwʉʉmi wa sikutsooni?” 26ɄYɨɨsʉ akamwanda akata, “Indagɨlo tsa Ngʉlʉve tsiita kɨki? Ndeeti, ʉkɨmanyile ɨkyʉ tsitsova?” 27Akamwanda akata, “Ʉnʼganage ʉNtwa ʉNgʉlʉve vaako nɨ numbula jyako jyoni, nʉ lʉhala lwako lwoni, na maka gaako gooni.#Simiilitso tsa Ndagɨlo 6:5 Ikange ʉnʼganage ʉnnino ndʉwʉ wɨganile jyʉve.”#Valawi 19:18 28ɄYɨɨsʉ akata, “Wandile vʉnonu! Ʉvombage vʉvʉle vʉle, apo jʉwiiva nʉ wʉʉmi wa sikutsooni.”

29Napeene, ʉmmanyisi va ndagɨlo ʉlya, akava inogwa ʉkwɨvɨɨka ʉkʉva inʼgolosu, akambʉʉtsa ikange ʉYɨɨsʉ akata, “Lɨno, ʉnʼjyango vɨ veeni?” 30ɄYɨɨsʉ akamwanda akata, “Aalepwo ʉmuunu mpamato, aahʉmile kʉ Yelusalemu, alɨkʉlotsa kʉ vʉtsenge wa kʉ Yeliko. Pwʉ mu nzɨla, vakamwʉvʉkɨla avanyambuda, vakansuula ɨmisabwa, vakantova siitso, vakandeka gupʉʉga. 31Baaho ʉnteeketsi mpamato akava igenda mu nzɨla jɨɨjɨlya, wʉ ikʉmbona ʉmuunu ʉlya akagenda kʉ lʉkanzi. 32Najyʉ Mlawi#10:32 Mlawi AValawi kyale kɨkolo ɨkyʉ ʉNgʉlʉve aahalile mu kɨvʉmbʉkʉ kya Vaisilahɨli kɨvombage ɨmbombo mu tembile (Kʉhʉma 3:1-13). akahʉmɨla ɨnzɨla jyɨjo, wʉ asiike palya, akambona ʉmuunu ʉlya, namwene akagenda kʉ lʉkanzi. 33Kʉmbele, ʉNsamaliya#10:33 ɄNsamaliya AVayahudi vaavabedaga aVasamaliya, ʉlwakʉva vaale vaanu avaaholilwe na vadala aVayahudi na vagoosi avatava Vayahudi. Itsi tsyavombiike ewo ʉnsɨkɨ gʉlya aVayahudi ʉpwʉ vaatoolilwe nʉ kʉhɨlɨkwa kʉ Babeli kwiva vavanda. Avadala avaasigye kʉnsana, vakahaalwa na vagoosi avasivʉmbʉkʉ isinge. Ikange aVasamaliya vɨɨsajaga kwa Ngʉlʉve kʉ nzɨla ɨjyahangile nʉ kwɨsaja kʉ mingʉlʉve gya veene. Lɨno, avaanu ʉkʉhʉma mu sivʉmbʉkʉ sivɨlɨ isi, navaapʉlɨngʼanage. mpamato, namwene akagendela ɨnzɨla jyɨjo. Wʉ ikʉmbona ʉmuunu ʉjwa, akankolela ɨkɨsa. 34Akahegelela kʉ mwene, akamʼbaka ɨdivai na mafuta mu sikoongʼo sya mwene pa vʉsumbe wa kʉmponia. Pwʉ akankʉnga isikoongʼo silya. Akantotsa pa punda jya mwene, akammɨlɨka kʉ nyumba jya kʉgona avahenza, akambʉvʉtsa.

35“Wʉ kʉkie, akahʉmya idinali ivɨlɨ,#10:35 Idinali ivɨlɨ Itsi tsyale ndalama tsa kʉkwɨla ʉlʉhombo lwa mbombi kʉ mbombo jya sigono sivɨlɨ. akampa ʉmwenenyumba jɨlya. Akatsova nave ʉmwenenyumba akata, ‘Ʉmbʉvʉtsaage ʉmuunu ʉjʉ. Tsingave indalama itsi tsisila, pwʉ woongeletsaage itsinge pa vʉsumbe wa kʉntanga. Ʉne ndɨva ndikilivuka, jʉndikʉkʉhomba.’ ” 36Pwʉ ʉYɨɨsʉ akambʉʉtsa ʉmmanyisi va ndagɨlo ʉlya akata, “Ndeeti, mu vaanu vadatu ava, vɨ veeni ʉvɨ vusaaga ʉkʉta vɨ nnine va lweli va muunu ʉvɨ ʉʉvʉkiilwe na vanyambuda?” 37Akamwanda akata, “Ʉvɨ aankolye ɨkɨsa, akantanga.” ɄYɨɨsʉ akambʉʉla akata, “Pwʉ najyʉve ʉlʉtage ʉkavombage vʉvʉle vʉle!”

ɄYɨɨsʉ mu nyumba jya Malita nʉ Maliyamu

38ɄYɨɨsʉ na vakongi va mwene, wʉ valɨ mu nzɨla vilʉta kʉ Yelusalemu, vakasika mu litsumbe lipamato. Pwʉ ʉnʼdala mpamato, ʉvɨ aatambʉlwagwa Malita, akanʼdoova ʉYɨɨsʉ abɨhe kʉ myave. 39ɄMalita aale nʉ nnunaave ʉvɨ aatambʉlwagwa Maliyamu. Wʉ ʉNtwa ʉYɨɨsʉ alɨ mu nyumba jya veene, ʉMaliyamu akataama kʉ silʉnde sya Yɨɨsʉ, alɨkʉpʉlɨhɨtsa imanyiiso tsa mwene. 40ɄMalita akava itoga ikwika ni mbombo nyongosu tsa kʉmbombela ʉYɨɨsʉ. Kʉmbele, akambʉʉla ʉYɨɨsʉ akata, “Gwe Ntwa, nawivona lʉviivi ʉpwʉ ʉnnuuna vango andekile ndivomba imbombo ndɨ mwene? Lɨno ʉmbʉʉle annange!”

41ɄNtwa akamwanda akata, “Malita, Malita! Kɨki vukɨgatatsa ni mbombo nyongosu? 42Ɨkyene kilondiwa ɨkɨɨnu kɨpamato ɨkɨnonu. Ɨkɨɨnu ɨkyo kyʉ kyene ʉMaliyamu ahalile, ɨkyʉ nakɨlahetsiwe kʉ mwene.”

Currently Selected:

Luuka 10: zga

Highlight

Copy