Luuka 9

ɄYɨɨsʉ ikʉvasuungʼa avapositili va mwene kɨtsigo na vavɨlɨ

(Mataayo 10:5-15; Maliko 6:7-13)

1ɄYɨɨsʉ akavɨɨlanga avapositili va mwene kɨtsigo na vavɨlɨ (12). Akavapa amaka ga kʉswɨma imepo imbiivi itsiveetsaga, na ga kʉponia avatamu. 2Ikange akavasuungʼa kulʉmbɨlɨla ikulongwi tsa Lʉdeeva lwa Ngʉlʉve nʉ kʉponia avatamu. 3Akavavʉʉla akata, “Mu nzɨla jiinyo, mwɨlekelwe ʉkʉgega ɨkɨveetsaga: ɨlaveetsaga nsaga gwa kwɨkolela, ɨlaveetsaga ɨmisuku, ɨlaveetsaga inkate, ɨlaveetsaga ndalama, pange magwanda ga kwandʉlania. 4Ɨnyumba ɨjyʉ mutsikwʉpɨlɨlwa, mutaamage muumwa ʉkʉsika ʉpwʉ mwihega mu vʉtsenge ʉwa. 5Mu vʉtsenge ʉwʉ avaanu navakavʉʉpɨlɨle, hʉmagi nʉ kʉkungʼuuna ʉlʉsumbe ʉlʉlɨ mu silʉnde siinyo,#9:5 Kʉkungʼuuna ʉlʉsumbe Ʉvʉganulu wa mamenyu ʉkʉkungʼuuna ʉlʉsumbe lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. kɨve kyʉ kɨmanyilo kya vʉviivi ʉwʉ vavombile.” 6Pwʉ avapositili valya, vakalʉta mu vʉtsenge ʉvʉlɨ pongosu, valɨkʉlʉmbɨlɨla ɨLivangɨli nʉ kʉponia avatamu kwoni ʉkwʉ vaalʉtaga.

ɄHelode itʉngʉtsiima nʉ Yɨɨsʉ

(Mataayo 14:1-12; Maliko 6:14-29)

7Ʉnkʉlʉdeeva ʉHelode aapʉlɨkaga ikulongwi tsa mbombo tsyoni itsʉ ʉYɨɨsʉ aavombaga. Itso tsikambɨɨka ʉkʉva nʉ lwɨganiiso, pakʉva avaanu avange valɨkʉta, ʉYɨɨsʉ vɨ Yohana ʉMwotsi atsʉʉkile ʉkʉhʉma kʉ vaswe. 8Avange valɨkʉta, ʉnyamalago ʉEliya#9:8 ɄEliya Ʉvʉganulu wa litaawa Eliya lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. itsile ikange. Avange valɨkʉta, impamato mu vanyamalago va katale atsʉʉkile. 9Ʉmwene ʉHelode akata, “Ʉne ndyanʼgɨdile ʉYohana ʉntwe! Lɨno, vɨ veeni ʉvɨ ivomba itsi itsʉ ndipʉlɨka?” Pwʉ ʉHelode, akava ilonda siitso ʉkwaganila nʉ Yɨɨsʉ.

ɄYɨɨsʉ iliisa avaanu avaelufu vahaano

(Mataayo 14:13-21; Maliko 6:30-44; Yohana 6:1-14)

10Avapositili valya vakakilivuka kwa Yɨɨsʉ, vakampangɨla gooni ʉgwʉ vatsivombile. Pwʉ akavatoola, vakalʉta mu vʉtsenge ʉwʉ waatambʉlwagwa Betisaida, pakʉta vave veene apoonu vɨjyekele. 11Avaanu vongosu wʉ valʉmanyile ʉkwʉ alʉtile, pwʉ vakankonga ʉkwa. ɄYɨɨsʉ akavambɨlɨla vʉnonu, akatengʉla ʉkʉvamanyiisa ikulongwi tsa Lʉdeeva lwa Ngʉlʉve. Ikange avanya vʉtamu, akava ikʉvaponia.

12Ʉnsɨkɨ gwa kʉmihe, avakongi va mwene valya kɨtsigo na vavɨlɨ (12) vakalʉta kʉ mwene vakata, “Lʉnonu ʉvatavʉle avaanu ava vabɨhe mu matsumbe na kʉ silɨmɨla isilɨ piipi, pakʉta vakɨlondele ɨkyakʉlya na pa kʉgona, pakʉva apoonu apa ʉpwʉ tʉlɨpwo lʉkɨnga.” 13ɄYɨɨsʉ akavavʉʉla akata, “Muvape ʉnyie ɨkyakʉlya!” Vakaanda vakata, “Ʉwe tʉlɨvʉla kɨɨnu, gyene ɨmikate gɨhaano ni somba ivɨlɨ syʉ pwʉsile. Ipange tʉbɨhe tʉkagʉle ɨkyakʉlya, pwʉ kɨkwɨle avaanu ava vooni!” 14Avaanu ʉwʉ vaalepwo palya, avagoosi veene vaale avaelufu vahaano (5,000). ɄYɨɨsʉ akavavʉʉla avakongi va mwene akata, “Muvataamye avaanu mu sipʉga sya vaanu isitsigo sihaano sihaano (50) vʉle.” 15Pwʉ vakavomba ndʉwʉ aavavʉʉlile, vakavataamya vooni. 16Pwʉ ʉYɨɨsʉ akatoola ɨmikate gɨlya gɨhaano ni somba tsilya ivɨlɨ, akalola kʉkyanya, akasaana kwa Ngʉlʉve. Akamenyulania ɨmikate gɨlya, akavapa avakongi va mwene vavagavɨlage avaanu. 17Avaanu vooni vakalya, vakiiguta. Avakongi vakalʉndamania amasigalɨlo, sikadɨga isitʉndʉ kɨtsigo na sivɨlɨ.

ɄPetulo itsova ʉkʉta ʉYɨɨsʉ vɨ Kɨlɨsiti

(Mataayo 16:13-19; Maliko 8:27-29)

18Ɨkɨgono kɨpamato, ʉYɨɨsʉ na vakongi va mwene vaale paninie, apoonu ʉpwʉ vɨɨjyekye. Wʉ valɨ apo, ʉYɨɨsʉ akatengʉla ʉkwɨsaja kwa Ngʉlʉve. Kʉmbele, akavavʉʉtsa avakongi va mwene akata, “Avaanu vitsova viita, ʉne neene veeni?” 19Vakaanda vakata, “Avange viita, veeve Yohana ʉMwotsi, avange viita, veeve Eliya, na vange viita, ʉlɨ mpamato mu vanyamalago va katale ʉvɨ atsʉʉkile.”

20ɄYɨɨsʉ akavavʉʉtsa ikange akata, “Ingɨno ʉnyie mwita, ʉne neene veeni?” ɄPetulo akaanda akata, “Ʉve veeve Kɨlɨsiti, ʉvɨ ʉNgʉlʉve aatye alansuungʼa!” 21ɄYɨɨsʉ akavabeetsa valeke ʉkʉmbʉʉla ʉmuunu ʉjyʉnge ʉvaveetsaga ɨkulongwi ɨjyo.

ɄYɨɨsʉ iganula ʉkʉswa nʉ kʉtsʉʉka kwa mwene

(Mataayo 16:20-28; Maliko 8:30–9:1)

22ɄYɨɨsʉ akavavʉʉla ikange akata, “Wɨgane wa Ngʉlʉve ʉkʉta ʉne ndɨ Mwana va Muunu ndɨkʉvɨlwe siitso, ndɨbeelwe na vanzagɨla va Vayahudi, avavaha va vateeketsi na vamanyisi va ndagɨlo,#9:22 Vanzagɨla va Vayahudi, avavaha va vateeketsi na vamanyisi va ndagɨlo Isipʉga sidatu isi syʉ syapelaga ʉlʉlʉndamano ʉlʉvaha lwa valongotsi va Vayahudi. Ʉlʉlʉndamano ʉlwa lwatambʉlwagwa Sanihedilini. Ʉvʉganulu wa limenyu ɨlɨ ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ndɨbudwe, na mu kɨgono kya daatu ndɨtsʉʉke.”

23Kʉmbele, ʉYɨɨsʉ akavavʉʉla vooni akata, “Angave ʉmuunu ʉvaveetsaga inogwa ʉkʉngʼonga, avʉleke ʉwɨgane wa mwene. Ɨtwɨke ɨkɨdamingʼanie kya mwene,#9:23 Ʉkwɨtwɨka ɨkɨdamingʼanie ʉkʉtsowa apa kwʉ kʉta ʉkwɨdɨka ʉkʉkʉvɨlwa nʉ kʉswa pa kulongwi jya Yɨɨsʉ Kɨlɨsiti. angʼongage isigono syoni, 24manya ʉmuunu ʉvaveetsaga ʉvɨ inogwa ʉkʉponia ʉwʉʉmi wa mwene, ʉjwa alawaambʉtsa. Apeene ʉmuunu ʉvɨ ikwambʉtsa ʉwʉʉmi wa mwene kʉ nongwa jyane, vɨ alavʉpoka. 25Ʉmuunu jiivʉmbʉlɨla kɨki angave akavile syoni isya mu kɨlʉnga wʉ kʉnʉ ambwitse ʉwʉʉmi wa sikutsooni? 26Ʉmuunu ʉvaveetsaga angambonele isoni ʉne ni manyiiso tsyango, najyʉne ndɨ Mwana va Muunu, ndɨlaava ndikwitsa mu wɨɨmɨkiwa wango, nʉ wa Daada paninie na vasuungʼwa avavalatse, ndɨlambonela isoni ʉmuunu ʉjwa. 27Tsa jɨlweli ndikʉvavʉʉla, avange mu nʼgati mwanyie nyɨ mulɨ apa, navakaaswe ʉkʉsika ʉpwʉ vikʉlʉvona ʉLʉdeeva lwa Ngʉlʉve.”#9:27 Avange mu nʼgati mwanyie nyɨ mulɨ apa, navakaaswe ʉkʉsika ʉpwʉ vikʉlʉvona ʉLʉdeeva lwa Ngʉlʉve Mu mamenyu aga, ʉYɨɨsʉ aatsovaga ikulongwi tsa mwene tsa kʉtsʉʉka nʉ kʉtoga kʉkyanya ni tsa kwitsa kwa Mepo ʉMbalatse.

ɄYɨɨsʉ ikwandʉka ɨmivonekele

(Mataayo 17:1-8; Maliko 9:2-8)

28Wʉ gʉlʉtɨngʼiinie ʉndʉngʉ mpamato, ʉkʉhʉma itsova amamenyu ago, ʉYɨɨsʉ akantoola ʉPetulo, ʉYohana, nʉ Yakobo, akatoga navo kʉ kɨdugala kukɨsaja. 29Wʉ ikɨsaja, akaandʉka kʉmiiho, nagyene ɨmisabwa gya mwene, gɨkava mivalasu, gɨkangʼaala siitso. 30-31Ʉnsɨkɨ gʉʉgwa, vakahʉmɨla avagoosi vavɨlɨ vingʼaala mu wɨɨmɨkiwa wa Ngʉlʉve. Avagoosi avo vaale vɨ Moose nʉ Eliya, vaatsovaga nʉ Yɨɨsʉ ʉmwʉ jiimalɨla ʉgwʉ ʉNgʉlʉve aanogwagwa gavombeke. Itso tsʉ kulongwi tsa kʉswa kwa mwene ʉkʉ kʉ Yelusalemu.

32Ʉnsɨkɨ ʉgwa ʉPetulo na vanine vaagoneelye itʉlʉ. Lɨno wʉ visisimuka, vakavona ʉYɨɨsʉ ingʼaala. Ikange vakavavona avagoosi vavɨlɨ vɨmile paninie nʉ Yɨɨsʉ. 33Avaanu valya vavɨlɨ wʉ vilekengʼana nʉ Yɨɨsʉ, ʉPetulo akambʉʉla ʉYɨɨsʉ akata, “Gwe Ntwa, lʉnonu ʉwe tʉtaamage baaha apa. Lɨno tʉtsenge isyeve sidatu: kɨpamato kɨve kyave, ɨkɨnge kya Moose, ɨkɨnge kɨve kya Eliya.” ɄPetulo naalʉmanye itsova kɨki.

34ɄPetulo wʉ itsova amamenyu ago, lɨkiitsa ɨlivɨngo lɨkavagubikila. Baaho vakadwada siitso. 35Ɨlimenyu lɨkapʉlɨkɨka ʉkʉhʉma mu livɨngo ɨlyo lɨkata, “Ʉjʉ vɨ Mwana vango ʉvɨ ndɨmmalile, mumpʉlɨhɨtsaage ʉmwene!” 36Ɨlimenyu wʉ lɨmalile ʉkʉpʉlɨkɨka, ʉYɨɨsʉ akavoneka alɨ mwene. Mu sigono isyo, avakongi va mwene navaampangɨle ʉmuunu ʉjyʉnge ʉgwʉ vaagaweene.

ɄYɨɨsʉ iswɨma ɨmepo ɨmbiivi ʉkʉhʉma mu nʼdɨɨmi

(Mataayo 17:14-18; Maliko 9:14-27)

37Ɨkɨgono ɨkya vɨɨlɨ, ʉYɨɨsʉ na vakongi valya vadatu wʉ viikile ʉkʉhʉma kʉ kɨdugala, vakaaganila nɨ kɨpʉga ɨkɨvaha kya vaanu. 38Ʉkʉhʉma mu kɨpʉga kɨlya, ʉmuunu mpamato akɨɨlanga siitso akata, “Gwe Mmanyisi, ndidoova ʉmponie ʉmwana vango, ʉlwakʉva ndɨlɨ nave jyʉjʉ mwene. 39Ʉmwene alɨ nɨ mepo ɨmbiivi, ɨjyo jikʉmpelela ʉkʉgʉlʉka, iita ʉkwoveela siitso. Ikange jikʉnʼjʉtsɨlɨngʼania nʉ kʉnʼgwisa paasi, iiva ndʉ muunu ʉnya ligotsi, kʉnʉ ɨlihuuve lihʉma mu ndomo. Ɨmepo ɨmbiivi ɨjyo najikʉndeka ngʼaningʼaani, jigendelela ʉkʉntovetsa paasi. 40Ndɨkadoovile avakongi vaako ʉkʉta vajɨhʉmye, valemilwe.” 41ɄYɨɨsʉ akata, “Ʉnyie nyɨ vaanu va kɨvʉmbʉkʉ ɨkɨtsila lwɨdɨko, ɨkya vagalo, ndɨtaame nʉʉnyie ʉnsɨkɨ ntale ʉgʉlɨ ndeeti pwʉ munnyɨdɨke? Indeete apa ʉmwana vaako.”

42Ʉmwana ʉlya wʉ ilʉta, ɨmepo ɨmbiivi jɨlya ɨkanʼgwisa paasi, ɨkanʼjʉtsɨlɨngʼania. Pwʉ ʉYɨɨsʉ akajɨtanila, akamponia ʉmwana ʉlya, akankilivula kwa dadaaje. 43Avaanu vooni wʉ vagaweene amaka amavaha ga Ngʉlʉve ndʉwʉ tsilɨwo, vakadega siitso.

ɄYɨɨsʉ itsova ikange ʉkʉswa kwa mwene

(Mataayo 17:22-23; Maliko 9:30-32)

Avaanu valya wʉ vipidega gooni ʉgwʉ avombile ʉYɨɨsʉ, akavavʉʉla avakongi va mwene akata, 44“Pʉlɨhɨtsi vʉnonu ʉgwʉ ndinogwa ʉkʉvavʉʉla! ɄMwana va Muunu jiihendamwa.” 45Napeene, avakongi va mwene navaatsimanyage itsyatsovaga ʉYɨɨsʉ, ʉlwakʉva vaasihilwe pakʉta vɨlekelwe ʉkʉlʉmanya. Ikange vakadwada ʉkʉmbʉʉtsa.

Ʉvʉvaha wa jɨlweli

(Mataayo 18:1-5; Maliko 9:33-37)

46Avakongi va Yɨɨsʉ vakatengʉla ʉkʉkaningʼana ʉkʉta veeni imbaha pagati pa veene. 47ɄYɨɨsʉ akagamanya amasaago ga mu numbula tsa veene. Pwʉ akantoola ʉmwana ʉnʼdebe, akambɨɨka pawiipi nʉ mwene, 48akavavʉʉla akata, “Ʉvɨ ikʉmwʉpɨlɨla ʉmwana ʉnʼdebe ndʉʉjʉ mu litaawa lyango, iiva ikʉnnyʉpɨlɨla ʉne. Ikange ʉvɨ ikʉnnyʉpɨlɨla ʉne, pwʉ iveetsaga amwʉpɨlye ʉvɨ ansuungʼile. Mulʉmanye ʉkʉta ʉvɨ ibedwa pagati paanyie nyɨ vooni, ʉjwa vɨ mbaha kʉ vooni.”

Ʉmuunu ʉvɨ nipɨgana nʉ Yɨɨsʉ alɨ lʉvasu lwa mwene

(Maliko 9:38-40)

49ɄYohana akambʉʉla ʉYɨɨsʉ akata, “Gwe Mbaha, tʉmbwene ʉmuunu ʉvɨ ihʉmya imepo imbiivi kʉ nzɨla jya litaawa lyako, tʉmʼbeetsiitse pakʉva nalɨ paninie nʉʉwe.” 50ɄYɨɨsʉ akaanda akata, “Mwɨlekelwe ʉkʉmʼbeetsa, pakʉva ʉmuunu ʉvaveetsaga ʉvɨ nikʉvasiga ʉkʉvomba itsa vʉnogwe wango, iveetsaga alɨ lʉvasu lwinyo.”

AVasamaliya vaninie vibeela ʉkʉmwʉpɨlɨla ʉYɨɨsʉ

51Isigono sya mwene sya kʉtoga kʉkyanya wʉ sihegelye, akalamula ʉkʉbɨha kʉ Yelusalemu, akahega. 52Pwʉ akavasuungʼa avaanu valongole kʉ vʉtsenge wa Vasamaliya pakʉta vannotsehetse apoonu pa kʉsikila. 53Lɨno avaanu vʉʉkʉ vakabeela ʉkʉmwʉpɨlɨla, ʉlwakʉva aalʉtɨngʼaniaga ʉkʉbɨha kʉ Yelusalemu. 54Avakongi va mwene, ʉYakobo nʉ Yohana wʉ valɨweene ɨlyo vakata, “Gwe Ntwa viitu, vunogwa tʉdoove ʉmwoto gwike ʉkʉhʉma kʉkyanya gʉvanyianye, ndʉwʉ ʉEliya aavombile?”#9:54 Ndʉwʉ ʉEliya aavombile Inyandʉlʉ itsinge tsa katale tsa Vʉvɨge ʉVʉvalatse natsilɨ nago amamenyu aga. 55Ʉmwene ʉYɨɨsʉ akakilivuka, akavatanila. Akata, “Pa kʉtsova aga muvonia namulʉmanyili ʉmwʉ tsikanogelanie ʉkʉva inumbula tsiinyo kʉ vaanu avange,#9:55 Akata, “Pa kʉtsova aga muvonia namulʉmanyili ʉmwʉ tsikanogelanie ʉkʉva inumbula tsiinyo kʉ vaanu avange…” Inyandʉlʉ itsinge tsa katale tsa Vʉvɨge ʉVʉvalatse natsilɨ nago amamenyu aga. pakʉva ʉMwana va Muunu niitse kujatsa avaanu, apeene iitsile kukʉvapoka avaanu.” 56Vakahega vakalʉta kʉ litsumbe ɨlɨnge.

Ɨlyʉ linogela kʉ vɨɨdɨki va Yɨɨsʉ

(Mataayo 8:19-22)

57ɄYɨɨsʉ na vakongi va mwene wʉ valɨ mu nzɨla, ʉmuunu mpamato akambʉʉla ʉYɨɨsʉ akata, “Ndikʉkʉkongaga kwoni ʉkwʉ vulʉtaga!” 58ɄYɨɨsʉ akata, “Lola, amakeve galɨ ni manga, isidege silɨ nʉ waaswa, lɨno, ʉMwana va Muunu alɨ vʉvʉle napa pa kʉgonia ʉlʉvasu.”#9:58 Kʉgonia ʉlʉvasu Mu mamenyu aga ʉYɨɨsʉ aavavʉʉlaga ʉkʉta ʉmwene aale mbʉla vʉtaamo, ʉlwakʉva aalʉtaga kʉnʉ na kʉnʉ kuvomba ɨmbombo jya Ngʉlʉve.

59ɄYɨɨsʉ akambʉʉla ʉmuunu ʉjyʉnge, akata, “Ʉngʼongage!” Ʉmuunu ʉlya akata, “Gwe Ntwa, ʉndeke taasi ndɨkansɨɨle ʉdaada.” 60ɄYɨɨsʉ akamwanda akata, “Valeke avaswe vavasɨɨle avaswe#9:60 Avaswe vavasɨɨle avaswe Apa ʉYɨɨsʉ aavatsovaga avaanu ʉwʉ navaalwʉpɨlɨle ʉLʉdeeva lwa Ngʉlʉve ʉkʉta vasue mu numbula (Vaefeso 2:1; Luuka 15:24, 32). Ʉmuunu ʉjwa ʉvaanogwagwa ʉkʉnkonga ʉYɨɨsʉ aavʉʉlilwe ʉkʉta avaleke avo vansɨɨle ʉvɨ asue ʉvʉswe wa mmana. va veene. Apeene ʉve, ʉlʉtage kupʉlɨsa ɨkulongwi jya Lʉdeeva lwa Ngʉlʉve.”

61Ʉjyʉnge akambʉʉla ʉYɨɨsʉ akata, “Gwe Ntwa, jʉndikʉkʉkonga. Lɨno, ʉndeke taasi ndɨkɨɨlage kʉ myaviitu.” 62ɄYɨɨsʉ akambʉʉla akata, “Ʉmuunu, angave atengwe ʉkʉlɨma ni senga, pwʉ ikange akilivuke kwilola kʉnsana, ʉjwa nanogiili ʉkʉva mbombi mu Lʉdeeva lwa Ngʉlʉve.”

Currently Selected:

Luuka 9: zga

Highlight

Copy