Lucas 21

Aju oyaj tu'n jun meb'a xu'j tal yajxix

Marcos 12.41-44

1Ex o til Jesús qe q'inun in ku'x kyq'o'n kyoyaj tuj k'ub'l pwaq tuj tja Dios. 2Ax ikx o til Jesús jun meb'a xu'j tal yajxix ku'x tq'o'n kab'e tal sentav. 3Ex tma Jesús:

—Ax tok kxel nma'ne kyeye, ate meb'a xu'j lu tal yajxix, mas ma ku'x tq'o'n kywitz kykyaqil. 4Porke kykyaqil qe jlu, aju in kyaj ten kye, atzunju ma ku'x kyq'o'n te kyoyaj twitz Dios; atzunte xu'j lu, maske tal yajxix, pero ma ku'x tq'o'n tkyaqilju at tajb'enil twi twa.

O tma Jesús qa tu'n tkub' xitj tja Dios

Mateo 24.1-2; Marcos 13.1-2

5In che yolintoq junjun xjal ti'j tja Dios b'incha'nxix wen tu'n ab'j tb'anilxix ex tu'n oyaj otoq pon kyi'n xjal. Xitzun tma'n Jesús kye:

6—Tkyaqil jlu aju nno'k kyke'yine, tzul q'ij mlay kyaj ten ab'j tib'aj juntl ab'j, tkyaqil kb'el tilj.

Qe señ na'nxtoq tjapun mankb'il tq'ijlalil

Mateo 24.3-28; Marcos 13.3-23

7Xitzun kyqanin te:

—Xnaq'tzal, ¿jtojtzun b'an tjapun jlu? ex ¿alkye señ tzul ch'ixtoq tjapun jlu? Che chi.

8Tmatzun Jesús:

—Ten kykwente kyi'je tu'n mi'n kykub' sb'u'ne; ok che ul nimku xjal ex k'okel kyq'on kyib' ik tza'n weye, ex ok kyma': Aqine ju Crist at woklene tu'n Dios, ex ch'ix tul laq'e' tq'ijlalil, che chilo; ex mi'n che ok lpe'ye kyi'j. 9Ex ok kyb'inteye ok tok q'oj ex ok kyjaw tilj xjal q'ojlel, mi'n che jaw sek'paje; porke tnejel ilxix ti'j tu'n tjapun tkyaqil jlu; ex myatzun mankb'il tq'ijlalil jlu tu'n tjapun b'aj tkyaqil.

10Che q'ojlel qe nasyon kyi'j txqantl nasyon, ex che q'ojlel qe tnam kyi'j txqantl tnam. 11Ex ktzajel kyaqnajnab' kyuwxix ex we'yaj ex tx'u'j yab'il noq jachaq; ex tzul sek'pub'l ex che tzajel señ ma'xix twitz kya'j.

12Ex na'nxtoq tjapun tkyaqil jlu, che tzyetele kyu'n xjal, ex che yajlanjtzele kyu'n. Che xel q'i'ne tuj ja te k'ulb'il tu'n kyoke tuj xjel ex che okex q'o'ne tuj pres, ex che xel q'i'ne kyu'n kywitz rey ex kywitz gobernador, noq tu'n tlaj okslal qeye wi'je. 13K'ajb'el jlu kyeye tu'n kyoke te testiw wi'je. 14Mi'n che ximan naje ti'j alkye yol kxel kyma'ne te kolb'il kyeye; 15porke aqine chin q'olte yol tuj kytzi'ye tuk'ix kynab'le, tu'ntzunju mlay kub' ti'j kyyole kyu'n kykyaqil aj q'oj kyi'je, ex mlay maqet kyyole kyu'n. 16Che xel q'i'ne twitz kawil kyu'nx kymane ex kyu'n kyermaniye ex kyu'n qeju at kyxilen kyuk'ile ex kyu'n kyamiwoye; ex at junjun kyxole che b'el b'yo'n kyu'n; 17ex che elel ik'une kyu'n kykyaqil xjal tu'n tlaj okslal qeye wi'je. 18Ex mi jun ttzmal kywi'ye mlay naj. 19Qa ma tzik'x kyu'ne, ok kykamb'a'ye kychwinqlale axix tok.

20Ok kylonteye ok t-xi kytxolb'an kyib' soldad ti'jele tnam Jerusalén, tz'elxtzun kynik'e ti'j ya ma pon q'ij tu'n tkub' xitj tnam. 21Atzun qeju ate' tuj tx'otx' Judea, b'a'n tu'n kyel oq tu'n kyxi' twi witz; ex qeju ate' tuj tnam Jerusalén, b'a'n tu'n kyetz oq; ex qeju ate' tuj kojb'il, mi'n che okx tuj tnam. 22Ex ok tul kanun ju q'ij lu, atzun q'ij tu'n ttzaj castiw kyib'aj xjal, tu'ntzun tjapun tkyaqilju in tma'n tuj Tu'jil. 23Ex b'ek'b'il kywitz qe xu'j ch'ixtoq tul itz'j kyal ok tul kanun ju q'ij lu, ex b'ek'b'il kywitz qe xu'j kukx tch'u'n kyal. Porke tzul nim yajb'il twitz tx'otx', ex tzul jun castiw ma'xix kyi'j qe xjal lu. 24At junjun che b'el b'yo'n tu'n spad, ex at junjun che xel q'i'n pres, ex che b'ajel sputj kyuj kykyaqil nasyon; ex kb'ajel wab'an tnam Jerusalén kyu'n qe nasyon mya judiy qe, maxitzun kweb'el okxi tjapun b'aj tq'ijlalil tu'n kykawin qe nasyon mya judiy qe.

Tza'n tten tzul Jesucrist juntl maj

Mateo 24.29-35,42-44; Marcos 13.24-37

25Tzultzun señ ti'j q'ij ex ti'j xjaw ex kyi'j che'w; ax ikx twitz tx'otx' b'i'x knajel kynab'l xjal kyuj kykyaqil nasyon, che jawil sek'paj tu'n tq'ajq'ajel twi' mar in xtulq'in. 26Qe xjal ktzajel yumin tuj kywitz tu'n xob'ajil ex tu'nju in che ximan ti'j ti kb'ajel twitz tx'otx'; ok che tzajel lu'lun tipumal kya'j. 27Ex oktzun kyila' xjal ok ntzaje tuj muj, aqine sk'o'maj qine tu'n Dios tu'n ntene kyuk'il xjal, ex ok kyila' nim wipumale ex in chin qoptz'aje wen. 28Oktzun t-xe't tkyaqil jlu, qe' kyk'u'je, ex kyke'yinktze jawni, porke aju kolpib'l kyeye in laq'ex ttzaj.

29Ex xi tma'n Jesús jun techal kye:

—Kyke'yinxe tqan higo ex qa juntl tze'. 30Oktzun kylonteye ok ttzaj t-xul, ax qeye nne'l kynik'e ti'j in laq'ex ttzaj ttzi jb'alil. 31Ikxtzun tten ok kylonteye ok tjapun tkyaqil jlu, tz'elx kynik'e ti'j in laq'ex ttzaj tkawb'il Dios.

32Ax tok kxel nma'ne kyeye, tkyaqil jlu kjapunel na'nxtoq kykyim qe xjal ate' tuj tq'ijlalil ja'lo. 33Ate kya'j knajel tuk'ix tx'otx', atzun we nyol mlay naj.

34Ten kykwente kyi'je tu'n mi'n tel tzpet kynab'le tu'n achb'il te twitz tx'otx' ex tu'n k'aj q'e'n ex tu'nju tichaq in b'aj kyk'u'je ti'j, mya yajku in kanunku tq'ijlalil jlu kyib'aje. 35Porke ik tten jlu ik tza'n jun k'ob'il; kykyaqil xjal najl tuj tkyaqil twitz tx'otx' che tzyetel tu'n. 36Kyja'tzun che xq'uqine ex che na'ne Dios tkyaqil q'ij, tu'ntzun kykolpaje te tkyaqilju tzul, ex tu'n kykub' we'ye nwitze, aqine sk'o'maj qine tu'n Dios tu'n ntene kyuk'il xjal.

37O'kx q'ijl in tq'o'ntoq Jesús xnaq'tzb'il kye xjal tuj tja Dios, atzun qonik'an nne'tz ex in xi' twi witz Olivos tb'i, ex ax in kyaj ten. 38Ex kykyaqil xjal in che ultoq tuk'il te prim b'ilte tyol tuj tja Dios.

Currently Selected:

Lucas 21: MAMNO

Highlight

Copy