Lucas 22
22
In che jyon xjal tumel tza'n tten tu'n ttzyet Jesús
Mateo 26.1-5,14-16; Marcos 14.1-2,10-11; Juan 11.45-53
1Ch'ixtoq Xjan Q'ij, atzun q'ij tu'n kywa'n xjal pan minti' t-samel tuj tu'n tjaw mal tk'u'j. 2Atzun kye nejenel kye pal kyxol xjal judiy kyuk'ix qe xnaq'tzal ti'j ley in che jyontoq tumel tza'n tten tu'n tkub' b'yet Jesús; ex in che xob'toq kywitz xjal.
3Okxtzun Satanás tuj tanmi Judas Iscariote, jun kyxol qeju kab'laj t-xnaq'tzb'en Jesús. 4Ex xi' Judas yolil kyuk'il nejenel kye pal kyxol xjal judiy ex kyuk'il qe nejenel kye polisiy tuj tja Dios, tza'n tten tu'n t-xi q'o'n Jesús tuj kyq'ab' tu'n. 5Atzun kye e jaw tzalaj, ex b'ant ti'j kyu'n kyxolx tu'n t-xi kyq'o'n pwaq te Judas. 6Ex xi ttziyan Judas kye, ex ok ten jyolte tumel tza'n tten tu'n t-xi q'o'n Jesús tu'n tuj kyq'ab' pal, minti' che b'in xjal ti'j.
O wa'n Jesús kyuk'il t-xnaq'tzb'en tuj Xjan Q'ij
Mateo 26.17-29; Marcos 14.12-25; Juan 13.21-30; 1 Corinto 11.23-26
7Ex o kanun aju ninq'ij tu'n kywa'n xjal pan minti' t-samel tuj tu'n tjaw mal tk'u'j, atzun q'ij lu ilxix ti'j tu'n tkub' b'yet ju tal ẍne'l tu'n tik'set Xjan Q'ij. 8Xitzun sama'n Pedro tuk'ix Juan tu'n Jesús, ex xi tma'n kye:
—Kyxi'ye, kyb'inchame wab'j te Xjan Q'ij tu'ntzun qwa'n ti'j.
9Atzun kye xi kyqanin te:
—¿Jatumtzun tajb'ila tu'n tb'aj qb'incha'ne?
10Xi tma'n Jesús kye:
—Ok kyokxe tuj tnam, k'okel kyk'ulb'an kyib'e tuk'il jun xinaq q'i'n jun ẍoq' a' tu'n; che lpexe ti'j tu'n kypone tuj ja jatum k'okex, 11ex kymanxe te tajaw ja: Chi xnaq'tzal in tma'n teya kyja': ¿Alkye jun kol ja jatum tu'n nwa'ne kyuk'il nxnaq'tzb'ene tu'n tik'set Xjan Q'ij? 12Ktzajeltzun tyek'un jun tkab' kolin ja ma'xix, b'animaj tten; atzun kyb'inchame wab'j.
13E je'xtzun ex knet tkyaqil kyu'n ik tza'n xi tma'n Jesús kye; ex b'aj kyb'incha'n wab'j tu'n tik'set Xjan Q'ij.
14Tej tpon or, kub' qe' Jesús ti'j mes kyuk'ix qe apostol. 15Xitzun tma'n Jesús kye:
—Wajb'ilxixe tu'n nwa'ne kyuk'ile tu'n tik'set Xjan Q'ij na'nxtoq nkyime. 16Ex kxel nma'ne kyeye, mlay chin wa'ntle juntl maj ti'j wab'j lu, maxitzun chin wa'le juntl maj junx kyuk'ile tuj tq'ijlalil ok tul tkawb'il Dios.
17Ex jaw ttzyu'n ju vas, xi tq'o'n chjonte te Dios ex tma:
—Kytzyunxe jlu, ex kysipanxe kyxolxe; 18ex kxel nma'ne kyeye, mlay txi nk'a'ntle juntl maj ta'l twitz uva lu, maxitzun kxel nk'a'ne juntl maj ok tjapun tq'ijlalil ok tul tkawb'il Dios.
19Ex jaw ttzyu'n ju pan, xi tq'o'n chjonte te Dios, kub' tpiẍk'u'n, xi tq'o'n kye, ex tma:
—Atzun nximlale jlu kjawil q'o'n twitz crus tu'n tten kolb'il kyeye; kyb'inchame jlu te nab'l weye.
20Ax ikx jaw ttzyu'n Jesús ju vas tb'ajlenxi wa'n, ex tma:
—Aju tku'x tuj vas lu, atzun ak'aj yol ma kyaj b'ant ti'j tu'n Dios kyuk'ile, ex aju nchk'ele k'elel chitj te kolb'il kyeye, atzunju k'okel te kyuwsab'l teju yol lu. 21Ex aju xjal kxel q'onte weye tuj kyq'ab' xjal, lu at wuk'ile ti'j mes. 22Ax tok chin xel q'o'ne tuj kyq'ab' xjal ik tza'nx b'animaj ti'j, aqine sk'o'maj qine tu'n Dios tu'n ntene kyuk'il xjal; ex b'ek'b'il twitz aju xjal kxel q'onte weye tuj kyq'ab' xjal.
23Atzun kye t-xnaq'tzb'en e ok ten qanilte kyxolx alkye jun kxel q'onte Jesús tuj kyq'ab' xjal.
In che yolin xnaq'tzb'en ti'j alkye mas at toklen kyxol
24Ex jaw jun yol kyxol xnaq'tzb'en ti'j alkye jun tu'n tten mas toklen kyxol. 25Atzunte Jesús xi tma'n kye:
—Qe rey kye nasyon kyuw in che kawin kyib'aj xjal; ex qe nejenel ate' kyuj nno'k q'o'n kyb'i mejor xjal qe. 26Atzun kyeye mlay che oke ikju; aju mas at toklen kyxole, q'o'nk tib' ik tza'n k'wa'lx ta'; ex aju nejenel kyxole, q'o'nk tib' ik tza'n jun ajb'el. 27Ex ¿alkye mas at toklen, apeju in kub' qe' ti'j mes tu'n twa'n, ex qa aju tok te ajb'el? ¿Myapelo aju in kub' qe' ti'j mes? Ex aqine atine kyxole ik tza'n jun ajb'el.
28Atzun kyeye kukx ma che tene wuk'ile tuj yajb'il weye. 29Kyja'tzun, kxel nq'o'ne kyoklene tu'n kykawine, ik tza'n weye ma tzaj q'o'n woklene tu'n Nmane tu'n nkawine, 30che wa'le ex che k'ale twi' nmese tuj nkawb'ile, ex che b'el qe'ye tuj q'uqb'il tu'n kykawine kyib'aj kab'laj k'loj kyiyjil aj Israel.
Chin b'el tewana ox maj, chi Jesús te Pedro
Mateo 26.31-35; Marcos 14.27-31; Juan 13.36-38
31Ax ikx tma Qajaw:
—Simón, Simón, lu ma che qaninjtze tu'n Satanás tu'n kyoke tuj sarand ik tza'n triw; 32ex ma chin kub'sane twitz Dios ti'ja tu'n mi'n tkub' numja tuj tokslab'la; oktzun tjaw twab'an tib'a juntl maj, kyuwsama qe termaniya.
33Xi tma'n Simón te:
—Tat, lu qine lu tu'n nxi'ye tuk'ila qa tuj pres ex qa tu'n nkyime junx tuk'ila.
34Xi tma'n Jesús te:
—Kxel nma'ne teya Pedro, na'nxtoq ttzaj oq' tzek' ja'lo, kb'el tewana ox maj qa minti' ojtzqi'n qine tu'na.
Ch'ix tul kanun or tu'n tik'x tu'n Jesús
35Ex xi tqanin Jesús kye t-xnaq'tzb'en:
—Tej kyxi nsama'ne minti' kych'u'ẍe, ex minti' kypaye, ex minti' kyxajb'iye, ¿atpe jun minti' o kanun kyeye? Atzun kye xi kytzaq'we'n:
—Tkyaqil o kanun, che chi.
36Xitzun tma'n Jesús kye:
—Ja'lotzun alkye at tch'u'ẍ, b'a'n tu'n t-xi ti'n tuk'ix tpa; ex alkye minti' t-spad, k'ayinx tchikyet ex laq'ontz jun t-spad. 37Ex kxel nma'ne kyeye, ilxix ti'j tu'n tjapun wi'je aju tz'ib'amaj tuj Tu'jil, in tma'n kyja': Kyxol qe mya b'a'n ok te tajlal, chi tuj Tu'jil. Ex tkyaqilju tz'ib'amaj wi'je il ti'j tu'n tjapun.
38Atzun kye kyma:
—Tat, at kab'e spad lu.
Ex tma Jesús kye:
—Akux jlu.
Jesús in na'n Dios tuj lugar twi' witz Olivos
Mateo 26.36-46; Marcos 14.32-42
39Etztzun Jesús, ex xi' twi witz Olivos ik tza'nx tmod; ax ikx qe t-xnaq'tzb'en e je'x lpe' ti'j. 40Tejtzun tkanun ma chixin, xi tma'n kye:
—Che na'ne Dios tu'n mi'n kyoke tuj joyb'il kyi'je.
41Ex el laq'e' Jesús kytxlaj b'alo te kab' ox ech; ex kub' ẍmeje', ok ten na'l Dios, 42ex tma:
—Tat, qa tajb'ila chin tkloma tu'n mi'n tik'x ju k'ixk'oj lu wu'ne; ex kuchiwt mi'n b'ant aju weye wajb'il, o'kx aju teya tajb'ila, chi Jesús.
43[Kub'tzun tyek'un tib' jun anjel tzajni tuj kya'j ul q'olte tipun. 44Ex tej toktoq Jesús tuj k'ixk'oj, mas o na'n Dios tu'n tkyaqil tipun; ex tzaj a' ti'j ik ke'yin ik tza'n nmaq txutpin chik' e kub' tz'aq twitz tx'otx'.]
45Jawtzun we' tb'ajlenxi na'n Dios, ul kyuk'il qe t-xnaq'tzb'en, ex e knet tu'n in che tan tu'n tlaj kyb'is. 46Xitzun tma'n kye:
—¿Tiqu'n in che tane? Che we'ktze, ex che na'ne Dios tu'ntzun mi'n kyoke tuj joyb'il kyi'je, chi Jesús.
Tej t-xi q'i'n Jesús pres
Mateo 26.47-56; Marcos 14.43-50; Juan 18.2-11
47Kukxtoq tyolin Jesús tej kypon nim xjal; nejni Judas kywitz, jun kyxol qeju kab'laj xnaq'tzb'en; ex pon laq'e' ttxlaj Jesús tu'n tel ttz'ub'an twitz. 48Xitzun tma'n Jesús te:
—Judas, ¿maj noq tu'nju nne'l ttz'ub'ana nwitze in chinx tq'o'na tuj kyq'ab' xjal, aqine sk'o'maj qine tu'n Dios tu'n ntene kyuk'il xjal?
49Ex atzun qeju ate'toq tuk'il Jesús tej kylonte kyja'toq ttzyet, xi kyma'n te:
—Tat, ¿okpe che okel qtx'emine qe jlu tu'n spad?
50Ex at jun kyxol ok ttx'emin jun tmajen ju nejenel kye pal, ex b'i'x el t-ẍkyin tuj tb'anq'ab'. 51Tmatzun Jesús kye:
—Kukx ttenju.
Oktzun tmako'n Jesús t-ẍkyin majen, ex b'anix tu'n. 52Ex xi tma'n Jesús te nejenel kye pal kyxol judiy ex kye nejenel kye polisiy tuj tja Dios ex kye kytijil xjal aqeju otoq che ul tzyul te:
—¿Maj ma che tzaje tzyul weye q'i'n spad kyu'ne tuk'ix tze', mer ik tza'n eleq' qine tuj kywitze? 53Tej atintoqe kyuk'ile tkyaqil q'ij tuj tja Dios, minti' in tzaj kytzyu'ne; ex atzun or jlu tu'n kyb'inchanteye kyajb'ile, ex atzun or tu'n tkawin tipumal qlolj.
Kub' tewan Pedro qa minti' ojtzqi'n Jesús tu'n
Mateo 26.57-58,69-75; Marcos 14.53-54,66-72; Juan 18.12-18,25-27
54Tzyettzun Jesús kyu'n, xi kyi'n tja nejenel kye pal kyxol judiy. Atzunte Pedro najchaq xi lpe'. 55Ex kub' kyq'o'n q'aq' tmijil ttxa'n pe'n, ex e kub' qe' ti'j q'aq'; ax ikx te Pedro kub' qe' kyxol. 56Oktzun tke'yin jun txin criad q'uqltoq Pedro ti'j q'aq', ax ok b'aj twitz ti'j, ex tma:
—Ax ajun te jlu o ten tuk'il Jesús.
57Ex kub' tewan Pedro ex tma:
—Txin, minti' ojtzqi'n twitz xjal lu wu'ne.
58Matoq ch'in tuj, o ilwaj Pedro tu'n juntl xjal, ex tma:
—Ax ajun teya kyxol qe jlu.
Xi ttzaq'we'n Pedro:
—Xinaq, mya ajun we qin.
59Ex tb'ajlenxi jun or tkyuwsa juntl ex tma:
—Ax tok, ikx te jlu o ten tuk'il Jesús porke aj Galilea.
60Xitzun tma'n Pedro te:
—Xinaq, minti' b'a'n wu'ne aju in tma'na.
Ex tzaj oq' naj tzek' matoq in yolin Pedro. 61Ajtztzun meltz'aj twitz Qajaw, ex tzaj tke'yin twitz Pedro; ex ul ti'j tk'u'j Pedro ti'j ju tyol Qajaw otoq txi tma'n te: Na'nxtoq ttzaj oq' tzek' ja'lo, kb'el tewana ox maj qa minti' ojtzqi'n qine tu'na. 62Etztzun laq'e' Pedro ti'jtze, ex jaw oq'xix wen.
In che xmayin xjal ti'j Jesús
Mateo 26.67-68; Marcos 14.65
63Atzun kye xinaq tzyu'ntoq Jesús kyu'n, in che xmayintoq ti'j ex ok kyb'ju'n. 64Ok kymaqsi'n twitz, [ex ok kytz'ajan twitz,] ex xi kyqanin te:
—Q'mantza, ¿alkye ma tz'ok b'jun teya? Che chi.
65Ex in kyma'n nimku yol te xmayb'il te.
Pon q'i'n Jesús kywitz Aj Sanjelal
Mateo 26.59-66; Marcos 14.55-64; Juan 18.19-24
66Ex tej qsqix, b'aj kychmon kyib' qe kytijil xjal judiy kyuk'ix qe nejenel kye pal kyxol xjal judiy ex qe xnaq'tzal ti'j ley, tzaj kyi'n Jesús kywitz Aj Sanjelal kye xjal judiy, ex xi kyqanin te:
67—Q'mantza qeye, ¿apeya ju Crist aju at toklen tu'n Dios? Che chi.
Xi ttzaq'we'n Jesús kye:
—Qa ma txi nma'ne kyeye, mlay txi kyoksla'ne. 68Ax ikx qa ma txi nqanine kyeye, mlay tzaj kytzaq'we'ne, [ex mlay chin tzaj kytzoqpi'ne.] 69Ex texju ja'lo, chin b'el qe'ye tuj b'anq'ab'aj ttxlaj Dios nim tipumal, aqine sk'o'maj qine tu'n Dios tu'n ntene kyuk'il xjal.
70Xitzun kyqanin kykyaqil te:
—¿Apetzun aya tk'wa'l Dios?
Xi tma'n Jesús kye:
—Aqine, ik tza'n ma kymaye.
71Atzun kye kyma:
—¿Ti til txqantl testiw qe? Ax qo' ma qo b'inte tyol.
Currently Selected:
Lucas 22: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
