Juan 11

Tej tkyim Lázaro

1At jun xjal Lázaro tb'i yab'toq, aj Betania xjal lu, aju ttanmi Mariy tuk'ix Marta aju terman. 2Yab'toq Lázaro aju t-xib'an Mariy; ate Mariy jlu aju ok su'nte perjum ti'j tqan Qajaw ex el t-su'n ti'j tqan tu'n ttzmal twi'. 3Xitzun kysama'n qe tanb' Lázaro jun sanjel q'malte te Jesús kyja':

—Tat, aju k'ujla'n tu'na, ma yab't, chi sanjel.

4Tej tb'inte Jesús tma:

—Aju yab'il lu mya tu'n tkyim Lázaro tu'n, noq o'kx ma tzaj yab'il lu tu'n tjaw nimsa'n tb'i Dios ex tu'n tjaw nimsa'n nb'iye, aqine Tk'wa'l Dios.

5Ex k'ujla'nxix Marta tu'n Jesús, tuk'ix titz'in tuk'ix Lázaro. 6Tejtzun tb'inte Jesús qa yab'toq Lázaro ax kyaj ten kab' q'ijtl. 7Tb'ajlenxitzun kab' q'ij, xi tma'n kye t-xnaq'tzb'en:

—Qo'qe juntl maj tuj Judea.

8Xitzun kyma'n qe t-xnaq'tzb'en Jesús te:

—Xnaq'tzal, k'itzqe o kyajb'e xjal judiy tu'n tok xo'na tu'n ab'j kyu'n. ¿Maj ma txi'ya juntl maj tuj Judea?

9Xi ttzaq'we'n Jesús:

—¿Myapetzun kab'laj or tuj jun q'ij? Qa in b'et xjal q'ijl mlay jaw tolj, porke in tke'yin ju spik'un at twitz tx'otx'; 10ex aju xjal in b'et qonik'an in jaw tolj, porke minti' spik'un tuk'il.

11Tej tb'aj tma'n Jesús jlu xi tma'ntl kye:

—Aju qamiw Lázaro in tan; ex ma chinxe k'asul te, chi Jesús.

12Xitzun kyma'n qe t-xnaq'tzb'en Jesús te:

—Tat, qa in tan Lázaro, kb'anteltzun.

13Ex tma Jesús jlu ti'j Lázaro qa otoq kyim; atzun kye t-xnaq'tzb'en ela tuj kynab'l qa in yolin Jesús ti'j ojlab'l tu'n watl. 14Xitzun tma'n Jesús clarxix kye:

—Ma kyim Lázaro. 15Ex in chin tzalaje tu'nju mya ax atine tej xkyim, ex mas b'a'n te kyeye tu'ntzun kyokslane wi'je; ex qo'tzun jatum ta'.

16Xitzun tma'n Tomás kye txqantl xnaq'tzb'en:

—Ax ikx qe, qo'qe tu'n qkyim tuk'il, chi Tomás, aju yo'ẍ tb'i kyu'n xjal.

Ate Jesús q'olte anq'ib'l ex q'ol chwinqlal

17Pontzun Jesús ex o tb'i otoq b'ant kyaje q'ij tku'xlen maqu'n Lázaro. 18Niqayin t-xol tnam Betania tuk'il Jerusalén, b'alo ox kilómetro kyxol. 19Ex nimku xjal judiy otoq che ul tuk'il Marta ex tuk'il Mariy, e ul q'uqb'alte kyk'u'j tu'n tlaj otoq kyim kyxib'an. 20Tejtzun tb'inte Marta kyja' t-xi' Jesús, etz kanul ti'j; atzunte Mariy kyaj ten tuja. 21Xitzun tma'n Marta te Jesús:

—Tat, noqwit ata tzalu, miwtlo o kyim nxib'ane. 22Ex b'a'n wu'ne ja'lo, tkyaqilju kxel tqanina te Dios ktzajel tq'o'n Dios teya.

23Xitzun tma'n Jesús te:

—Kjawil anq'in t-xib'ana.

24Xi tma'n Marta te:

—B'a'n wu'ne kjawil anq'in ok kyjaw anq'in kyimni tuj mankb'il tq'ijlalil.

25Xitzun tma'n Jesús te:

—Aqine q'olte anq'ib'l ex aqine q'ol chwinqlal; alkye ma tz'okslan wi'je, maske qa ma kyim, ok k'anq'il. 26Ex qe xjal itz'xqe, qa ma che okslan wi'je mlay che kyim te jumajx. ¿Mape tokslaya jlu? Chi Jesús.

27Xi tma'n Marta te:

—Ma txi woksla'ne, Tat; ma wokslaye aya ju Crist aju at toklen tu'n Dios, ex aya Tk'wa'l Dios ma tzula twitz tx'otx'.

Jaw oq' Jesús ttzi tpantyón Lázaro

28Tej tb'aj tma'n Marta jlu, xi' txkolte Mariy aju titz'in, cheb'a xi tjask'u'n te:

—Ma tzul Xnaq'tzal ex in txkonjtza tu'n, chi Marta.

29Tej tb'inte Mariy jlu, jaw we' naj ex ul tuk'il Jesús. 30Na'nxtoq tokx Jesús tuj tnam; ax ta'toq jatum ul Marta kanul ti'j. 31Atzun kye xjal judiy, aqeju otoq che pon tja Mariy q'uqb'alte tk'u'j, tej kylonte otoq jaw we' naj Mariy ex otoq tz'etz, e ok lpe' ti'j, ex kyma: Ma txi' oq'el ttzi pantyón, che chi.

32Tejtzun tkanun Mariy jatum ta'toq Jesús ex tej tke'yinte, kub' ẍmeje' t-xe tqan Jesús ex tma:

—Tat, noqwit ax ta'ya tzalu miwtlo o kyim nxib'ane.

33Tej tke'yinte Jesús in oq' Mariy ex kyuk'ix qe xjal judiy in che oq', aqeju e tzaj tuk'il, tzaj ta'w tuj tanmi tu'n tb'is, 34ex xi tqanin kye:

—¿Jatum okx kyq'o'ne?

Xitzun kyma'n te Jesús:

—Tat, qo' ke'yilte.

35Jawtzun oq' Jesús. 36Kymatzun qe xjal judiy:

—Nimxix tk'ujlalil Jesús ti'j.

37Ex at junjun kyxol kyma:

—Ate xjal lu jaqonte twitz moẍ, ¿tiqu'ntzun minti' xb'ant tu'n tu'n mi'n tkyim Lázaro?

Jatz anq'in Lázaro

38Tzajxix tb'is Jesús juntl maj, ex pon jatum tokx kyimni. Tokx tuj jun jul tok jun ab'j ttzi'. 39Xitzun tma'n Jesús kye:

—Kyi'mele aju ab'j.

Atzunte Marta, aju tanb' qtzan Lázaro, xi tma'n te Jesús:

—Tat, ma tzuwix, porke ma b'ant-xi kyaje q'ij tku'xlen maqut.

40Ex xi tma'n Jesús te:

—¿Myapetzun ma txi nma'ne teya, qa ma tokslaya ok tila'ya tipumal Dios? Chi Jesús te.

41Eltzun kyi'n aju ab'j [jatum otoq tz'okx q'o'n kyimni.] Ex jaw tke'yin Jesús twitz kya'j, ex tma:

—Tat, kxel nq'o'ne chjonte teya porke ma chin tzaj tb'i'na. 42B'a'n wu'ne kukx in chin tzaj tb'i'na, ex ma txi nma'ne jlu tu'n kylaj nimku xjal ate' ntxlaje, tu'ntzun t-xi kyoksla'n qa aya ma tzaj samante weye.

43Tejtzun tb'aj tma'n Jesús jlu, jaw tq'ajq'ajel twi' kyuwxix, tma:

—Tetza, Lázaro.

44Etztzun aju otoq kyim, b'alq'i'ntoq tq'ab' tu'n xb'alun tuk'ix tqan, ex potzin twitz tu'n jun k'alb'il. Xitzun tma'n Jesús kye xjal:

—Kypaju'mele ex kytzoqpinxe.

In che jyon xjal tumel tza'n tten tu'n ttzyet Jesús kyu'n

Mateo 26.1-5; Marcos 14.1-2; Lucas 22.1-2

45Nimku xjal judiy otoq che ul tuk'il Mariy. Tej kylonte aju tb'incha Jesús, nim e okslan ti'j. 46Ex at junjun kyxol e je'x kyuk'il fariseo ex xi kyma'n aju otoq tb'incha Jesús. 47Atzun kye nejenel kye pal ex qe fariseo ok kychmo'n qe Aj Sanjelal kye xjal judiy ex kyma:

—¿Alkye kb'antel qu'n? Porke ate xjal lu nimku señ in b'ant tu'n. 48Qa kukx ma kyaj qq'o'n ikju, kykyaqil xjal che okslal ti'j; che ultzun qe aj sanjelal aj Roma, ex kb'ajel kyxitun tja Dios tuk'ix qtanmi, che chi.

49Ex at jun xjal kyxol, Caipás tb'i, toktoq nejenel kye pal tuj ab'q'i tej tkub' b'yo'n Jesús, xi tma'n kye:

—Kyeye minti' kynab'le; 50ex minti' nne'l kynik'e ti'j; mas b'a'n tu'n tkyim jun xjal te kyxel kykyaqil xjal ex mya tu'n kynaj kykyaqil xjal tuj nasyon lu, chi Caipás.

51Mya noq tu'nx Caipás o tma jlu; ate Dios o q'mante tuj tnab'l tu'nju toktoq te nejenel kye pal tuj ab'q'i lu, kyja'tzun tzaj tma'n naj qa ate Jesús tu'n tkyim te t-xel enter jun tnam xjal, aqeju xjal judiy; 52ex mya noq o'kx tu'n tkyim te t-xel enter tnam, ax ikx tu'n kytzaj chmo'n qe Tk'wa'l Dios tu'n kyten junx, aqeju otoq che el sputj. 53Kyja'tzun, atxixtzun tuj q'ij lu b'ant ti'j kyu'n aj sanjelal kye xjal judiy tu'n tkub' kyb'yo'n.

54Kyja'tzun minti'tl o ten Jesús kyxol xjal judiy, ik' laq'e', pon tuj jun tnam Efraín tb'i, niqayin ttxlaj lugar minti' kynajb'il xjal tuj; ex axtzun o ten kyuk'ix qe t-xnaq'tzb'en.

55Ch'ixtoq tul kanun ninq'ij kye xjal judiy, aju Xjan Q'ij tb'i; ex nimku xjal e tzaj tuj kojb'il e ja'wil tuj Jerusalén tu'n kytx'jonte kyib' ik tza'nx in tma'n kyley, akux na'nxtoq tul kanun Xjan Q'ij. 56Ex in che jyon ti'j Jesús, ex in che qanin ti'j kyxolx tuj tja Dios, in kyma'n:

—¿Chi tok kyu'ne? ¿Mi'npelo tzul tuj ninq'ij? Che chi.

57Qe nejenel kye pal ex qe fariseo otoq tz'etz jun orden kyu'n, qa at jun xjal ma tb'i jatum ta' Jesús, b'a'n tu'n tpon naj tqanil tu'n, tu'ntzun ttzyet Jesús kyu'n.

Currently Selected:

Juan 11: MAMNO

Highlight

Copy