Juan 10
10
Aju techal ti'j jun pe'n ẍne'l
1Tmatzun Jesús:
—Ax tok kxel nma'ne kyeye, alkye minti' nno'kx ttzi kype'n ẍne'l, noq o'kx nno'kx tuj juntl plaj, atzunte eleq'ju minti' t-xob'il. 2Atzun teju nno'kx ttzi pe'n, atzunte pastorju kye ẍne'l. 3Ex in jaqet ttzi pe'n tu'n xq'uqil pe'n tu'n tokx pastor, ex qe ẍne'l in kyb'i'n tq'ajq'ajel twi'; ex in che tzaj ttxko'n t-ẍne'l teyle junjun alkye kyb'i, ex in che etz ti'n. 4Ex oktzun kyetz ti'n kykyaqil qeju tekuxix, in kub' nej kywitz; ex in che ok lpe' ẍne'l ti'j, porke ojtzqi'n tq'ajq'ajel twi' kyu'n. 5Atzun ti'j junxitl xjal mlay che ok lpe' ti'j; noq o'kx che elel oq ti'j, tu'nju minti' ojtzqi'n tq'ajq'ajel twi' junxitl xjal kyu'n, chi Jesús kye.
6Xi tma'n Jesús aju techal lu kye; ex minti' el kynik' ti'j ti t-xilen aju o tma.
Ate Jesús ju b'a'n pastor
7Xitzun tma'n Jesús juntl maj kye:
—Ax tok kxel nma'ne kyeye: Aqine ttzi pe'n kye ẍne'l. 8Kykyaqil qeju e ul nej nwitze eleq' qe, ex minti' kyxob'il; ex minti' xi kyb'i'n qe ẍne'l kyyol. 9Aqine ttzi pe'n kye ẍne'l; alkye ma tz'oktz ttzi pe'n lu kkletel; ok k'oketz ex k'elex, ex knetel twab'l.
10Ate eleq' noq elq'al nnu'l ex b'yol kye ẍne'l ex in che naj tu'n; atzun weye ma chin ule tu'n tten kychwinqlal ex nimxix kychwinqlal tu'n tten. 11Aqine b'a'n pastor; ate b'a'n pastor in xi tq'on tib' tu'n tkyim tu'n kyklet qe ẍne'l. 12Atzunju xjal majen, ex mya axixte pastor, ex mya te qe ẍne'l, ok tlonte ok ttzaj xo'j, in che kyaj tkolin qe ẍne'l ex nne'l oq; atzun kye ẍne'l in che tzyet naj tu'n xo'j ex in che el sputj tu'n. 13Nne'l oq xjal porke majen ex minti' taj kyi'j ẍne'l.
14Aqine b'a'n pastor, ex ojtzqi'n qe nẍne'le wu'ne, ex qe nẍne'le ojtzqi'n qine kyu'n, 15ik tza'n te Nmane ojtzqi'n qine tu'n, ex ojtzqi'n Nmane wu'ne; ex in xi nq'on wib'e tu'n nkyime tu'n kyklet qe ẍne'l. 16Ax ikx ate' txqantl nẍne'le mya a ate' tuj pe'n lu; ax ikx il ti'j tu'n kytzaj wi'ne, ex ok kyb'i' tq'ajq'ajel nwi'ye; ex jun pe'nx ẍne'l ktel ex junx pastor.
17Tu'ntzunju in chin k'ujlanjtze tu'n Nmane, porke in xi nq'on wib'e tu'n nkyime ex chin jawil anq'ine juntl maj. 18Mi jun k'elel q'inte nchwinqlale, wu'nx wib'e kxel nq'on wib'e tu'n nkyime. At woklene tu'n t-xi nq'on wib'e tu'n nkyime, ex at woklene tu'n njaw anq'ine. Atzun mandamyent jlu ma nk'ame te Nmane, chi Jesús kye.
19Tzaj juntl maj kyyol xjal judiy kyxolx tu'n tlaj ju yol lu. 20Ex nimku kye in kyma'ntoq:
—At ju'ẍ tuj tanmi, ex ma tz'el tzpet tnab'l; ¿tiqu'n in xi kyb'i'ne tyol? Che chi.
21Atzun juntl k'loj in kyma'ntoq:
—Aju yol lu mya tyol jun xjal at ju'ẍ tuj tanmi. ¿Baqa jaku b'ant tu'n ju'ẍ tu'n tjaqet kywitz qe moẍ? Che chi.
El ik'un Jesús kyu'n xjal judiy
22In che ik'santoq xjal ninq'ij tuj Jerusalén tu'n ttzaj kyna'n tej tb'aj saqset tja Dios tu'n tok juntl maj k'ulb'il tuj. Tuj jb'aliltoq jlu. 23Atzunte Jesús in b'ettoq twitz tja Dios, aju twitz ja tok tb'i te Salomón. 24E oktzun txole' xjal judiy ti'jele Jesús ex xi kyma'n te:
—¿Jte' q'ij tu'n qtene noq in jawje' qk'u'je tu'na? Qa aya ju Crist aju at toklen tu'n Dios, q'mantza clarxix qeye.
25Xi ttzaq'we'n Jesús:
—Ma txi nma'ne kyeye, pero minti' ma txi kyoksla'ne nyole. Aju aq'untl in tma'n Nmane tu'n nb'inchanteye, atzun qe testiw wi'je; 26pero minti' in xi kyoksla'ne porke myatzun ate'ye kyxol qe nẍne'le, [ik tza'n ma txi nma'ne kyeye.] 27Qe nẍne'le in kyb'i'n tq'ajq'ajel nwi'ye, ex ojtzqi'n qe wu'ne, ex in che ok lpe' wi'je. 28In xi nq'o'ne kychwinqlal te jumajx, ex mlayx che naj, ex mi jun k'elel q'inte kye tuj nq'ab'e. 29A Nmane tzaj q'onte kye weye, ex mas nim toklen Nmane kywitz kykyaqil, ex mi jun jaku tz'el q'inte kye tuj tq'ab' Nmane. 30Aqine tuk'ix Nmane junx qo'ye, chi Jesús xi tma'n kye.
31Jawtzun kytzyu'n juntl maj xjal judiy ab'j tu'n tok kyxo'n ti'j. 32Xitzun tma'n Jesús kye:
—Nimku nb'inchb'ene b'a'n ma nb'inchaye kywitze tu'n tipumal Nmane; ¿alkyetzun jun nb'inchb'ene mya b'a'n kyxol jlu tu'n wok kyxo'ne tu'n ab'j?
33Xitzun kytzaq'we'n xjal judiy:
—Mlay tz'ok qxo'ne tu'n ab'j tu'n tlaj jun tb'inchb'ena b'a'n, noq o'kx tu'nju in yolina mya b'a'n ti'j Dios. Porke xjal teya ex nno'k tq'on tib'a te Dios, che chi.
34Xi ttzaq'we'n Jesús:
—¿Myapetzun tz'ib'an tuj kyleye, o nmaye qa dios qeye? Chi Dios. 35B'a'n qu'n aju tz'ib'an tuj ley mlay ch'expet, porke in tma'n qa dios qeju e k'monte tyol Dios. 36Aqine sk'o'maj qine tu'n Nmane ex ma chin tzaj t-sama'n kyxol xjal. ¿Tiqu'ntzun in kyma'ne weye: In yolina mya b'a'n ti'j Dios, che chiye, noq tu'nju ma txi nma'ne: Tk'wa'l Dios qine? 37Qa mya ax aq'untl in b'ant wu'ne ik tza'n in tb'incha'n Nmane, mi'n txi kyoksla'ne nyole. 38Qatzun ax aq'untl in b'ant wu'ne ik tza'n in b'ant tu'n Nmane, maske minti' in xi kyoksla'ne nyole, pero kyokslame aju nb'inchb'ene, tu'ntzun tel kynik'e ti'j ex tu'n t-xi kyoksla'ne qa ate Nmane at wuk'ile ex atine tuk'il Nmane, chi Jesús kye.
39Oktzun tilil juntl maj kyu'n tu'n ttzyet Jesús, ex etz tzoqpaj tuj kyq'ab'.
40Ex xi' juntl maj jlajxi nima jordán tuj lugar jatum e b'yan xjal tu'n Juan nej; ex axtzun kyaj ten. 41Ex nimku xjal e pon tuk'il, in kyma'n:
—Ax tok ate Juan mi jun señ b'ant tu'n; ex tkyaqilju o tma Juan ti'j ju xjal lu, ax tok, che chi.
42Ex nimku xjal e okslan ti'j Jesús tuj lugar lu.
Currently Selected:
Juan 10: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
