Génesis 27

Kub' ky'iwla'n Jacob ex Esaú tu'n Isaac

1Tej otoq tijin Isaac ex otoq moẍix twitz, tzaj ttxko'n aju tnejel tky'ajal Esaú tb'i, ex xi tma'n te kyja':

—Nky'ajal. Atzun te xi ttzaq'we'n:

—Lu qine lu, tat, chi Esaú.

2Xi tma'n Isaac te:

—Ma tila ma chin tijine, ex minti' b'a'n wu'ne alkye q'ij chin kyime. 3Q'inxa qe tplecha tuj kykub'il, tuk'ix xob'l tplecha, txi'ya tuj kojb'il ex q'intza txkup kb'el tu'na. 4B'inchama jun laq nchi'ye k'ok'j ik tza'n nganiye, ex q'intza tu'n t-xi nchyo'ne, tu'ntzun tkub' nky'iwla'na na'nxtoq nkyime, chi Isaac.

5Atzunte Rebeca in b'intoq tej in yolintoq Isaac tuk'il Esaú aju tky'ajal. Tejtzun t-xi' Esaú tuj kojb'il kamb'alte txkup te tchi' tman, 6xi tma'n Rebeca te Jacob aju tal:

—Ma nb'iye tyol tmana xi tma'n te Esaú aju ttzika, ex ma tma kyja': 7Q'intza txkup kb'el tu'na, ex b'inchama jun laq nchi'ye k'ok'j tu'n t-xi nchyo'ne, tu'ntzun tkub' nky'iwla'na twitz Qman na'nxtoq nkyime, chi tmana. 8Ja'lotzun wal, nimanxa aju kxel nma'ne teya. 9Txi'ya jatum ate' qe alumaj, ex q'intza kab'e tal chip tb'anilxix. Che b'ajel nb'incha'ne te tchi' tmana ik tza'nx tgan. 10Kxe'ltzun ti'na twitz tmana ex kxel tchyo'n, tu'ntzun tkub' ky'iwla'na tu'n na'nxtoq tkyim, chi Rebeca.

11Xitzun tma'n Jacob te Rebeca aju ttxu':

—Aju ntzike Esaú nojni ti'j tu'n xya'n, atzun weye mi'n. 12Yajtzun qa in chin ok mako'ne tu'n nmane, jakulo tma in chin xmayine ti'j, ex ktzajel wi'ne jun mya b'a'n wib'aje te t-xel ky'iwb'il, chi Jacob.

13Xitzun ttzaq'we'n ttxu':

—Wal, aju mya b'a'n jaku tzaj tib'aja, e tkub' tz'aq wib'aje. O'kx txi'ya, b'inchama aju ma txi nma'ne teya ex q'intza qe tal chip, chi Rebeca.

14Xi'tzun Jacob q'ilte kye tal chip ex xi tq'o'n te ttxu'. Ok ten ttxu' b'inchalte chib'j k'ok'j ik tza'nx tgan Isaac. 15Tzajtzun ti'n Rebeca t-xb'alun Esaú aju tnejel tal. Aju xb'alun lu tb'anil, ex k'u'ntoq tu'n Rebeca tuj tja. Ok tq'o'n xb'alun lu ti'j Jacob aju tkab'in tal, 16ex ok tq'o'n kytz'umal tal chip kyi'j tq'ab' Jacob tuk'ix ti'j tqul jatum minti'toq xya'n. 17Xitzun tq'o'n chib'j tuj tq'ab' Jacob, tuk'ix wab'j aju otoq b'ant tu'n.

18Okxtzun Jacob jatum ta'toq tman ex xi tma'n te kyja':

—Tat, chi Jacob.

Xitzun ttzaq'we'n Isaac:

—Lu qine lu. ¿Alkyeya, nky'ajal?

19Xitzun tma'n Jacob te tman:

—Aqine Esaú aju tnejel tky'ajala. Ma b'ant wu'ne aju saj tma'na weye. Tjaw qe'ya, chyo'na ti'j txkup ma nkamb'aye, tu'ntzun nkub' tky'iwla'na.

20Xitzun tqanin Isaac:

—¿Tza'n tten xknet naj tu'na, nky'ajal?

Xi ttzaq'we'n Jacob:

—Ate Qman Dios ma onin weye tu'n tknet naj.

21Xi tma'n Isaac:

—Laq'etza ex k'okel nmako'ne ti'ja nky'ajal, qa ax tok aya Esaú ex qa mi'n, chi Isaac.

22Xitzun laq'e' Jacob twitz tman. Atzunte tman ok tmako'n ex tma kyja':

—Aju tq'ajq'ajel wib'aj te Jacob, atzun qe q'ab'aj te Esaú, chi Isaac.

23Minti' el tnik' ti'j tu'nju attoq nim xya'n kyi'j tq'ab', ik tza'n kyi'j tq'ab' Esaú aju ttzik. Tej kyja'toq tkub' tky'iwla'n, 24xi tqanin juntl maj te:

—¿Axpe tok aya Esaú aju nky'ajale?

Xi ttzaq'we'n Jacob:

—Ax tok aqine.

25Xi tma'ntl Isaac:

—Q'intza chib'j tu'n t-xi nchyo'ne aju xkub' tu'na nky'ajal, tu'ntzun tkub' nky'iwla'na, chi Isaac.

Xitzun tq'o'n Jacob tchi' tman tuk'ix ta'l twitz uva. O wa'n ex o k'an Isaac. 26Xitzun tma'n Isaac te tky'ajal:

—Laq'etza nky'ajal, ex tz'ub'an ela nwitze.

27Xi laq'e' Jacob ex el ttz'ub'an twitz tman. O tna' Isaac tk'ok'jal t-xb'alun ex kub' tky'iwla'n kyu'n qe yol lu:

Ax tok, a tk'ok'jal nky'ajale jlu ik tza'n tk'ok'jal tuj kojb'il aju o kub' tky'iwla'n Qman.

28Tzajwit tq'o'n Dios jb'al teya twitz kya'j, nimxwit twitz tawala tz'ok twitz tx'otx', ex tenwt nim triw ex nim ta'l twitz uva tuk'ila.

29Che ajb'enwit xjal kyuj txqantl tnam teya ex che kub'wit ẍmeje' twitza qe xjal ate' kyuj txqantl nasyon. Tz'okxwita te kawil kyib'aj tiyjil termaniya ex che kub'wit mok'e' qe tiyjil tal ttxu'ya twitza. Tzajwit mya b'a'n kyib'aj qeju kxel kyqanin mya b'a'n tib'aja ex che kub'wit ky'iwla'n qeju che b'el ky'iwlante teya, chi Isaac.

30B'ajtzun ky'iwla'n Jacob tu'n Isaac, ex matoq nne'x jatum ta'toq tman tej tul meltz'aj Esaú kamb'al. 31Ax ikx te Esaú b'aj tb'incha'n chib'j k'ok'j, xi ti'n te tman ex xi tma'n te kyja':

—Tjaw qe'ya tat, ex chyo'na ti'j txkup ma kub' wu'ne, aqine tky'ajala, tu'ntzun nkub' tky'iwla'na.

32Xitzun tqanin Isaac te:

—¿Alkyetzuna?

Xi ttzaq'we'n Esaú:

—Aqine Esaú aju tnejel tky'ajala, chi Esaú.

33Jawtzun lu'lun Isaac nimxix ex xi tma'n te kyja':

—¿Alkyetzun xi aj kamb'al ex ma tzul ti'n chib'j weye? Ma b'aj nchyo'ne tkyaqil tej na'nxtoq tula. Ma kub' nky'iwla'ne, ex ja'lo ky'iwlamajtl.

34Tejtzun tb'inte Esaú aju tma tman, ok ten oq'el kyuwxix, ex jaw tq'ajq'ajel twi' b'isb'ajilxix:

—Tat, ax ikx weye chin tky'iwlan kub'a, chi Esaú.

35Xi tma'n Isaac:

—Ma tzul aj termaniya, ma chin kub' t-sb'u'n, ex ma tk'am ky'iwb'il aju tetoqa.

36Xi ttzaq'we'n Esaú.

—Tuj tumelxlo Jacob tb'i toksa'n. Atzun tkab'in maj lu chin kub' t-sb'u'n. Tnejel o tz'el ti'n woklene te tnejel k'wa'lb'aj, atzun ja'lo ma tz'el ti'n ky'iwb'il, aju wetoqe. ¿Minti'pe juntl ky'iwb'il ma kyaj tklo'na te weye? Chi Esaú.

37Xi ttzaq'we'n Isaac te Esaú kyja':

—Ma txi nq'o'ne toklen Jacob tu'n tkawin tib'aja ex ma che'x nq'o'ne kykyaqil qe tiyjila te tmajen, ax ikx ma txi nma'ne tu'n tten nim triw ex nim ta'l twitz uva tuk'il. Nky'ajal, ¿titzun kb'antel ti'ja wu'ne ja'lo?

38Xi tma'ntl Esaú te tman:

—Tat, ¿o'kxpe junx ky'iwb'il at tuk'ila? Ax ikx weye chin tky'iwlan kub'a, chi Esaú.

Jaw oq'tl Esaú.

39Xitzun tma'n Isaac te Esaú kyja':

Knajala najchaq ti'j tb'anil tx'otx' ex najchaq ti'j jb'al twitz kya'j.

40Ok tkla' tib'a tu'n t-spadiya ex k'okela tmajen termaniya; oktzun tok tipuna, kkolpetela tjaq' tkawb'il.

El oq Jacob twitz Esaú

41Eltzun ik'un Jacob tu'n Esaú tu'n tlaj ky'iwb'il xi q'o'n te tu'n tman, ex tma Esaú tuj tanmi: Ch'ix tpon tq'ijlalil tu'n tkyim nmane, ex te tib'ajxi jlu kb'el nb'yo'ne witz'ine Jacob.

42Tejtzun tb'inte Rebeca aju in ximantoq Esaú ti'j, xi tma'n tu'n t-xi txokb'aj Jacob aju tkab'in tal. Xitzun tma'n te kyja': Taj ttzika Esaú tu'n tkub' b'yo'na tu'n, tu'ntzun t-xelin aju mya b'a'n tb'inchaya ti'j. 43Atzun ja'lo wal, b'intza aju kxel nma'ne teya. B'incham ttena ex txi oqa tja nxib'ane Labán, aju najl tuj Harán. 44Tena tuk'il junjun q'ij, akux in b'aj tq'oj ttzika, 45akux in b'aj ttx'u'jil ti'ja, ex akux nnik' tna'l tu'n aju tb'inchaya ti'j. B'a'ntzun t-xi nsama'ne jun xjal txkolte teya tu'n tajtza. Mi'n waje tu'n kynaj qe kab'e wale te junx q'ij.

46Xitzun tma'n Rebeca te Isaac: Mya b'a'n atine kyu'n qe xu'j aj Heteo, aqeju kab'e t-xu'jil Esaú. Qa ma moje' Jacob tuk'il jun xu'j aj Heteo ik tza'n qe jlu, aqeju najl tzalu tuj Canaán, maslo b'a'n tu'n nkyime, chi Rebeca.

Currently Selected:

Génesis 27: MAMNO

Highlight

Copy