Génesis 28

1Txket Jacob tu'n Isaac, kub' tky'iwla'n ex xi tma'n te kyja': Mi'n moje'ya tuk'il jun xu'j aj Canaán. 2B'incham ttena, txi'ya tuj tx'otx' Padan-aram, max tja tchmana Betuel, ex moje'ya ma chixin tuk'il jun tme'jel Labán aju t-xib'an ttxu'ya. 3Awt Dios ky'iwlante teya, aju Dios at tipumal tu'n tb'ant tkyaqil tu'n, chmet-xwit nim tiyjila, ex che elwit poq'l nimku k'loj xjal ti'ja. 4Tzajwit tq'o'n teya ex kye tiyjila aju ky'iwb'il tzaj ttziyan te Abraham, ex tz'okwita tajwil tx'otx' lu jatum najl qo' ja'lo ik tza'n stranjer xjal, aju tx'otx' o tzaj ttziyan Dios te Abraham, chi Isaac.

5Kyja'tzun tten, xi sama'n Jacob tu'n Isaac tuj Padan-aram. Pontzun Jacob tja Labán aju tky'ajal Betuel aju aj Arameo; ate Labán t-xib'an Rebeca, aju kytxu' Jacob ex Esaú.

Moje'tl Esaú

6O tb'i Esaú otoq kub' ky'iwla'n Jacob tu'n Isaac, ex otoq txi t-sama'n tuj Padan-aram tu'n tmoje' ma chixin, ex tej tkub' tky'iwla'n Isaac otoq txi tma'n te kyja': Mi'n moje'ya tuk'il jun xu'j aj Canaán. 7Ax ikx o tb'i Esaú otoq txi tniman Jacob tyol tman ex tyol ttxu', ex otoq txi' tuj Padan-aram. 8Kyja'tzun el tnik' Esaú ti'j, mya b'a'n in che e'la qe xu'j aj Canaán tuj twitz Isaac aju tman. 9Xi'tzun Esaú tuk'il Ismael aju tky'ajal Abraham, ex moje' tuk'il Mahalat, aju tanb' Nebaiot ex tme'jel Ismael, ex mya o'kx jlu, ax ikx attoq mastl t-xu'jil.

Kub' tyek'un tib' Dios twitz Jacob tuj Betel

10Etztzun Jacob tuj Beerseba tu'n tpon tuj Harán. 11Pon tuj jun lugar ex ax kyaj ten te qonik'an tu'nju otoq tz'ex q'ij. Ax jaw ti'n jun ab'j ma chixin ex kub' tq'o'n te t-xwi' ex kub' tan tuj lugar lu. 12Ok jun twitzik' ex o til lu jun scaler xi'yni twitz tx'otx' japun b'aj max twitz kya'j. Lu qe t-anjel Dios in che jaxtoq ex in che ku'tztoq twi scaler. 13Ax ikx o til Jacob lu Qman wa'ltoq max twi scaler, ex tzaj tma'n te kyja': Aqine Tmana, aju Tdios tchmana Abraham ex Tdios tmana Isaac. Teya ex kye tiyjila kxel nq'o'ne tx'otx' jatum tx'ayl tkub'a ja'lo. 14Che chmetel qe tiyjila wu'ne ik tza'n tquqil tx'otx', kb'ajel kysipan kyib' jawni ex kub'ni, okni ex elni; noq tu'n tlaja ex tu'n kylaj tiyjila, che b'el ky'iwla'n kykyaqil xjal twitz tx'otx'. 15Lu qine atine tuk'ila; k'okel nkwentine noq jatumchaq kpola, ex k'ajetz meltz'aja wu'ne juntl maj tuj tx'otx' lu. Mlay kyaj nkolina qa na'nxtoq tjapun aju in xi nma'ne teya, chi Dios.

16Tejtzun tel twatl Jacob kub' t-ximan: Ax tok at Qman tuj lugar lu ex minti'toq b'a'n wu'ne. 17Tzaj t-xob'il ex tma: Xob'ajilxix te lugar lu. A jlu tja Dios ex ttzi kya'j.

18Te prim tuj juntl q'ij jaw we' Jacob, jaw ti'n aju ab'j otoq tz'ajb'en te t-xwi', jaw twab'an te jun techal ex kub' tqo'n aseyt tib'aj. 19Betel#28.19 Betel. Tuj yol ebrey atzun in tma'n: A jlu tja Dios. tb'i lugar lu ok tq'o'n, maske Luz tb'i tnam nej. 20Xitzun ttziyan Jacob jun yol te Qman ex tma kyja': Qa ma txi' Dios wuk'ile, qa ma chin ok kwentine tu'n tuj nb'eye, qa ma tzaj tq'o'n nwaye tuk'ix nxb'alune, 21qa b'a'n ma chin pon meltz'aje tja nmane, k'okeltzun Qman te Ndiose. 22Aju ab'j ma jaw nwab'ane te jun techal, k'okel nq'o'ne te tja Dios, ex kxel nq'o'ne teya aju tlaji'n ti'j tkyaqilju ktzajel tq'o'na weye, chi Jacob.

Currently Selected:

Génesis 28: MAMNO

Highlight

Copy