Génesis 14

Kolpet Lot tu'n Abram

1Tuj tq'ijlalil lu toktoq Amrafel te rey tuj Sinar, atzunte Arioc toktoq te rey tuj Elasar, atzunte Quedorlaomer toktoq te rey tuj Elam ex atzunte Tidal toktoq te rey tuj Goím. 2Aqe jlu e q'ojin ti'j Bera rey te tnam Sodoma, ti'j Birsa rey te tnam Gomorra, ti'j Sinab rey te tnam Adma, ti'j Semeber rey te tnam Seboím ex ti'j rey te tnam Bela (aju ax juntl tb'i Zoar). 3Aqeju jwe' rey lu ok kychmon kyib' kyuk'ix qe kysoldad tuj chq'ajlaj Sidim, jatum ta' mar at nim atz'an tuj. 4Ate rey Quedorlaomer otoq kawin kab'laj ab'q'i kyib'aj, ex tuj toxlajin ab'q'i jaw kyi'n kyib' tu'n kyq'ojin ti'j. 5Tuj juntl ab'q'i tzaj Quedorlaomer kyuk'ix qe txqantl rey mojl kyyol tuk'il. Kub' kyi'j aj Refaim kyu'n tuj Astarot Karnaim, kub' kyi'j aj Zuzim kyu'n tuj Ham, kub' kyi'j aj Emim kyu'n tuj Save-quiriataim, 6ex kub' kyi'j aj Horeo kyu'n tuj tiwitz tx'otx' Seir, ul b'aj max tuj chq'ajlaj Parán aju tkub' ttxa'n tzqij tx'otx'. 7Ajtzun meltz'aj Quedorlaomer kyuk'ix qe tuk'il, ex e pon tuj En-mispat, ex ax juntl tb'i Cades. Tkyaqil b'aj naj kyu'n tuj kytx'otx' aj Amalec, ax ikx kyb'incha kyi'j aj Amorreo, aqeju najltoq tuj Hazezon-tamar.

8Ultzun rey te Sodoma tuj chq'ajlaj Sidim, tuk'ix rey te Gomorra, rey te Adma, rey te Seboím ex rey te Bela (aju ax juntl tb'i Zoar), ex atzun tzyet q'oj kyu'n. 9E q'ojin qeju jwe' rey kyi'j qe kyaje rey lu: Quedorlaomer rey te Elam, Tidal rey te Goím, Amrafel rey te Sinar ex Arioc rey te Elasar. 10Tejtzun tel oq rey te Sodoma tuk'ix rey te Gomorra, e ku'x tz'aq junjun kyuj qe jul nojni tu'n asfalt, aqeju ate'toq tuj tkyaqil chq'ajlaj Sidim. Atzun qe txqantl e jax oq twi witz.

11Qeju e kamb'an xi kyi'n tkyaqil kywa ex tkyaqil kyq'inumab'l aj Sodoma ex aj Gomorra, ex e ik'tzun. 12Tuk'ix Lot xi kyi'n pres, aju tky'ajal terman Abram, tu'nju najltoq tuj Sodoma, ax ikx xi kyi'n tkyaqilju attoq te. 13Jun xinaq otoq tzoqpaj tuj q'oj, ul q'malte te Abram aju aj Hebreo ti'j tkyaqilju otoq b'aj. Atzun najltoq Abram kyjaq' qe tze' k'ol tuj ttx'otx' Mamre aju aj Amorreo. Ate Mamre terman Escol ex Aner. Aqe jlu mojl kyyol tuk'il Abram.

14Tejtzun tb'inte Abram otoq tz'okx presin tky'ajal terman, e b'aj tchmo'n qe tmajen aqeju ax e itz'j tuj tkwent. Tu'n tkyaqil 318 kyb'et qe tmajen, ex kykyaqil qe jlu e je'x lpe' kyi'j qe rey tejxi kypon tuj tnam Dan. 15Te qonik'an ok tzoqpaj Abram kyuk'ix qe t-xjalil q'ojlel kyi'j qe rey; kub' kyi'j tu'n ex ok lpe' kyi'j tejxi kypon tuj Hoba, aju tkub' tuj tumlal tb'anq'ab' q'ij te tnam Damasco. 16El ti'n tkyaqil q'inumab'l otoq txi kyi'n qe rey. Tuk'ix Lot kolpet tu'n, aju tky'ajal terman. El ti'n kye rey tkyaqil tq'inumab'l Lot. Ax ikx qe xu'j ex qe txqantl xjal e kolpet tu'n.

Kub' ky'iwla'n Abram tu'n Melquisedec

17Tej tajtz Abram tkub'lenxi ti'j Quedorlaomer tu'n, kyuk'ix qe rey ate'toq tuk'il, etztzun rey te Sodoma k'molte Abram tuj chq'ajlaj Save (aju ax juntl tb'i Tchq'ajlaj Rey). 18Ate Melquisedec rey te Salem ex pal te Dios, aju Dios Ma'xix Toklen, ul ti'n pan ex ta'l twitz uva. 19Kub' ky'iwla'n Abram tu'n, chi kyja':

Ky'iwla'nxwit Abram tu'n Dios, aju Dios Ma'xix Toklen, aju b'inchante kya'j ex tx'otx';

20ex nimanxwit Dios, aju Dios Ma'xix Toklen, aju tzaj q'onte qe aj q'oj ti'ja tuj tq'ab'a, chi Melquisedec.

Ex xi tq'o'n Abram te Melquisedec tlaji'n ti'j tkyaqilju otoq tz'el ti'n kye rey. 21Aju rey te Sodoma tzaj tma'n te Abram kyja':

—Q'ontza qe xjal weye, atzun teya, q'inkja qe q'inumab'l.

22Atzunte Abram xi ttzaq'we'n kyja':

—O txi ntziyane te Nmane, aju Dios Ma'xix Toklen, aju b'inchante kya'j ex tx'otx': 23Mlay txi wi'ne jun noq', mi jun taq'al xjab' ex mi jun ti'xti teya, tu'ntzun mi'n tmanteya kyja': Wu'ne o tz'ok Abram q'inun. 24Noq o'kx ok nk'maye aju b'aj kywa'n qe majen. Ex qe xinaq ẍe'x aj wuk'ile: Aner, Escol ex Mamre, b'a'n tu'n kyk'monte aju at kyoklen ti'j.

Currently Selected:

Génesis 14: MAMNO

Highlight

Copy