Génesis 13
13
El kypa'n kyib' Abram tuk'il Lot
1Etztzun Abram tuj Egipto tu'n tul tuj tx'otx' Néguev tuk'ix t-xu'jil ex tkyaqilju attoq te. Tuk'ix Lot etz tuk'il. 2Attoq nimxix tq'inumab'l Abram, nim talun, nim saq pwaq ex nim q'an pwaq. 3Cheb'ale ajtz tuj Néguev tu'n tul max tuj tnam Betel, ex tu'n tultl jatum otoq kub' tq'o'n tja, xb'alun ja, t-xol tnam Betel tuk'il Hai, 4jatum otoq kub' tb'incha'n jun altar, ex atzun tzaj tna'n tb'i Qman.
5Ax ikx te Lot, aju in b'ettoq tuk'il Abram, ate'toq t-ẍne'l, twakẍ ex qe xjal ax najl tuk'il; 6atzunju lugar jatum o che ten minti' kanun tu'n kyk'a'chit kykyaqil qe kyalun, tu'nju nimxix. Minti' tumel tu'n kyanq'in junx. 7Tzaj q'oj kyxol qe kwentil talun Abram ex qe kwentil talun Lot. Ax ikx ax najltoq qe aj Canaán ex qe aj Ferezeo tuj lugar lu. 8Tmatzun Abram te Lot kyja': Mya b'a'n tu'n tten q'oj qxol, mi kyxol qe kwentil walune ex qe kwentil taluna, tu'nju qerman qib'. 9Ja'lotzun chin kub'sale twitza, pa'mil tib'a wi'je. Lu tkyaqil tx'otx' tkub' twitza. Qa ma txi'ya tuj nayaj, jaku chinx weye tuj b'anq'ab'aj; qatzun ma txi'ya tuj b'anq'ab'aj, jaku chinx weye tuj nayaj.
10Xitzun tke'yin Lot tkyaqil chq'ajlaj ttzi a' Jordán. Aju tx'otx' lu attoq nim a' tuj te a'lb'il tx'otx' ex tb'anilxixtoq ke'yin, ponin b'aj max ti'j tnam Zoar, ik tza'nju tawal Qman, ex mer ik ke'yin ik tza'n tx'otx' Egipto. A jlu o b'aj tej na'nxtoq kykub' t-xitun Qman qe tnam Sodoma ex Gomorra. 11Jawtzun t-sk'o'n Lot tkyaqil chq'ajlaj ttzi a' Jordán, ex kyja' xi' tuj tjawitz q'ij. Kyja'tzun el kypa'n kyib' Abram tuk'il Lot. 12Kyajtzun ten Abram tuj tx'otx' Canaán, atzunte Lot xi' najal kyxol qe tnam ate'toq tuj chq'ajlaj, niqayin ti'j tnam Sodoma. 13Kykyaqil xjal tuj Sodoma puro mya b'a'n qe ex aj ilxix qe twitz Qman.
14Tel-lenxi tpa'n tib' Lot, tma Qman te Abram kyja': Ax jatum ta'ya, ke'yinxa jawni ex kub'ni, okni ex elni; 15tkyaqil tx'otx' in tila kxel nq'o'ne teya ex kye tiyjila te jumajx. 16Ik che okel qe tiyjila wu'ne ik tza'n tajlal tquqil tx'otx'. Qa at jun xjal jaku b'ant tajlante tquqil tx'otx', ax ikx kb'antel tajlante kyi'j tiyjila. 17We'ktza ex b'eta twitz tx'otx' lu. B'etinxa tuj tnuqb'il ax ikx tkyaqil twitz, porke teya kxel nq'o'ne.
18Ik'tzun tlaq'b'a'n Abram tja, xb'alun ja, ex xi' najal kyjaq' qe tze' k'ol tuj ttx'otx' Mamre, niqayin ti'j tnam Hebrón. Atzun jaw tb'incha'n jun altar te k'ulb'il te Qman.
Currently Selected:
Génesis 13: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
