Marko 14

Weynaanti Yaꞌhuud saggi iche Yeesso itagiis yowatta

(Mattaayo 26:1-5, Luuka 22:1-2, Yoohana 11:45-53)

1Ibeen lamma ankhane ꞌdee daawti Baasakka ichoow Daawti Makaateti Liikhasin lagela. Kuhaaniyyohi wewween ichoow tagaammeti amurre la ekkeysi ka saggi iche Yeesso ikhabatti ꞌdee itagiise yowatta.

2A mehe wihi icho essaan, “Uus inno daawta goyaka khaban. Kolossoo enenyet hol ka il a baabiichaa.”

Yeesso Beꞌdaaniya ka matah lasubha omoottiis liitannabicha

(Mattaayo 26:6-13, Yoohana 12:1-8)

3Yeesso ilkerengeetti Beꞌdaaniya ka minki etoo Siimonhi Ki Buꞌda Khabe layadeeh ka, komborti ballaaddane lakagolossati ka dikkile kajiifa golossata. Makhaabassoo kurunkoo daakki alabaasta lakahaaggiche miricchihoo weyti gato miige kijiro geeyoo naad layadeeh lakahaaggiche leetimiy. Kurum lukhum jebisse, Yeesso miricchi matah kakhubte.

4ꞌDooꞌdi intaas kijire gaasoo, “Miricchiha a iꞌdoh immarah labaabiicho?” iche hol ka isidowa. 5“Kootte chilimmeti eti guꞌhoo hil haaggiche laguto ꞌdirihiissa lakoororicha, chilimme miskiin lasiicha,” iche essaan. Icho la makhaabál weyti leejaakheen.

6Yeesso wihi us yidah, “A iꞌdoh iche imalalissaan? ꞌDiicha! Wihi iche iyeesse a haaggi weyti buure. 7Miskiin kol dakkhan goytiinna kakhabtaane, kolbaaw atin ꞌdoontaan la a gargaartaan. Iꞌdaasenyi ani kol dakkhan ma ikhabtaan. 8Makhaabassa wihi iche tabuuꞌd tuummane yeesse. Sarteey miricchi ka subahte, orey on geeddi liihawwaalin tannabisse. 9Rume atin icheeka, meelbaaw Wori Haaggan harra tuumman ka lacheeko ka, wihi iche yeesse laka a lacheeka, iche la lakasooꞌhela.”

Yuuda Yeessó ꞌdub goocha

(Mattaayo 26:14-16, Luuka 22:3-6)

10ꞌDeerka Yuuda Iskaariyoothi ullaka abatti Yeessoti tomon ichoow lammee kichekoowe, kuhaaniyyohi wewween iirte, Yeessó ꞌdub goocha dahanohicho gessaa. 11Inkoo icho wahaas daageen ka weyti hamaadeene toro chilimme iayyicheen. Yuuda ꞌdeerka inti leemujjumenye us Yeesso dahanohicho kagesso yowte.

Yeesso gololi daawti Baasakka abattitiis leeyaham

(Mattaayo 26:17-25, Luuka 22:7-14, 21-23, Yoohana 13:21-30)

12Ibeenki oraate Daawti Makaateti Liikhasin maanti heleenki daawti Baasakka lasoorriyoocho eheet. Ibeenkaas goya abatti Yeesso wihi iche Yeesso worsatte, “Intoh ꞌdoonta iranna katannabanna, ꞌdee gololi daawti Baasakka kataham?”

13ꞌDeerka abattitiistoo lammee erge wihi us iyidah, “Nyaama ilkerengeet gela, etoo ꞌdirihoo biccheet siꞌdo afiin a kayamiite raaha. 14Minki us gelo wihi atin ooyo itadeehiin, ‘Eti Ween mehe worsata ya, min goyaka meessi marti ani ichoow abattiteey gololi daawti Baasakka kanaham meeke?’ 15Meessoo buurenye minkiis sartiisenye meeh tuumman khabto lahaaggiche iche atin tusa. Intaas ka golol inno ihaaggicha.”

16Abatti bahte ilkerengeet gesse, walah dakkhan ba iꞌdi kootte usu iyidah on iꞌheleen. ꞌDeerka gololi daawti Baasakka haaggisse.

17Chirri il gelebnowe ka, Yeesso abattitiisti tomon ichoow lammee khabaayi yimiy. 18Chirra icho komborti lakagolossati ka dikkille kajiifaane golossataan ka, Yeesso wihi us yidah, “Rume atin icheeka, etiinkoo ꞌdub igoocha, a etiinkoo ileegolossati.”

19Iche tuumman fool ribowe kooba, “Rumanka ani mee menya?” worsate.

20Wihi us ilaabe, “Atinha tomon ichoow lammee, a etiinkoo. A etiinki makaate karanta ikaleelugꞌdo. 21Ínam Aadam iꞌdi usu miinsane lachiiruu, a yamuut. Iꞌdaasenyi eti Ínam Aadam ꞌdub goocho, sinati sugto eenna a buure! Usuhi goorat idelanne deefta.”

Gololi Kamur

22Golossataani Yeesso makaate khaate Waakh kalaꞌd ilaabe, jejjebche abattitiis ididdiibe, wihi us yidah, “Khaata, waha a sartaayaa.”

23Toro kokkoob khaate, Waakh kalaꞌd ilaabe, abatti idiibe, iche tuumman la isleeanguumatte.

24“Waha a diiggeeyki ayyinti husube Waakh enenyet igoocho, a diiggi iroonoti enenyeti buure liikhubo. 25Rume atin icheeka, an farsoti sabiib toro ma damo, ichoowka ibeenkaas an wihi husub dakhi Waakh ka damo yateeh.”

26Inkoo icho geeyoo Waakh dowteen ka, Hali Geeyohi Oolif ibaheen.

Beetero Yeesso, “An ma kigardi,” iyadeeh

(Mattaayo 26:31-35, Luuka 22:31-34, Yoohana 13:36-38)

27Yeesso wihi us abatti iyidah, “Atin tuumman a ikafiriddaan, a mehe wihi chiiran,

“ ‘An ersime guꞌdda,

iiye la seley baabaata.’#14:27 Sakkariiya 13:7.

28Iꞌdaasenyi inkoo an omoot kasookahe, boroofenhi Gaalilaaya ortiin a irda.”

29Beetero la, wihi us yidah, “Chirri iche tuumman kaafiridde laka, ani ma kaafirdo!”

30Yeesso wihi us ilaabe, “Rume atin icheeka, maanta ibeenka goya laka, geeddi lukki kol lamma iriirin, ati rubeytaah kol seyyahe, ma igaratti tadeeh!”

31Iꞌdaasenyi Beetero weyti yeediis katirriinsate wihi us yidah, “Chaꞌan kileeamuut laka, jirtuu ma kigardi ma adeeh!” Ti addan tuumman laka iꞌdaas tidah.

Yeesso meessoo Gesseemane layadeeh ka Waakh wahta

(Mattaayo 26:36-46, Luuka 22:39-46)

32Intoo Gesseemane layadeeh irteene, Yeesso wihi us abatti iyidah, “Inta orronda, geeddi an Waakh wahdi.” 33Beetero ichoow Yaakoobo ichoow Yoohana khaatte. Sohtaayi, uur goya iooye, mali uskul gele. 34“Huleesi rubeyteey kijiro, huleesi omooteet laka a ikeena. Inta fiddiya, toorribda la,” iyidah.

35Iꞌdaaru orey isohte, il isiꞌdiiche, Waakh wahte, chiꞌiche tateeh sahaꞌdda sinayyoot usu a kakutto. 36Wihi us yidah, “Aabba, Aabbahaaw, ati ka walah tuumman a geeddi icho yateehiin. Kokkooba sinayyoot ikakhaat. Iꞌdaasenyi in an ꞌdoono menye, in at ꞌdoonto a titaahe.”

37ꞌDeerka abattitiis inokhte, ichehi uꞌdurto ꞌhele. Beetero leeyeede, wihi us iyidah, “Siimon, a uꞌdurte? At sahaꞌddoo kalday laka toorribnaan a agaafatte? 38Toorribda Waakh wahda, ꞌdee kajmeti uskeel atin kaluguꞌddo akidihina. Rubeyohiin wihi mujjumenye ꞌdoonaane, iꞌdaasenyi sartiinna ꞌdabakhe.”

39Toro irte Waakh wahte, wihi kootte us yidah on inokhte. 40Chuꞌus soonokhti, ichehi uꞌdurto, indo hulees kore toro ꞌhele. Wihi iche usu itadeeh ma garatti.

41Koli seyyahnaatteet soonokhte, wihi us iyidah, “Atin uliba a uꞌdurtaane, nassaan? A geeddaas on! Sahaꞌde a titah. Yeya, Ínam Aadam ꞌdube lagoocha, dahanohi ꞌdooꞌdi uskeel leh lagessa! 42Sookaha a iranni! Eti ꞌdub igoocho kalla soosohtaa!”

Yeesso lakhabta

(Mattaayo 26:47-56, Luuka 22:47-53, Yoohana 18:3-12)

43Yeesso yeyyeedaayi, Yuudahi ullaka abattiti tomon ichoow lammee kichekoowe yimiy. ꞌDooꞌdi sooraahe a ururoo birlabbe ichoow khokkhoomme khabo, kuhaaniyyohi wewween ichoow tagaammeti amurre ichoow ewweenki Yaꞌhuud sooergate.

44Eta Yeesso ꞌdub goocho la mehe urur iskakhabeen ya, “Eti ꞌdee an dongade, a usu, khabda khaata iskar a toorribto.” 45Yuuda chirraas on Yeesso iirte, “Eti weenoow!” iyidahye dongate. 46ꞌDooꞌd la Yeesso khabte hide. 47ꞌDeerka etoo ullaka intaas toollo, birlab on sooꞌhiire falfati kuhaanihi weyti ween guꞌdde nabah ngꞌure.

48Yeesso la wihi us yidah, “Chaꞌatin khokkhoomme ichoow birlabbe leetimaateene ikhabattaan, an a etoo enenyet walah saro? 49Maan tuumman ani a atin leejire one, uranti minki Waakhe buure ka Yeedi Waakh atin abche, ma ikhaban la. Iꞌdaasenyi wahanyeyyoha a yitaaheene ꞌdee wihi Chiirnaanneti Waakh kachiiran labuuhicha.” 50ꞌDeerka ꞌdooꞌd tuumman usu katabe kafirde.

51Etoo nugule dafartoor sookorsate la Yeesso ꞌdubiissa sooraaha. ꞌDooꞌdi kootte Yeesso woyo la, etaas khabte. 52Ulla dafar intaas on katabe, murukhenyi firde.

Yeesso min kuhaanihi weyti ween lakeena lahukkuma

(Mattaayo 26:57-68, Luuka 22:54-55, 63-71, Yoohana 18:13-14, 19-24)

53Yeesso minki kuhaanihi weyti ween geecheen. Kuhaaniyyohi wewween tuumman ichoow ewweenki Yaꞌhuud ichoow tagaammeti amurre kulmeen. 54Beetero la fogaka Yeesso sooraahe ichoowka uranti kuhaanihi weyti ween fiddiyo goya gele. Intaakka iskarti meel yaakhisso koorronte ꞌdab dahammoote.

55Kuhaaniyyohi wewween ichoow Jaldaabti Weene Yaꞌhuud tuumman, garti iche yeeddo, ꞌdee icho Yeesso omoot ikagoochaan yowteene, iꞌdaasenyi walah icho ꞌheleen mele. 56A mehe ꞌdooꞌdi buurenye Yeesso garti beenaat kacheekte, iꞌdaasenyi yeedicho ma israahin.

57ꞌDeerka ꞌdooꞌdoo kahe, garta beenaat yeede, wihi icho yidaaheen, 58“‘Minka Waakhe buurenye dahanohi enenyet diseen a jejjebcha koo addane enenyet idisin ibeen seyyah goyaka disa,’ usuhi essi a daagne.” 59Iꞌdaasenyi garti icho laabeen laka ma israahin.

60Chirraakka kuhaanihi weyti ween ꞌdooꞌd tuumman ortiis ka kahe, wihi us Yeesso worsate, “Walah at soolaabto mele? Yeeda enenyet kaacheekti, mehe jira?” 61Iꞌdaasenyi Yeesso gammadiche, walah us soolaabe mele.

Kuhaanihi weyti ween toro wihi us worsate, “At a Ki Lasubhe, a Weeli Waakkhi Lakoolicho?”

62Yeesso la wihi us iyidah, “Aa, a ani. Ínam Aadam la usuhi Waakkhi Miig Leh anki dahantiisti miigeet fiddiyo toro mirsohi saraat fuulaayi yamiit a agartaan.”

63Kuhaanihi weyti ween hol on ka ubbaariiski deer kharradiche, wihi us worsate, “Inno a iꞌdoh ꞌdooꞌdoo addane gar laabo iyowanna? 64Atin saggi us igafe a daagteen gon! Mehe goosseen?” enenyet worsate. Icho tuumman omoote imasse ayyicheene, omoot igoocheen.

65Gaasichekoo hanjuf katufin sookhabteene, indo hideene khomhoyyo kajaheene, “Eti Waákh íyeyyeedoow, eti kiguꞌdde nah isoocheek,” idoween, a kachaartaanee. Iskarti meel yaakhisso khaatte, jahte.

Beetero Yeesso ma garti yadeeh

(Mattaayo 26:69-75, Luuka 22:56-62, Yoohana 18:15-18, 25-27)

66Beetero uranti minkaas khariise iliche fiddiyaayi, inantoo falfati kuhaanihi weyti weene timiy. 67Chirri iche Beeterohi ꞌdab dahammooti agarte ka fiirisse,

“At laka etaas Naasarete Yeesso layadeeh a leejirte,” tidah.

68Iꞌdaasenyi ꞌdiiꞌde, “An waha at elatti ma gardi, foolicho ma khabo ba,” yidahye, kahe, anki ariteet tabe. Chirraas on lukkihoo riire.

69Chirri inanti falfee intaas ka agarte ka, ꞌdooꞌdi intaas toollo wihi iche toro itidah, “Reenka alah a kichekoo.” 70Beetero toro ꞌdiiꞌde.

Iꞌdaaru on fiddiyeene, ꞌdooꞌdi intaas hagga toollo wihi us Beetero iyidah, “At rumanka a kichekoo, iꞌdi tahe at laka a ꞌdooꞌdi Gaalilaaya!”

71Beetero isabaare toro Waakh dowe, “An eta atin kaayyeeddaan ma gardi!” yidah.

72Chirraas on lukki koli lammaatteet riire. ꞌDeerka Beetero yeedi Yeesso iyidah kasooꞌhele, “Geeddi lukki kol lamma iriirin, at kol seyyah, ‘Ma kigardi!’ tadeeh.” Chirraas on ilmo sookhube, ooye.

Currently Selected:

Marko 14: rel

Highlight

Copy