Marko 15

Yeesso Bilaatohi yaafti Roomeenye gaafanahi ili Yaꞌhuudiyee liigeecha

(Mattaayo 27:1-2, 11-14, Luuka 23:1-5, Yoohana 18:28-38)

1Uun il barye, kuhaaniyyohi wewween ichoow ewweenki Yaꞌhuud ichoow tagaammeti amurre ichoow Jaldaabti Weene Yaꞌhuud tuumman wihi icho Yeesso yeelaan goocheen. Yeesso hidhideene, khaateene, dahan Bilaato gesseen. 2Bilaato wihi us worsate, “Karnati Yaꞌhuud a ati?”

Yeesso wihi us ilaabe, “A rum, a iꞌdaas at elatti on.”

3Kuhaaniyyohi wewween wihi ittaawenye Yeesso kacheekteen. 4Bilaato ꞌdeerka toro Yeesso wihi us worsate, “At wahanyeyyoha ma soolaabto? Bal waha ittaawenye icho kaacheektaan yey!”

5Iꞌdaasenyi Yeesso walah uliba us laabe mele, Bilaato la girmeeste.

Yeesso omoot liigoocha

(Mattaayo 27:15-26, Luuka 23:13-25, Yoohana 18:39-19:16)

6Hugum ka Bilaato daawti Baasakka ka etoo hidane enenyet usuhi lasoofuro daahe a soofura. 7Etoo Barraba layadeeh ichoow ꞌdooꞌdoo sirgaal ꞌdiiꞌdo diho ka enenyet dubunuunu bakkiche jeela kijiraan. 8Urur yimiyye Bilaato usuhi iꞌdi orrankateet u etoo hidan isoofuro daahe.

9Bilaato la, “Anihi Karnati Yaꞌhuud atin isoofuro a ꞌdoontaan?” urur worsate. 10A mehe us saggi kuhaaniyyohi wewween jeenteti kalꞌdarri on u Yeesso dahanohiis igesseen a garta.

11Iꞌdaasenyi kuhaaniyyohi wewween urur leeyeedeene, ꞌdee Bilaatohi Yeesso menye, Barraba soofuro a daaheen.

12Bilaato wihi us urur worsate, “ꞌDeerka ki atin Karnati Yaꞌhuud tadeehiin iꞌdoh idaahe?”

13Riireene, “Massalaaba kakaah!” yidaaheen.

14Bilaato wihi us worsate, “A iꞌdoh? Mehe suujenye yeele?”

Iꞌdaasenyi geeddi kootteet ꞌdirihiis riireene, “Massalaaba kakaah!” yidaaheen.

15Jeenteti us icho ihamaadin ꞌdoonuu, Bilaato Barraba icho isoofure, amuri Yeesso lakadoocho toro massalaaba lakakaaho bahche.

Iskare Yeesso ranta

(Mattaayo 27:27-31, Yoohana 19:2-3)

16Iskare Yeesso uranti minki buurenye gaafana igelo geesse, rabittoo iskareet tuumman isiwahte. 17Dafartoo muggee iꞌdi karnat u korisse, ꞌduuboo kudaheet iskayuubte matah korisse. 18Icho la usu, “Karnati Yaꞌhuudoow jiroti deer ꞌhel!” idowte. 19Wussoo ka matah jajjahte, hanjuf kaattufte, a kachaaratta dubunuunu ortiis ka jilbo il kaguꞌdubte iꞌdoo iche inkaanyit tussuu. 20Inkoo icho kachaarteen ka, kabuuꞌdi muggee kabahcheene gaaddiis gesseen. ꞌDeerka leebaheene woyeen massalaaba kakaahaanee.

Yeesso massalaaba lakakaaha

(Mattaayo 27:32-44, Luuka 23:26-43, Yoohana 19:17-27)

21Etoo ilkerengeetti Kureene Siimon layadeehe gosiis kayimiyye intaas leeyimiy massalaaba Yeesso sinnaan ihosseen. Siimonha la a aabba Alekisaanda ichoow Ruufo. 22Yeesso meessoo Golgooꞌda layadeeh keeneen. Golgooꞌda la a mehe ya, Meessi Lafohi Matahe Enenyet. 23Farsoti sabiibe hanjati halalle lakawarse#15:23 Farsoti sabiibe hanjati halalle lakawarse. Biccheha bolokhe yaasichaan. Yeesso siisse, iꞌdaasenyi ma khaatan. 24Icho la Yeesso massalaaba kakaaheen. Goycho ka gaaddiis gisante, kura guꞌddateene ebba wihi us ꞌhelo yeyeen.

25Chirra iche massalaaba kakaahto, il a geeddi sahaꞌd seyyahti chirdeereet. 26Wihi lakayigisye, massalaaba sarche lakachiire la a mehe ya, Karnati Yaꞌhuud. 27Reeroo lammeenye hatto leh leekaaheen. Koo ankiiski miigeet lakakaahe, ki addan la ankiiski gurro lakakaahe. #15:27 Chiirnaanneti Yeedi Waakhe uumacchee gaasoo chiirnaanka a kakhayte. 28 “Chiirnaanneti Yeedi Waakhe, ‘ꞌDooꞌdi sussuujenye goya lagate,’ tadeeh labuuhiche.” 29ꞌDooꞌdi intaas tabo a leeabaarrama, ꞌdarraaw ka matah moroogicha. “Aaꞌheey! Atihi minki Waakhe buure jejjebisso, toro orrah seyyah on ka disso, 30bal isribe, massalaaba kasooyag giꞌde!” iche idowaan.

31Saggaas on u kuhaaniyyohi wewween ichoow tagaammeti amurre laka a kachaartaane, wihi icho goycho ka esseen, “Us ꞌdooꞌdi addan a ribe, iꞌdaasenyi isribin ma yabuuꞌd! 32Kan Lasubhe, Karnata yaafohi Issiraayele bal toolla massalaaba a kasooyago, ꞌdee a agarro, a rummeysanni giꞌde!” ꞌDooꞌdi laleekaahe laka weyti usu leeabaarrame.

Omoot Yeesso

(Mattaayo 27:45-56, Luuka 23:44-49, Yoohana 19:28-30)

33Sahaꞌd lihti maalimeet ka, il tuumman mugꞌdi yitahye, ichoowka sahaꞌd saagaale eleesse. 34Sahaꞌd saagaal ka Yeesso hooyi buure ka riire, “Elooy, Elooy, laama sabakhtani?” yidah. Wahaas la a mehe ya, “Waakkhaayaaw, Waakkhaayaaw, a iꞌdoh ikatabte?”#15:34 Sabuur 22:1.

35ꞌDooꞌdoo intaas hagga toollo la, baabule daage, wihi icho yidaaheen, “Daaga, usu eti Waákh íyeyyeedo Eliiya layadeeh iche waha.”

36Koo la nyaame, haaruggoo khaate, farsoti sabiibe birrakhe buuhiche. Khoꞌdoonkoo deer kahide, Yeesso iyooge, ꞌdee a yubhaabe. “ꞌDiicha, usu Eliiya yamiite, sooyagcho, a agarro,” yidah.

37Yeesso weyti riire, rubey gooche.

38Dafarti weyti yobbeenye minki Waakhe buure seley goosso meel lamma seley igoote, sereye kasookharradde ichoowka iliche kabahte. 39Chirri eti koobbintoo iskareet itoollo Yeesso ortiis toollo riiritiis daage saggi us imassate arge ka mehe yidah ya, “Rumanka eta Weeli Waakhe eheet.”

40Deyyehotoo fogaka a ꞌdeyꞌdoossa. Goycho ka a Maariyati ilkerengeetti Magdaala ichoow Maariyati Yaakoobohi nugul ichoow Yoosse desse ichoow Saloome. 41Maanti Yeesso boroofenhi Gaalilaaya kijire, deyyehotane usu raahte, gargaarte. Deyyehoti addane ittaawenye ilkerengeetti weene Yeerusaleem kaleetimiy laka intaase tolossa.

Sar Yeesso goꞌddoo lakahawwaala

(Mattaayo 27:57-61, Luuka 23:50-56, Yoohana 19:38-42)

42Maantaas a Ibeenki Latannabti. Waha la a maanti Seeri Lanaso ortiise. Chirri il gelebnowe ka, 43Yuussufhi ilkerengeetti Arimaꞌdaaya Bilaato roorro laan iirte sar Yeesso daahe. Yuussufha la a etoo Jaldaabti Weene Yaꞌhuud goyaka magah khabo toro la dakhi Waakh laka sugo. 44Bilaato Yeessohi geeddaas ka yumuy kagirmeeste, eti koobbintoo iskareet itoollo wahe usu Yeesso ꞌhor yumuy worsate. 45Chirri us eti koobbintoo iskareet itoollo woraas kaabte ka, sar Yeesso Yuussuf siiche. 46Yuussuf dafartoo soogate, sar Yeesso massalaaba kasooyagche, dafartaas kaayyuube. Goꞌddoo daddaab ka lakhute hawwaal lakayeele goya kareeche, daddaabtoo buure ꞌdembeleeliye hawwaal afiche gesse. 47Maariyati ilkerengeetti Magdaala ichoow Maariyati abar Yoossee, goꞌddaas sar Yeesso lakareeche a argeen.

Currently Selected:

Marko 15: rel

Highlight

Copy