Marko 11
11
Enenyet Yeesso hamaad ka ilkerengeetti weene Yeerusaleem ka soodowwaacha
(Mattaayo 21:1-9, Luuka 19:29-38)
1Chirra icho ilkerengeetti weene Yeerusaleem isoodowwaateene, ilkerengeetti Beꞌdifaage ichoow Beꞌdaaniya Hali Geeyohi Oolif haggee yimaateen ka, Yeesso abattitiistoo lammee ergate, 2wihi usu icho iyidah, “Ilkerengeetti ortiin kijirto irda, uus atin gessaan la inkuraarruhoo injire liirarine hidan a ꞌhessaan. Soofura inta keena. 3Chirri etoo, ‘A iꞌdoh iꞌda iyeessaan?’ atin worsate la, mehe itadeehiin ya, ‘Kamure ꞌdoona, inkoo dow on la inta isoolaaba.’ ”
4Iratte, inkuraarruhi afafhi min kahidan ꞌhesse. Geedda iche furto, 5ꞌdooꞌdoo intaas toollo, “Inkuraarruhaas atin furtaan, a iꞌdoh?” worsate. 6Iche la wihi kootte Yeesso iyidah tidahye, ꞌdooꞌd la sooꞌdiiche. 7Chirri icho inkuraarru Yeesso ikeeneene, kabuuꞌddeticho kagaadeen ka, Yeesso koorronte. 8ꞌDooꞌdi ittaawe kabuuꞌddeticho jit kagolge, gaasoo la seytohi icho gosas goya kasoogoocheen, jit kagolge. 9ꞌDooꞌdi Yeesso ortiis raaho ichoow ki ꞌdubiis raaho riire wihi us yidah,
“Waakh koolinno!”
“Waakh ki magahi Kamur kayamiit a imaale.”#11:9 Sabuur 118:25-26.
10“Waakh dakhi aacchiheenki Dawuud layadeehe yamiit a imaale!”
“Waakkheenki inti weyti saraat kijiro koolinno!”
11Yeesso ilkerengeetti weene Yeerusaleem gele. Minki Waakhe buure gele, walah tuumman yeye. Il a sooibeennowe, abattitiisti tomon ichoow lammee khabaayi, ilkerengeetti Beꞌdaaniya irte.
Yeesso geeyoo fala
(Mattaayo 21:18-19)
12Ibeenki kaas sooraaho chirri icho ilkerengeetti Beꞌdaaniya kasoobaheen ka, Yeesso ankaye. 13Foga ka geeyoo fiig layadeehe seeb khabo arge, ibuje, usu gurnaan khabo yeyaa. Chuꞌus geey sooeleele ka, seeb on menye walah us kaꞌhele mele. A mehe maanti geey gurnaan bahcho mee gon. 14ꞌDeerka geey fale wihi us iyidah, “Yombuu tuumman etoo kalday laka gurnaan ma kaayaham!” Abattitiis la a daagte.
Yeesso ꞌdooꞌdi minki Waakhe buure ka chilimme iskadooricho riha
(Mattaayo 21:12-17, Luuka 19:45-48, Yoohana 2:13-22)
15Chirri icho ilkerengeetti weene Yeerusaleem yimaateen ka, Yeesso uranti minki Waakhe buure gele, ꞌdooꞌdi intaas ka walah gatti ichoow ki walah ororicho ba rihnaan sookhabte. Komborohi balballaaddane ꞌdooꞌdi chilimmeti ilassi addan iskadooricho leeyahe ichoow komborohi ꞌdooꞌdi kutukuurrug#11:15 Laawi 12:8. ororsati ba rerreeche.
16Yeesso la eti tuummane meeh siꞌdo, uranti minki Waakhe buure dah kaleegoocho tirte.
17Enenyet ayti Waakh abche, wihi us iyidah, “Wihi chiiran,
“ ‘Minkeey mehe layadeeh ya,
minki weysiite, ꞌdooꞌdi harra tuumman,’#11:17 Isaaya 56:7.
Iꞌdaasenyi, ‘inti ꞌdooꞌdi hatto leh kadagti,’ kayeesseen.”#11:17 Yeeremiya 7:11.
18Kuhaaniyyohi wewween, ichoow tagaammeti amurre ba, yeedaas daagte. Jiti iche Yeesso katagiis yowatte. Jeenteti urur tuumman wihi us enenyet abcho ka weyti igirmeestuu, usu weyti karoorte.
19Chirri il gelebnowe ka, Yeesso ichoow abattitiis ba ilkerengeet kabaheen.
Wihi abatti geeyi fiig kaabatte
(Mattaayo 21:20-22)
20Chirdeer geeddi icho ꞌdulaan, geeyi cheletteete fiig usuhi hiiyyay kasookhabte tuum angage argeen. 21Beetero wihi chele eheet kasooꞌhele wihi us Yeesso iyidah, “Eti ween bal yey! Geeyi fiige chele at fasse, a angage!”
22Yeesso wihi us ilaabe, “Waakh kakhuufa! 23Rume atin icheeka, chiꞌ etoo hala, ‘Nyaam beyti buure goya iskaluguꞌd!’ iyidahye toro la uurlammaal ikhabine, wihi us yidah saggi icho iyateehiin rummeesti, etaas wahaas a liiyeela. 24Maantaka wihi an atin isoocheeko, walahbaaw atin weysi ka Waakh daahteen, saggi atin iꞌhesseen rummeesda, wahaas la a atin lasiichaa. 25Chirra atin tolossattaane weysattaane, etoo la wohoo ikhabtaan etaas wahaas ikakuta ꞌdee Aabbahiinki serey jiro uskeeliin a atin ikakuto.”#11:25 Chiirnaanneti Yeedi Waakhe uumacchee gaasoo chiirnaanka a kakhayte. 26 “Iꞌdaasenyi chaꞌat uskeeli lakiyeele enenyet ikakutin, Aabbahaah laka uskeeli at yeesse ma ikaakuto.”
Anto Yeesso lakamalala
(Mattaayo 21:23-27, Luuka 20:1-8)
27Toro ilkerengeetti weene Yeerusaleem yimaateen. Geedda Yeesso uranti minki Waakhe buure goya raaho kuhaaniyyohi wewween ichoow tagaammeti amurre ichoow ewweenki Yaꞌhuud la Yeesso iyimaateen. 28Wihi icho worsateen, “Antohi at wahanyeyyoha kahaaggisso, a weheeyya? Antohi at wahanyeyyoha kahaaggisso ayyo kisiiche?”
29Yeesso wihi us ilaabe, “Wohoo kaldaye atin worsada. Isoolaaba, ani la antohi an khabo, an wahanyeyyoha dakkhan kahaaggicho, a weheeyya a atin isoocheeko. 30Yoohanahi Enenyet Baattissiyo, antohi us enenyet kabaattissiyo, Waakhe kayimaateen, bal enenyet? Isoocheeka!”
31Iskaleehawwoocheene wihi icho isiyidaaheen, “Chiꞌinno, ‘Waakhe kayimaateen,’ nadeeh, mehe inno iyadeeh ya, ‘A iꞌdoh ꞌdeerka irummeysanna?’ 32Iꞌdaasenyi chiꞌinno, ‘Enenyete kayimaateen,’ nadeeh mehe soobaha?” A mehe ꞌdooꞌde karooraan jeenteti enenyet tuumman saggi Yoohana rumanka eti Waákh íyeyyeedo iekkaachuu.
33ꞌDeerka wihi icho Yeesso ilaabeen, “Nah ma garanni.”
Yeesso la iiyeyye, “Ani laka antohi an wahanyeyyoha kahaaggicho ma atin isoocheeko gon.”
Currently Selected:
Marko 11: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
