Marko 10
10
Yeesso wori mindischoti seley labaho ꞌdooꞌd abcha
(Mattaayo 19:1-12, Luuka 16:18)
1Yeesso ꞌdeerka intaas kakahe, anki boroofenhi Yaꞌhuudiya ichoow hawti Yoordane ꞌdusso berihiche irte. Urur toro isootabe, ulla iꞌdiiski orrankateet u wahanyeyyohi Waakh abche.
2Farissaayotoo la timiy, usu angey gelin ꞌdoonta, wihi iche worsatte, “Eti makhaabassiis tuum riho ichoow amurreteen a israahaan?”
3Yeesso wihi us ilaabe, “Muusa amuri us atin siiche mehe yadeeh?”
4Iche la wihi iche itidah, “Muusa ka a geeddi makhaabal khadaabi seley lakabaho chiiro, toro la a geeddi us makhaabassiis tuum riho.”
5Yeesso wihi us ilaabe, “Muusa jeenteti matahmiigtiinna amuraas atin ikasoochiire. 6Iꞌdaasenyi uumaccho ka, maanti Waakh walah dakkhan soouume, ‘labo ichoow deyyeho soouume.’#10:6 Uumaccho 1:27. 7‘Jeentetuu, mejel aabbahiis ichoow abartiis a kataba, usu ichoow makhaabassiis la wohoo kalday yateehiine, 8lammacho ba sartoo kalday yateehiin.’ ꞌDeerka kola et lamma menye, a sartoo kalday. 9Maantaka wihi Waakh isikeene, uus weeli enenyet seley bihin.”
10Inkoo icho min inokhteen ka, abattitiis wihi kootte us essi, a mehe worsatte. 11Wihi us ilaabe, “Eti tuummane makhaabassiis tuum rihe makhaabassoo addan diste, uskeeli us makhaabassi tiis ieheynan leeurꞌdo, iche gele. 12Makhaabassi makhaabaliche tuum katabte, makhaabaloo addan khaatatte diste, uskeeli iche makhaabaloo kiche ieheynan leeuꞌdurto, iche gesse.”
Yeesso nyaakhuti rurrucchul iweesta
(Mattaayo 19:13-15, Luuka 18:15-17)
13ꞌDooꞌd la nyaakhuti rurrucchule sookhaata, Yeesso ikeena, ꞌdee ulla dahano korcha iweesta. Iꞌdaasenyi abatti ꞌdooꞌdaas leejaakhte. 14Chiꞌ Yeesso waha arge ka hollowe wihi us abatti iyidah, “Nyaakhuti rurrucchul ajeyinna ꞌdiicha ani a iyimaatee, a mehe dakhi Waakh a ki ꞌdooꞌdi iꞌdee. 15Rume atin icheeka, eti dakhi Waakh saggi weeli rucchul ikakhaatan, koloo kalday laka goobi Waakh ma gelo.” 16Ulla nyaakhut khabte, dahanohiis korche iweeste.
Eti nugule kamure ichoow dakhi Waakh
(Mattaayo 19:16-30, Luuka 18:18-30)
17Chirra Yeesso abattitiis khabaayi bahe ka, etoo sooyiriyye, ortiis ka jilbo il kaguꞌdde, wihi us worsate, “Eti weene haaggan, mehe yeelo ꞌdee jiroti jirtuu imassan ꞌhela?”
18Yeesso wihi us ilaabe, “At a iꞌdoh ani, ‘Eti haaggan,’ ikawahta? Etoo kaldaye haaggan laka ma jiro Waakh on menye. 19Amurreti Muusa enenyet siiche a garatta, ‘Weeli enenyet dubunuunu iigaasan, makhaabali kaah ieheynan ommos makhaabassi taah ieheynan aleeurꞌdin, walah ahatin, garti beenaat ayeedin, enenyet akakharaawin, aabbahaah ichoow abartaah inkaanyit.’ ”
20“Eti ween, wahaas tuumman, koo an iraahin mala, uuꞌ goorat an weel eheet,” et yidah.
21Yeesso et yeye, ꞌdoonine buuhisse. Ét iiyeyye, “Wohoo kaldaye kaankhan. Nyaame wihi at khabto tuumman ororiche, chilimme miskiin siiche, ꞌdee kamurroonki goobi Waakh ꞌhele, ꞌdee kaale isooraah.”
22Chuꞌus yeedaas daage ka hamaad waaye. Usuhi fool ribowe nokhte, a mehe hoolahi buurenye khabe.
23Yeesso jilakh rogte, wihi us abattitiis iyidah, “A ꞌhoossoo geeddohe chiꞌ kamurre dakhi Waakh gesso!”
24Abattitiis weyti girmeysatte. Iꞌdaasenyi Yeesso wihi us yidah, “ꞌDooꞌdaaw, a ꞌhoossoo geeddohe chiꞌ dakhi Waakh lagelo! 25Naffi gaale issi irbi kakhaduutti weyti ꞌhooltahe. Eheet a, ꞌhoossi eti kamurenye dakhi Waakh gelo iche weyti kutta.”
26Abatti geeddaas ꞌdirihiis girmeysatte, wihi iche isworsatte, “Ayyo ꞌdeerka lariba?”
27Yeesso icho yeye, wihi us iyidah, “Weeli enenyet ka waha a wihi koloo kalday laka iitaahan. Iꞌdaasenyi Waakh ka iꞌdaas mee. Waakh ka walah tuumman a geeddi icho yateehiin.”
28Beetero wihi us iyidah, “Bal yey, nah weheenyo tuumman a kasootabne, ꞌdee ati kiraahna.”
29Yeesso wihi us ilaabe, “Rume atin icheeka, eti jeenteteey u ichoow jeenteti Wori Haaggan u goobiis ommos walaalinyetiis ichoow albehi leedesse kasootabe, aabbahiissa, abartiissa, nyaakhut, ommos gosiis kasootabe, 30jiroti toolla us jiro ka kol kud, iche wahaas us kasootabe ꞌdirihiis ꞌhela. Goob ichoow walaalinyetiis ichoow albehi leedesse, arbo, nyaakhut, ichoow gosas ꞌhela, toro la geedda tuumman sina laka loomhicha. Jiroti yomboot ka la, jiroti jirtuu imassanne ꞌhela. 31Iꞌdaasenyi ꞌdooꞌdi ittaawenye oraate ki ꞌduboot yateehe, ki ꞌduboot la ki oraat yateeh.”
Yeesso toro omoottiis kayeeda, koli seyyahnaatteet
(Mattaayo 20:17-19, Luuka 18:31-34)
32Yeesso oreye kasohta, abatti la ꞌdubiis sooraahta, ilkerengeetti weene Yeerusaleeme ikoraan. Abatti girmeysatte, ꞌdooꞌdi sooraaho la roorro khaba. Yeesso abattitiisti tomon ichoow lammee ꞌdol iwahe, wihi usu dowwanoha ka layeelo icheeke. 33Wihi us iyidah, “Ilkerengeetti Yeerusaleeme iranna, Ínam Aadam la ꞌdube lagoocha kuhaaniyyohi wewween ichoow tagaammeti amurre dahanohicho lagessa. Iche la omoot igoossa, ꞌdooꞌdi Waakh igaran dahanohicho gelissa, 34icho la usu kachaartaane, fool hanjuf katufaane, laajja ka doochaane, ꞌdaꞌddaboka yagiisiin. Chirri ibeen seyyahe kutte ka omoot kasookaha.”
Wihi yeele Sebedaayo daahte
(Mattaayo 20:20-28)
35Chirraakka yeele Sebedaayoti Yaakoobo ichoow Yoohana layadeeh, Yeesso itimiyye, “Eti ween! Atihi walahbaaw nah kidaahne ka nah iyeesso ꞌdoonna,” itidah.
36“Mehe atin iyeelo ꞌdoontaan?” Yeesso worsate.
37Wihi icho ilaabeen, “Maanti at ababtaayi kombortaahti antoot koorrommatti, alley eteenyokoo ankaahki miigeet a orronti, koo la ankaahki gurro a orronti.”
38Yeesso wihi us yidah, “Atin wihi atin daahtaan wihiche ma garattaan. Atin maanta kokkoobi sinayyoote an damo damin a tabuuꞌdiin? Ommos baattissiyoti omooteete ani liibaattissiyo a tabuuꞌdiin?”
39Wihi icho ilaabeen, “Aa, a nabuuꞌd.” Yeesso la wihi us icho iyidah, “Kokkoobi an damo a dantaane toro la baattissiyoti liibaattissiyo ka laka atin labaattissiya. 40Iꞌdaasenyi eti ankeeyki miigeet ommos ankeeyki gurro orronti ani mee goocho. Meelassa a ti ꞌdooꞌdi liiyeele.”
41Abattiti addane tomone, chiꞌiche wahaas daagte ka, Yaakoobo ichoow Yoohana kahollowte. 42Yeesso isiwahe, wihi us iyidah, “Saggi atin igarattaan u, ꞌdooꞌdi weynaanti ꞌdooꞌdi Waakh igaran liiekkaacho, saggi suujenye ꞌdooꞌd idakhtaane toro ewweenkicho la wihi ꞌdooꞌd yeelo icheeka. 43Atin ka iꞌdaas mee. Eti tuummane goytiin ka weynaan ꞌdoono, falfatiin a yitaahe. 44Eti tuummane orey ꞌdoono la, bowꞌdati enenyet tuumman a yitaahe. 45A mehe Ínam Aadam laka, ma imaatane ꞌdee enenyet usu ma ifalo, iꞌdaasenyi a yimiyye ꞌdee us ꞌdooꞌd ifala, rubeytiis diiba, ꞌdee enenyeti ittaawe mogti uskeelicho iguta.”
Yeesso Bartimaayo indo haaggicha
(Mattaayo 20:29-34, Luuka 18:35-43)
46ꞌDeerka ilkerengeetti Yeeriko sooeleeleen ilkerengeetti weene Yeerusaleeme isohtaanee. Chirra Yeesso ichoow abattitiis ichoow ururoo buure Yeeriko kabahaan, etoo indo laaye Bartimaayo layadeehe koo Timaayee, jite fiddiya, walah daddaaha. 47Chirri us saggi us Yeessohi Naasaret iyahe daage ka riire, “Yeesso, Inam Dawuud, uur isoonugleyso!” yidah.
48ꞌDooꞌdi buure usu leejaakhe, gammadi iyidah. Iꞌdaasenyi geeddi kootteet laka ꞌdirihiis riire, “Ínam Dawuud, uur isoonugleyso!” yidah.
49Yeesso tolossate, “Soowaha,” yidah. ꞌDeerka eti indo laa waheene, “Hamaad! Sookah, Yeesso a kiwahaa,” iyidaaheen. 50Kabuuꞌdiis seye, serey isoonyaame, Yeessó iyimiy.
51“Mehe kiyeelo ꞌdoonta?” Yeesso usu worsate.
Eti indo laa wihi us yidah, “Eti ween, anihi toro il argo ꞌdoona.”
52“Nyaam giꞌde kakhuufnaanki at ikakhuufte a kisamaachee,” Yeesso iyidah. Chirraas on indo bahche, jit kadihe Yeesso raahe.
Currently Selected:
Marko 10: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
