Marko 9

1Toro wihi us iyidah, “Rume atin icheeka, gaasiinkoo maanta inta kijiro omoot ma argo, ichoowka dakhi Waakh miig khabaayi yamiit.”

Yeesso luurgiyicha Eliiya ichoow Muusa Yeesso leeyyeedaan

(Mattaayo 17:1-13, Luuka 9:28-36)

2Inkoo ibeen lihe kutte ka, Yeesso Beetero ichoow Yaakoobo ichoow Yoohana khaatte, woye, haloo deer koreen, ichohaas on. ꞌDeyꞌdoossaayi Yeesso luurgiyiche. 3Gaaddiis la weyti dakhnaatte, waha maanta torrogoote, dikhaassi harrata kootte ikayeelin yitaaheen. 4Eliiya ichoow Muusa ba orcho ka soobaheene, Yeesso leeyyeedeen.

5Beetero wihi us Yeesso iyidah, “Eti weenoow, a haaggantahe gon, chiꞌ nah inta kijirro. Alley gaayim seyyah a disno, too a taahha, too a too Muusa too la a too Eliiya.” 6A mehe abattiti seyyahe weyti nahte, Beetero wihi us laabo ma garti.

7Mirisoo soobahe icho tuumman ankube. Hooyoo la mirisaas goyaka sooyeede, “Waha a Weeleeyki an weyti ꞌdoono. Usu nabah isuda!” yidah.

8Chirraas on jilakh rorrogatte, et addane icho leejiro icho argeen mele Yeesso on menye.

9Chirra icho hal kasookhubtaan ka, Yeesso icho amur ibahche, iicho wihi icho argeen ꞌdooꞌdi addan iicheekine ichoowka Ínam Aadam omoot a kasookaho. 10Wihi us iyidah raahte, iꞌdaasenyi ayta omoot lakasookaho wihiche kahawwoocheen.

11Wihi icho Yeesso worsateen, “A iꞌdoh tagaammeti amurre, ‘Eliiya koloo yamiit,’ ielatta?”

12Yeesso wihi us ilaabe, “Rumanka, Eliiya koloo yamiite, walah tuumman iꞌdi icho eheneet toro kayeela. Kamalda bal a iꞌdoh Chiirnaanneti Waakh goya Ínam Aadam bolokkhi buurenye latusa, weyti laꞌdiiꞌda liikachiire? 13Iꞌdaasenyi wihi an atin icheeko, Eliiya a yimiyye, ꞌdooꞌd la suujoonki noole icho ꞌdoonaan usu tuse iꞌdi wihi usu miinsane lachiiruu.”

Yeesso inanki ginna dakhatti samaacha

(Mattaayo 17:14-20, Luuka 9:37-43)

14Chiꞌiche abattiti addan itamiit, ururi buurenye icho khaariche argeen. Tagaammeti amurre ichehi abatti leeiriirto ꞌheleen. 15Enenyet uun us Yeesso arge weyti girmeeste, iorye bariitiche.

16Yeesso wihi us abattitiis worsate, “Atin mehe ꞌdooꞌdaas isleeiriirtaan?”

17Etoo la urur goyaka wihi us ilaabe, “Eti ween, inankaaya kikeene, ginna dakhatta, yeyyeed tiratta. 18Kolbaaw iche khabatte, ile irogta, af dakkhan ꞌdombeestaane, ilko iskaroba choꞌha. Abattitaah, ‘Ginna inam kabahcha,’ iidahye, iꞌdaasenyi iche a agaafatte.”

19Yeesso wihi us ilaabe, “ꞌDooꞌdi weyꞌdane Waakh ikakhuufin, geeddoh atin leefiddiyo? Geeddoh atin igarrahsadi? Ínam ikeena!”

20Ínam Yeesso ikeeneen. Ginna uun iche Yeesso agarte, chirraas on inam korkokisse. Inam il guꞌdde, fade, afa dakkhan ꞌdomboyyo leekeene.

21“Uuꞌ maantoh iꞌda eheneet?” Yeesso aabbahi inam worsate.

Wihi us ilaabe, “Uus weel eheet. 22Geeddi buure ꞌdab ommos bicche goya kaluguꞌdda, ichehi tagiise ꞌdoontaa. Iꞌdaasenyi chaꞌat wohoo nah iyeelin tabuuꞌd, uur nah isoonugleyso, nah gargaar!”

23“Chaꞌat wohoo tabuuꞌd a?” Yeesso yidah, “Eti Waakh on rummeesti walah us iubaaꞌdan mala.”

24Aabbahi inam chirraas on sooriire, wihi us yidah, “An a kirummeesda, iꞌdaasenyi igargaare uurlammaal a baho.”

25Yeesso chuꞌus ururi intaas isooryo arge ka, ginna leejaakhe, “Ginnata ínam yeed ichoow dogo tirto, amure kibahchaa, toolla kofche inankaas goya kabahe, jirtuu la iinokhan!” iyidah.

26Ginna riirit guꞌdubte, ínam korkokisse kabahte, inam iꞌdi eti yumuy yitahye, ꞌdooꞌdi buure, “A yumuy,” yidah. 27Iꞌdaasenyi Yeesso inam dahan khabte, sootoolliche, inam la tolossate.

28Inkoo Yeesso min gele ka, abattitiis dagsi ka mehe worsatte ya, “Nah a iꞌdoh ginna bihit iagaafanne?”

29Wihi us ilaabe, “Ginnati iꞌdee, wihi bahcho tuumman a weysi kalday.”#9:29 Weysi kalday. Chiirnaanne gaasoo mehe tadeeh ya, “Weysi ichoow afi lahiiti.”

Yeesso toro omoottiis ichoow omootti us kasookaho kaayyeeda

(Mattaayo 17:22-23, Luuka 9:43-45)

30Intaas kakaheene, ili Gaalilaaya dah kagoocheen. Yeesso usuhi enenyet inti us kijiro abti ma ꞌdoono, 31a mehe abattitiissa wohoo abchaa. Wihi us iyidah, “Ínam Aadam dowwanoha ka ꞌdube lagoocha, dahanohi enenyet lagessa yagiisiine, chirri maan seyyahe kutte ka omoot kasookaha.” 32Iꞌdaasenyi wihi us idowo ma abanne, toro usu worsan karooreen.

Abatti eti ꞌdooꞌdi addan tuumman iween isworsatta

(Mattaayo 18:1-5, Luuka 9:46-48)

33Ilkerengeetti Kafarnaaꞌhum soogeleen. Chiꞌicho min geleen ka, Yeesso wihi us abatti worsate, “Atin kootte jit ka mehe isleeiriirtaan?” 34Iꞌdaasenyi gammadisse a mehe kootte jit ka eti ꞌdooꞌdi addan tuumman iweene isleeiriireen.

35Yeesso orronte, abattiisti tomon ichoow lammee isiwahe wihi us iyidah, “Chiꞌ etiinkoo orey ꞌdoono, eti weyti ꞌduboot a yitaahe, falfati enenyet tuumman a yitaahe.”

36Weeloo rucchul khaate, goycho toolliche. Dahano kakhabte wihi us abatti iyidah, 37“Eti tuummane jeenteti us abattiteey iyahuu, nyaakhuta rurrucchul kichekoo martiisti, ani imartiista. Eti ani imartiisti la, ani menye eti isooergate martiista.”

Eti inno iꞌdiiꞌdin, a aaleenna

(Luuka 9:49-50)

38Saahka Yoohana wihi us iyidah, “Eti ween, nah etoo antohi magahaah ka ginnayyo enenyet goya kabahcho a agarre. Jeenteti us keen ieheynan u wahaas toolli inidah.”

39“Ajeyinna,” Yeesso yidah, “Eti antohi magaheey ka wihi weeli enenyet yeelin iubaaꞌdan yeelo, ꞌdeeka toro ma ihayhayo, 40a mehe eti inno iꞌdiiꞌdin, a aaleenna. 41Rume atin icheeka, eti tuummane jeenteti us abatti Kiriisto iyahuu kooboo biccheet kisiiche, etaas koloo kalday laka kalaꞌddiis ma waayo.”

Wihi uskeel kaalugꞌdo

(Mattaayo 18:6-9, Luuka 17:1-2)

42“Chiꞌ etoo ꞌdooꞌdaar irummeesti kichokoo tarraantarricho la, etaas wihi ideefo a usuhi daddaabti buurenye gurnaan lakatumo lukhum lakahido beyti buure lakalugꞌdo. 43Chiꞌ dahantaah uskeel kaaluguꞌddo, dahantaas gooy! Atihi dahan laaye jiroti jirtuu imassan ꞌhesso deefta, atihi dahano lammacho khabto, meessi ꞌdabi armaanjireene ꞌdabiche ijitin iratti ka.#9:43 Chiirnaanneti Yeedi Waakhe uumacchee gaasoo chiirnaanka a kakhayte. 44 ‘Intaas ka ꞌdooꞌdaas akhsihiis ma yamuute, ꞌdabiche la jirtuu ma jito.’ 45Chiꞌ luhtaah uskeel kaaluguꞌddo, luhtaas gooy! A mehe atihi elyeenye jiroti jirtuu imassan ꞌhesso deefta, atihi luhlo lammacho khabto, meessi ꞌdabi armaanjireen lakaalugꞌdo ka. #9:45 Chiirnaanneti Yeedi Waakhe uumacchee gaasoo chiirnaanka a kakhayte. 46 ‘Intaas ka ꞌdooꞌdaas akhsihiis ma yamuute, ꞌdabiche la jirtuu ma jito.’ 47Chiꞌ issaah uskeel kaaluguꞌddo la, issaas bihi! Atihi issoo laaye dakhi Waakh gesso deefta, atihi indo lammacho khabto, meessi ꞌdabi armaanjireen lakaalugꞌdo ka. 48Intaas ka,

“ ‘ꞌdooꞌdaas akhsihiis ma yamuute,

ꞌdabiche la jirtuu ma jito.’#9:48 Isaaya 66:24.

49Saggi orran golol tuumman magaaꞌd liikachibuu, saggaas on enenyet tuumman ꞌdabi sinayyoot itaba.

50“Magaaꞌde a haaggantahe. Iꞌdaasenyi chiꞌiche gimbatiche waayte saggoh toro liigimbaacha? Magaaꞌddi haaggane gimbatiche khabto ateeha! Nebey iskaleefiddiya.”

Currently Selected:

Marko 9: rel

Highlight

Copy