Hilassi Ergaano 4

Beetero ichoow Yoohana jaldaab liigeecha

1Beetero ichoow Yoohana enenyet leeyyeedaani, kuhaaniyyo ichoow Sadukaayo ichoow eti iskarti minki Waakhe buure yaakhisso iween, yimaateen. 2Jeenteti ergaano ꞌdooꞌd walah iabisso iche saggi Yeesso omoot ikasookahe toro ꞌdooꞌdi tuume omoot a kasookaha icheektuu icho weyti holloween. 3Beetero ichoow Yoohana khabatte, jeela gelisse, saahta leesugte, il a gelebnowe gone. 4Iꞌdaasenyi ꞌdooꞌdi ittaawenye yeedicho daage, Yeesso rummeeste. Tiri ꞌdooꞌdi Kiriisto rummeeste geeddi elif chan yitah.

5Ibeenki kaas sooraaho ka makhaaballeti Yaꞌhuude wewween ichoow ewweenki Yaꞌhuud ichoow tagaammeti amurre ba ilkerengeetti weene Yeerusaleem ka tossatte. 6Kuhaanihi weyti weene Aanas layadeeh ichoow Kayaafa ichoow Yoohana ichoow Alekisaanda ichoow minki kuhaaniyyohi weyti wewween dakkhamba leh makhaaballetaas khabaani isꞌheleen. 7Beetero ichoow Yoohana orcho a lakeeno yidaaheene, ꞌdeerka waha wowworsateen, “Miig eyya ommos antohi magah eyya waha kayeesseen?”

8ꞌDeerka Beeterohi Rubeyti Munyee buuhisse yeed laabe mehe yidah ya, “Makhaaballeti Yaꞌhuude wewweenoow ichoow ewweenki Yaꞌhuudoow, 9wihi maalinka nah lakahukkumo, a haaggi nah uuri ꞌdabakhe ka eta goorat luhlo laa nah tusne. Ichoow toro saggi liisamaache iche nah laworsata. 10Toollaka atin ichoow ꞌdooꞌdi Issiraayel tuumman waha abda giꞌde! Eta toolla feyyate, miigowe, ortiin toollo, antohi magah Yeesso Kiriistohi Naasarete goorat atin massalaaba kakaahteene atin tigaaseene iꞌdaasenyi Waakh omoot kasookahche iche kasamaate. 11Yeessoha,

“ ‘A daakki atinhi minan dissaan ꞌdiiꞌddeene,

usu tirrinki dagaheet min tiiro yitah.’#4:11 Sabuur 118:2.

12Ribnaanki enenyet et addane lakaꞌhelo mele. A mehe magahoo addane Waakh harra tuumman ka inno karibo ma jiro.”

13Chirri icho Yoohana ichoow Beeterohi roorro laan yeyyeedo argeene toro saggi icho ꞌdooꞌdi walah garti iyahiin kaseen ka weyti girmeesteen. Saggi goorat icho Yeesso ileejireen kaseen. 14Iꞌdaasenyi eti lasamaache garabicho toollo a argeen gone, walah icho laabaan mele. 15ꞌDeerka Beetero illeh amur liibahche inti Jaldaabti Weene Yaꞌhuud katossatti kabahte, hawwoosse. 16“ꞌDooꞌda iꞌdoh nidaahe?” isworsatte. “ꞌDooꞌdi Yeerusaleem yaal tuumman saggi icho girmohi buurenye miigti Waakh tuso iyeeleen a garta. Inno rubeyteen la sag inno iꞌdiiꞌdno mele. 17Iꞌdaasenyi saggoo ꞌdee yeeda toro weyti itaaꞌhin u, ꞌdooꞌda tootoonno, ‘Toro maantoo addan magah Yeesso akayeyyeedina,’ inidaahe.”

18ꞌDeerka reér toro min goya iwahte, amur ibihisse uus iche maantoo addan magah Yeesso kaayyeedine ommos yeediis laka enenyet abin. 19Iꞌdaasenyi Beetero ichoow Yoohana la wihi icho ilaabeen, “Bal wihi Waakh nah kaꞌdoono isigoocha, nahi aytiin raahno bal nahi ayti Waakh raahno. 20Iꞌdi tahe wihi nah agarre ichoow wihi nah daagne leegammadin ma nabuuꞌd.”

21Jaldaabe weyti yeedi kootteet katirriinsatte tootoosse ꞌdeerka sooꞌdiisse. Sinati icho ergaano igoochaan waayeen, a mehe enenyet tuumman jeenteti wihi yitah u Waakhe koolicha. 22A mehe eta luhlo laaye wihi weeli enenyet yeelin iubaaꞌdan ka lasamaache, guꞌh tomon affar af khabto, iche khaba.

ꞌDooꞌdi Kiriisto rummeeste Waakh wahta

23Beetero ichoow Yoohana uus lasooꞌdiiche, ꞌdooꞌdichoki addan iirteene wihi kuhaaniyyohi wewween ichoow ewweenki Yaꞌhuud kaleeyyeedde ꞌdooꞌd icheekte. 24Uus icho daageen ka, icho tuummamba Waakh isleewahteene, wihi icho yidaaheen, “Kamuri Miig Tuumman Leh, ati wihi serey ichoow harra ichoow beyohi burbuure goya kajiro tuumman soouunte! 25Ati Rubeyti Munyee ka af aacchiheenyoki Dawuud layadeehe falfataahe ka a yeedde,

“ ‘ꞌDooꞌdi Waakh igaran a iꞌdoh weyti hol ikhaba?

Yaafoha a iꞌdoh ꞌduul imaalaane toro marah isoonokhtaan?

26Karnatohi harra tuumman ꞌduul a sookahcheen,

weynaane la a tossatte,

Waakkhi Kamure ichoow

Lasubhehiis ꞌdiiꞌdeen.’#4:26 Sabuur 2:1-2.

27Rumanka ꞌHerood ichoow Boontiyo Bilaato ichoow yaafohi Yaꞌhuud ichoow yaafohi Yaꞌhuud ieheynan ba ilkerengeetta ka a kulmeene, ꞌdee saggi icho Yeessohi falfataahenye munyeenye at subahte itirrimaan goocheen. 28Wihi sooyateehe at ꞌdoonintaah ichoow miigtaah ka orey goosse yeeleen. 29Maantaka, Kamuraanyaaw waha ꞌdooꞌda nah idowo daage falfayyohaah uur miigooche yeedaah roorro laan a cheekeen. 30Antohi magah Yeessohi falfataahti munyee ka, dahantaah sooge enenyet samaache, wahanyeyyohi miigti Waakh tuso ichoow girmo yeel.”

31Inkoo icho weesteen ka, meessi kootte icho kijiraan sesseehte. Rubeyti Munyee la icho tuumman buuhisse, Yeedi Waakh roorro laan cheekeen.

ꞌDooꞌdi Kiriisto rummeeste wihicho tuumman isleegisma

32ꞌDooꞌdi Kiriisto rummeeste tuumman uuricho ichoow malicho a koo kalday. Et, “Waha a wahaaya, waha weheey mee,” yadeeh mele. Iꞌdaasenyi wihicho tuumman a isleegismeen. 33Ergaano miigti buurenye Waakh siiche kaayyeedde, saggi Yeessohi Kamure omoot ikasookahe enenyet icheekte. Waakh la icho tuumman haaggiiski buure kaankube. 34ꞌDooꞌdaas isleefiddiyo tuumman eticho sina khabe mele. Iꞌdi tahe kolba etichoki gos khabo ommos min khabo, a ororicha, chilimme 35ergaano ikeena. Ebba la chilimme geeddi sinatiis tahe lasiicha.

36ꞌDooꞌd goytiis ka etoo Yuussuf layadeehe, goob Laaweenye ullaka ili Kuuburo layadeeh kadesse, a jire. Magahi ergaano usu ibihisse la a Barnaba. Iꞌdaas ka la mehe leessa ya, eti enenyet uur miigoocho. 37Eta laka gosiis ororiche, chilimme sookhaate, ergaano ikeene.

Currently Selected:

Hilassi Ergaano 4: rel

Highlight

Copy