Hilassi Ergaano 1

Yeed ortiissa

1ꞌDeyoofilohaaya, khadaabeeyki oraat ka, #1:1 Khadaaba oraat, a Wori Haaggane Luuka chiire. an wihi noole Yeesso yeele ichoow wihi us enenyet abche, 2ichoowka ibeenki goobi Waakh lageeche, iche kisoochiire. Geeddi serey liigeen, Rubeyti Munyee ka ꞌdooꞌdi us soobahsate us ergaanotiis kayeesse, amurre ibahche. 3Inkoo sina lakawaariche us reera a isoobahe, jitassi ittaawe ka saggi us rumanka ijiro tuse. Geeddi ibeen tomon affar icho a isoobahe, wori dakhi Waakh miinsan kaleeyyeede. 4Maantoo leegolossataayi amurane ibahche, “Ilkerengeetti weene Yeerusaleem akabihina, iꞌdaasenyi siinti goorat Aabbaheey atin iayyiche, an woriche kaayyeedo atin daagteen suga. 5A mehe Yoohana enenyet bicche kabaattissiye, iꞌdaasenyi maanassa, Rubeyti Munyee ka a atin labaattissiya.”

Yeessó goobi Waakh lageecha

(Marko 16:19-20, Luuka 24:50-53)

6Saahka maanti icho kulmeen ka wihi icho usu worsateen, “Kamur, antohi yaafohi Issiraayel harraticho kaantaan maanassa on toro ilaabta?”

7Yeesso la icho mehe iyidah ya, “Aabbaheey antohiissa on ka maan ichoow chirri walah dakkhan yateehiin gooche. Atin mee maanti icho yateehiin abattaan. 8Iꞌdaasenyi maanti Rubeyti Munyee atin isooyagte, miig a ꞌhessaane, atin la weheeyki atin garattaan cheektaan. Ilkerengeetti weene Yeerusaleem ka ichoow boroofenneti Yaꞌhuudiya ichoow ti Saamariya ka ichoow harra tuumman ka cheektaan.”

9Inkoo us yeedaas yidah ka, iche ꞌdeyꞌdoossaayi, Yeesso serey liikorche, mirisoo la icho kadagche.

10Geedda us serey irti, sereye ꞌdeyꞌdoochaan. Chirraas on reeroo lammeenye#1:10 Reera lammee, a herti Waakh. darfohoo daddakhan khabo garabicho sootolossate. 11“Era atinha boroofenhi Gaalilaaya!” yidah, “A iꞌdoh itolossaane serey iꞌdeyꞌdoossaan? Yeessoha atin lakakhaate serey lageeche, saggaas atin iagartaane us serey iirti on isoonokhta.”

Ergaano minki saraat ka weysatta

12Ergaano ꞌdeerka Hali Geeyohi Oolif kakhubatte, ilkerengeetti weene Yeerusaleem inokhatte. Halaas la Yeerusaleem ka a geeddi kiilomittatoo kalday. 13Chiꞌicho sooeleeleen ka, inti minki saraate iche maanassaas fiddiito ikorte. Ichehi intaas fiddiito a Beetero ichoow Yoohana ichoow Yaakoobo ichoow Andereeya ichoow Fiilif ichoow Toomas ichoow Barꞌdolomaayo ichoow Mattaayo ichoow inam Alfaayoki Yaakoobo layadeeh ichoow Siimonhi Yaaftiisꞌdoone layadeeh ichoow inam Yaakooboki Yuuda layadeeh. 14Ichohaas tuumman, ichoow oboorrihoo addan ichoow Maariyati abar Yeessee, ichoow walaalinye Yeesso ba kol tuumman a sooururaane Waakh isleewahtaan.

Mattiyas lasoobahcha meel Yuuda gela

(Mattaayo 27:3-10)

15Inkoo ibeennetoo kutte ka, ꞌdooꞌdi Kiriisto rummeeste soourure. Icho tuumman la a geeddi et kudoo ichoow tomon lamma. Beetero la kahe yeede, 16wihi us yidah, “ꞌDooꞌd Kiriistokaaw, wihi massan Chiirnaanneti Waakhe Rubeyti Munyee Dawuud afiis leekeente, Yuudahi ꞌdooꞌdi Yeesso khabti soowoye miinsan a labuuhicha. 17Us a keenyokoowe hila Waakh a nah kaleejire.”

18Yuuda kalaꞌddi us jiti khollokkhan kaꞌhele ka gosoo soogatte. Gosaas goya on ka soodihe, uur desme, mindakharo tuumman sookhubteen. 19Enenyeti ilkerengeetti weene Yeerusaleem kijiro tuumman daage, gosaas magah ibahcheene aficho ka Akeldaama yidaaheen. Iꞌdaakka la mehe leessa ya, “Gosi Diig.”

20Beetero wihi us yidah, “A mehe buuggi Sabuur ka wihi chiiran,

“ ‘Goobiis ba a baabo,

uus etoo kalday laka jirin.’ #1:20 Sabuur 69:25.

Wihi addane chiiran,

“ ‘Etoo addan ba meessiisti weynaaneet gela.’ #1:20 Sabuur 109:8.

21Maantaka wihi massan, etoo geeddi Kamureenki Yeessee nah leefiddiye tuumman nah leejire soobihinno. 22Eti uus maanti Yoohana enenyet baattissiyo sookhabte ichoowka maanti Yeesso nah lakakhaate serey lageeche nah leejire a eheetti. A mehe a nah isookhaya ꞌdee garti saggi Yeesso omoot liikasookahche nah leecheeka.”

23ꞌDeerka et lamma magahenye waheen. Yuussufhi Barsabba layadeehe magahiiskoo Yaasto layadeeh ichoow Mattiyas.

24ꞌDeerka Waakh wahteen, “Kamur, ati uurassi enenyet tuumman a garatta. Maantaka ꞌdooꞌda lammatiis ki at soobahsatte, 25ꞌdee hila Waakhe ergaano gelo nah tus. Waha la a meessi Yuuda kabahe, ulla inti imasse irtee.”

26ꞌDeerka magah lammataas ka kura guꞌddeen. Eti ꞌhele a Mattiyase, ꞌdeerka ergaanoti tomon ichoow koowe ikhaye.

Currently Selected:

Hilassi Ergaano 1: rel

Highlight

Copy