Mak 4

A Boreborɔ Sekpɔgre

(Mat 13:1-9; Luk 8:4-8)

1A Yeezu da laboreŋ piili kanna la a noba a mane noɔreŋ. Nembeɛoŋ naŋ ba taa mannoo da wa ŋmaagyili O la, ka O da kpɛ zeŋ gbori poɔ a koɔ̃ zu kyɛ ka a noba zaa da are a dondoli zu a koɔ̃ noɔreŋ. 2O pãã da piili kanna ba la yɛlɛ yaga ane sekpɔgɔ. A O kannoo poɔ, O da yeli ko la a noba: 3“Yɛ kyɛllɛ! Boreborɔ kaŋ la da yi gaa ka o te bore o weɛ. 4O naŋ da borɔ, a bombie mine da le la sobiri zu, ka nuuli wa de a di. 5A bombie mine meŋ da le la pikubo poɔ, zie naŋ ba taa tɛne yaga, ka a bombie buli wieouŋ zaa, a tɛne naŋ ba e zuluŋ zuiŋ. 6Kyɛ a ŋmenaa naŋ da wa puri, a bombulo da zoɔlɛɛ la, a ko, a naŋ da ba taa nyaga zuiŋ. 7A bombie mine meŋ da le la goore poɔ a buli, kyɛ ka a goore baa fogle a, ka a da ba maale eŋ bie. 8Kyɛ a bombie mine da le la tɛnnoɔ poɔ, a buli a maale velaa zaa, a wɔŋ eŋ bie. Ka a bonzuri mine eŋ bie lezare ne pie, ka a mine eŋ bie lezaata, ka a mine eŋ bie kɔɔ.” 9Ka a Yeezu da yeli ko a noba, “Neɛzaa naŋ taa tobo a na woŋ, o kyɛlle woŋ!”

A Sekpɔgɔ Lɔɔbo Tɛgɛ

(Mat 13:10-17; Luk 8:9-10)

10A noba naŋ da wa gaa kyɛ bare a Yeezu yoŋ, a banaŋ naŋ da peɛle O ane a O potuuribo pie ne bayi da soore O la a sekpɔgɔ tɛgɛ. 11Ka a Yeezu yeli ko ba, “Yɛnee eŋ ba ko yɛ la a Naaŋmen naaloŋ yelsɔglaa bammo. Kyɛ a banaŋ naŋ ba poɔ yɛ poɔ, sekpɔgɔ la ka ba maŋ lɔɔ ko ba; 12lɛ la:

‘ba sereŋ na maŋ furi kaara la, kyɛ koŋ nyɛ bonzaa,

a sereŋ kyɛllɛ, kyɛ koŋ baŋ a tɛgɛ;

a na erɛ wa leɛ ba eebo a nyɛ yelbebe sudi.’ ”

13Ka a Yeezu da soore ba, “Yɛ ba baŋ a sekpɔgre ŋa tɛgɛ be? Ka lɛ wola ka yɛ na e a baŋ a sekpɔgɔ zaa tɛgɛ? 14A boreborɔ maŋ bore la a Naaŋmen yelbiri. 15A bombie na naŋ da le a sobiri zu la a banaŋ naŋ maŋ woŋ a Naaŋmen yelbiri, kyɛ ka Setaana wa wieouŋ lɛ a wa iri a yelbiri naŋ bore eŋ ba sukyie poɔ. 16A anaŋ ba naŋ da bore a pikubo poɔ la a banaŋ naŋ woŋ a Naaŋmen yelbiri, a de o ne popeɛloŋ wieouŋ zaa. 17Kyɛ ba naŋ ba tɛ nyaga zuiŋ, ba maŋ di la kannyiri belaa lɛ, kyɛ ka yelwonaa bee dɔgroŋ wa pɔge ba a Naaŋmen yelbiri ba naŋ de zuiŋ, ba maŋ faa le la wieouŋ zaa. 18Ka ba mine meŋ waa seŋ ŋa a bombie anaŋ naŋ le a goore poɔ: ba na la a noba na naŋ woŋ a yelbiri, 19kyɛ ka a teŋɛzu boma teɛroŋ ane bondaa-yɛlɛ ane bombɔ vɔlfaare maŋ wa feere a Naaŋmen yelbiri ko, ka a ba maale. 20Kyɛ a noba na naŋ waa seŋ ŋa a bombie na ba naŋ bore a tɛnnoɔ poɔ la banaŋ naŋ maŋ de a Naaŋmen yelbiri ka a maale, a eŋ bie, a mine lezare ne pie, amine lezaata, amine meŋ kɔɔ.”

Fentelɛ Gbaale Naŋ Vɔgle Pɔge

(Luk 8:16-18)

21A Yeezu da soore ba la, “Ba maŋ kyɔŋ la fentelɛ a kpɛ ne die a te de gbaale vɔgle pɔge be, bee a de biŋ gado puliŋ? Ba ba maŋ de dɔgle fentel-daa zu be? 22Bonzaa kyebe naŋ sɔgle, ka ba koŋ e ka a yi sãã; ka yelsɔglaa zaa ba kyebe, a koŋ yi kyaane poɔ. 23Neɛzaa naŋ taa tobo a na woŋ, o kyɛlle woŋ!” 24O da yeli ko ba la, “Yɛ kyɛlle a yɛlɛ yɛ naŋ wono velaa. Bonna fo naŋ de manne ne ko fo tɔsoba, o ne o zu ka ba na de manne ne ko fo meŋ, a ko fo yaga gba ka a gaŋ a lɛ. 25Bonso banaŋ naŋ taa, ba na la ko ba la amine poɔ, kyɛ banaŋ naŋ ba taa, haali bonna ba naŋ taa, ba na de a la ba zie.”

Bombiri Baabo Sekpɔgre

26A Yeezu da la yelee la, “A Naaŋmen naaloŋ waa seŋ ŋa neɛ kaŋ naŋ yi te bore bombie o weɛ poɔ, 27kyɛ o naŋ wa gbiri tensogɔ saŋ ka zie nyaa ka o iri nyɛ ka a bombie buli a baa, ka o ba baŋ bon naŋ so a lɛ. 28A teŋɛ la maŋ e ka a bombie buli, a daŋ eŋ kadaare, ka a dɔge, a pãã eŋ bie. 29Kyɛ saŋ na a kyi naŋ wa be, o maŋ iri de la o soɔ wieouŋ zaa, a kpɛ ne a weɛ, a boma deebo saŋ naŋ ta zuiŋ.”

Bombi-bile Sekpɔgre

(Mat 13:31-32, 34; Luk 13:18-19)

30A Yeezu da la soorɛɛ la, “Boŋ ka te na de a Naaŋmen naaloŋ manne ne, bee sekpɔg-buo ka te na de manne ne o? 31O waa seŋ ŋa tobiri naŋ sereŋ waa a teere zaa poɔ bombi-bile ka ba de bore teŋɛŋ; 32kyɛ ka banaŋ wa bore o ka o baa, o maŋ waa la kpoŋ gaŋ a teere zaa. O maŋ tɛ la ulkponni ka a sazu nuuli na toɔ̃ wuo kyogri o zu.”

A Sekpɔgɔ Lɔɔbo Tɛgɛ

33A sekpɔgɔ ama taaba yaga la ka a Yeezu da de kanne ne ba a Naaŋmen yelbiri, a seŋ lɛnɛɛ ba naŋ na toɔ̃ woŋ; 34O da ba yeli yɛlɛ ko ba, ka sekpɔgɔ naane ka O da lɔɔrɔ, kyɛ O da maŋ iri la a pare ko a O potuuribo ka ba naŋ wa be ba yoŋ zie.

Yeezu Naŋ E Ka Sasekpeɛŋaa Ŋmaa

(Mat 8:23-27; Luk 8:22-25)

35A lɛ daare, zie naŋ da wa maa, a Yeezu da yeli ko la a O potuuribo, “Yɛ e ka te ŋmaa a mane gaa a lambo-kyɛ seŋ.” 36Ba naŋ da wa bare a nembeɛoŋ a be, a O potuuribo da de O la ne a gbori na poɔ O naŋ da be, ka ba zaa gɛrɛ. Gboe mine meŋ da be la a be. 37Sasekpoŋ kaŋ da iree la ka a kɔmmie ŋmeɛrɛ a gbori, ka a gbori paala ne koɔ̃ a linne. 38Kyɛ ka a Yeezu da be a gbori kpaareŋ a gaŋ kɔge O zu ne zukɔgraa a gbire; ka ba seŋ O a soore O, “Wulwullo, fo baga ba kyebe ne te naŋ weɛrɛ be?” 39A Yeezu da iri tanne la a saseɛ, kyɛ yeli a mane, “E maaroŋ! Are zomm!” Lɛ la ka a saseɛ ŋmaa, ka a koɔ̃ ŋmaa vooroŋ seretete. 40A Yeezu da leɛ soore la a O potuuribo, “Bonso ka yɛ zoro dabeɛ̃? Yɛ mɔɔ naŋ ba taa yeldeebo be?” 41Dabeɛ̃ ne nɔmaa da kpɛ ba la yaga zaa, ka ba soorɔ taa, “Aŋ mɔɔ la a neɛ ŋa, haali ka saseɛ ane a mane sagra O noɔre?”

Currently Selected:

Mak 4: DNTTP

Highlight

Copy