Mak 10

Kultaa Baroo Yɛlɛ

(Mat 19:1-12; Luk 16:18)

1A Yeezu da yi la a be a gaa Gyudiya paaloŋ, a Gyɔɔdan man-gaŋne. Neŋyaga da la wa ŋmaagyili O la, ka O da kanne ba aŋa lɛ O naŋ da maŋ erɛ.

2A Farazii noba mine da wa la a Yeezu zie, kyɛ ba naŋ da boɔrɔ ka ba e O nyɛ la ka ba da soore O, “A tu la sori ka dɔɔ bare o pɔge be?” 3Ka a Yeezu yeli sɔge ba, “Boŋ noɔre la ka Moozul da ko yɛ?” 4Ka ba da yeli, “Moozul da tere la sori ka te maŋ sɛge pɔg-bare gane ko a pɔge kyɛ bare o.” 5Ka a Yeezu yeli ko ba, “A yɛ sukyie naŋ dare zuiŋ la so ka a Moozul da sɛge a noɔre ŋa ko yɛ. 6Ka lɛ naane, a yi a andonɛɛ piiluu saŋ, ‘Naaŋmen da iri ba la dɔɔ ane pɔge.’ 7‘A ŋaa zuiŋ, dɔɔ na maŋ bare la o saa ane o ma kyɛ laŋ ne a o pɔge, 8ka a ba bayi leɛ eŋgan-yeni.’ Azuiŋ ba ba la waa bayi, ba waa la eŋgan-yeni. 9Azuiŋ bonna Naaŋmen naŋ de lantaa, neɛzaa ta wɛle a taa.”

10Lɛ la ka ba da te kpɛ die ka a potuuribo laboreŋ soore O a yeli ŋa. 11A Yeezu da yeli ko ba la, “Soba na zaa naŋ bare o pɔge kyɛ la de pɔge yuo, toŋ la moɔrɔ toma a danweɛ pɔge zie; 12ka a pɔge meŋ wa bare o serɛ, kyɛ la te kuli dɔɔ yuo, o meŋ toŋ la moɔrɔ toma.”

Yeezu Naŋ Ko Bibiiri Maaloo

(Mat 19:13-15; Luk 18:15-17)

13Noba da taa la bibiiri waana ne a Yeezu zie ka O na de O nuuri seene ba; kyɛ a O potuuribo da nyare la ba zu. 14Kyɛ a Yeezu naŋ da wa nyɛ a ŋaa, O suuri da iree la ka O da yeli ko ba, “Yɛ bare a bibiiri ka ba wa N zie, yɛ ta pigi ba sori; bonso, a bama taaba la so a Naaŋmen naaloŋ. 15Yelmeŋɛ ka N yele korɔ yɛ, soba na zaa naŋ ba sage de a Naaŋmen naaloŋ yɛlɛ aŋa bibile, o soba koŋ baŋ kpɛ o poɔ.” 16A Yeezu pãã da nyɔge la a bibiiri kori; a de O nuuri pare ba zuri, a maale ba.

Bondaana Kaŋ Yɛlɛ

(Mat 19:16-30; Luk 18:18-30)

17A Yeezu naŋ da nara ka O tu sori, dɔɔ kaŋ da zo wa gbi la dumo O niŋesogɔ kyɛ soore O, “Wulwulsoŋ, boŋ ka N na e a nyɛ nyɔvore naŋ ba taa baaroo?” 18Ka a Yeezu soore o, “Bonso ka fo boɔlɔ ma soŋ soba? Neɛzaa ba waa soŋ ka Naaŋmen yoŋ naane. 19Fo baŋ la a Naaŋmen nɔɛ, ‘Ta ko neɛ; Ta toŋ moɔrɔ toma; Ta zuuro; Ta dire danse-zirii; Ta finni fo tɔ; Eŋnɛ fo saa ane fo ma.’ ” 20Ka a dɔɔ yeli ko O, “Wulwullo, N tuuro la a nɔɛ ama zaa a yi n biiluŋ saŋ a wa tɔ zenɛ.” 21Ka a Yeezu da kaa a dɔɔ tĩĩ, a deɛ nɔŋ o, kyɛ yeli, “Yeli yenaa kaŋ yoŋ la ka fo ba taa, gaa te koɔre a fo boma zaa a de a libie ko nembaalba, fo na taa la bondaaboma tenvelaa#10:21 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ poɔ, kyɛ pãã wa tuuro ma.” 22A dɔɔ naŋ da wa woŋ a ŋaa, o da sãã la o niŋe, a leɛ te gɛrɛ ne posaanaa, bonso, o da taa la boma yaga.

23Lɛ la ka Yeezu da leɛ kaa a noba zaa gyeere kyɛ yeli ko a O potuuribo, “Ana waa la tuo ko banaŋ naŋ e bondaanema ka ba kpɛ a Naaŋmen naaloŋ poɔ.” 24A potuuribo nɔɛ da maaɛ la yaga zaa ane a O yeluu ŋa. Kyɛ ka a Yeezu laboreŋ yeli ko ba, “N bibiiri, a Naaŋmen naaloŋ poɔ kpeɛbo na waa la tuo! 25A e la mɔlɔ ka bontaŋ tu fumini#10:25 Fumini: A Dagaaba mine maŋ yeli ka Musin bee Kpar-pii. voɔre yi, a gaŋ bondaana naŋ na kpɛ a Naaŋmen naaloŋ poɔ.” 26Ba nɔɛ da maaɛ la yaga zaa ka ba soorɔ taa, “Ka anaŋ pãã waa lɛ, nembuo la na toɔ̃ nyɛ faabo?” 27Ka a Yeezu da kaa ba kyɛ yeli, “Yɛlɛ naŋ koŋ baŋ nyɛ eebo nensaala zie, Naaŋmen eŋ zie, a na toɔ̃ nyɛ la eebo.”

28A Piita da piili yele korɔ O la, “Nyɛ, te bare la bonzaa kyɛ tu fo.” 29Ka a Yeezu yeli, “Yelmeŋɛ ka N yele korɔ yɛ, neɛzaa kyebe a bare o yiri, bee o yɔɔmine, bee o yɔɔpuuli, bee ma, bee saa, bee biiri, bee wɛre N zuiŋ, bee a Ŋmen-yelnoore zuiŋ, 30a koŋ la nyɛ a gbɛɛ kɔɔ a nyɔvore ŋa poɔ te naŋ be. O na leɛ nyɛ la yie, yɔɔmine, yɔɔpuuli, mamine, saamine, biiri ane wɛre ane dɔgɛɛ; a kyɛ naŋ la nyɛ nyɔvore naŋ ba taa baaroo a o kũũ puoriŋ.” 31Kyɛ noba yaga naŋ de weɛ na leɛ la puori deme, ka a puori deme meŋ leɛ wa de weɛ.

Yeezu Naŋ Yeli O Kũũ Ane O Leɛ-iruu Yɛlɛ A Gbɛre Bota Soba

(Mat 20:17-19; Luk 18:31-34)

32Ba da be la a sobiriŋ gɛrɛ Gyɛruzɛlɛm, ka a Yeezu da de a O potuuribo weɛ a kyɛnɛ. A O potuuribo nɔɛ da maaɛ la, kyɛ ka dabeɛ̃ da kpɛ a noba naŋ da tuuro ba. A Yeezu da laboreŋ taa la a O potuuribo pie ne bayi a gyɛŋ yi ne zie kaŋ a te piili yele korɔ ba yɛlɛ naŋ waana ka a pɔge O, 33a yele, “Yɛ nyɛ, te duoro gɛrɛ la Gyɛruzɛlɛm, ka ba na te de a Nensaala Bie eŋ a Naaŋmen bagmaalkare ane a Naaŋmen bege wulwulibo nuuriŋ, ka ba di O sɛrɛɛ a yeli ka O seŋ ne la kũũ; kyɛ ka ba pãã leɛ de O ko a Nemboore-yobo.#10:33 Nemboore-yobo: Noba na zaa naŋ da ba waa Gyuumine la a Nemboore-yobo. 34Ba na e O la la, a toore nentaare waare O, a feɛ O, kyɛ ko O, ka a beri ata daare ka O leɛ-iri yi a kũũ poɔ.”

Gyimisi Ane Gyɔɔn Naŋ Sɔre Yɛlɛ Yi Yeezu Zie

(Mat 20:20-28)

35Gyimisi ane Gyɔɔn, a Zɛbɛdii bidɔbɔ, da tage ta la a Yeezu, a yeli ko O, “Wulwullo, te boɔrɔ la ka fo e ko te bonna zaa te naŋ na sɔre fo zie.” 36Ka a Yeezu soore ba, “Boŋ mɔɔ la ka yɛ boɔrɔ ka N e ko yɛ?” 37Ka ba yeli ko O, “E ka te kaŋ zeŋ fo nuduluŋ seŋ, ka kaŋ meŋ zeŋ fo nugɔɔ seŋ a fo puubu poɔ.” 38Ka a Yeezu yeli ko ba, “Yɛ ba baŋ bonna yɛ naŋ sɔrɔ. Yɛ na toɔ̃ nyu la a zuŋmanekoɔ̃ ŋa N naŋ na nyu, bee a de a suobu na ba naŋ na so ma?” 39Ka ba da yeli sɔge O, “Te na toɔ̃ la.” Lɛ la ka a Yeezu yeli ko ba, “Yɛ sereŋ na nyu la a N zuŋmanekoɔ̃, a de a suobu na ba naŋ na so ma meŋ; 40kyɛ maa naane so ka N iri a banaŋ naŋ na zeŋ N nuduluŋ seŋ, bee N nugɔɔ seŋ; a e la banaŋ zuiŋ ba naŋ nare a ziiri ama bare soobo.”

41A ba pie na naŋ da wa woŋ a lɛ, ba suuri da piili ire ne la a Gyimisi ane a Gyɔɔn. 42Lɛ la ka a Yeezu da boɔle ba a yeli ko ba, “Yɛ baŋ ka banaŋ naŋ dire naaloŋ a Nemboore-yobo zu maŋ dire la kpeɛ̃õ ba zu, kyɛ ka ba nembɛrɛ wullo kpaŋkpaŋkpeɛ̃õ ba zu. 43Kyɛ a ba waa lɛ yɛ zie; ka yɛ kanzaa wa boɔrɔ ka o waa neŋkpoŋ yɛ poɔ, a ferɛɛ la ka o waa yɛ zaa tontonɔ, 44ka soba na zaa meŋ naŋ boɔrɔ ka o de weɛ yɛ poɔ, a ferɛɛ la ka o waa a yɛ zaa gbaŋgbaa. 45Bonso, a Nensaala Bie ba wa ka O wa zeŋ ka ba tonɔ korɔ O, O waɛ la ka O wa tonɔ korɔ noba kyɛ de a O nyɔvore yɔɔ de ne neŋyaga nyɔvoɛ.”

Yeezu Naŋ Saŋ Batemio Zɔnnoŋ

(Mat 20:29-34; Luk 18:35-43)

46Yeezu ne a O potuuribo da wa la Gyɛreko teŋɛ. O ne a O potuuribo ane a nembeɛoŋ naŋ da wa yire a Gyɛreko poɔ, Temiyo bidɔɔ Batemio naŋ da waa zɔŋ, a da maŋ sɔrɔ boma, da zeŋ la a sobiri noɔreŋ. 47O naŋ da wa woŋ ka Yeezu naŋ yi Naazɛrɛ la wa tɔlɔ, o da piili ŋmeɛrɛ la kpɛlle a yele, “Yeezu, Davil Bidɔɔ, zo n nembaaloŋ!” 48Ka noba yaga da tanne o ka o bare gɔmɔ, kyɛ a lɛ ka o da maaleŋ kyeere yaga zaa, “Davil Bidɔɔ, zo n nembaaloŋ!” 49Ka a Yeezu leɛ tɛge are kyɛ yeli, “Yɛ boɔle o ka o wa.” Ka ba da boɔle a dɔɔ zɔŋ, a yeli ko o, “Nyɔge fo meŋɛ, iri, O boɔlɔ fo la.” 50Lɛ la ka o da yage o kparoo lɔɔ bare, kyɛ gbaale iri wa a Yeezu zie. 51Ka a Yeezu soore o, “Boŋ la ka fo boɔrɔ ka N e ko fo?” Ka a dɔɔ zɔŋ yeli ko O, “N Wulwullo, e ka n leɛ nyɛrɛ.” 52Ka a Yeezu yeli ko o, “Gɛrɛ; a fo yeldeebo saŋ fo la.” A daadaalɛ ka o deɛ da leɛ nyɛrɛ a da tuuro O gɛrɛ.

Currently Selected:

Mak 10: DNTTP

Highlight

Copy