Mak 11

Yeezu Naŋ Kpɛ Gyɛruzɛlɛm Poɔ Ane Gandaaloŋ

(Mat 21:1-11; Luk 19:28-40; Gyn 12:12-19)

1Ba naŋ da wa te tara Gyɛruzɛlɛm, a peɛle Bɛtefage ane Bɛtani naŋ are a Oliva Taŋ lamboriŋ, a Yeezu da toŋ la O potuuribo bayi, 2a yeli ko ba, “Yɛ gaa a tembile na naŋ be yɛ niŋesogɔ, ka yɛnee wa te kpeɛrɛ a teŋɛ poɔ yɛ na nyɛ la boŋlee kaŋ neɛzaa naŋ daŋ ba zɔŋ zaa ka o leŋ are a be, yɛ lori o a taa wa ne. 3Ka neɛzaa wa soorɔ yɛ, ‘Bonso ka yɛ erɛ a ŋaa?’ yɛ deɛ yeli, ‘A Daana la boɔrɔ o, ka O naŋ wa baare, O na leɛ tere la ka ba wa ne o daadaalɛ.’ ” 4Ba da gaa te nyɛ la a boŋlee ka o leŋ are peɛle a dendɔre a yeŋe poɔ a sobiri zu. Ba naŋ da wa te loro o la 5ka noba mine naŋ are peɛle a be soore ba, “Bonso ka yɛ wa loro a boŋlee?” 6Ka ba da yeli ko ba lɛ a Yeezu naŋ da yeli; lɛ la ka a noba da vɛŋ ba ka ba taa a boŋlee gɛrɛ ne. 7Ba pãã da taa la a boŋlee wa ko a Yeezu, kyɛ yagre ba bonsuuri a yɛre dɔgle a boŋlee zu ka a Yeezu do zɔŋ. 8Noba yaga da yagre la ba bonsuuri yɛre a sobiri zu, ka ba mine meŋ kɔɔre vaare yi a wɛre poore a yɛre a sobiri zu. 9A noba banaŋ naŋ da de weɛ ane banaŋ naŋ da be a Yeezu puoriŋ, da kyaara la yaga zaa, a yele:

“Hozaana!

Soba na naŋ waana a Daana yuori eŋɛ nyɛ la maaloo!

10Te sããkoma Davil naaloŋ naŋ waana nyɛ la maaloo!

Ka Naaŋmen naŋ be sazu nyɛ puubu!”

11Lɛ la ka a Yeezu da gaa Gyɛruzɛlɛm a te kpɛ a Naaŋmen die; O naŋ da wa te kaa a boma zaa gyeere, O ne a potuuribo pie ne bayi da yi gaa la Bɛtani teŋɛ a saŋ naŋ da faa zuiŋ.

Yeezu Naŋ Kaa Eŋ Kaŋkaŋteɛ

(Mat 21:18-19)

12Zie naŋ da wa nyaa ka ba leɛ yi a Bɛtani a waana, kɔŋ da kpɛ la a Yeezu. 13O da naŋ te be la tɔɔre kyɛ nyɛ kaŋkanteɛ naŋ te are a taa vaare. Lɛ la ka a Yeezu da gaa o pare ka O te nyɛ ka o taa la wɔmɔ be. O naŋ da ta a teɛ pare, O da ba nyɛ wɔne zaa, ka vaare yoŋ naane, bonso, a da ba waa kaŋkanne wɔmmo saŋ. 14Ka a Yeezu yeli ko a kaŋkanteɛ, “Fo daŋ koŋ la wɔŋ wɔne zaa ka neɛ di.” A O potuuribo da woŋ la a lɛ O naŋ da yeli.

Yeezu Naŋ Digi Yɛreyɛrebɛ Bare A Naaŋmen Die Poɔ

(Mat 21:12-17; Luk 19:45-48; Gyn 2:13-22)

15Lɛ la ka a Yeezu ne O potuuribo da wa Gyɛruzɛlɛm. Ka O da te kpɛ a Naaŋmen die poɔ a piili digre a noba banaŋ naŋ da koɔrɔ boma ane a banaŋ naŋ daara boma a Naaŋmen die poɔ. O da daa la a libi-tɛgrebɛ tabolɔ lɔɔ, a daa a banaŋ meŋ naŋ da koɔrɔ ŋmama dakogri lɔɔ; 16kyɛ da ba sage ka neɛzaa de bonzaa tu ne a Naaŋmen die tɔle. 17O da kanna la a noba a yele, “Ba da ba sɛge a Naaŋmen gane poɔ:

‘Ba na boɔlɔ la a N yiri nemboorɔ zaa puoruu yiri’?

Kyɛ ka yɛ e ka o leɛ nannyig-kpeɛne sɔgloozie.”

18A Naaŋmen bagmaalkare ane a Naaŋmen bege wulwulibo naŋ da wa woŋ a yɛlɛ ama, ba da piili boɔrɔ la sori na ba naŋ na tu a ko a Yeezu. Kyɛ ba da zoro la O dabeɛ̃, bonso, a noba zaa nɔɛ da maaɛ la ne a O kannoo. 19Zie naŋ da wa maa, a Yeezu ane O potuuribo da yi la a teŋkpoŋ poɔ.

A Kaŋkaŋteɛ Yelwulaa

(Mat 21:20-22)

20A baguo saŋ ba naŋ da wa kyɛnɛ tɔlɔ, a potuuribo da nyɛ la a kaŋkanteɛ na ka o ko o zaa a sigi tɔ o nyaga. 21Lɛ la ka Piita leɛ-teɛre a yeli ko a Yeezu, “Wulwullo, nyɛ! A kaŋkanteɛ na fo naŋ da kaa-eŋ la ko o zaa.” 22Ka a Yeezu yeli sɔge ba, “Yɛ taa yeldeebo Naaŋmen eŋɛ. 23Yelmeŋɛ zaa ka N yele korɔ yɛ, ka yɛnee yeli ko a taŋ ŋa, ‘Iri sigi te le a mane poɔ’; kyɛ ba bonnɔ togitogi zaa fo sukyiri poɔ, kyɛ sage de ka a lɛ yɛ naŋ yeli na nyɛ la eebo, a sereŋ na e la a lɛ. 24Azuiŋ, N yele korɔ yɛ la, bonna zaa yɛ naŋ sɔre a yɛ puoruu poɔ, yɛ sage de ka yɛ nyɛɛ la, kyɛ a sereŋ na e la yɛ soobo.”

25“Kyɛ saŋ na zaa yɛ naŋ wa are puoro, yɛ maŋ di suuri ko neɛzaa naŋ sãã yɛ, a lɛ na vɛŋ la ka yɛ Saa naŋ be tenvelaa#11:25 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ poɔ meŋ di yɛ yelbebe suuri ko yɛ.” 26Kyɛ ka yɛnee ba di suuri ko yɛ taaba naŋ sãã yɛ, yɛ Saa naŋ be tenvelaa poɔ meŋ koŋ di suuri ko yɛ.

Ba Naŋ Soore Yeezu A O Kpeɛ̃õ Yiibu Zie

(Mat 21:23-27; Luk 20:1-8)

27A Yeezu ne O potuuribo da laboreŋ wa la Gyɛruzɛlɛm. O naŋ da wa te yoɔrɔ a puoruudie poɔ la ka a Naaŋmen bagmaalkare, ane a Naaŋmen bege wulwulibo ane a teŋɛ nembɛrɛ da wa O zie, 28a wa soore O, “Yeŋ la ka fo nyɛ a kpeɛ̃õ ŋa a tonɔ ne a toma ama? Nembuo la ko fo a kpeɛ̃õ ka fo tonɔ ne a?” 29Ka a Yeezu yeli ko ba, “N meŋ na soore yɛ la soorebiri bon-yeni, ka yɛnee wa iri a noɔre ko ma, N meŋ na yeli ko yɛ la benee N naŋ nyɛ a kpeɛ̃õ erɛ ne a yɛlɛ ama. 30Yɛ yeli ko ma: A Gyɔɔn suobu da yi la Naaŋmen zie bee nensaala zie?” 31Lɛ la ka ba leɛ ŋmeɛrɛ nɔkpeɛne ne taa a yele, “Ka tenee yeli, ‘Naaŋmen zie la,’ O na soore te la, ‘Boŋ pãã so ka yɛ da ba sage de o yɛlɛ?’ 32Kyɛ bee te yeli, ‘Nensaala zie la’?” Ba da zoro la a noba dabeɛ̃, bonso, a noba zaa da sage ka a Gyɔɔn sereŋ waa la Ŋmen-yelmanna. 33Lɛ la ka ba yeli sɔge a Yeezu, “Te ba baŋ.” Ka a Yeezu meŋ yeli ko ba, “Ka lɛ N meŋ koŋ yeli ko yɛ neɛ na zie N naŋ nyɛ a kpeɛ̃õ a tonɔ ne a toma ama.”

Currently Selected:

Mak 11: DNTTP

Highlight

Copy