Mat 7
7
Taaba Sɛrɛɛdiibu Yɛlɛ
(Luk 6:37-38, 41-42)
1“Ta di fo tɔ sɛrɛɛ, ka ba ta wa di fo meŋ sɛrɛɛ. 2A lɛ fo naŋ di fo tɔ sɛrɛɛ, lɛ ka ba na di fo meŋ sɛrɛɛ. Bonna fo naŋ manne ne ko fo tɔsoba, a bonna ne o zu ka ba na manne ne ko fo meŋ. 3Bonso ka fo nyɛ muri naŋ be fo tɔsoba nimiri poɔ, kyɛ ba nyɛ a wɛge naŋ be fo meŋɛ nimiri poɔ? 4Bee wola ka fo na toɔ̃ yeli ko fo tɔsoba, ‘Vɛŋ ka N iri muri bare fo nimiri poɔ,’ kyɛ ka wɛge be fo meŋɛ nimiri poɔ? 5Fõõ bampuori-kombampoɔ ŋa, daŋ iri a wɛge naŋ be fo meŋɛ nimiri poɔ bare, lɛ ka fo na nyɛrɛ velaa a pãã toɔ̃ iri a muri bare fo tɔsoba nimiri poɔ.
Ta Dɛge Bon Naŋ E Soŋ
6“Ta de bonsoŋ eŋ baare, bee a de fo boma naŋ taa yuori lɔɔ eŋ dobaare. A na neɛ a la sãã bare, kyɛ nyɔge fo meŋ tage kyore.
Yɛ Sɔre, A Bɔ, A Kpaare
(Luk 11:9-13)
7“Yɛ sɔre, ba na ko yɛ la; yɛ bɔ, yɛ na nyɛ la, yɛ kpaare a pane, ba na yuo ko yɛ la ka yɛ kpɛ. 8Bonso, neɛzaa naŋ maŋ sɔre ba maŋ ko o la, neɛzaa meŋ naŋ maŋ bɔ o maŋ nyɛ la, ka a pane maŋ yuo ko neɛzaa meŋ naŋ kpaare. 9Nembuo la be yɛ poɔ kyɛ, ka o bie na sɔre boroboro ka o de kuuri ko o? 10Bee ka o bie na sɔre zommo, ka o de waabo ko o? 11Ka yɛnee gba naŋ waa nenfaare baŋ ka yɛ de bonsoŋ ko yɛ bibiiri, wola ka yɛ Saa naŋ be tenvelaa#7:11 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ poɔ koŋ ko banaŋ zaa naŋ maŋ sɔre bonveɛle O zie gaŋ lɛ! 12Yelzaa poɔ, yɛ maŋ erɛ korɔ yɛ taaba a seŋ lɛ yɛ naŋ boɔrɔ ka ba erɛ korɔ yɛ; bonso, a begɛ ane a Ŋmen-yelmanneba wuluu tɛgɛ la a lɛ.
A Dendɔ-fogloo Yɛlɛ
(Luk 13:24)
13“Tu a dendɔre na naŋ e fogloo kpɛ, bonso, a dendɔre na naŋ gɛrɛ weɛbo poɔ e la yɛloŋ ka o sori tuubu e mɔlɔ, ka noba yaga tuuro o. 14Kyɛ a nyɔvore dendɔre waa la fogloo, ka o tuubu waa tuo, ka noba fẽẽ tuuro o.
Teɛ Ane O Wɔmɔ Yɛlɛ
(Luk 6:43-44)
15“Yɛ baŋna ne a kaŋwaa Ŋmen-yelmanneba yɛlɛ. Ba maŋ pilli la pegama a wa yɛ zie kyɛ ka ba pooreŋ ka ba waa gboŋgboe. 16Ba yel-erre la na wuli noba na ba naŋ waa. Ba mɔɔ maŋ pɔre la zemberemɛ gɔteere zu bee a pɔre kaŋkanne gɔzaŋaa teɛ zu? 17A lɛ ne o zu, teɛ zaa naŋ waa velaa maŋ wɔŋ la wɔŋ veɛle; ka teɛ naŋ waa faa meŋ wɔŋ wɔŋ faare. 18Teɛ naŋ waa velaa kontoɔ̃ wɔŋ wɔŋ faare, bee ka teɛ naŋ waa faa wɔŋ wɔŋ veɛle. 19Teɛ na zaa naŋ ba wɔnɔ wɔŋ veɛle, ba na kyɛ o la a lɔɔ eŋ vũũ poɔ. 20Azuiŋ yɛ na baŋ ba la a yi ba yel-erre zie.
Meŋɛ Bɛlloo Yɛlɛ
(Luk 13:25-27)
21“A ba e ka neɛzaa naŋ boɔlɔ ma ‘Daana, Daana,’ la na kpɛ a tenvelaa naaloŋ. Kyɛ soba na yoŋ naŋ erɛ a N Saa naŋ be tenvelaa poɔ poboɔbo yɛlɛ la na kpɛ a tenvelaa 22A bebiri na daare, noba yaga na yeli ko ma la, ‘Daana, Daana, te mɔɔ naane da moɔlɔ a Naaŋmen yelbiri a fo yuori eŋɛ, a da digre sefaare fo yuoriŋ, a kyɛ da tonɔ toŋkpeɛne yaga a fo yuori eŋɛŋ?’ 23Kyɛ N pãã na leɛ yeli ko ba la, ‘Maa ba baŋ yɛ togitogi; yɛ tage yi be N zie, yɛnee yelfa-erebɛ ŋa.’
A Piiri Zu Yiri Ane A Biiree Zu Yiri Yɛlɛ
(Luk 6:47-49)
24“Neɛ na zaa naŋ woŋ a N yelbie ama, a erɛ seŋ lɛ a naŋ wuli, na waa seŋ ŋa dɔɔ yɛmbaŋna kaŋ naŋ mɛ o yiri piiri zu. 25Ka saa mi, ka kɔmpie ŋmɛ, ka saseɛ fu dɔ̃ɔ̃ a yiri kyɛ ka o ba le, bonso, piiri zu la ka o biŋ a yiri pare. 26Neɛ na zaa meŋ naŋ woŋ a N yelbie ama, kyɛ ba erɛ seŋ lɛ a naŋ wuli, na waa seŋ ŋa dɔɔ damboli kaŋ naŋ mɛ o yiri biiree zu. 27Ka saa mi, ka kɔmpie ŋmɛ, ka saseɛ fu dɔ̃ɔ̃ a yiri ka o zaa le vɔgle teŋɛ muro muro. A leebu da sereŋ waa la kpoŋ yaga!”
28A Yeezu naŋ da wa yeli a yɛlɛ ama zaa baare, a nembeɛoŋ nɔɛ da maaɛ la ne a O wuluu, 29bonso, O da kanne ba la aŋa neɛ naŋ taa kpeɛ̃õ. O ne a Naaŋmen bege wulwulibo kannoo da ba yi taa.
Currently Selected:
Mat 7: DNTTP
Highlight
Share
Copy
Want to have your highlights saved across all your devices? Sign up or sign in
First New Testament in Dagaare Language © The Bible Society of Ghana, 2013.
