Mat 6
6
Nembaalba Sommo Yɛlɛ
1“Yɛ maaleŋ erɛ a ta wa tonɔ yɛ tonveɛle noba niŋeŋ ka ka ba nyɛ. Ka yɛnee wa erɛ ka noba nyɛ, a yɛ Saa naŋ be tenvelaa#6:1 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ poɔ koŋ la yɔɔ yɛ.
2“Azuiŋ, ka yɛnee maŋ wa soŋ nembaala, yɛ ta maŋ peɛlɛ eelɛ ka noba na baŋ, aŋa a bampuori-kombampoɔ mine naŋ maŋ erɛ a puoruuderi poore ane a sobɛrɛ zu, ka noba na nyɛ a puu ba. Yelmeŋɛ zaa ka N yele korɔ yɛ, ba nyɛ la ba san-yɔɔ baare. 3Kyɛ ka yɛnee maŋ wa korɔ nembaalba sommo, yɛ ta maŋ vɛŋ ka yɛ nugɔɔ baŋ bonna yɛ nuduluŋ naŋ erɛ, 4ka yɛ nembaalba sommo na ta sãã, kyɛ a yɛ Saa naŋ nyɛrɛ yelsɔglɔ zaa na yɔɔ yɛ la.
Puoruu Yɛlɛ
(Luk 11:2-4)
5Ka yɛnee maŋ wa puoro, yɛ ta maŋ erɛ aŋa a bampuori-kombampoɔ mine naŋ maŋ erɛ a lɛ. Ba maŋ nɔŋ ka ba are puoro a puoruuderi pooreŋ ane a sobɛrɛ zu ka noba na nyɛ ba. Serɛzaa ka N yele korɔ yɛ, ba de la a ba san-yɔɔ baare. 6Kyɛ ka yɛnee maŋ wa puoro, yɛ maŋ kpɛ yɛ deri poore, a page a pama, kyɛ puori a yɛ Saa naŋ be zisɔglaa poɔ; a yɛ Saa naŋ nyɛrɛ a yelsɔglɔ zaa na yɔɔ yɛ la.
7“Ka yɛnee maŋ wa puoro; yɛ ta maŋ yele yɛlɛ naŋ ba taa tɛgɛ dɔglɔ taa, aŋa a Nemboore-yobo#6:7 Nemboore-yobo: Noba na zaa naŋ da ba waa Gyuumine la a Nemboore-yobo. naŋ maŋ erɛ a lɛ. Ba maŋ teɛre ka, ka ba naŋ yele yelyaga, lɛ ka Naaŋmen na woŋ a ba puoruu. 8Yɛ ta tɔglɔ ba, bonso, a yɛ Saa maŋ daŋ baŋ la bon yɛ naŋ boɔrɔ ka yɛ naŋ ba sɔre O sɛre.
9“Azuiŋ yɛ maŋ puori ŋaa:
Te Saa naŋ be tenvelaa poɔ,
ka fo yuori waa soŋ,
10Ka fo naaloŋ wa.
Ka fo poboɔbo nyɛ eebo
a teŋɛzu, a seŋ a naŋ waa lɛ tenvelaa poɔ.
11Ko te a te zenɛ bondirii.
12Di te saanaa suuri ko te,
aŋa lɛ te naŋ dire suuri korɔ banaŋ naŋ sãã te.
13Ta e ka te kpɛ enyaabo poɔ,
kyɛ faa te yi ne a nenfaa nuuri poɔ.#6:13 A gankorɔ mine poɔ ba maŋ sɛge la a ŋmaaroŋ ŋa poɔ: Bonso, a naaloŋ ane a kpeɛ̃õ ane a puubu e la fo soobo tegitegilɛ. Ameena.
14Ka yɛnee dire yɛ taaba yelfaare suuri korɔ ba, a yɛ Saa naŋ be tenvelaa poɔ na di la yɛ meŋ yelfaare suuri ko yɛ. 15Kyɛ ka yɛnee ba dire yɛ taaba yelfaare suuri korɔ ba, a yɛ Saa meŋ koŋ di yɛ meŋ yelfaare suuri ko yɛ.
Nɔleŋ Yɛlɛ
16“Ka yɛnee maŋ wa leŋ noɔre, yɛ ta maŋ sãã yɛ niŋe aŋa a bampuori-kombampoɔ mine. Ba maŋ sãã la ba niŋe ka noba nyɛ a baŋ ka ba leŋ la noɔre. Yelmeŋɛ ka N yele korɔ yɛ, ba nyɛ la ba san-yɔɔ baare. 17Kyɛ ka yɛnee maŋ wa leŋ noɔre, yɛ maŋ pɛge yɛ niŋe, a sɔ yɛ zu kãã, 18ka lɛ vɛŋ ka noba ta baŋ ka yɛ leŋ la noɔre. Kyɛ a yɛ Saa naŋ nyɛrɛ yelsɔglɔ zaa na ko yɛ la a san-yɔɔ.
Tenvelaa Bondaanoŋ Yɛlɛ
(Luk 12:33-34)
19“Yɛ ta boɔrɔ yɛ bondaaboma binne a teŋɛzu kyɛ, benee mɔgre ane zoɔ̃#6:19 Zoɔ̃: A Dagaaba mine maŋ yeli ka ‘Bazẽẽ.’ naŋ na di a, bee nannyigri naŋ na kɔɔ a pane kyɛ kpɛ zu a; 20kyɛ yɛ boɔrɔ yɛ bondaaboma binne tenvelaa poɔ, be ka mɔgre bee zoɔ̃ kontoɔ̃ di a, bee ka nannyigri kontoɔ̃ kɔɔ a pane kyɛ kpɛ zu a. 21Bonso, zie na fo bondaaboma naŋ be, be la ka fo sukyiri meŋ na be.
Nimiri La A Eŋɛ Veɛloŋ
(Luk 11:34-36)
22“A nimiri la a eŋɛ fentelɛ. Azuiŋ, ka fo nimiri wa taa laafeɛ, a fo eŋɛ zaa na paale ne la veɛloŋ. 23Kyɛ ka fo nimiri wa sãã, a fo eŋɛ zaa na paale ne la ligruŋ, kyɛ ka a veɛloŋ naŋ be fo eŋɛ wa e ligruŋ, nyɛ lɛ a ligruŋ naŋ pãã na e kpoŋ seŋ!
Nembɛrɛ Bayi Toma Tommo Yɛlɛ
(Luk 16:13; 12:22-31)
24“Neɛzaa kontoɔ̃ tonɔ korɔ nembɛrɛ bayi. O na kyiiri la kaŋ, kyɛ nɔŋ kaŋ; bee o na sagra la kaŋ noɔre kyɛ zagra kaŋ deni. Yɛ kontoɔ̃ tonɔ korɔ Naaŋmen kyɛ naŋ kpimare libi-bɔ meŋ.
Yɛ Ta Kyerɛ
(Luk 12:22-31)
25“Azuiŋ, N yele korɔ yɛ la, yɛ ta vɛŋ ka yɛ nyɔvore yɛlɛ dɔɔnɔ yɛ, bon yɛ naŋ na di bee a nyu, bee ka bonsuuri yɛlɛ dɔɔnɔ yɛ. A nyɔvore ba gaŋ a bondiraa be, ka a eŋɛ meŋ gaŋ a bonsuuri be? 26Yɛ leɛ kaa nyɛ a sazu bon-ɛgre, a ba borɔ bee a kyeɛrɛ, bee eŋnɛ boma bugri poɔ meŋ; kyɛ a yɛ tenvelaa Saa guolo a la. Yɛ ba seɛ a bon-ɛgre ama yaga zaa be? 27A yɛ buo soba la na kyerɛ, ka a lɛ vɛŋ ka gogo-yeni la dɔgle a o yuomo zu? 28Ka bonso, ka yɛ kyerɛ bonsuuri yɛlɛ? Yɛ kaa nyɛ a baa pɛmpɛllɛ naŋ maŋ baara lɛ. A ba tonɔ toma bee a wuoro pɛmɛ, 29kyɛ anealɛzaa, N yele korɔ yɛ la, haali gba Solomɔn ne o naaloŋ veɛloŋ zaa daŋ ba su bonsuuri ka a veɛlɛ seŋ a ama kanzaa. 30Kyɛ ka Naaŋmen pãã kaara a weɛ moɔ zu seŋ ŋaa, anaŋ are zenɛ ka zie wa nyaana ka ba de lɔɔ eŋ vũũ poɔ, O koŋ kaa yɛ a gaŋ a lɛ be, yɛnee yelde-fẽẽ deme? 31Azuiŋ, yɛ ta kyerɛ a yele, ‘Boŋ ka te na di?’ bee ‘Boŋ ka te na nyu?’ bee ‘Boŋ ka te na su?’ 32A Nemboore-yobo la yɔ zoro boɔrɔ a teŋɛzu boma ama. Serɛzaa, a yɛ Saa naŋ be tenvelaa poɔ baŋ ka yɛ boɔrɔ la a boma ama zaa. 33Yɛ moɔ nimiri a daŋ bɔ a Naaŋmen naaloŋ ane O mennoŋ, kyɛ O pãã na de la a boma ama zaa naŋ kyɛre meŋ ko yɛ.
34Azuiŋ, yɛ ta kyerɛ bieu yɛlɛ, bonso, a bieu meŋ taa la o meŋɛ deme. Bebiri zaa taa la o meŋɛ yɛlɛ.
Currently Selected:
Mat 6: DNTTP
Highlight
Share
Copy
Want to have your highlights saved across all your devices? Sign up or sign in
First New Testament in Dagaare Language © The Bible Society of Ghana, 2013.