Mat 25

Pɔgzeŋguribo Pie Sekpɔgre

1“A tenvelaa#25:1 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ naaloŋ na manne seŋ ŋa, pɔgzeŋguribo pie naŋ da de ba fentelɛ yi ka ba gaa te tuori a pɔgpaalaa serɛ. 2Ba banuu da waa la dambolo, ka ba banuu meŋ da waa yɛmbaŋnema. 3A dambolo naŋ da de a ba fentelɛ, ba da ba la de kãã poɔ gɛrɛ ne; 4kyɛ a yɛmbaŋnema da de la kãã eŋ kolee poɔ gɛrɛ ne. 5A pɔgpaalaa serɛ naŋ da kɔɔrɔ waabo zuiŋ, ba zaa nimie da kyuuro la ka ba faa gbiri. 6Kyɛ tensogpozentaa saŋ, kpɛlle da ŋmɛɛ la, ‘Nyɛ! A pɔgpaalaa serɛ waana la, yɛ yi wa tuori o.’ 7Lɛ la ka a pɔgzeŋguribo pie na zaa vaa-iri a de ba fentelɛ, a maale a eŋ ka a nyɛrɛ. 8Ka a pɔgzeŋguribo banaŋ naŋ da waa dambolo da yeli ko a yɛmbaŋnema, ‘Yɛ ŋmaa yɛ kãã belaa ko te, a te fentele kpiire la.’ 9Kyɛ ka a yɛmbaŋnema na leɛ yeli, ‘Ai! a kãã koŋ seŋ te ne yɛ zaa. Yɛ gaa a kãã koɔrebɔ zie a te da a mine.’ 10Kyɛ ba naŋ da yi gaa ka ba te da a kãã la ka a pɔgpaalaa serɛ wa, ka banaŋ zaa naŋ da nare bamenne da tu o ka ba te kpɛ a pɔgebeɛle tigri die kyɛ ka ba page a dendɔre. 11A lɛ puoriŋ, a pɔgzeŋguribo banaŋ naŋ da waa dambolo meŋ da waɛ la, a wa yele, ‘Daana, daana, yuo a dendɔre ko te.’ 12Kyɛ ka o leɛ yeli, ‘Serɛzaa ka N yele korɔ yɛ, N ba baŋ yɛ.’ 13Azuiŋ yɛ gu yɛmenne velaa, bonso, yɛ ba baŋ a daare bee a saŋ.”

A Tontonema Bata Sekpɔgre

(Luk 19:11-27)

14“A manne seŋ ŋa dɔɔ kaŋ naŋ boɔrɔ ka o tu sori, a boɔle o gbaŋgbaare a de o boma ko ba ka ba kaara; 15o da ko la ba kaŋ warbie anuu, a ko kaŋ warbie ayi, kyɛ ko kaŋ na meŋ warbi-yeni. O da ko la a gbaŋgbaa kanzaa a seŋ ne o faŋ kyɛ pãã tu a sori. 16A onaŋ naŋ da de a warbie anuu, da de la a libiri a piili ne yɛroŋ daadaalɛ, a nyɛ warbie anuu tɔnɔ dɔgle a libiri zu. 17A lɛ ne o zu la ka a onaŋ naŋ da de a warbie ayi na meŋ nyɛ warbie ayi tɔnɔ dɔgle o libiri zu. 18Kyɛ ka a onaŋ naŋ da de a warbi-yeni na da yi te tu bogi teŋɛŋ a de a o daana libiri ũũ. 19A naŋ da wa kɔɔre yaga la, ka a gbaŋgbaare bama daana da leɛ yi a o sori wa, ka o ne ba sɛgre a o libi-yɛlɛ. 20Lɛ la ka a onaŋ naŋ da de a warbie anuu, da de a warbie anuu tɔnɔ o naŋ nyɛ dɔgle a libi-zu, a wa yele, ‘N daana, fo da ko ma la warbie anuu; nyɛ N meŋ toŋ nyɛ la warbie anuu tɔnɔ a dɔgle a libiri zu.’ 21Ka a o daana yeli ko o, garebanyɛ! gbaŋgba-soŋ, fo seŋ ne la dɛloo. Fo naŋ moɔ nimiri kaa bonfee zu velaa N na e la ka fo kaara bon-yaga zu. Kpɛ wa laŋne ma a wono noɔ. 22Ka a onaŋ meŋ naŋ da de warbie ayi meŋ wa yi a yele, ‘N daana, fo da ko ma la warbie ayi, N meŋ nyɛ la warbie ayi tɔnɔ a dɔgle a zu.’ 23Ka a o daana yeli ko o, garebanyɛ! gbaŋgba-soŋ, fo e la neɛ naŋ seŋ ne dɛloo. Fo moɔ la nimiri kaa bonfee zu velaa, N na e la ka fo kaara bon-yaga zu. Kpɛ wa laŋne ma a wono noɔ. 24Lɛ la ka a onaŋ meŋ naŋ da de a warbi-yeni na tage ta, a yele, ‘N daana, N baŋ ka fo waa la potuo soba. Fo maŋ kyɛ la boma zie na fo naŋ ba bore, a kaale wuo boma zie na fo naŋ ba yaare bombie. 25Azuiŋ, N da zoro la dabeɛ̃, a gaa te tu bogi ũũ a fo libiri. Nyɛ a fo bon.’ 26Ka a o daana leɛ yeli sɔge, ‘Fõõ gbaŋgba-faa, ane entuo soba! Fo yeli ka fo baŋ ka N maŋ kyɛ la boma zie na N naŋ ba bore, a kaale wuo boma, zie na N naŋ ba yaare? 27Ka lɛ a da seŋ ka fo taa a N libiri te biŋ baŋgye poɔ, ka maa wa leɛ wa, ka N wa de n libiri, ane tɔnɔ. 28Azuiŋ, yɛ de a libiri o zie ko a onaŋ naŋ taa a warbie pie na. 29Bonso, banaŋ zaa naŋ taa, ba na la ko ba la amine poɔ, ka ba taa ka a gore ba, kyɛ banaŋ naŋ ba taa, haali a fẽẽ na meŋ ba naŋ taa ba na de a la yi ba zie. 30A gbaŋgbaa ŋa naŋ ba taa tɔnɔ, yɛ de o lɔɔ eŋ yeŋ lige poɔ, be konni ane nyemɛ nyeroo naŋ na be.’ ”

A Tenne Sɛrɛɛdiibu Yɛlɛ

31“Ka a Nensaala Bie wa wa a O veɛloŋ poɔ, a laŋ ne a malekere zaa, O pãã na wa zeŋ la O veɛloŋ nakogi zu. 32A nemboorɔ zaa na laŋ la taa O niŋesogɔ, ka O wɛle ba taa, aŋa pekyeenɛ naŋ maŋ wɛle o peere ne a boore lɛ. 33O na e la ka a peere be O nuduluŋ seŋ, kyɛ ka a boore meŋ be o nugɔɔ seŋ. 34A naa pãã na yeli ko la banaŋ naŋ be o nuduluŋ seŋ, ‘Yɛ wa, yɛnee N Saa naŋ maale, yɛ wa di a naaloŋ gbandiruŋ#25:34 Gbandiruŋ: A Dagaaba mine maŋ yeli ka ‘Kyɛndi.’. ba naŋ nare bare yɛ, a yi a tendaa piiluu saŋ. 35Bonso, kɔŋ da kpɛ ma la ka yɛ ko ma diibu, ka kɔŋnyuuri da kpɛ ma ka yɛ ko ma koɔ̃ ka N nyu. N da waa la saana ka yɛ da tuori de ma saanoŋ. 36N da taa la eŋkpoŋkpoli ka yɛ ko ma bonsuuri, N da beɛrɛ la ka yɛ kaa N zie. N da be la nempagdie poɔ, ka yɛ wa nyɛ ma.’ 37A nemmenne pãã na leɛ soore O la, ‘Daana, boŋ saŋ la ka te nyɛ fo ka kɔŋ kpɛ fo ka te ko fo diibu, bee ka kɔŋnyuuri kpɛ fo ka te ko fo koɔ̃ ka fo nyu? 38Dabori la ka fo da waa saana ka te taa fo kpɛ ne die, bee ka fo da taa eŋkpoŋkpoli ka te ko fo bonsuuri? 39Boŋ saŋ la ka fo da beɛrɛ ka te wa nyɛ fo, bee a be nempagdie poɔ ka te wa nyɛ fo?’ 40A naa na leɛ yeli ko ba la, ‘Yelmeŋɛ ka N yele korɔ yɛ, saŋ na zaa yɛ naŋ e a yeli ŋa kaŋ tɔ ko a N yɔɔmine ane n yɔɔpuuli bama kanzaa, maa la ka yɛ e a lɛ tere.’ 41Kyɛ O pãã na yeli ko la a O nugɔɔ deme meŋ, ‘Yɛ sɛre yi be N zie, yɛnee neŋkaa-enne. Yɛ gaa te kpɛ a vũũ na poɔ ba naŋ nare bare a Setaana ne o malekefaare ka a ba kpiire; 42bonso, kɔŋ da kpɛ ma la, ka yɛ ba ko ma bondirii, ka kɔŋnyuuri da kpɛ ma, ka yɛ ba ko ma koɔ̃ ka N nyu. 43N da waa la saana, ka yɛ ba tuori de ma. N da taa la eŋkpoŋkpoli, ka yɛ ba ko ma bonsuuri. Ka N da beɛrɛ ka yɛ ba wa nyɛ ma, ka N da be nempagdie poɔ, ka yɛ ba wa nyɛ ma.’ 44Lɛ la ka a nenfaare ŋa meŋ na yeli sɔge O, ‘Daana, boŋ saŋ la ka te da nyɛ fo ka fo taa kɔŋ, bee kɔŋnyuuri, bee a waa saana, bee a taa eŋkpoŋkpoli, bee a beɛrɛ, bee a be nempagdie poɔ kyɛ ka te ba kaa fo zie?’ 45O pãã na yeli sɔge ba la, ‘Yelmeŋɛ ka N yele korɔ yɛ, saŋ na yɛ naŋ zagre ka yɛ e soŋ a ko a N yɔɔmine bama kanzaa, maa meŋɛ la ka yɛ zagre ka yɛ soŋ a lɛ.’ 46A bama pãã na kpɛ la tuo naŋ babaara poɔ, kyɛ ka a nemmenne kpɛ nyɔvore naŋ ba taa baaroo poɔ.”

Currently Selected:

Mat 25: DNTTP

Highlight

Copy