Mat 24

Yeezu Naŋ Yeli A Naaŋmen Die Sããmo Yɛlɛ

(Mak 13:1-2; Luk 21:5-6)

1A Yeezu naŋ da wa yi a Naaŋmen die poɔ a kyɛnɛ gɛrɛ, a O potuuribo da wa la O zie a wa teɛ wullo O a Naaŋmen die. 2Lɛ la ka O soore ba, “Yɛ nyɛ la a ama zaa, bee yɛ ba nyɛ a? Yelmeŋɛ ka N yele korɔ yɛ, ba koŋ bare a yiri ŋa kusi-yenaa zaa ka o dɔgle o tɔ zu. A zaa pabo ka ba na daalɔɔ.”

A Andonɛɛ Baaroo Yelwulii

(Mak 13:3-13; Luk 21:7-19)

3A Yeezu naŋ da wa zeŋ a Oliva Taŋzu, a O potuuribo da wa la O zie ba yoŋ tɛgɛ, a wa soore O, “Yeli ko te, boŋ saŋ la ka a yeli ŋa na e? Ka boŋ la na wuli ka a fo leɛ-waabo ane a teŋɛ baaroo saŋ taɛ la?” 4Ka a Yeezu yeli sɔge ba, “Yɛ gu yɛmenne velaa ka neɛzaa ta wa bɛlle yɛ. 5Bonso, noba yaga na wa la N yuori eŋɛ, a yele, ‘maa la a Mɛzaaya!’#24:5 Mɛzaaya: A Mɛzaaya tɛgɛ la a ‘Kirista.’ kyɛ na bɛlle noba yaga ka ba bɔre. 6Yɛ na woŋ la zɔɔre yɛlɛ, ane zɔɔre yɛlɛ ba naŋ na waala yele; yɛ ta vɛŋ ka dabeɛ̃ kpɛ yɛ. Ama zaa na e la kyɛ ka a teŋɛ naŋ koŋ baare sɛre. 7Bonso, paaloŋ na maŋ iri zɔɔrɔ ne la o paaloŋ tɔ, ka namine iri zɔɔrɔ ne ba namin-taaba. Kɔŋkpoŋ na le la a ziiri zaa, kyɛ ka a teŋɛ gbigre a ziiri yaga poore: 8kyɛ a ama zaa waa seŋ ŋa pɔg-poɔ naŋ ta dɔgebo ka a o poɔ piili beɛrɛ.”

Dɔgroŋ Kpoŋ Naŋ Waana Yɛlɛ

9“Ba na de yɛ la tere ka ba dɔgre, kyɛ ko yɛ, ka a tenne zaa kyiiri yɛ, a N yuori zuiŋ. 10Noba yaga na zagre la a Naaŋmen yɛlɛ a lɛ saŋ, a yire taa poe, kyɛ kyiire taa. 11Kaŋwaa Ŋmen-yelmanneba yaga na yi la, a bɛlle noba yaga ka ba bɔre. 12Kyɛ potuoloŋ naŋ na do zu yaga zuiŋ, noba yaga nɔmmo na maa la. 13Kyɛ soba na zaa naŋ na di kannyiri te ta a baaroo saŋ, na nyɛ la faabo. 14Ba na moɔle la a Naaŋmen naaloŋ yelnoore a tendaa zaa zu, ka a e danseɛ a noba zaa zie kyɛ ka a baaroo pãã ta.”

A Kyiiruŋ Kpoŋ Kpoŋ Yɛlɛ

(Mak 13:14-23; Luk 21:20-24)

15Azuiŋ, ka yɛnee wa nyɛ a kyiiruŋ kpoŋ kpoŋ ka o are a Naaŋmen die zisoŋ poɔ, aŋa lɛ a Ŋmen-yelmanna Daneɛl naŋ da daŋ yeli, (vɛŋ ka neɛ naŋ sɔre a gane baŋ a tɛgɛ), 16a ferɛɛ la ka banaŋ naŋ be Gyudiya paaloŋ zo kpɛ a tanne poore. 17Soba na naŋ be peɛzu ta la sigi ka o te de o boma naŋ be a die poɔ. 18Soba na naŋ be weɛ poɔ ta wa leɛ kulo ka o te de kparoo. 19Pɔgpoore ane banaŋ naŋ taa bilɛɛre ka ba ɛnnɛ a bebie na poɔ yuori la we! 20Yɛ puoro ka a yɛ zoobu ta wa le a sakyɔre saŋ, bee a pɛnnoo bebiri daare. 21Bonso, a lɛ saŋ dɔgɛɛ kpoŋ ba naŋ daŋ ba nyɛ o tɔ a yi a tendaa piiluu saŋ a wa ta zenɛ, bee a daŋ na la nyɛ a dɔgɛɛ ŋa tɔ, na wa la. 22Kyɛ ka ba naŋ da ba ŋmaa a bebie ama kyɛlɛɛ bare, nensaala zaa da koŋ nyɛ faabo. Kyɛ a neŋkaa-irri zuiŋ, ba na ŋmaa la a bebie mine bare. 23Ka neɛzaa pãã wa yeli ko fo, ‘Nyɛ! a Mɛzaaya la kyɛ!’ Kyɛ bee O be la kyɛ! Yɛ ta sage de. 24Kaŋwaa mɛzaaya mine ane kaŋwaa Ŋmen-yelmanneba na wa la, a wa erɛ yelwulii kyɛ tonɔ toŋkpeɛne, ka ba bɛlle noba ka ba tuli, ka ba naŋ na toɔ̃, ba na e la ka a neŋkaa-irri meŋ gba tuli. 25Yɛ kaara velaa, N daŋ yeli ko yɛ la. 26A lɛ zuiŋ ka ba naŋ wa yeli ko yɛ, ‘Nyɛ! O be la wɛgyɛŋ poɔ,’ yɛ ta wa yire be, bee ka ba yeli, ‘Nyɛ! O be la a dikpaareŋ,’ yɛ ta sage de. 27Aŋa saa nyegroo naŋ maŋ yi sapare, ka a sapii toɔ̃ wa te gaa saniŋe, lɛ ka a Nensaala Bie waabo na waa. 28Benee zaa bonkũũ naŋ gaŋ, be la ka gyugmo#24:28 Gyugmo: A dagaaba mine maŋ boɔle la a gyugmo ka ‘Sedume’. na lantaa.

A Nensaala Bie Waabo Yɛlɛ

(Mak 13:24-27; Luk 21:25-28)

29“A paretɛloŋ lɛ, a dɔgɛɛ ama puoriŋ,

a ŋmenaa na ligi la,

ka a kyuu veɛloŋ meŋ koŋ kyaane;

a ŋmarbie na yi la a sazu le,

kyɛ ka a sazu boŋkpeɛne zaa zɛŋ.

30A lɛ ka a Nensaala Bie yelwulaa pãã na sãã a saluoni poɔ, ka a tendaa nemboorɔ zaa koŋ, kyɛ ka ba pãã nyɛ ‘a Nensaala Bie ka O yi a sagama poɔ waana’ ne kpeɛ̃õ ane puubu. 31O na toŋ la O malekere ka ba wa peɛle eelɛ gboligboli, a boɔle a O neŋkaa-irri zaa lantaa a yi a tendaa lamboe anaare zaa, a yi a saluoni baaraa te ta a kaŋ.”

A Kaŋkanteɛ Yelwulaa

(Mak 13:28-31; Luk 21:29-33)

32“Yɛ zanne a wuluu ŋa yi a kaŋkanteɛ zie: ka o ulli#24:32 Teɛ ulee bee teɛ ulli: A Dagaaba mine maŋ boɔle la teɛ ulee bee teɛ ulli ka danu bee danuuri. pɔrɔ wa te bɔrɔ vaare, yɛ maŋ baŋ ka sẽɛ saŋ peɛlɛɛ la. 33A lɛ ne o zu, ka yɛnee wa nyɛ a yɛlɛ ama zaa, yɛ baŋ ka a Nensaala Bie waabo pãã doŋɛɛ la, a gba be a dendɔre noɔreŋ. 34Yelmeŋɛ zaa ka N yele korɔ yɛ, a zenɛ noba boorɔ ŋa koŋ kpi baare kyɛ ka a yɛlɛ ama zaa e. 35Sazu ne teŋɛ na wa tɔle gaa la, kyɛ N yelbie koŋ baŋ tɔle gaa togitogi.”

Neɛ Zaa Ba Baŋ A Bebiri Bee A Saŋ

(Mak 13:32-37; Luk 17:26-30, 34-36)

36“Kyɛ neɛzaa ba baŋ a bebiri, bee a saŋ a Nensaala Bie naŋ na wa. A tenvelaa#24:36 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ malekere bee a Bidɔɔ meŋ gba ba baŋ a saŋ, ka a Saa yoŋ naane. 37Aŋa a Nowa bebie naŋ da waa lɛ, lɛ ka a Nensaala Bie meŋ waabo bebiri na waa. 38Aŋa a bebie na poɔ a kɔmpiiri naŋ da ba wa sɛre, ka noba da dire kyɛ nyuuro, ka dɔbɔ derɛ pɔgeba, ka pɔgeba meŋ kulo serebɛ, a te ta daare na a Nowa naŋ kpɛ a gbori, 39ka ba da ba baŋ yeli naŋ erɛ a te ta saŋ na a kɔmpiiri naŋ wa ŋmɛ, a wuo ba zaa gaa ne. Lɛ meŋ ka a na waa a Nensaala Bie waabo saŋ. 40A lɛ saŋ, noba bayi na be la weɛ poɔ, ka ba wa taa kaŋ gaa ne kyɛ bare kaŋ. 41Pɔgeba bayi na laŋ ɛrɛ la zɔŋ, ka ba wa taa kaŋ gaa ne kyɛ bare kaŋ. 42Azuiŋ, yɛ gu yɛmenne velaa, a kaara soŋ, bonso, yɛ ba baŋ a daare na yɛ Daana naŋ waana. 43Kyɛ yɛ baŋ a ŋaa tɛgɛ: ka a yidandɔɔ da baŋ bonna saŋ a nannyige naŋ na wa, o da na gu la a yiri velaa, o da koŋ vɛŋ ka a nannyige wa ŋma a yiri. 44Azuiŋ, yɛ meŋ nare yɛmenne, bonso, a Nensaala Bie na wa la saŋ na yɛ naŋ ba baŋ ne a.”

Gbaŋgba-bivelaa Bee Gbaŋgba-bifaa Yɛlɛ

(Luk 12:41-48)

45“Aŋ pãã la a gbaŋgba-bivelaa ane yɛmbaŋna, ka o daana na de o eŋ ka o kaara o yiri zu, a korɔ a o gbaŋgba-taaba ba bondirii a saŋ na a naŋ seŋ ne? 46A gbaŋgbaa na o daana naŋ leɛ kulo waana a wa nyɛ o ka o tonɔ nyɛ la maaloo. 47Yelmeŋɛ zaa ka N yele korɔ yɛ, a o daana na e la ka o kaara o boma zaa zu. 48Kyɛ ka a gbaŋgba-faa ŋa wa yeli ko o meŋɛ, ‘A n daana kɔɔrɛɛ waabo,’ 49kyɛ pãã piili ŋmeɛrɛ a o gbaŋgba-taaba, a dire kyɛ nyuuro ne dããnyukuolibo, 50a gbaŋgbaa ŋa daana na uri wa la daare na o naŋ ba nare ane gogo na o naŋ ba baŋ. 51A gbaŋgbaa ŋa daana na wa kyɛ o la ŋmaare puropuro, a de o poɔ a bampuori-kombampoɔ mine poɔ, be ka ba na be kono kyɛ nyerɛ nyemɛ.”

Currently Selected:

Mat 24: DNTTP

Highlight

Copy