Mat 23

Yeezu Naŋ Zagre A Naaŋmen Bege Wulwulibo Ane A Faraziimine Yɛlɛ

(Mak 12:38-39; Luk 11:43, 46; 20:45-46)

1Lɛ la ka Yeezu da yeli ko a noba ane a O potuuribo: 2“A Naaŋmen bege wulwulibo ane a Faraziimine la leɛre a Moozul zu; 3azuiŋ, yɛ tuuro a ba wuluu kyɛ erɛ a lɛ zaa ba naŋ wullo yɛ, kyɛ ta tɔglɔ ba eebo, bonso, ba ba tuuro bamenne wuluu. 4Ba maŋ leŋ la tuotegrɛ a zɛle dɔgle a noba bɔgŋmama zuri, kyɛ bamenne koŋ sage de nubiri seene ne a tuobu. 5Ba maŋ erɛ la ba yɛlɛ zaa ka ka noba na nyɛ; bonso, ba maŋ e la ka a Naaŋmen sɛgebie ba naŋ leŋ ba gberi e bɛrɛ, kyɛ ka ba kparre nɔzoɔrɔ waa wogri. 6Ba maŋ nɔŋ ka ba zenɛ a nembɛrɛ zenziiri a tige ziiri kyɛ zenɛ kog-veɛle zu a puoruuderiŋ, 7kyɛ ka noba puoro ba a dare poore ne gyeremɛ, a nɔŋ ka noba boɔlɔ ba Wulwulibo. 8Kyɛ a ba seŋ ka ba boɔlɔ yɛ “Wulwulibo” bonso, wulwullo yenaa la ka yɛ taa, kyɛ ka yɛ zaa waa zanzannema. 9Yɛ ta boɔlɔ neɛzaa yɛ saa a teŋɛzu kyɛ, bonso, Saa yenaa yoŋ ka yɛ taa; ona la be a tenvelaa#23:9 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ poɔ. 10Bee a ba seŋ ka ba boɔlɔ yɛ wulwulibo; bonso, wulwullo yenaa yoŋ la ka yɛ taa, ona la a Mɛzaaya.#23:10 Mɛzaaya: A Mɛzaaya tɛgɛ la a ‘Kirista.’ 11A yɛ poɔ neŋkpoŋ na waa la yɛ zaa tontonɔ. 12Banaŋ zaa naŋ duoro bamenne, ba na sigri ba la, kyɛ banaŋ zaa meŋ naŋ sigri bamenne, ba na duori ba la.”

13“Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Bonso, yɛ lare la noba bare yeŋeŋ ka ba ta kpɛ a tenvelaa naaloŋ. Yɛ menne ba kpeɛrɛ kyɛ ba la sage ka noba naŋ boɔrɔ ka ba kpɛ be meŋ kpɛ. 14[Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ maŋ fa la pɔg-kɔbɔ yie wieouŋ lɛ, kyɛ maŋ puori kɔɔre yaga zaa, ka noba nyɛ a na teɛrɛ ka yɛ waa la nemmenne. A ŋaa zuiŋ yɛ dɔgroŋ na waa la kpoŋ.] 15Yɛ yuori la we, yɛnee Naaŋmen begɛ wulwulibo, ane Faraziimine, yɛnee bampuori-kombampoɔ mine! Yɛ maŋ ŋmaa la mama a lɔnne tatenne, neŋyenaa eŋɛ ka yɛ te leɛre o eŋ yɛ ŋmen puoruu poɔ. Kyɛ ka o naŋ wa kpɛ a yɛ ŋmen puoruu baare, yɛ maŋ e o la ka o seŋ dazugovũũ kpeɛbo gbɛre boyi gaŋ yɛ.”

16“Yɛ yuori la we, yɛnee zɔnne naŋ tagra zɔnne, yɛ maŋ yeli la, ‘Soba na zaa naŋ pɔ ne a Naaŋmen die, pɔraa zaa ba dɔgle o zu, kyɛ soba na zaa naŋ pɔ ne a salema naŋ be a Naaŋmen die poɔ, ka a pɔraa na do o la.’ 17Yɛnee zɔndambolo ŋa! Buo la kpoŋ, a salema bee a Naaŋmen die naŋ e ka a salema leɛ bonsoŋ? 18Ka yɛ yeli, ‘Soba na zaa naŋ pɔ a Naaŋmen bagmaalkuuri, pɔraa zaa ba dɔgle o zu, kyɛ soba na zaa naŋ pɔ ne a kyɔɔtaare boma naŋ biŋ a Naaŋmen bagmaalkuuri zu, a pɔraa na do la o soba.’ 19Nyɛ yɛ zɔnnoŋ naŋ seŋ lɛ! A buo soba la kpoŋ, a kyɔɔtaare boma bee a Naaŋmen bagmaalkuuri naŋ vɛŋ ka a boma leɛ kyɔɔta-soŋ? 20Azuiŋ soba na zaa naŋ pɔ ne a Naaŋmen bagmaalkuuri pɔ laŋne la a kyɔɔtaare naŋ biŋ o zu; 21ka soba na zaa meŋ naŋ pɔ ne a Naaŋmen die, pɔ laŋne a soba na naŋ kpeɛrɛ a Naaŋmen die poɔ, 22ka soba na zaa meŋ naŋ pɔ ne tenvelaa, pɔ ne a Naaŋmen naaloŋ kogo a laŋne a soba na naŋ zeŋ o zu.”

23“Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ maŋ iri la yɛ ziiri pie ŋmen kyɔɔtaare, nyɛremaanyuu, zama ane badoge, kyɛ bare a begɛ na naŋ e nimizeɛ yaga: bo-soŋ, nyonono ane yeldeebo. A yɛlɛ ama la ka a da seŋ ka yɛ nyɔge kpeɛŋaa, kyɛ ta bare a anaŋ meŋ. 24Yɛnee zɔnne naŋ tagra zɔnne! Yɛ maŋ sele la naazoɔ bare yɛ bonnyuuri poɔ kyɛ vɔlɔ bontaŋ!”

25“Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ maŋ pɛge la a ŋmanlee ane a laa puori, kyɛ ka a poore kpɛ dɛge, a paale ne bombɔ-gaŋne ane finnuu. 26Yɛnee Faraziimine naŋ zɔŋ! Yɛ maŋ daŋ pɛge a ŋmanlee ane a laa poore sɛre lɛ la ka a puori meŋ pãã na veɛlɛ.”

27“Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ waa seŋ ŋa yaare ba naŋ mɛ, ka a pɛle, a sãã velaa a yeŋeŋ kyɛ ka a poore kpɛ te paale ne kɔbɔ, a ɔlle a zaa ne dɛgre boorɔ zaa. 28Lɛ ka yɛ meŋ waa; a sãã ŋa nemmenne noba niŋeŋ, kyɛ ka yɛ poore kpɛ paale ne faaloŋ ane koŋwoŋyɛlɛ.”

29“Yɛ yuori la we, yɛnee Naaŋmen bege wulwulibo, ane Faraziimine, yɛnee bampuori-kombampoɔ mine! Yɛ maŋ mɛ la a Ŋmen-yelmanneba yaare, kyɛ maale a nemmenne yaare, a eŋ a peɛmɛ ka a veɛlɛ, 30kyɛ ka yɛ yeli, ‘Ka tenee da bebe a te sããkommine saŋ na, te da koŋ ko a Ŋmen-yelmanneba aŋa ba naŋ da e a lɛ.’ 31A lɛ yɛ di la danseɛ kyaare ne yɛmenne ka yɛ waa la a banaŋ naŋ ko a Ŋmen-yelmanneba boorɔ. 32Yɛ moɔ nimiri a baare toŋ a toma a yɛ sããkommine naŋ da piili. 33Yɛnee weere ane dompane boorɔ! Wola ka yɛ na e a zo bale a dazugovũũ poɔ kpeɛbo? 34Azuiŋ, N toŋ la Ŋmen-yelmanneba, bambaŋnema ane a begɛ wulwulibo yɛ zie. Yɛ na ko la ba mine, a kpa ba mine dagaraa zu, kyɛ feɛ ba mine a yɛ puoruuderi poore, kyɛ digi ba yɔ ne tenne, 35ka a nemmenne na zaa ba naŋ ko zẽẽ a teŋɛzu kyɛ na do yɛ. A yi a nemmeŋɛ Abɛl a te tɔ Zakareya, a Barakiya bidɔɔ. Ona la ka yɛ da ko a Naaŋmen dieŋ, a zisoŋ ane a Naaŋmen bagmaalkuuri kpakyagaŋ. 36Yelmeŋɛ zaa ka N yele korɔ yɛ, a yɛlɛ ama zaa na do la a zenɛ noba zu.”

Yeezu Naŋ Koŋ A Gyɛruzɛlɛm Teŋɛ Yɛlɛ

(Luk 13:34-35)

37“Gyɛruzɛlɛm, Gyɛruzɛlɛm, a teŋkpoŋ na naŋ maŋ ko a Ŋmen-yelmanneba, kyɛ za a noba na Naaŋmen naŋ toŋ fo zie ne kubo! Gbɛre bowola ka N da boɔrɔ ka N laŋ a fo biiri taa, aŋa nɔnyaaŋaa naŋ maŋ laŋ o bilii taa a uuni lɛ, kyɛ ka fo da ba sagra! 38Nyɛ, ba bare la a fo yiri ko fo ka o leɛ dabori. 39Maa yeli ko fo, fo koŋ la nyɛ Ma, kyɛ te ta saŋ na fo naŋ yeli, ‘Soba na naŋ waana a Daana yuori eŋɛ nyɛ la maaloo.’ ”

Currently Selected:

Mat 23: DNTTP

Highlight

Copy