Mat 20

Dããteere Weɛ Tontonema Yɛlɛ

1“A tenvelaa#20:1 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ naaloŋ waa seŋ ŋa weɛ soba kaŋ naŋ yi bagu-pipi ka o te de tontonema gaa ne o weɛ poɔ. 2O ne ba naŋ da wa sage lɛ tontonema naŋ maŋ toŋ kyɛ de, o da taa ba la gaa ne a o weɛ poɔ. 3O naŋ da wa leɛ yi gbelli awae saŋ, o da te nyɛ la ba mine ka ba are a daa poɔ weɛlɛ, 4ka o yeli ko ba, ‘Yɛ meŋ gaa te toŋ a n weɛ poɔ, n na yɔɔ yɛ la bon naŋ seŋ ka n yɔɔ yɛ.’ Lɛ la ka ba gaa. 5O naŋ da la yi ŋmentantuo saŋ, ane gbelli ata saŋ, o da e la a lɛ ne o zu. 6Kyɛ aŋa zimaane gbelli anuu saŋ, o da yi te nyɛ la ba mine ka ba are; ka o soore ba, ‘Bonso ka yɛ are a kyɛ a zenɛ zaa weɛlɛ?’ 7Ka ba yeli ko o, ‘Neɛzaa ba de te ka o ko te toma.’ Ka o yeli ko ba, ‘Yɛ meŋ gaa a n dããteere weɛ.’ 8Zie naŋ da wa maa, a weɛ soba da yeli ko la a o weɛ kaara, ‘Boɔle a tontonema, a ko ba ba san-yɔɔ. Daŋ yɔɔ a puori deme a te tɔ a danweɛ deme.’ 9A banaŋ naŋ da gaa a weɛ aŋa a zimaane gbelli anuu saŋ, ba kanzaa da de la bebi-gbuli san-yɔɔ. 10A danweɛ deme naŋ da wa, ba da teɛre ka ba na de gaŋ la lɛ, kyɛ ba kanzaa meŋ da de la a bebi-gbuli san-yɔɔ. 11Ba naŋ de a lɛ, ba da ŋmoonɔ la yɛlɛ ne a weɛ daana, 12a yele, ‘A puori deme bama toŋ la gogo yeni yoŋ, kyɛ ka fo yɔɔ te zaa seŋ taa, tenee naŋ woŋ tuo a bebi-gbuli zaa, ka ŋmenaa tɔ te yaga.’ 13Ka a weɛ soba leɛ soore ba kaŋ, ‘N ba, N ba erɛ fo saanaa zaa wɛ. Maa ne fo naane laŋ yeli biŋ ka fo na de la bebi-gbuli san-yɔɔ kyɛ ka n taa fo gaa ne a n weɛ poɔ be? 14De a fo san-yɔɔ gɛrɛ ne; maa la boɔrɔ ka n yɔɔ a puori deme bama a seŋ fo. 15N ba taa sori ka N e lɛ n naŋ boɔrɔ ne n boma be? Bee fo erɛ la nyuuri ne N naŋ erɛ velaa zuiŋ be?’ 16Azuiŋ a puori deme na de la weɛ, kyɛ ka a danweɛ deme meŋ leɛ be puori.”

Yeezu Naŋ Yeli O Kũũ Ane O Leɛ-iruu Yɛlɛ A Gbɛre Bota Soba

(Mak 10:32-34; Luk 18:31-34)

17A Yeezu naŋ da wa duoro gɛrɛ Gyɛruzɛlɛm, O da taa la a O potuuribo pie ne bayi gyɛŋ yi ne ba yoŋ zie, a te yeli ko ba a sori poɔ: 18“Yɛ nyɛ, te duoro gɛrɛ la Gyɛruzɛlɛm, ka ba na te de a Nensaala Bie eŋ a Naaŋmen bagmaalkare ane a Naaŋmen bege wulwulibo nuuriŋ, ka ba di O sɛrɛɛ a yeli ka O seŋ ne la kũũ, 19kyɛ pãã de O ko a Nemboore-yobo#20:19 Nemboore-yobo: Noba na zaa naŋ da ba waa Gyuumine la a Nemboore-yobo. ka ba e O la, a feɛ O, kyɛ kpa O dagaraa zu. Kyɛ a beri ata daare ba na e la ka O leɛ-iri a kũũ poɔ.”

Gyimisi Ane Gyɔɔn Ma Sɔroo Yɛlɛ

(Mak 10:35-45)

20Lɛ la ka a Zɛbɛdii biiri ma da wa a Yeezu zie ane o bidɔbɔ, a wa gbi dumo O niŋeŋ kyɛ sɔre yelboɔraa kaŋ O zie. 21Ka a Yeezu soore o, “Boŋ la ka fo boɔrɔ?” Ka o yeli ko O, “Sage ka N biiri bama bayi kaŋ zeŋ fo nuduluŋ seŋ ka kaŋ meŋ zeŋ fo nugɔɔ seŋ a fo naaloŋ poɔ.” 22Ka a Yeezu yeli sɔge, “Yɛ ba baŋ bonna yɛ naŋ sɔrɔ. Yɛ na toɔ̃ nyu la a zuŋmanekoɔ̃ ŋa N naŋ waana ka N nyu?” Ka ba yeli ko O, “Te na toɔ̃ la.” 23Ka O yeli ko ba, “Yɛ sereŋ na nyu la a N zuŋmanekoɔ̃, kyɛ maa naane so ka N iri a banaŋ naŋ na zeŋ N duluŋ seŋ bee N gɔɔ seŋ. A e la a banaŋ zuiŋ N Saa naŋ nare a ziiri ama bare soobo.”

24A potuuribo pie na naŋ da wa woŋ a lɛ, ba suuri da iri ne la a yɔɔmine bayi na. 25Kyɛ a Yeezu da boɔle la ba zaa lantaa a yeli ko ba, “Yɛ baŋ ka a Nemboore-yobo nembɛrɛ maŋ dire la kponnuŋ a ba noba zu, kyɛ ka ba zubɛrɛ dire kpeɛ̃õ ba noba meŋ zu. 26Kyɛ a ba seŋ ka a waa lɛ yɛ zie; ka yɛ kanzaa wa boɔrɔ ka o leɛ neŋkpoŋ yɛ poɔ, see ka o leɛ yɛ zaa tontonɔ, 27kyɛ soba na zaa meŋ naŋ boɔrɔ ka o de weɛ yɛ poɔ, seŋ ka o e yɛ poɔ gbaŋgbaa; 28a ŋa lɛ a Nensaala Bie naŋ ba wa ka noba toŋ ko O, kyɛ O waɛ la ka O toŋ ko noba; a kyɛ de O nyɔvore yɔɔ de ne neŋyaga.”

Yeezu Naŋ Saŋ Zɔnne Mine Bayi

(Mak 10:46-52; Luk 18:35-43)

29Ba naŋ da wa yire Gyɛreko poɔ, nembeɛoŋ da tuuro O la. 30Zɔnne mine bayi da zeŋ la a sori noɔreŋ. Ba naŋ da wa woŋ ka Yeezu la wa tɔlɔ, ba da ŋmɛ la kpɛlle a yele, “Daana, Davil Bidɔɔ, zo te nembaaloŋ!” 31Ka a noba da tanne ba ka ba pɔge ba nɔɛ a bare gɔmɔ. Kyɛ lɛ eŋ ka ba pãã da la maaleŋ kyeerɛ yaga zaa a yele, “Zo te nembaaloŋ, Daana, Davil Bidɔɔ!” 32Ka a Yeezu leɛ are zomm kyɛ boɔle ba, a yele, “Boŋ ka yɛ boɔrɔ ka N e ko yɛ?” 33Ka ba yeli ko O, “Daana, e ka te nimie yuori.” 34Ba nembaaloŋ naŋ da kpɛ a Yeezu zuiŋ, O da de la O nu te seene ne a ba nimie. A daadaalɛ ka ba deɛ nyɛrɛ a tuuro a Yeezu gɛrɛ.

Currently Selected:

Mat 20: DNTTP

Highlight

Copy