Mat 19

Kultaa Baroo Yɛlɛ

(Mak 10:1-12)

1A Yeezu naŋ da wa yeli a yɛlɛ ama baare, O da yi la a Galili teŋɛ a gaa te kpɛ Gyudiya paaloŋ, a te gaŋ a Gyɔɔdan do gaa. 2Nembeɛoŋ da yi tuuro o la, ka O da saŋ ba a be.

3A Faraziimine da wa la O zie, kyɛ ba naŋ da boɔrɔ ka ba e O a nyɛ la, ka ba da soore O, “A tu la sori ka dɔɔ bare o pɔge yelzaa zuiŋ be?” 4Ka o yeli sɔge, “Yɛ mɔɔ ba kanne ka a soba na naŋ iri ba a piiluu saŋ, ‘iri ba la dɔɔ ne pɔge,’ 5kyɛ yeli, ‘A ŋaa zuiŋ, dɔɔ na bare la o saa ne o ma, kyɛ te laŋ ne o pɔge, ka ba bayi leɛ eŋgan-yeni.’? 6Azuiŋ ba ba la e noba bayi, ba e la eŋgan-yeni. A lɛ zuiŋ, bonna Naaŋmen naŋ wa lantaa, nensaala zaa ba taa sori ka o wɛle a taa.” 7Ka a Faraziimine la soore O, “Ka wola pãã la so ka Moozul da tere sori ka ka dɔɔ wa boɔrɔ ka o bare o pɔge, ka o ko o pɔg-bare gane kyɛ bare o?” 8Ka a Yeezu yeli ko ba, “A yɛ sukyie naŋ dare zuiŋ la so ka a Moozul da tere sori ka yɛ bara yɛ pɔgeba. Kyɛ a da ba waa lɛ a piiluu saŋ. 9Kyɛ maa yele korɔ yɛ, ka neɛzaa wa bare o pɔge, ka moɔrɔ zuiŋ naane, kyɛ la de pɔge yuo, o soba toŋ la moɔrɔ toma.”

10Ka a O potuuribo yeli ko O, “Ka a naŋ waa ŋaa dɔɔ ne o pɔge zie, ka neɛ vɛŋ pɔge deebo a naŋ seɛ.” 11Ka O yeli ko ba, “Neɛzaa naane na baŋ sage a wuluu ŋa, ka banaŋ yoŋ Naaŋmen naŋ ko a wuluu ŋa deebo faŋ naane. 12A noba mine waa la nenvarre a yi ba dɔgebo saŋ, ka ba mine meŋ waa nenvarre ba nensaaltaaba naŋ vare, ka ba mine meŋ waa nenvarre a tenvelaa#19:12 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ naaloŋ yɛlɛ zuiŋ. Vɛŋ ka neɛ naŋ na toɔ̃ tu a yeli ŋa sage de a lɛ.”

Yeezu Naŋ Ko Bibiiri Maaloo

(Mak 10:13-16; Luk 18:15-17)

13Lɛ la ka noba da taa bibiiri waana ne a Yeezu zie ka O na de O nuuri pare ba zuri kyɛ puori ko ba. A O potuuribo da mii la a noba na naŋ da taa a bibiiri wa ne zu. 14Ka a Yeezu yeli, “Yɛ bare a bibiiri ka ba wa N zie, yɛ ta pigi ba sori; bonso, a bama taaba la so a tenvelaa naaloŋ.” 15Kyɛ da de O nuuri pare ba zuri, a kyɛ la tu O sori gɛrɛ.

Pɔlbil-bondaana Kaŋ Yɛlɛ

(Mak 10:17-31; Luk 18:18-30)

16Lɛ la ka neɛ kaŋ da wa a Yeezu zie a wa yeli, “Wulwullo, boŋ tonsoŋ la ka N na toŋ a taa nyɔvore naŋ ba taa baaroo?” 17Ka O yeli ko o, “Bonso ka fo soorɔ ma bon naŋ e soŋ yɛlɛ? Neŋyeni kaŋ yoŋ la bebe a e soŋ. Ka fõõ wa boɔrɔ ka fo kpɛ nyɔvore poɔ, tuuro a Naaŋmen nɔɛ.” 18Ka a pɔlbile soore O, “A Naaŋmen nɔɛ abobo?” Ka Yeezu yeli, “Ta ko neɛ, ta toŋ moɔrɔ toma, ta zuuro, ta dire danse-zirii; 19eŋnɛ fo saa ne fo ma, kyɛ nɔŋ fo tɔ seŋ fo naŋ nɔŋ fo meŋɛ lɛ.” 20Ka a pɔlbile yeli ko O, “N tu la a nɔɛ ama zaa; boŋ la kyɛre ka N na e?” 21Ka Yeezu yeli ko o, “Ka fõõ wa boɔrɔ ka fo maaleŋ e soŋ yaga, gaa te koɔre fo boma zaa a de a libie ko nembaalba, kyɛ wa tuuro ma, fo pãã na taa la bondaaboma tenvelaa poɔ.” 22A pɔlbile naŋ wa woŋ a yelbiri ŋa, o da leɛ gaa ne la posaanaa, bonso, o da taa la boma yaga.

23Lɛ la ka a Yeezu da yeli ko O potuuribo, “Yelmeŋɛ ka N yele korɔ yɛ, a na waa la tuo yaga ko bondaana ka o kpɛ a tenvelaa naaloŋ poɔ. 24Ka N la yeli ko yɛ: A e la mɔlɔ ka bontaŋ tu fumini#19:24 Fumini: A Dagaaba mine maŋ yeli ka Musin bee Kpar-pii. voɔre yi, a gaŋ bondaana naŋ na kpɛ a Naaŋmen naaloŋ.” 25A potuuribo naŋ da woŋ a yɛlɛ ama, ba nɔɛ da maaɛ la yaga, ka ba yeli, “Ka lɛ, aŋ la na baŋ nyɛ faabo?” 26Ka Yeezu leɛ kaa ba kyɛ yeli, “Nensaala eŋ zie a yɛlɛ ama waa la kpeɛŋaa, kyɛ Naaŋmen zie yelzaa na baŋ nyɛ la eebo.”

27Lɛ la ka Piita leɛ yeli sɔge, “Nyɛ, te bare la bonzaa kyɛ wa tuuro fo. Boŋ ka te na nyɛ?” 28Ka Yeezu yeli ko ba, “Yelmeŋɛ ka N yele korɔ yɛ, a saŋ na a boma zaa naŋ na leɛ e paala, ka a Nensaala Bie zeŋ o puubu nakogi zu, yɛ meŋ na zeŋ la nakogri pie ne ayi zu a dire a Izerayɛl boorɔ pie ne bayi na sɛrɛɛ. 29Kyɛ neɛzaa naŋ bare o yie, bee o yɔɔmine, bee o yɔɔpuuli, bee o saa, bee o ma, bee bibiiri, bee wɛre, N yuori zuiŋ, a soba na nyɛ a la a dɔgle gbɛɛ kɔɔ kyɛ la nyɛ nyɔvore naŋ ba taa baaroo meŋ poɔ. 30Kyɛ noba yaga naŋ de weɛ na leɛ la puori deme, kyɛ ka a puori deme leɛ danweɛ deme.”

Currently Selected:

Mat 19: DNTTP

Highlight

Copy