Gyn 8

Pɔge Ba Naŋ Nyɔge Peɛ̃mo Toma Poɔ

1A Yeezu da gaa la a Oliva Taŋ zu. 2A bagu-pipi saŋ, a Yeezu da leɛ wa la a Naaŋmen die poɔ. A noba zaa da wa la O zie, ka O da zeŋ a piili kanna ba. 3A Naaŋmen bege wulwulibo ane a Faraziimine da taa la pɔge kaŋ ba naŋ da nyɔge ka o tonɔ peɛ̃mo toma wa ne, a e ka o are a noba niŋesogɔ, 4kyɛ ka ba da yeli ko a Yeezu, “Wulwullo, te nyɔge la a pɔge ŋa ka o tonɔ peɛ̃mo toma. 5Kyɛ a bege poɔ, Moozul da tere la noɔre ka te za a pɔge ŋa tɔ ne kubo ko. Pampana wola ka fo meŋ yeli?” 6Ba da yeli la a ŋaa ka ba e O nyɛ, a pãã na toɔ̃ nyɛ saanaa tuo O. A Yeezu da zuunee la kyɛ sɛgrɛ boma teŋɛŋ ne O nubiri. 7Ba naŋ da pullo soorɔ O la ka O da vaa-iri kyɛ yeli ko ba, “Yɛ vɛŋ ka soba na zaa naŋ be yɛ poɔ a ba e yelbieri zaa daŋ de kuuri za ne a pɔge.” 8A tɔntɔbaalɛ ka O da leɛ zuuni a sɛgrɛ boma a teŋɛŋ. 9Ba naŋ da wa woŋ a lɛ, ba da leɛ gɛrɛ la, yeni yeni, a piili ne a ba nembɛrɛ, kyɛ te kyɛre a Yeezu yoŋ ne a pɔge ka o are O niŋesogɔ. 10A Yeezu da vaa-iree la kyɛ soore a pɔge, “Pɔge, a noba bɛ? Neɛzaa ba nyɛ fo saanaa ka fo seŋ ne la kũũ be?” 11Ka a pɔge da yeli, “Daana, neɛzaa ba kyebe.” Ka a Yeezu da yeli, “N meŋ koŋ yeli ka fo taa la saanaa seŋ ne kũũ. Gɛrɛ fo gaabo zie, kyɛ a naŋ yi a ŋaa gɛrɛ, tɔɔ la wa erɛ yelbieri.”]

Yeezu La A Andonɛɛ Kyaane

12A Yeezu da laboreŋ yeli la yɛlɛ ko a noba, a yele, “Maa la a andonɛɛ kyaane. Soba na zaa naŋ tuuro ma daŋ koŋ baŋ kpɛ lige poɔ, kyɛ o na taa la nyɔvore kyaane.” 13Lɛ la ka a Faraziimine da yeli ko O, “Fo leɛ dire la fo meŋɛ danseɛ; a fo danseɛ ba e yelmeŋɛ.” 14Ka a Yeezu da yeli sɔge, “Ka maa leɛ dire N meŋɛ danseɛ gba, a N danseɛ e la yelmeŋɛ, bonso, N baŋ la zie na N naŋ yi wa ane zie na N naŋ gɛrɛ. Kyɛ yɛnee ba baŋ zie na N naŋ yi wa bee zie na N naŋ gɛrɛ. 15Yɛ maŋ tu la nensaaloŋ sobie kyɛ di sɛrɛɛ; kyɛ maa eŋ ba dire neɛzaa sɛrɛɛ. 16Ka maa dire noba sɛrɛɛ gba, a N sɛrɛɛdiibu e la yelmeŋɛ, bonso, N yoŋ naane dire a sɛrɛɛ, kyɛ maa ne a N Saa naŋ toŋ ma la dire a sɛrɛɛ. 17A yɛ Naaŋmen begɛ poɔ, ba sɛgɛɛ la ka noba bayi danseɛ la waa yelmeŋɛ. 18N dire la N meŋɛ danseɛ, ka a N Saa naŋ toŋ ma meŋ dire N danseɛ.” 19Lɛ la ka ba soore O, “Yeŋ ka a fo Saa be?” Ka a Yeezu da yeli sɔge ba, “Yɛ ba baŋ ma bee a N Saa. Ka yɛnee da baŋ ma, yɛ da na baŋ la a N Saa meŋ.” 20A Yeezu da yeli la a yɛlɛ ama O naŋ da are a libie emmo zie a Naaŋmen die poɔ a kanna noba, kyɛ neɛzaa da ba nyɔge O, a O saŋ naŋ da naŋ ba ta sɛre zuiŋ.

Yeezu Naŋ Da Daŋ Yeli O Kũũ Yɛlɛ

21A Yeezu da la yeli ko ba la, “N gɛrɛ la, ka yɛ na bɔ ma, kyɛ yɛ na kpi la a yɛ yelbebe poɔ. Zie na N naŋ gɛrɛ yɛ kontoɔ̃ wa be.” 22Lɛ la ka a Gyuumine da yeli, “O mɔɔ boɔrɔ la ka O ko O meŋɛ be? A lɛ mɔɔ la so ka O yele, ‘Zie N naŋ gɛrɛ yɛ kontoɔ̃ wa be’?” 23Ka a Yeezu da yeli ko ba, “Yɛ yi la teŋɛzu, kyɛ ka N yi sazu. Yɛ e la teŋɛzu noba, kyɛ ka maa ba e a teŋɛzu neɛ. 24N da yeli ko yɛ la ka yɛ na kpi la a yɛ yelbebe poɔ, bonso, yɛ sereŋ na kpi la a yɛ yelbebe poɔ ka yɛnee ba sage de ka maa la a soba na.” 25Ka a noba da soore O, “Aŋ la fo?” Ka a Yeezu da yeli ko ba, “Boŋ mɔɔ la so ka N yele yɛlɛ korɔ yɛ? 26N taa la yɛlɛ yaga na yeli kyaare ne yɛ ane yɛlɛ yaga naŋ naŋ na e ka yɛ le sɛrɛɛ poɔ. Kyɛ a soba na naŋ toŋ ma e la yelmeŋɛ soba, ka a yɛlɛ N naŋ woŋ yi O zie la ka N yele korɔ a teŋɛzu noba.” 27Ba da ba baŋ a tɛgɛ ka a Saa yɛlɛ la ka O da yele korɔ ba. 28Lɛ la ka a Yeezu da yeli, “Ka yɛnee wa te zɛge a Nensaala Bie ka O do saa, lɛ la ka yɛ na baŋ ka maa la a soba na. Yɛ pãã na baŋ ka N meŋɛ yɛlɛ naane ka N da erɛ, kyɛ yɛlɛ na a Saa naŋ ko ma noɔre la ka N da yele. 29Kyɛ a soba na naŋ toŋ ma be la N zie. O ba bare ma N yoŋ, bonso, N maŋ erɛ la yɛlɛ naŋ pɛllɛ O poɔ tegitegilɛ.” 30O naŋ da yele a yɛlɛ ama, noba yaga da sage de la O yɛlɛ.

Banaŋ Naŋ Sereŋ E A Yeezu Potuuribo

31Lɛ la ka Yeezu da yeli ko a Gyuumine na naŋ da sage de O yɛlɛ, “Ka yɛnee wa sage de a N yɛlɛ a ba leɛrɛ puori, yɛ sereŋ waa la N potuuribo. 32Yɛ na baŋ la a yelmeŋɛ, ka a yelmeŋɛ e ka yɛ so yɛmenne.” 33Ka a noba da leɛ yeli ko O, “Te waa la a Aboraham boorɔ, a daŋ ba e neɛzaa gbaŋgbaare. A fo yɛlɛ ŋa fo naŋ yele, ‘Yɛ na so la yɛmenne tɛgɛ la boŋ’?”

34Ka a Yeezu da yeli sɔge ba, “Yelmeŋɛ zaa ka N yele korɔ yɛ, neɛzaa naŋ e yelbieri waa la a yelbieri gbaŋgbaa. 35A gbaŋgbaa ba maŋ taa zie a yiri poɔ tegitegilɛ, kyɛ a yiri bie eŋ maŋ taa la zie a yiri poɔ tegitegilɛ. 36Azuiŋ, ka a Bidɔɔ wa e ka yɛ so yɛmenne, yɛ sereŋ na so la yɛmenne. 37N baŋ ka yɛ waa la Aboraham boorɔ, kyɛ ka yɛ boɔrɔ sobiri ka yɛ tu kyɛ ko ma, yɛ naŋ ba taa zie a na ko a N yelbiri a yɛ nyɔvore poɔ zuiŋ. 38Bon N naŋ nyɛ yi a N Saa zie la ka N yele korɔ yɛ, kyɛ yɛnee eŋ, yɛ erɛ bonna yɛ naŋ woŋ yi a Saa zie.”

Yeezu Ane Aboraham Yɛlɛ

39Ba da yeli sɔge la a Yeezu, “Aboraham la te Saa.” Ka O da yeli ko ba, “Ka yɛnee da waa Aboraham biiri, yɛ da na erɛ la yɛlɛ na Aboraham naŋ da e. 40Kyɛ pampana ŋa, yɛ moɔrɔ la ka yɛ ko ma, neɛ naŋ yeli a yelmeŋɛ O naŋ woŋ yi a Naaŋmen zie ko yɛ. Ŋaa naane ka Aboraham da e. 41Yɛ sereŋ erɛ la yɛlɛ na a yɛ saa naŋ da maŋ erɛ.” Ka ba da yeli ko a Yeezu, “Te ba waa sɛnsɛmbiiri.#8:41 Sɛnsɛmbiiri: A Dagaaba mine maŋ yeli ka ‘Zeŋyirbiir.’ Saa yeni yoŋ la ka te taa; Ona la a Naaŋmen meŋɛ.” 42Ka a Yeezu da yeli ko ba, “Ka Naaŋmen da waa yɛ Saa, yɛ da na nɔŋ ma la, bonso, Naaŋmen zie la ka N yi, kyɛ pampana, maa la be kyɛ. N ba wa N meŋɛ waabo, kyɛ Ona la toŋ ma. 43Boŋ la so ka yɛ ba baŋ a yɛlɛ N naŋ yele tɛgɛ? Yɛ naŋ kontoɔ̃ sage de N yɛlɛ la so. 44Yɛ yi la a yɛ saa a sebɛlbɛllɛ zie. A yɛ saa poboɔbo la ka yɛ boɔrɔ ka yɛ e. O da e la neŋkoorɔ a yi a piiluu saŋ zaa, a ba taa yelmeŋɛ, bonso, yelmeŋɛ zaa ba kye o zie. Ka o naŋ wa ŋmaara zirii, o maŋ yele kyaare ne la o meŋɛ waaloŋ, bonso, o e la zirŋmaara ane zirŋmaareba zaa saa. 45Kyɛ N naŋ yele a yelmeŋɛ zuiŋ la so ka yɛ ba sage de a N yɛlɛ. 46Yɛ buo soba la na toɔ̃ wuli ma yelbieri N naŋ e? Ka maa yele a yelmeŋɛ korɔ yɛ, bonso ka yɛ ba sage de a N yɛlɛ? 47Soba na zaa naŋ yi Naaŋmen zie maŋ kyɛlle woŋ la a Naaŋmen yelbie. Yɛ naŋ ba yi Naaŋmen zie la so ka yɛ ba wono a yɛlɛ.”

48A Gyuumine da yeli sɔge la a Yeezu, “A bogriŋ mɔɔ naane ka te yeli ka fo waa la Samareya neɛ kyɛ taa sefaa be?” 49Ka a Yeezu da yeli sɔge, “N ba taa sefaa, kyɛ N Saa la ka N eŋnɛ, kyɛ ka yɛnee ba eŋnɛ ma. 50Kyɛ N ba boɔrɔ N meŋɛ puubu. Neɛ kaŋ naŋ waa a sɛredire, ona la boɔrɔ ka N nyɛ puubu. 51Yelmeŋɛ zaa ka N yele korɔ yɛ, soba na zaa naŋ tuuro a N yɛlɛ daŋ koŋ kpi.” 52Ka a Gyuumine da yeli ko O, “Ŋaa te pãã baŋ ka fo taa la sefaa. A Aboraham kpie la, ka a Ŋmen-yelmanneba meŋ da kpi, kyɛ ka fo yeli, ‘Neɛzaa naŋ sage de a N yɛlɛ daŋ koŋ kpi.’ 53Fo e la kpoŋ gaŋ a te saa Aboraham naŋ kpi be? A Ŋmen-yelmanneba meŋ da kpie la. Fo mɔɔ teɛre ka fo waa la boŋ?” 54Ka Yeezu da yeli sɔge: Ka maa korɔ N meŋɛ puubu, a N puubu koŋ taa tɛgɛ. A N Saa la korɔ ma puubu. Ona la ka yɛ yeli, ‘O waa la te Naaŋmen,’ 55kyɛ ka yɛ ba baŋ O. Kyɛ maa eŋ baŋ O la. Ka maa na yeli ka N ba baŋ O, N na e la zirŋmaara aŋa yɛnee. N baŋ O la, a sagra O yɛlɛ. 56A yɛ Sããkoma Aboraham da kyellɛ la ka o nyɛ a N waabo bebiri. O da nyɛ o la ka a da e o noɔ. 57Lɛ la ka a Gyuumine da yeli ko O, “Fo naŋ ba ta yuomo lezaayi ne pie sɛre, kyɛ nyɛ Aboraham?” 58Ka Yeezu da yeli ko ba, “Yelmeŋɛ zaa ka N yele korɔ yɛ, ba naŋ wa dɔgrɔ Aboraham ka N daŋ bebe la.” 59Lɛ la ka a noba da wuo kubo a na za ne a Yeezu, ka O da sɔgle muri yi a Naaŋmen die poɔ.

Currently Selected:

Gyn 8: DNTTP

Highlight

Copy