Gyn 18

Ba Naŋ Nyɔge Yeezu

(Mat 26:47-56; Mak 14:43-50; Luk 22:47-53)

1A Yeezu naŋ da wa yeli a yelbie ama baare, O ne a O potuuribo da yi gaŋ la a Kidorɔn bafoɔlaa a gaa te kpɛ gaaden kaŋ poɔ. 2A Gyudase na naŋ da yi a Yeezu puori meŋ da baŋ la a be, bonso, Yeezu ne a O potuuribo da maŋ gaa laŋ la taa a be. 3Lɛ la ka Gyudase da te taa sogyɛre mine a laŋ ne polisiri yi ne a Naaŋmen bagmaale wederebɛ nembɛrɛ ane a Faraziimine zie wa ne a be. Ba da taa la fentele, vũũdaare ane zɔɔzɔɔ-boma. 4A Yeezu naŋ pãã da baŋ bonna zaa naŋ da waana ka a e O, O da yi wa soore ba la, “Aŋ la ka yɛ boɔrɔ?” 5Ka ba da yeli sɔge, “Yeezu naŋ yi Naazɛrɛ.” Ka a Yeezu da leɛ yeli, “Maa la lɛ.” A Gyudase na naŋ da yi a Yeezu puori da be la ba poɔ are a be. 6A Yeezu naŋ da yeli ko ba, “Maa la lɛ,” ba da deri gaa la puori a te le teŋɛ. 7A Yeezu da laboreŋ soore ba la, “Aŋ la ka yɛ boɔrɔ?” Ka ba da yeli, “Yeezu naŋ yi Naazɛrɛ.” 8Ka a Yeezu da yeli sɔge, “N yeli ko yɛ la ka maa la lɛ. Azuiŋ, ka maa wa la ka yɛ boɔrɔ, yɛ bare a bama ka ba gɛrɛ.” 9A ŋaa da eɛɛ la ka a na tu lɛ O naŋ da yeli, “A banaŋ fo naŋ da ko ma, N ba e ka ba kanzaa bɔre.” 10Lɛ la ka Saamon Piita da voɔ o zɔɔzɔɔ-soɔ o naŋ da taa a kyɛne a Naaŋmen bagmaale wederebɛ nembɛrɛ zusoba gbaŋgbaa duluŋ toori kpɛlle. A gbaŋgbaa yuori da la Malku. 11Yeezu da yeli ko la a Piita, “Leɛ su a fo zɔɔzɔɔ-soɔ a sɔteɛ#18:11 Sɔteɛ: A Dagaaba mine maŋ boɔle la a yelbiri ŋa ka ‘Sɔkpar.’ poɔ. N mɔɔ ta nyu a zuŋmanekoɔ̃ a Saa naŋ ko ma be?”

Ba Naŋ Wa Ne Yeezu A Naaŋmen Bagmaale Wederebɛ Nembɛrɛ Zusoba Zie

12Lɛ la ka a sogyɛre ane ba neŋkpoŋ ane a Gyuumine polisiri da nyɔge a Yeezu leŋ. 13Ba da daŋ taa O la gaa ne Anaase naŋ da e Kayefa deɛndɔɔ zie. A Kayefa da la a Naaŋmen bagmaale wederebɛ nembɛrɛ zusoba a yuoni na poɔ. 14A Kayefa la da yeli wuli a Gyuumine ka a na seɛ la ka neŋyeni kpi faa a noba.

A Piita Naŋ Zagre Yeezu Yɛlɛ

15A Saamon Piita ane a potuuro kaŋ da tu la a Yeezu. A Naaŋmen bagmaale wederebɛ nembɛrɛ zusoba naŋ da baŋ a potuuro ŋa zuiŋ, o da tu la a Yeezu te kpɛ a Naaŋmen bagmaale wederebɛ nembɛrɛ zusoba davoro poɔ, 16kyɛ ka Piita da are a yeŋ poɔ, a dendɔre noɔreŋ. Lɛ la ka a potuuro na a Naaŋmen bagmaale wederebɛ nembɛrɛ zusoba naŋ da baŋ da yi te yeli yɛlɛ ko a pɔge na naŋ guuro a dendɔre kyɛ da taa a Piita kpɛ ne. 17A pɔge da soore la Piita, “Fo meŋ ba waa a dɔɔ ŋa potuuro kaŋ be?” Ka a Piita da yeli, “N ba waa kaŋ.” 18A gbaŋgbaare ne a polisiri da mare la saala vũũ a are ŋmaagyili uoro, bonso, ɔɔre da erɛ la. A Piita meŋ da are la ba poɔ a uoro a vũũ.

A Naaŋmen Bagmaale Wederebɛ Nembɛrɛ Zusoba Naŋ Soore Yeezu Soorebie

(Mat 26:59-66; Mak 14:55-64; Luk 22:66-71)

19Lɛ la ka a Naaŋmen bagmaale wederebɛ nembɛrɛ zusoba da soore Yeezu kyaare ne a O potuuribo ane a O kannoo yɛlɛ. 20Ka a Yeezu da yeli sɔge, “N da yeli la yɛlɛ weliweli ko a tendaa noba. N da maŋ kanna la a puoruuderi ane a Naaŋmen deri poore, benee a Gyuumine zaa naŋ maŋ lantaa. N da ba sɔgle yeli yelzaa. 21Bonso ka fo soorɔ ma? Soore a banaŋ naŋ woŋ a yɛlɛ N naŋ da yeli ko ba. Bana la baŋ bonna N naŋ yeli.” 22A Yeezu naŋ da wa yeli a ŋaa, a polisiri kaŋ naŋ da are peɛle O da fale O la kyɛ yele, “A ŋaa la ka fo na yeli sɔge a Naaŋmen bagmaale wederebɛ nembɛrɛ zuzoba be?” 23A Yeezu da leɛ soorɛɛ la, “Ka maa wa yeli yelfaa, wuli a N saanaa. Kyɛ ka maa wa yeli velaa, bonso ka fo fale ma?” 24Lɛ la ka Anaase da e ka ba leŋ a Yeezu, a taa gaa te ko Kayefa, a Naaŋmen bagmaale wederebɛ nembɛrɛ zusoba.

Piita Naŋ Laboreŋ Zagre A Yeezu Yɛlɛ

(Mat 26:71-75; Mak 14:69-72; Luk 22:58-62)

25A Saamon Piita da are uoro la vũũ, ka ba da la soore o, “Fo meŋ ba waa a dɔɔ ŋa potuuro kaŋ be?” Ka a Piita kyiiri a yeli, “N ba waa kaŋ.” 26A Naaŋmen bagmaale wederebɛ nembɛrɛ zusoba gbaŋgbaa kaŋ naŋ da waa a dɔɔ na Piita naŋ da kyɛ o toori kpɛlle dɔgrɔ da soore la a Piita, “N da ba nyɛ fo a gaaden poɔ ne a Yeezu be?” 27A Piita da laboreŋ kyiiree la, ka a daadaalɛ ka nɔdaa koŋ.

Ba Naŋ Taa Yeezu Wa Ne Pilato Zie

(Mat 27:1-2, 11-14; Mak 15:1-5; Luk 23:1-5)

28Ba pãã da taa la a Yeezu yi ne a Kayefa zie a gaa ne a Pilato nayikpoŋ poɔ. A da waa la bagu-pipi saŋ. A Gyuumine da ba kpɛ a nayikpoŋ poɔ, ka ka ba ta wa kpɛ dɛgre a na toɔ̃ di a Ista tigri. 29Lɛ la ka Pilato da yi wa ba zie a soore ba, “Boŋ yelsaanaa la ka yɛ taa kyaare ne a dɔɔ ŋa?” 30Ka ba da yeli sɔge, “Ka a dɔɔ ŋa da ba waa nenfaa, te da koŋ nyɔge O wa ne a fo zie.” 31Ka a Pilato da yeli ko ba, “Yɛ taa O gaa ne te di O sɛrɛɛ a seŋ ne a yɛ Naaŋmen begɛ naŋ wuli lɛ.” Ka a Gyuumine da leɛ yeli, “Te ba taa sori ka te ko neɛzaa.” 32(A ŋaa da eɛɛ la ka a tu lɛ a Yeezu naŋ da yeli, O naŋ da manna wullo kũũ na tɔ O naŋ na kpi.)

33Lɛ la ka Pilato da la kpɛ a die poɔ a boɔle a Yeezu a soore O, “Fõõ la a Gyuumine Naa be?” 34Ka a Yeezu da leɛ soore, “Fo meŋɛ la baŋ a yeli ŋa a soorɔ ma bee noba mine la yeli a N yɛlɛ ko fo?” 35Ka a Pilato da leɛ yeli, “N mɔɔ waa la Gyuu neɛ be? A fo meŋɛ noba ane a Naaŋmen bagmaale wederebɛ nembɛrɛ la taa fo wa ne a N zie. Boŋ la ka fo e?” 36Ka Yeezu da yeli sɔge, “N naaloŋ ba yi a tendaa ŋa poɔ. Ka a N naaloŋ da yi a tendaa ŋa poɔ, a N potuuribo da na zɔɔrɔ la ka ba faa ma yi ne a Gyuumine nuuriŋ. Kyɛ lɛ anaŋ waa, N naaloŋ ba yi a tendaa ŋa poɔ.” 37Ka a Pilato da soore O, “Ka lɛ fo waa la naa wɛ?” Ka a Yeezu da leɛ yeli, “Fõõ la yeli ka N waa la naa. A ŋaa zuiŋ la ka ba dɔge ma, ka N wa di a yelmeŋɛ danseɛ ko a tendaa noba. Neɛzaa naŋ waa a yelmeŋɛ soba maŋ kyɛllɛ la a N noɔre yɛlɛ.” 38Ka a Pilato da soore O, “Yelmeŋɛ la boŋ?”

Ba Naŋ Di Yeezu Sɛrɛɛ A Yeli Ka Ba Ko O

(Mat 27:15-31; Mak 15:6-20; Luk 23:13-25)

A Pilato naŋ da wa yeli a ŋaa baare, O da la yi la a Gyuumine zie a te yeli ko ba, “N ba nyɛ O yelsaanaa zaa. 39Kyɛ yɛ taa la yɛ teŋkoɔ̃ yeli kaŋ, ka N maŋ iri a nempɔgraa kaŋ bare a Ista tigri saŋ. Yɛ na boɔrɔ la ka N bare a Gyuumine Naa ko yɛ be?” 40Ka a noba kyeere a yele, “A dɔɔ ŋa eŋ naane, bare a Baraba!” A Baraba da waa la fafaara.

Currently Selected:

Gyn 18: DNTTP

Highlight

Copy