Gyn 17

Yeezu Naŋ Puori Ko O Potuuribo

1A Yeezu naŋ da wa yeli a yelbie ama baare, O da gbole kaa la sazu kyɛ yeli, “N Saa, a saŋ taɛ la. Iri a fo Bidɔɔ yuori, ka a fo Bidɔɔ meŋ pãã iri a fo yuori. 2Fo ko O la kpeɛ̃õ nensaalba zaa zu, ka O ko banaŋ zaa fo naŋ ko O nyɔvore naŋ ba taa baaroo. 3A nyɔvore naŋ ba taa baaroo la ŋa: ka ba baŋ fo yoŋ naŋ waa Naaŋmen meŋɛ ane a Yeezu Kirista fo naŋ toŋ. 4N iri la a fo yuori a teŋɛzu ne a toma fo naŋ ko ma ka N toŋ baare. 5Pampana ŋa, N Saa, pãã iri N yuori a fo meŋɛ niŋesogɔ ne a yuori na N naŋ da taa fo zie kyɛ ka a tendaa wa bebe.”

6“A noba banaŋ fo naŋ da iri a tendaa poɔ ko ma, N eɛɛ la ka ba baŋ a fo yuori. Ba da waa la fo soobo, kyɛ ka fo da de ba ko ma ka ba da tuuro a fo yelbiri. 7Ŋaa ba baŋ ka bonzaa fo naŋ ko ma yi la fo zie, 8bonso, N ko ba la a yelbie na fo naŋ da ko ma. Ba de la a yelbie kyɛ baŋ a yelmeŋɛ ka N yi la fo zie wa. Ba sage deɛ la ka fõõ la toŋ ma. 9A bana zuiŋ la ka N puoro. N ba puoro a tendaa noba zuiŋ, kyɛ banaŋ fo naŋ ko ma zuiŋ la ka N puoro, bonso, fõõ la so ba. 10Banaŋ zaa N naŋ so e la fo soobo, ka banaŋ zaa fo naŋ so meŋ e N soobo, ka N yuori na nyɛ puubu ba zie. 11Kyɛ pampana, N ba la be a teŋɛzu, kyɛ bana eŋ naŋ be la a teŋɛzu kyɛ ka N waana fo zie. N Saa Soŋ, gu ba a fo yuori fo naŋ ko ma zuiŋ, ka ka ba na waa yeni aŋa maa ne fo naŋ waa yeni lɛ. 12N naŋ da be a ba zie, N da gu ba la a fo yuori fo naŋ da ko ma zuiŋ. N da gu ba la ka ba kanzaa da ba bɔre, ka a soba na a naŋ nare biŋ ka o wɛ yoŋ naane, ka ka a gansoŋ poɔ yɛlɛ na tu a tuubu. 13Kyɛ pampana N waana la fo zie. N yele la a yɛlɛ ama a teŋɛzu ka ka N kyelloo na paale ba zie. 14N ko ba la a fo yelbiri, kyɛ a tendaa noba da kyiiri ba la, ba naŋ ba poɔ a tendaa noba poɔ zuiŋ aŋa N meŋ naŋ ba poɔ a tendaa noba poɔ lɛ. 15N ba sɔrɔ ka fo iri ba yi ne a tendaa poɔ, kyɛ N sɔrɔ la ka fo guuro ba a faaloŋ soba eŋɛ. 16Ba ba poɔ a tendaa noba poɔ aŋa N naŋ ba poɔ a tendaa noba poɔ lɛ. 17Maale ba eŋ a yelmeŋɛ poɔ. A fo yelbiri waa la yelmeŋɛ. 18A lɛ fo naŋ da toŋ ma a teŋɛzu, a lɛ la ka N meŋ toŋ ba a teŋɛzu. 19Kyɛ a ba eŋɛ la ka N maale N meŋɛ, ka ka ba meŋ na maale bamenne a yelmeŋɛ poɔ.”

20“Ba yoŋ eŋɛ naane ka N puoro, kyɛ N puoro korɔ la a banaŋ zaa naŋ na sage de N yɛlɛ a ba yelbiri zuiŋ, 21ka ba zaa na e yeni. N Saa, aŋa fo naŋ be N poɔ ka N meŋ be fo poɔ lɛ, e ka ba meŋ be te poɔ. Lɛ la ka a tendaa noba na sage de ka fõõ la toŋ ma. 22A puubu na fo naŋ ko ma, N meŋ de ko ba la, ka ba meŋ na e yeni aŋa te naŋ waa yeni lɛ. 23N be la ba poɔ ka fo be N poɔ, ka ka ba na lantaa e yeni. Lɛ la ka a tendaa noba na baŋ ka fõõ la toŋ ma kyɛ nɔŋ ba aŋa fo naŋ nɔŋ ma lɛ. 24N Saa, N nɔnɔ la ka a banaŋ fo naŋ ko ma meŋ na laŋ ne ma a zie N naŋ be, ka ba na nyɛ a puubu fo naŋ ko ma, bonso, fo nɔŋ ma la sɛre kyɛ ka a tendaa wa piili.”

25“Yelmennoŋ Saa, a teŋɛzu noba ba baŋ fo kyɛ maa baŋ fo la, ka a noba bama meŋ baŋ ka fõõ la toŋ ma. 26N eɛɛ la ka ba baŋ a fo yuori, kyɛ na e ka ba baŋ o. Lɛ la ka a nɔmmo fo naŋ nɔŋ ma na be ba poɔ, kyɛ ka N be ba poɔ.”

Currently Selected:

Gyn 17: DNTTP

Highlight

Copy