Gyn 13

Yeezu Naŋ Pɛge A O Potuuribo Gbɛɛ

1A Ista tigri naŋ da wa tara, a Yeezu da baŋ ka a saŋ taɛ la ka O na yi a teŋɛzu kyɛ a leɛ gaa a Saa zie. O naŋ da nɔnɔ a O noba naŋ be a teŋɛzu, O da nɔŋ ba la te ta a baaraa. 2A sebɛlbɛllɛ da kpɛ la Gyudase, a Saamon Ezekarɔte bidɔɔ teɛroŋ baare ka o na iri a Yeezu tere. A zimaane bondirii diibu saŋ, 3Yeezu naŋ da baŋ ka a Saa de la yelzaa eŋ O nuuriŋ, kyɛ la baŋ ka O yi la Naaŋmen zie wa kyɛ leɛ gɛrɛ Naaŋmen zie, 4O da iri la a diibu zu a yage O kpar-kpoŋ bare, kyɛ de bɔɔdowaa leŋ O seɛŋ. 5O pãã da kyiri la koɔ̃ eŋ laa poɔ a piili pɛgrɛ a O potuuribo gbɛɛ kyɛ maŋ de a bɔɔdowaa naŋ leŋ a O seɛŋ a meelɛ ne a ba gbɛɛ. 6O naŋ da wa ta Saamon Piita zie, a Saamon Piita da yeli ko O la, “Daana, fo boɔrɔ la ka fo pɛge n gbɛɛ be?” 7Ka a Yeezu da leɛ yeli, “A pampana, fo ba baŋ bonna N naŋ erɛ, kyɛ a puoriŋ fo na baŋ la a tɛgɛ.” 8Ka a Piita yeli ko O, “Fo daŋ koŋ pɛge a n gbɛɛ togitogi zaa.” Ka a Yeezu da leɛ yeli, “Ka maa ba pɛge fo gbɛɛ, fo koŋ la laŋne ma.” 9Ka a Piita da yeli ko O, “Daana, ta pɛge n gbɛɛ yoŋ, kyɛ pɛge n nuuri ane n zu meŋ poɔ!” 10Ka a Yeezu da yeli ko o, “Neɛ naŋ so koɔ̃ yi, ba la seŋ ka o pɛge o meŋɛ ka o gbɛɛ yoŋ pɛgoo naane. Kyɛ yɛnee eŋ so la koɔ̃ yi, kyɛ yɛ zaa naane so yi.” 11A Yeezu naŋ da baŋ a soba na naŋ na yi O puori zuiŋ la so ka O da yeli, “Yɛ zaa naane so koɔ̃ yi.”

12O naŋ da wa pɛge a ba gbɛɛ baare, a su O kparoo kyɛ leɛ gaa a diibu zie, O da soore ba la, “Yɛ baŋ la bonna N naŋ e ko yɛ? 13Yɛ boɔlɔ ma la Wulwullo ane Daana; a yelmeŋɛ la a lɛ, bonso, a lɛ la ka N waa. 14Azuiŋ, ka maa, a yɛ Daana ane yɛ Wulwullo wa pɛge yɛ gbɛɛ, a seŋ ka yɛ meŋ pɛgrɛ taa gbɛɛ. 15N e wuli yɛ la ka yɛ meŋ na erɛ a lɛ N naŋ e ko yɛ. 16Yelmeŋɛ zaa la ka N yele korɔ yɛ, tontonema ba ganna ba neŋkpoŋ, ka banaŋ ba naŋ toŋ meŋ ba ganna a soba na naŋ toŋ ba. 17Ka yɛnee wa baŋ a yɛlɛ ama, yɛ nyɛ la maaloo ka yɛnee wa tuuro a. 18Yɛ zaa yɛlɛ naane ka N yele. N baŋ la a banaŋ N naŋ kaa-iri. Kyɛ a eɛɛ la ka a gansoŋ poɔ yɛlɛ na tu a tuubu, ‘A soba na naŋ di a N diibu la leɛ de o gbɛre teɛ ne ma.’ 19N yele la a ŋaa korɔ yɛ pampana ŋa, ka ka a saŋ na anaŋ wa e, ka yɛ na sage de ka maa la lɛ. 20Yelmeŋɛ zaa la ka N yele korɔ yɛ, soba na zaa naŋ tuori de neɛ na zaa N naŋ toŋ, a soba tuori de ma la. Ka soba na zaa naŋ tuori de ma meŋ tuori de a soba na naŋ toŋ ma.”

Yeezu Naŋ Da Daŋ Yeli A Neɛ Naŋ Na Yi O Puori Yɛlɛ

21A Yeezu naŋ da wa yeli a ŋaa baare, o teɛroŋ da dɔɔnɔ O la ka O da yeli, “Yelmeŋɛ zaa la ka N yele korɔ yɛ, yɛ kaŋ na yi la N puori a de ma tere.” 22A potuuribo da leɛ kaara la taa, a da ba baŋ ba buo soba naŋ la ka O da yele. 23A Yeezu potuuro na O naŋ da nɔŋ yaga da zeŋ peɛle la a Yeezu. 24Ka a Saamon Piita da kagre o ka o soore a Yeezu nembuo naŋ la ka O yele. 25Lɛ la ka a potuuro na da tage gbɔge a Yeezu kyɛ soore O, “Daana, nembuo la?” 26Ka a Yeezu da yeli sɔge, “Ona la a soba na N naŋ na de a boroboro ŋmaa ŋa toŋ a laa poɔ kyɛ de ko o.” O naŋ pãã da wa de a boroboro ŋmaa toŋ a laa poɔ baare, O da de ko la Gyudase, a Saamon Ezekarɔte bidɔɔ. 27A Gyudase naŋ da wa de a boroboro ŋmaa baare, Setaana da wa kpɛ la o teɛroŋ poɔ. Ka Yeezu da yeli ko o, “Page wieouŋ zaa a e yeli na fo naŋ boɔrɔ ka fo e.” 28A ŋaa, ba kanzaa naŋ da be a diibu zie da ba baŋ bonna naŋ so ka a Yeezu da yeli a ŋaa ko a Gyudase. 29Ka ba mine da teɛre ka a Gyudase naŋ da e a ba libi-binne la so ka Yeezu da yele korɔ o, “Te da a boma te naŋ na di ne a tigri”; bee, ka o ko a nembaalba bonkaŋ. 30Azuiŋ, a Gyudase naŋ da wa de a boroboro baare, a tɔntɔbaalɛ ka o da te yi yeŋ. Zie da sɔgɛɛ la.

A Nɔpaalaa Yɛlɛ

31A Gyudase naŋ da wa yi baare, Yeezu da yelee la, “Ŋaa eŋ a Nensaala Bie nyɛ la puubu, ka Naaŋmen nyɛ puubu O zie. 32Ka Naaŋmen wa nyɛ puubu O zie, a Naaŋmen na ko O la puubu O meŋɛ zie, a de ko O daadaalɛ. 33N bibiiri, N koŋ la be yɛ zie ka a la kɔɔre yaga. Yɛ na bɔ ma la, kyɛ a ŋa N naŋ da yeli ko a Gyuumine lɛ, a lɛ ka N yele korɔ yɛ, ‘A zie N naŋ gɛrɛ, yɛ koŋ baŋ wa be.’ 34N eŋnɛ la nɔpaalaa korɔ yɛ, yɛ nɔnɔ taa. Aŋa N naŋ da nɔŋ yɛ lɛ, yɛ meŋ nɔnɔ taa. 35A ŋaa zie la ka neɛzaa na baŋ ka yɛ waa la N potuuribo, ka yɛnee wa nɔnɔ taa.”

Yeezu Naŋ Da Yeli Piita Naŋ Na Zagre O Yɛlɛ

36A Saamon Piita da yeli ko la a Yeezu, “Daana, yeŋ la ka fo gɛrɛ?” Ka a Yeezu da yeli sɔge, “A zie N naŋ gɛrɛ fo kontoɔ̃ tu ma gaa a be pampana ŋa, kyɛ fo na tu ma la a puoriŋ.” 37Ka a Piita da soore O, “Daana, bonso ka N kontoɔ̃ tu fo pampana ŋa? N na sage kpi la fo zuiŋ.” 38Ka a Yeezu da yeli sɔge, “Fo na sage kpi la a N zuiŋ yaa? Yelmeŋɛ zaa la ka N yele korɔ fo, nɔdaa naŋ koŋ koŋ sɛre kyɛ ka fo kyiiri gbɛre bota ka fo ba baŋ ma.”

Currently Selected:

Gyn 13: DNTTP

Highlight

Copy