Tom 16

Timoti Naŋ Tu Pɔɔl Ane Selase

1A Pɔɔl da gaa la Dɛɛbe meŋ a yi be gaa Lisitera. A Yeezu potuuro kaŋ da be la a Lisitera teŋɛ poɔ ka o yuori di Timoti. O ma da waa la Gyuumine pɔgeyaa naŋ sage de a Yeezu yɛlɛ, kyɛ ka o saa da waa Giriki neɛ. 2O da taa la yosoŋ a yelderebɛ naŋ da be a Lisitera ane Ikoniyo poɔ. 3A Pɔɔl da boɔrɔ la ka a Timoti tu o; lɛ la ka o da e ka ba iri o dɛgre. Bonso, a Gyuumine naŋ da be a ziiri na poore zaa da baŋ ka a Timoti saa da waa la Giriki neɛ. 4Ba naŋ da yɔ yoɔrɔ a tenne poore, ba da manna korɔ la a yelderebɛ ka ba sagra a yɛlɛ na zaa a apostoliimine ane nembɛrɛ naŋ da yeli biŋ a Gyɛruzɛlɛm poɔ. 5Ka a lɛ da vɛŋ ka a puoruu laŋne deme yeldeebo da zɛge do saa, kyɛ ka ba noɔre da yɛllɛ bebiri zaa.

Pɔɔl Naŋ Nyɛ Nyaabo Kyaare Ne Masedoniya Dɔɔ Kaŋ Yɛlɛ

6Ba da tu la Firigyeya ane Galesiya paaloŋ tɔle, a Vooroŋ Soŋ naŋ da ba ko ba sori ka ba kanne a yelbiri a Ezeya poɔ zuiŋ. 7Ba naŋ da wa te ta Mesiya teŋɛ niŋe, ba da boɔrɔ la ka ba da te kpɛ Bitiniya poɔ, kyɛ a Yeezu Vooroŋ da ba sage ka ba kpɛ a be. 8Lɛ la ka ba da te beɛ a Mesiya teŋɛ bare kyɛ sigi gaa Turose. 9A tensogɔ saŋ, Pɔɔl da nyɛ la nyaabo kaŋ, ka Masedoniya dɔɔ kaŋ da are sɔrɔ o a yele, “Wa a Masedoniya poɔ, a wa soŋ te.” 10O naŋ da wa nyɛ a nyaabo, a daadaalɛ ka te da e aneɛ ka te gaŋ gaa a Masedoniya, te naŋ da baŋ ka Naaŋmen la boɔle te ka te gaa te moɔle a yelnoore ko ba zuiŋ.

Lidiya Naŋ Sage De A Daana Yɛlɛ Filipae Teŋɛ Poɔ

11Te da kpɛ la gbori a yi Turose kyɛ mɔŋ daadaa gaa Samoterase, ka a zie da wa nyaa ka te da gaa Neɛpoli, 12a da la yi a be gaa Filipae naŋ da waa Masedoniya teŋkpoŋ kaŋ kyɛ da be a Uroma noba nuuriŋ. Te da be la a teŋkpoŋ ŋa poɔ ka a kɔɔre belaa. 13A pɛnnoo bebiri daare naŋ da wa ta, te da yi la a teŋɛ poɔ a gaa baa kaŋ noɔre, te naŋ da teɛre ka puoruu zie be la a be. Te da zeŋ la a be a yeli yɛlɛ ko a pɔgeba naŋ da lantaa. 14Pɔge kaŋ naŋ da puoro Naaŋmen ka o yuori di Lidiya, a yi Tatira teŋɛ, a da waa yɛreyɛrɛ naŋ koɔrɔ pɛmɛ daaroŋ naŋ ba wono, da kyɛllɛ la a te yɛlɛ. A Daana da eɛɛ la ka o yuo o sukyiri a eŋ toori kyɛllɛ a yɛlɛ na a Pɔɔl naŋ da yele. 15A Lidiya ane o yideme naŋ da wa de suobu, o da sɔre te la a yele, “Ka yɛnee wa sage ka N waa la a Daana yelderɛ serɛzaa, yɛ wa kpeɛrɛ n yiri poɔ.” Kyɛ o da sɔre te la yaga zaa ka te da te sage.

Ba Naŋ Nyɔge A Pɔɔl Ane Selase Pɔge

16Daare kaŋ, te naŋ da gɛrɛ a puoruudie, te da tuori la pɔgsarlee kaŋ naŋ da waa gbaŋgbaa kyɛ da waa bageboorɔ, ka a o bageboge da yire libie yaga korɔ a o demee. 17O naŋ da tuuro te ane a Pɔɔl, a da ŋmeɛrɛ kpɛlle yele, “A noba bama waa la a Kpeɛ̃õ Zaa Naaŋmen gbaŋgbaare naŋ wa ka ba moɔle a faabo yɛlɛ ko yɛ.” 18O da erɛ la a ŋaa beri yaga, ka a Pɔɔl suuri da te iri yaga ka o leɛ yeli ko a sefaa, “A Yeezu Kirista yuori eŋɛ ka N yele korɔ fo, wa yi o eŋɛ.” Ka a sefaa da wa yi a gogo na poɔ.

19Kyɛ a o demee naŋ da wa nyɛ ka ba koŋ la baŋ nyɛrɛ a libie ba naŋ da nyɛrɛ, ba da nyɔge la a Pɔɔl ane Selase, a tage ba gaa ne a daa poɔ a nembɛrɛ zie. 20Ba naŋ da taa ba wa ne a sɛrediribe zie, ba da yelee la, “A noba bama waa la Gyuumine, a wa dɔɔnɔ a te teŋɛ, 21a wullo a noba ka ba tuuro yel-erre te Uroma noba naŋ ba taa sori ka te tu bee a e.” 22A nembeɛoŋ da iri zɔɔrɔ ne la a Pɔɔl ane Selase, ka a sɛrediribe da e ka ba yaare ba bonsuuri kyɛ e ka ba feɛ ba. 23Ba naŋ da wa feɛ ba yaga baare, ba da pɔge ba la kyɛ tere noɔre ka a nempagdie kaara gu ba velaa. 24Ba naŋ da ko o a noɔre ŋa zuiŋ, o da de ba la kpɛ te pɔge a dikpaare poɔ, a leŋ ba gbɛɛ mare kpulo.

25Aŋa tensogpozentaa saŋ, Pɔɔl ane Selase da puoro la kyɛ yiele puubu yieluŋ korɔ Naaŋmen, ka a nempɔgre da kyɛllɛ wono. 26Ba wa berɛ ka a zie gbigri yaga yaga zaa, ka a nempagdie daŋkyime da zɛŋ a sigi te tɔ a pare. A daadaalɛ ka a dendɔɛ zaa da yuori, kyɛ ka a nempɔgre zaa banzɔlɔ da lori. 27A nempagdie kaara naŋ da wa dɔ̃ɔ̃ iri o goɔŋ poɔ a nyɛ ka a dendɔɛ zaa yuore, o da voɔ la o zɔɔzɔɔ-soɔ a da boɔrɔ ka o ko o meŋɛ, bonso, o da teɛre ka a nempɔgre da yi zoe la. 28Kyɛ a Pɔɔl da zɛge la o kɔkɔre a kyeere yele, “Ta e fo meŋɛ yelfaa zaa, bonso, te zaa bebe la.” 29A nempagdie kaara da eɛɛ la ka ba ko o vũũ, ka o da ŋmore kpɛ a nempagdie poɔ, a te le vɔgle a Pɔɔl ane Selase niŋesogɔ a miine ne dabeɛ̃. 30Lɛ la ka o da taa ba yi ne yeŋ a te soore ba, “N bamine, wola ka N na e a nyɛ faabo?” 31Ka ba leɛ yeli sɔge, “Sage de a Daana Yeezu yɛlɛ, kyɛ fo na nyɛ la faabo, fõõ ne a fo yideme zaa.” 32Ba da kanne la a Daana yelbiri a ko o ane banaŋ zaa naŋ da be a o yiri poɔ. 33A tensogɔ na zaa, a gogo na poɔ, a nempagdie kaara da taa ba la a te pɛge ba felɛ. Lɛ la ka o ne o yideme zaa da de suobu a daadaalɛ. 34O da taa ba la do ne o yiri, a te ko ba bondirii kyɛ ka o ne o yideme da taa popeɛloŋ, o naŋ da sage de a Naaŋmen yɛlɛ zuiŋ.

35Zie naŋ da wa nyaa, a sɛrediribe da toŋ la a polisiri, a yele, “Vɛŋ ka a noba na gɛrɛ.” 36A nempagdie kaara da ko la Pɔɔl a duoro a yele, “A sɛrediribe tere la noɔre ka ba bare yɛ ka yɛ gɛrɛ; azuiŋ, yɛ wa yi a gɛrɛ ne emmaaroŋ.” 37Kyɛ ka Pɔɔl leɛ yeli sɔge, “Te waa la Uroma noba kyɛ ka ba ŋmɛ te noba poɔ, a page te, kyɛ ka te ba taa saanaa zaa. Kyɛ a pampana ŋa, ba boɔrɔ la ka ba sɔgle bare te be? A koŋ baŋ waa lɛ togitogi! Vɛŋ ka bamenne wa taa te yi ne.” 38A polisiri da te yeli la a yɛlɛ ama ko a sɛrediribe, ka dabeɛ̃ da kpɛ ba, ba naŋ da wa woŋ ka ba waa la Uroma noba; 39lɛ la ka ba da wa sɔre saanaa a yi ba zie. A lɛ puoriŋ, ba da taa ba la yi ne a te yeli ko ba ka ba yi a teŋɛ poɔ. 40Ba naŋ da wa yi a nempagdie poɔ, ba da gaa la Lidiya yiri. Ba naŋ da wa te nyɛ a ba yɔɔmine ane ba yɔɔpuuli a yeli yɛlɛ teɛ a ba yeldeebo, ba pãã da yi la a be a gaa.

Currently Selected:

Tom 16: DNTTP

Highlight

Copy