Tom 15

A Gyɛruzɛlɛm Kpaaroŋ Kpoŋ Yɛlɛ

1Lɛ la ka noba mine da yi a Gyudiya a sigi wa Antoɔki a wa kanna a yɔɔmine, “Ka yɛnee ba iri yɛ dɛgre a seŋ a Moozul bege naŋ yeli lɛ, yɛ koŋ baŋ nyɛ faabo.” 2A yeli ŋa da wa ne la tage taa, ka nɔkpeɛne da kpɛ a Pɔɔl ane Banabase ane a noba na sogɔŋ. Lɛ la ka ba da iri Pɔɔl ane Banabase ane a noba na mine ka ba gaa Gyɛruzɛlɛm a te nyɛ a apostoliimine ane a nembɛrɛ ka ba gyɛle a yeli ŋa. 3A lɛ zuiŋ a puoruu laŋne deme da toŋ ba la, kyɛ ba naŋ da tu a Foniseya ane Samareya, ba da manne la lɛ a Nemboore-yobo#15:3 Nemboore-yobo: Noba na zaa naŋ da ba waa Gyuumine la a Nemboore-yobo. naŋ sage de a Yeezu yɛlɛ, ka a yelderebɛ zaa poore da pɛle yaga zaa. 4Ba naŋ da wa ta Gyɛruzɛlɛm, a puoruu laŋne deme ane a apostoliimine ane a nembɛrɛ da de ba la saanoŋ. Ba da manne la a yɛlɛ na zaa Naaŋmen naŋ da tu ba zie a e. 5Kyɛ a yelderebɛ mine naŋ da poɔ a Faraziimine laŋne poɔ da iri arɛɛ la kyɛ yeli, “A e la feroo ka a Nemboore-yobo iri ba dɛgre kyɛ tuuro a Moozul begɛ.”

6A apostoliimine ane a nembɛrɛ da laŋ la taa ka ba kaa a yeli ŋa nyɛ. 7Ba naŋ da ŋmɛ a nɔkpeɛne ka a kɔɔre puoriŋ, Piita da iri arɛɛ la kyɛ yeli ko ba, “N yɔɔmine, yɛ baŋɛɛ la ka a piiluu saŋ Naaŋmen da kaa-iri ma la yɛ poɔ, ka n zie la ka a Nemboore-yobo na tu woŋ a yelnoore kyɛ sage de. 8Kyɛ Naaŋmen naŋ baŋ nensaala sukyiri, da di la danseɛ ko ba, O naŋ da ko ba a Vooroŋ Soŋ aŋa O naŋ da ko te lɛ. 9A ba yeldeebo zuiŋ, O pɛge la a ba sukyie ka a veɛlɛ, ka tɛɛtɛɛ zaa ba kyebe te ne ba zie. 10Pampana ŋa, bonso ka yɛ boɔrɔ ka yɛ e Naaŋmen nyɛ ne yɛ naŋ de a gbogli na te ne te sããkommine naŋ da ba toɔ̃ na tuo a yɛre a potuuribo kɔkɔɛ eŋɛ? 11Kyɛ a ba e a lɛ, te sage deɛ la ka a Daana Yeezu garaaseɛ la na faa te aŋa O naŋ na faa ba lɛ.”

12A noba zaa naŋ da lantaa da e la gbilli, kyɛ da kyɛllɛ a Banabase ane Pɔɔl ka ba da manne a yelwulii ane a toŋkpeɛne Naaŋmen naŋ da tu ba zie a e a Nemboore-yobo zie. 13Ba naŋ da wa yeli a yɛlɛ baare, Gyimisi da yeli sɔgɛɛ la, “N yɔɔmine, yɛ kyɛlle woŋ n noɔre yɛlɛ. 14Simeon da manne la lɛnɛɛ Naaŋmen naŋ da daŋ kaa a Nemboore-yobo ne nimimaaroŋ, a kaa-iri noba ba poɔ, a O yuori eŋɛ. 15A yelbie ama ane a Ŋmen-yelmanneba yelbie tu la taa, a seŋ ba naŋ sɛge lɛ:

16‘A yeli ŋa puoriŋ, N na leɛ wa la,

a wa leɛ mɛ a Davil yiri naŋ le;

N na leɛ mɛ la a dabori,

a e ka o leɛ are,

17ka a lɛ vɛŋ ka noba zaa na boɔrɔ a Daana

haali a Nemboore-yobo banaŋ zaa N naŋ boɔle N yuori eŋɛ.

A ŋaa la ka a Daana yeli, a Onaŋ naŋ da maŋ erɛ

18ka ba baŋna a yɛlɛ ama a yi a dakoroŋ saŋ.’

19Azuiŋ, maa eŋ teɛroŋ la ka te ta dɔɔnɔ a Nemboore-yobo bama naŋ sagra derɛ a Naaŋmen yɛlɛ, 20kyɛ te sɛge ko ba ka ba ta dire tebɛ boma, a ta tonɔ peɛ̃mo toma, a ta ɔɔrɔ donne ba naŋ ba kɔre kyɛ ka a kpi, a kyɛ ta dire zẽẽ. 21Bonso, a dakoroŋ saŋ, Moozul da taa la noba naŋ da maŋ moɔlɔ a Naaŋmen yɛlɛ a teŋkponni zaa poore, kyɛ ka a pɛnnoo bebiri zaa ka ba maŋ kanne O yɛlɛ a puoruuderi poore.”

Gane Ba Naŋ Sɛge Ko A Nemboore-yobo Naŋ Sage De A Kirista Yɛlɛ

22A apostoliimine ane a nembɛrɛ ane a puoruu laŋne deme zaa pãã da laŋ la noɔre, a kaa-iri noba a ba poɔ, a na toŋ ba ka ba gaa a Antoɔki, a laŋ ne Pɔɔl ane Banabase. Ba da toŋ la Gyudase ba naŋ boɔlɔ Basaba ane Selase, naŋ da waa wederebɛ a yɔɔmine poɔ, 23ne a gane ŋa, “A yɛ yɔɔmine, a apostoliimine ane a nembɛrɛ puoro la a yɔɔmine, a Nemboore-yobo naŋ be Antoɔki ane Seeriya ane Selusiya tenne poore. 24Te woŋ ka a te noba mine naŋ yi te poɔ, te naŋ ba toŋ, da wa yeli la yɛlɛ a dɔ̃ɔ̃ yɛ teɛroŋ. 25Azuiŋ, te laŋ la noɔre a kaa-iri noba a toŋ ba yɛ zie, ba ne Banabase ane Pɔɔl te naŋ nɔŋ, 26ba naŋ de ba nyɔvoɛ zaa kpimare a te Daana Yeezu Kirista zuiŋ. 27A lɛ zuiŋ, te toŋ la Gyudase ane Selase ka ba wa manne a yeli ŋa ne ba nɔɛ a ko yɛ. 28Bonso, a Vooroŋ Soŋ ane te nyɛɛ la ka a ba seŋ ka te de dɔgroŋ zaa dɔgle yɛ zu, ka a yelfere ama yoŋ naane: 29yɛ ta dire tebɛ boma, a ta dire zẽẽ, a ta ɔɔrɔ donne ba naŋ ba kɔre kyɛ ka a kpi, a ta tonɔ peɛ̃mo toma. Yɛ na e la a neɛ, ka yɛnee iri yɛmenne yi a ama poɔ. Yɛ zeŋ velaa.”

30Ba pãã da toŋ ba la, ka ba da sigi a Antoɔki. Ba naŋ da wa boɔle a puoruu laŋne deme lantaa, ba da de la a gane ko ba. 31A noba naŋ da wa kanne a gane, ba poore da pɛlɛɛ la ne a gane yelbie. 32A Gyudase ane Selase meŋ naŋ da waa Ŋmen-yelmanneba, da yeli la yɛlɛ yaga teɛ a yɔɔmine a ko ba faŋ paalaa. 33Ba naŋ da wa be a be ka a kɔɔre belaa, a yelderebɛ da puori ba la kyɛ eŋ ba sori ka ba leɛ gaa a noba na naŋ toŋ ba zie. 34[Kyɛ Selase eŋ zie, a da waa la velaa ko o ka o kpeɛrɛ a be] 35Kyɛ Pɔɔl ane Banabase da zeŋ la a Antoɔki poɔ. Ba ne noba yaga mine da kanne la a noba kyɛ moɔle a Daana yelbiri a be.

Pɔɔl Ane Banabase Naŋ Wɛle Taa

36Bebie mine puoriŋ, Pɔɔl da yeli ko la Banabase, “E ka te leɛ yɔ a nyɛ a yelderebɛ a tenne na zaa poore te naŋ da kanne a Daana yelbiri a nyɛ lɛ ba naŋ erɛ.” 37Banabase da boɔrɔ la ka ba taa a Gyɔɔn ba naŋ boɔlɔ Marko a gɛrɛ ne. 38Kyɛ Pɔɔl da ba boɔrɔ ka o taa neɛ naŋ da zo kyɛ bare ba Pamfiliya poɔ, a ba tu ba a toŋ a toma. 39A nɔkpeɛne da wa kpɛ la faa, ka a lɛ da e ka ba da wɛltaa; Banabase da taa la a Marko ka ba kpɛ gbori a gaa Saapuru. 40Kyɛ Pɔɔl da kaa-iri la Selase, ka a yelderebɛ da sɔre a Daana maaloo ko o kyɛ ka ba gɛrɛ. 41O da tu la Seeriya ane Silisiya, a erɛ ka a puoruu laŋne noba yeldeebo erɛ kpeɛŋaa.

Currently Selected:

Tom 15: DNTTP

Highlight

Copy