Marko 3

Nyumu ɔ nɛ nine kake gbo ɔ

(Mateo 12.9-14; Luka 6.6-11)

1Yesu ba kpe he ɔ ekohu. Nyumu ko ngɛ lejɛ ɔ nɛ nine kake gbo. 2Ni komɛ ngɛ Yesu huɔe kaa e ma tsa hiɔtsɛ ɔ Hejɔɔmi ligbi ɔ lo, konɛ a ya po e nya. 3Yesu de nɔ nɛ nine gbo ɔ ke, “Hɛɛ mo kɛ ba ye ngɔ!” 4Kɛkɛ nɛ e bi ni ɔmɛ ke, “Anɛ e da kaa a peeɔ kpakpa, loo a peeɔ yayami Hejɔɔmi ligbi ɔ; e da kaa a heɔ nɔmlɔ yi wami, aloo a gbee lɛ?”

Se mɛɛ lɛɛ a pɛ̃ nya mi. 5Yesu kɛ abofu hyɛ a hɛ mi kɛ kpe; e dɔ lɛ kaa a tsui wa kikɛ nɛ ɔ. Kɛkɛ nɛ e de nyumu ɔ ke, “Kpã o nine mi!” E pee ja; nɛ a tsa e nine ɔ. 6Lɔ ɔ he ɔ, Farisi bi ɔmɛ je kpe he ɔ, nɛ amlɔ ɔ, a kɛ Herode bi ɔmɛ ya so Yesu yi nɔ, bɔ nɛ a maa pee nɛ a kpata e hɛ mi.

Nimli babauu ba wo ɔ nya

7Yesu kɛ e kaseli ɔmɛ sã a he si kɛ ho Galilea wo ɔ nya ya, nɛ nimli babauu nyɛɛ e se. A je Galilea, Yudea, 8Yerusalem, Idumea kpokpa a nɔ, Yordan pa a se, kɛ Tiro kɛ Sidon ní ɔmɛ a mi kɛ ba. Nimli babauu nɛ ɔmɛ tsuo ba Yesu ngɔ, ejakaa a nu níhi nɛ e ngɛ pee ɔ a he. 9#Mar 4.1; Luk 5.1-3 Nimli nɛ ɔmɛ a he hiɛ, lɔ ɔ he ɔ, Yesu de e kaseli ɔmɛ ke a hla lɛ ko ha lɛ, konɛ asafo ɔ ko mia lɛ. 10A nu he kaa e tsa nihi babauu he je ɔ, hiɔtsɛmɛ tsuo bu kɛ ba e ngɔ konɛ a ba ta e he. 11Nihi nɛ mumi yayami ngɛ a mi ɔ, mɛɛ lɛɛ be tsuaa be nɛ a maa na lɛ ɔ, a tsɔɔ nɔɔ si ngɛ e hɛ mi, nɛ a kpaa ngmlaa ke, “Mo ji Mawu Bi ɔ nɛ!”

12Yesu bɔ mumi yayami ɔmɛ kɔkɔ veveeve ke a ko je lɛ si kɛ tsɔɔ.

Yesu hla bɔfohi nyɔngma kɛ enyɔ

(Mateo 10.1-4; Luka 6.12-16)

13Enɛ ɔ se ɔ, Yesu ya yoku ko nɔ, nɛ lɛ nitsɛ e tsɛ nihi nɛ e suɔ ɔ kɛ ba e ngɔ. 14E hla a kpɛti ni nyɔngma kɛ enyɔ,#3.14 Blema ngmami komɛ kɛ piɛ he ke “nɛ e tsɛ mɛ bɔfohi.” konɛ a kɛ lɛ ba hi si, nɛ́ e tsɔ mɛ nɛ a ya fiɛ. 15A ma na he blɔ nɛ a kɛ hia mumi yayamihi.

16Ni nyɔngma kɛ enyɔ ɔmɛ nɛ e hla a ji nɛ ɔmɛ nɛ: Simon, (nɛ e wo lɛ biɛ ke Petro hulɔ ɔ), 17Yakobo, kɛ e nyɛmi Yohane, Zebedeo bimɛ ɔmɛ (Yesu wo mɛ Boanerges. E sisi ji oslabai bimɛ), 18Andrea, Filipo, Bartolomeo, Mateo, Toma, Alfeo bi Yakobo, Tadeo, Simon ma he doolɔ ɔ, 19kɛ Yuda Iskariot, nɔ nɛ tsɔɔ e se blɔ ɔ.

Yesu kɛ Beelzebul

(Mateo 12.22-32; Luka 11.14-23; 12.10)

20Jehanɛ Yesu ba su we mi. Nihi babauu ba bua a he nya ekohu bɔ nɛ Yesu kɛ e kaseli ɔmɛ na we hɛ mi nɛ a ye ní po. 21Benɛ e weku li nu he ɔ, a ho konɛ a ya nu lɛ, ejakaa nihi ngɛ dee ke, “E yi mi ngɛ puɛe!”

22 # Mat 9.34; 10.25 Mlaa tsɔli komɛ nɛ je Yerusalem kɛ ba a ngɛ dee ke, “Beelzebul ngɛ e mi. Mumi yayami ɔmɛ a tsɛ nɛ ɔ nɛ haa lɛ he wami nɛ e kɛ hiaa mumi yayami ɔ nɛ.”

23Lɔ ɔ he ɔ, Yesu tsɛ ni ɔmɛ kɛ ba e ngɔ, nɛ e de mɛ ngɛ abɛ gbi mi ke, “Kɛ Abosiami maa pee kɛ hia Abosiami kɛɛ? 24Ke ma ko mi bi gba ta ngɔ wo mɛ nitsɛmɛ a he ɔ, jamɛ a ma a be nyɛe maa da si. 25Ke we ko gba ta wo lɛ nitsɛ e he ɔ, jamɛ a we ɔ be si nyɛe maa da. 26Lɔ ɔ he ɔ, ke Abosiami gba ta ngɔ wo lɛ nitsɛ e he, nɛ e gba e mi ɔ, e be si nyɛe maa da, se mohu e nyagbe ji lɔ ɔ nɛ.

27“Nɔ ko be nyɛe maa ya katsɛ we mi ya ju, ja e fi lɛ kekle, lɔ ɔ loko e ma nyɛ maa ju e níhi.

28“I ngɛ nyɛ dee anɔkuale mi ke, a kɛ nimli a he yayamihi tsuo maa pa mɛ; a kɛ munyuhi nɛ a maa tu kɛ bɔ musu tsuo hu maa pa ja nɔuu. 29#Luk 12.10 Se nɔ nɛ bɔɔ musu kɛ siɔ Mumi Klɔuklɔu ɔ, a kɛ be lɛ pae gblegbleegble kɛ maa ya neneene; ejakaa e yeɔ fɔ kɛ yaa neneene.” 30(Yesu de enɛ ɔ, ejakaa ni komɛ ke, “Mumi yayami ngɛ e mi.”)

Yesu nyɛ kɛ e nyɛmimɛ

(Mateo 12.46-50; Luka 8.19-21)

31Jehanɛ Yesu nyɛmimɛ ɔmɛ kɛ e nyɛ ba lejɛ ɔ. A ba da si ngɛ tsu ɔ se nɛ a tsɔ ke a tsɛ lɛ ha mɛ. 32Nihi babauu nɛ kɛ Yesu hii si ɔ de lɛ ke, “Hyɛ, o nyɛ kɛ o nyɛmimɛ ɔmɛ daa si ngɛ tsu ɔ se ngɛ mo hlae.”

33Se Yesu he nɔ ke, “Mɛnɔ ji maa, nɛ mɛnɔmɛ ji ye nyɛmimɛ?” 34E hyɛ nihi nɛ hii si ngɛ e he ɔ a hɛ mi kɛ kpe, kɛkɛ nɛ e ke, “Maa, kɛ ye nyɛmimɛ ji nɛ ɔmɛ nɛ! 35Nɔ tsuaa nɔ nɛ peeɔ nɔ́ nɛ Mawu suɔ ɔ, lɛ nɔuu ji ye nyɛminyumu, ye nyɛmiyo, kɛ ye nyɛ.”

Currently Selected:

Marko 3: Dangme

Highlight

Copy