Marko 2

Yesu tsa nɔ ko nɛ hule pue si

(Mateo 9.1-8; Luka 5.17-26)

1Yesu kpale kɛ ba Kapernaum, nɛ pee se ɔ, a nu e he kaa e ba su we mi. 2Nihi babauu ba bua a he nya ngɛ lejɛ ɔ bɔ nɛ a nɛ́ blɔ ngɛ agbo ɔ nya tete. Benɛ Yesu ngɛ fiɛe ha mɛ ɔ, 3a ngɔ nɔ ko nɛ hule pue si, nɛ nihi eywiɛ tloo lɛ kɛ ba. 4Akɛnɛ ni ɔmɛ hiɛ tsɔ ngɛ lejɛ ɔ, a nɛ́ blɔ nɛ a kɛ su Yesu ngɔ. Lɔ ɔ he ɔ, a ya hia tsu ɔ nɛ Yesu ngɛ mi ɔ yi mi, ngɛ he nɛ e ngɛ ɔ tutuutu. A siu hiɔtsɛ ɔ kɛ sa a nɛ e hwɔɔ si ngɛ nɔ ɔ tsuo kɛ gu puɔ nɛ a gbu ɔ mi. 5Yesu na kaa ni ɔmɛ he lɛ ye saminya, lɔ ɔ he ɔ, e de hiɔtsɛ ɔ ke, “Ye bi, a ngɔ o he yayami ɔmɛ kɛ pa mo!”

6Se mlaa tsɔɔli ɔmɛ ekomɛ nɛ hii si ngɛ lejɛ ɔ susu ngɛ a yi mi ke, 7“Mɛni e ngɛ dee nɛ ɔ? E ngɛ musu bɔe. Nɔ ko be nyɛe nɛ e kɛ yayami maa pa, ja Mawu pɛ.”

8Yesu na ngɛ mumi mi kaa a ngɛ nɔ́ ɔ he susue, lɔ ɔ he ɔ, e bi mɛ ke, “Mɛni he je nyɛ ngɛ ní nɛ ɔmɛ susue ɔ? 9Te nɔ́ nɛ demi yee nɛɛ; kaa a ma de nɔ nɛ hule pue si ɔ ke, ‘A ngɔ o he yayami ɔmɛ kɛ pa mo,’ loo kaa a ma de ke, ‘Tee si nɛ o hluɛ o sa a nɛ o nyɛɛ?’ 10Ma tsɔɔ nyɛ jehanɛ ɔ kaa Nɔmlɔ Bi ɔ ngɛ he blɔ ngɛ zugba a nɔ kaa e kɛ yayami paa nɔ.” Lɔ ɔ he ɔ, e de hiɔtsɛ ɔ ke, 11“I ngɛ mo dee ke, tee si, hluɛ o sa a nɛ o ya we mi!”

12Ngɛ mɛ tsuo a hɛ mi ɔ, nyumu ɔ te si nɔuu; e ngɔ e sa a, nɛ e je kpo. Mɛ tsuo a nya kpɛ a he, nɛ a je Mawu yi ke, “Wa nɛ enɛ ɔ eko hyɛ!”

Yesu tsɛ Levi

(Mateo 9.9-13; Luka 5.27-32)

13Yesu kpale e se ekohu kɛ ho Galilea wo ɔ nya ya. Nihi babauu ba e ngɔ, nɛ e bɔni mɛ ní tsɔɔmi. 14Benɛ e yaa a, e na Alfeo bi Levi nɛ hii si ngɛ tó tsumi he ɔ. Yesu de lɛ ke, “Nyɛɛ ye se.” Kɛkɛ nɛ Levi te si pam nɛ e nyɛɛ e se.

Yesu kɛ yayami peeli ye ní

15Pee se ɔ, Yesu kɛ e kaseli ɔmɛ ya ye ní ngɛ Levi we ɔ mi. Tó tsuli, kɛ nihi babauu nɛ a buu mɛ yayami peeli nɛ nyɛɛ Yesu se hu piɛ e kɛ kaseli ɔmɛ a he kɛ ye ní ɔ. 16Mlaa tsɔɔli ɔmɛ ekomɛ nɛ ji Farisi bi ɔmɛ na nɛ Yesu kɛ kikɛmɛ a nimli nɛ ɔmɛ hii si ngɛ ní yee. Lɔ ɔ he ɔ, a bi e kaseli ɔmɛ ke, “Mɛni he je nɛ Nyɔmtsɛ ɔ kɛ nimli kaa kikɛ nɛ ɔ yeɔ ní ɔ?”

17Yesu nu, nɛ e ha mɛ heto ke, “Nihi nɛ ngɛ he wami ɔ, tsopatsɛ he hia we mɛ, se ni nɛmɛ nɛ ngɛ hiɔ nue ɔ mohu. I bɛ nɛ ma ba tsɛ nihi nɛ da, se mohu ni nɛmɛ nɛ peeɔ yayami a he i ba.”

Hwɔ hami

(Mateo 9.14-17; Luka 5.33-39)

18Ligbi ko ɔ, Yohane nɔ sɔlelɔ ɔ kaseli ɔmɛ, kɛ Farisi bi ɔmɛ ngɛ hwɔ hae. Ni komɛ ba Yesu ngɔ ba bi lɛ ke, “Mɛni he je nɛ Yohane kaseli ɔmɛ, kɛ Farisi bi ɔmɛ a kaseli ɔmɛ haa hwɔ, se o kaseli ɔmɛ lɛɛ a hɛ́ hwɔ ɔ?”

19Yesu he nɔ ke, “Ke nɔ ko kpee yo nɛ e huɛmɛ ba e he nyami ɔ, anɛ nyɛ susuɔ kaa e maa ha mɛ hwɔ be mi nɛ e kɛ mɛ ngɛ ɔ lo? Be abɔ nɛ ayɛflo huno ɔ kɛ mɛ ngɛ nɛ ɔ, a be hwɔ hae. 20Se be ma nɛ a maa ngɔ ayɛflo huno ɔ kɛ je a he; jamɛ a be ɔ mi loko a maa ha hwɔ.

21“Nɔ ko ngɔɛ bo nya he kɛ ta we tade momo mi. Ke e pee ja a, bo nya he ɔ ma hía tade momo ɔ, nɛ e ma ha pa a ma blii. 22Jehanɛ hu, nɔ ko ngɔɛ wai he ngɔ wui lohwe he womi tɔ momo mi. Ke e pee ja a, lɛɛ wai he ɔ ma pɛ lohwe he womi tɔ ɔ, nɛ wai ɔ ma pue si, nɛ lohwe he womi tɔ ɔ hu ma puɛ. Wai he ɔ, lohwe he womi tɔ he mi a kɛ woɔ!”

Hejɔɔmi ligbi ɔ

(Mateo 12.1-8; Luka 6.1-5)

23 # Mose V, 23.25 Hejɔɔmi ligbi ko ɔ, Yesu ya gu blɛfo ngmɔ komɛ a mi. E kaseli ɔmɛ kɛ lɛ nyɛɛ, nɛ a bɔni blɛfo ɔ kpɔmi. 24Lɔ ɔ he ɔ, Farisi bi ɔmɛ bi Yesu ke, “Hyɛ, mɛni he je o kaseli ɔmɛ ngɛ nɔ nɛ mlaa a ngmɛ́ blɔ pee Hejɔɔmi ligbi ɔ?”

25 # Sam I, 21.1-6 Yesu he nɔ ke, “Anɛ nyɛ kane we nɔ́ nɛ David pee benɛ hwɔ ye lɛ nɛ e nɛ́ nɔ́ ko nɛ e ye ɔ. Hwɔ ye e kɛ nihi nɛ kɛ lɛ nyɛɛ ɔ tsuo, 26#Mose III, 24.9 lɔ ɔ he ɔ, e ya Mawu we ɔ mi, nɛ e ya ye abolo klɛdɛɛ nɛ a kɛ maa Mawu hɛ mi ɔ. Enɛ ɔ ba mi benɛ Abiatar ngɛ osɔfo nɔkɔtɔma pe kulaa yee ɔ. Wa mlaa a nya a, osɔfo ɔmɛ pɛ lɛ a ngɛ he blɔ nɛ a yeɔ abolo nɛ ɔ, se David ye eko, nɛ e ha nihi nɛ kɛ lɛ nyɛɛ ɔ tete eko nɛ a ye.”

27Yesu gbe e munyu ɔ nya ke, “Nɔmlɔ he nɛ a pee Hejɔɔmi ligbi ɔ, se pi Hejɔɔmi ligbi ɔ he nɛ a bɔ nɔmlɔ. 28Lɔ ɔ he ɔ, Hejɔɔmi ligbi ɔ po e nyɔmtsɛ ji Nɔmlɔ Bi ɔ.”

Currently Selected:

Marko 2: Dangme

Highlight

Copy