Mateo 4

Abosiami ka Yesu

(Marko 1.12-13; Luka 4.1-13)

1 # Heb 2.18; 4.15 Jehanɛ ɔ, Mumi ɔ ngɔ Yesu kɛ ho nga a nɔ ya, konɛ Abosiami ya ka lɛ. 2Benɛ Yesu ha hwɔ nyɔ kɛ pia ligbi nyingmi eywiɛ se ɔ, hwɔ ye lɛ. 3Kɛkɛ nɛ Abosiami ba e ngɔ ba de lɛ ke, “Ke Mawu Bi ji mo ɔ, fa tɛ nɛ ɔmɛ nɛ a plɛ abolo.”

4 # Mose V, 8.3 Se Yesu he nɔ ke, “Ngmami ɔ ke, ‘Pi abolo kɛkɛ nɛ haa nɔmlɔ yi naa wami, se mohu munyu tsuaa munyu nɛ jee Mawu nya a.’ ”

5Jehanɛ ɔ, Abosiami ngɔ Yesu kɛ ya Yerusalem, ma klɔuklɔu ɔ mi, nɛ e kɛ lɛ ya da sɔlemi we ɔ yi mi ploplooplo, 6#La 91.11-12 nɛ e de lɛ ke, “Ke Mawu Bi ji mo ɔ, hlu kɛ ya ma zugba, ejakaa ngmami ɔ ke,

‘Mawu ma ha nɛ e bɔfo ɔmɛ maa bu o he.

A maa hɛɛ mo ngɛ a dɛ mi,

nɛ o nane tete po be tɛ sie.’ ”

7 # Mose V, 6.16 Yesu he nɔ ke, “Ngmami ɔ de ekohu ke, ‘Koo ka Nyɔmtsɛ, o Mawu ɔ.’ ”

8Jehanɛ lɛɛ Abosiami ngɔ Yesu kɛ ya yo gagaaga ko nɔ. E tsɔɔ Yesu matsɛ yemihi tsuo nɛ ngɛ je ɔ mi, kɛ bɔ nɛ a hɛ mi ngɛ nyami ha, 9nɛ e de Yesu ke, “Ke o kpla si nɛ o ja mi ɔ, ma ngɔ enɛ ɔmɛ tsuo kɛ ha mo.”

10 # Mose V, 6.13 Kɛkɛ nɛ Yesu de lɛ ke, “Satan, jee hiɛmɛ nɛ ɔ! Ngmami ɔ ke, ‘Ja Nyɔmtsɛ o Mawu ɔ, nɛ o sɔmɔ lɛ pɛ!’ ”

11Kɛkɛ nɛ Abosiami si lɛ, nɛ bɔfohi ba nɛ a ba sɔmɔ lɛ.

Yesu je e ní tsumi sisi ngɛ Galilea

(Marko 1.14-15; Luka 4.14-15)

12 # Mat 14.3; Mar 6.17; Luk 3.19-20 Benɛ Yesu nu kaa a nu Yohane ɔ, e pue nɔ kɛ ho Galilea ya. 13#Yoh 2.12 E je Nazaret kɛ ba hi Kapernaum, wo nya ma a nɛ ngɛ Zebulun kɛ Naftali kpokpa a nɔ ɔ. 14A pee enɛ ɔ, konɛ nɔ́ nɛ gbalɔ Yesaya de to ɔ nɛ ba mi ke,

15 # Yes 9.1-2 “Zebulun zugba, kɛ Naftali zugba

nɛ ngɛ wo nya blɔ

ngɛ Yordan pa a se!

Galilea, ma je li a zugba!

16Nihi nɛ hi diblii mi ɔ

ba na la nguaa.

Ni nɛmɛ nɛ hi gbenɔ zugba,

kɛ gbenɔ hɔ̃ mi ɔ,

la je ha mɛ.”

17 # Mat 3.2 Kɛ je jamɛ a be ɔ mi ɔ, Yesu bɔni fiɛmi ke, “Nyɛ tsake nyɛ tsui, ejakaa hiɔwe matsɛ yemi ɔ su si ta.”

Yesu tsɛ wo hɛli eywiɛ

(Marko 1.16-20; Luka 5.1-11)

18Benɛ Yesu ngɛ si kpae ngɛ Galilea wo ɔ nya a, e na nyɛmimɛ hɛli enyɔ nɛ a ngɛ ya fɔe ngɛ wo ɔ mi. Mɛ ji Simon, nɛ a tsɛɛ lɛ Petro hulɔ ɔ, kɛ Andrea. 19Yesu de mɛ ke, “Nyɛ ba nyɛɛ ye se, nɛ ma ha nyɛɛ maa hɛ nimli kaa a hɛɛ lo.” 20Amlɔ ɔ, a si a ya amɛ, nɛ a ba nyɛɛ e se.

21Benɛ Yesu je lejɛ ɔ, e na nyɛmimɛ enyɔ kpa komɛ ngɛ lɛ mi nɛ a kɛ a tsɛ Zebedeo ngɛ ya kpɛe, nɛ e tsɛ mɛ. Mɛ ji Yakobo kɛ Yohane. 22Amlɔ ɔ, mɛ hu a si a lɛ ɔ, kɛ a tsɛ ɔ, nɛ a ba nyɛɛ Yesu se.

Yesu tsɔɔ ní, e fiɛ, nɛ e tsa nihi

(Luka 6.17-19)

23 # Mat 9.35; Mar 1.39 Yesu kpa Galilea tsuo; e tsɔɔ ní ngɛ a kpe he ɔmɛ, nɛ e fiɛ matsɛ yemi ɔ he sane kpakpa a, nɛ e tsa hiɔhi tsuo nɛ ngɛ ni ɔmɛ a he. 24Yesu he sane gbɛ fĩa Siria zugba a tsuo nɔ; nɛ a ngɔ hiɔtsɛmɛ, kɛ nihi nɛ ngɛ haomi slɔɔtohi a mi kɛ ba e ngɔ, nɛ e tsa mɛ: kɔkɔtsɛmɛ, hulemi hiɔtsɛmɛ, kɛ nihi nɛ mumi yayamihi ngɛ a mi. 25Nihi babauu je Galilea, Ma Nyɔngma amɛ, Yerusalem, Yudea, kɛ mahi nɛ ngɛ Yordan pa a se ba nyɛɛ Yesu se.

Currently Selected:

Mateo 4: Dangme

Highlight

Copy