Mateo 5

Yoku nɔ fiɛmi

1Benɛ Yesu na ma kpekpemi ɔ, e kuɔ yoku ɔ, nɛ e ya hi si. E kaseli ɔmɛ ba e ngɔ, 2nɛ e bɔni mɛ ní tsɔɔmi ke,

Bua jɔmi nitsɛ

(Luka 6.20-23)

3“A gbaa nihi nɛ le kaa mumi mi ohiatsɛmɛ ji mɛ, ejakaa a nɔ́ ji hiɔwe matsɛ yemi ɔ nɛ.

4 # Yes 61.2 “A gbaa ni nɛmɛ nɛ yeɔ kɔmɔ, ejakaa Mawu maa jɔɔ a bua.

5 # La 37.11 “A gbaa ni nɛmɛ nɛ a he jɔ, ejakaa nɔ́ nɛ Mawu wo he si ɔ, a nine maa su nɔ.

6 # Yes 55.1-2 “A gbaa ni nɛmɛ nɛ hlaa kaa be tsuaa be ɔ, a pee nɔ́ nɛ da, ejakaa Mawu ma ha a ma na bua jɔmi babauu.

7“A gbaa ni nɛmɛ nɛ naa mɔbɔ, ejakaa a maa na mɛ mɔbɔ.

8 # La 24.3-4 “A gbaa ni nɛmɛ nɛ a tsui mi tsɔ, ejakaa a maa na Mawu.

9“A gbaa ni nɛmɛ nɛ kpataa pɛ, ejakaa a ma tsɛ mɛ Mawu bimɛ.

10 # Pet I, 3.14 “A gbaa ni nɛmɛ nɛ peeɔ nɔ́ nɛ da, nɛ a waa mɛ yi mi ngɛ lɔ ɔ he, ejakaa a nɔ́ ji hiɔwe matsɛ yemi ɔ nɛ.

11 # Pet I, 4.14 “A gbaa nyɛ, ke nihi jɛ nyɛ, nɛ a wa nyɛ yi mi, nɛ a tu munyu yaya slɔɔtohi kɛ si nyɛ ngɛ ye he. 12#Kron II, 36.16; Nits 7.52 Nyɛ nya, nɛ nyɛ na bua jɔmi, ejakaa nyɛ hiɔwo nɛ ngɛ hiɔwe ɔ kle agbo. Gbali nɛ sɛ nyɛ hlami ɔ, kikɛ nɛ ɔ nɔuu a wa mɛ yi mi.

Ngo, kɛ la

(Marko 9.50; Luka 14.34-35)

13“Nyɛ ngɛ kaa ngo kɛ ha je ɔ. Se ke ngo nya nyu gbo ɔ, mɛni a kɛ ma futu lɛ, nɛ e maa dooɔ ekohu? E he be se nami hu kaa ja a tsɛ̃ pue he, nɛ nimli naa nɔ.

14 # Yoh 8.12; 9.5 “Nyɛ ngɛ kaa la kɛ ha je ɔ. Ma nɛ a bɔ ngɛ yoku nɔ ɔ, e be nyɛe maa laa. 15#Mar 4.21; Luk 8.16; 11.33 Jehanɛ se hu, nɔ ko su we kane kɛ ma sowe sisi; mohu e kɛ maa kane tso nɔ, nɛ́ e tso ha nihi tsuo nɛ ngɛ we ɔ mi. 16#Pet I, 2.12 Nyɛ ha nyɛ la a nɛ tso ngɛ nimli a hɛ mi ja nɔuu, konɛ a na ní kpakpahi nɛ nyɛ ngɛ pee ɔ, nɛ a wo nyɛ Tsɛ nɛ ngɛ hiɔwe ɔ hɛ mi nyami.

Mlaa he ní tsɔɔmi

17“Nyɛ ko susu kaa i ba nɛ ma ba gu Mose mlaa a, kɛ níhi nɛ gbali ɔmɛ tsɔɔ ɔ. Dɛbi! I bɛ mɛ gumi; se mohu, i ba, konɛ ma ba tsɔɔ a sisi saminya. 18#Luk 16.17 Niinɛ, i ngɛ nyɛ dee ke, be abɔ nɛ hiɔwe kɛ zugba ngɛ nɛ ɔ, a be nɔ́ nyafii tslɛ po jee kɛ je mlaa a mi kɛ yaa si a maa gbe nɔ́ tsuaa nɔ́ nya. 19Lɔ ɔ he ɔ, nɔ tsua nɔ nɛ maa tɔ mlaa nɛ ɔmɛ a kpɛti nyafii kake, nɛ e maa tsɔɔ ni kpahi ke a pee ja a, a maa bu lɛ nɔmlɔ nyafii pe kulaa ngɛ hiɔwe matsɛ yemi ɔ mi. Se nɔ tsuaa nɔ nɛ yeɔ mlaa a nɔ, nɛ e tsɔɔ ni kpahi hu ke a pee ja a, a maa bu lɛ nɔmlɔ nguaa ngɛ hiɔwe matsɛ yemi ɔ mi. 20I ngɛ nyɛ dee ke loko nyɛ maa sɛ hiɔwe matsɛ yemi ɔ mi ɔ, ja nyɛ ye anɔkuale ngɛ nɔ́ nɛ Mawu ngɛ hlae nɛ nyɛɛ pee ɔ mi pe mlaa tsɔɔli ɔmɛ, kɛ Farisi bi ɔmɛ.

Ní tsɔɔmi nɛ kɔɔ mi mi fumi he

21 # Mose II, 20.13; Mose V, 5.17 “Tse nyɛ nu kaa a de blematsɛmɛ ɔmɛ ke, ‘Koo gbe nɔmlɔ; se nɔ tsuaa nɔ nɛ maa gbe nɔmlɔ ɔ, a kojo lɛ.’ 22Se imi lɛɛ i ngɛ nyɛ dee ke nɔ tsuaa nɔ nɛ mi mi fuɔ e nyɛmi#5.22 Ngmami komɛ deɔ ke “nɔ tsuaa nɔ nɛ mi mi fuɔ e nyɛmi yaka a.” ɔ, a maa kojo lɛ. Nɔ tsuaa nɔ nɛ jɛɔ e nyɛmi ke, ‘Yaka nɔmlɔ’ ɔ, a kɛ lɛ maa ba kpe ngua a hɛ mi; nɔ tsuaa nɔ nɛ jɛɔ e nyɛmi ke, ‘Kuasia’ a, e maa ya Abosiami a je la a mi. 23Lɔ ɔ he ɔ, ke o kɛ o nike ní ba bɔ sami la tɛ ɔ hɛ mi, nɛ o kai ngɛ lejɛ ɔ kaa o nyɛmi kɛ mo ngɛ sane ko ɔ, 24si o nike ní ɔ ngɛ lejɛ ɔ, ngɛ bɔ sami la tɛ ɔ hɛ mi. Yaa esɔ, nɛ o kɛ o nyɛmi ɔ ya kpata lolo, konɛ o kpale kɛ ba nɛ o kɛ o nike ní ɔ ba ha Mawu.

25“Ke nɔ ko sama mo, nɛ nyɛ ngɛ blɔ ɔ nɔ kɛ yaa kojomi he ɔ, o kɛ lɛ nɛ tsa mla. Ke pi ja a, o pɛbilɔ ɔ maa ngɔ mo ya wo kojolɔ ɔ dɛ mi; kojolɔ hu maa ngɔ mo ya wo tsɔlɔ ɔ dɛ mi, nɛ a maa wo mo tsu. 26Niinɛ, i ngɛ mo dee ke o be lejɛ ɔ jee kɛ yaa si o maa wo hiɔ nɛ o ye ɔ sisiisi.

Ní tsɔɔmi nɛ kɔɔ gba puɛmi he

27 # Mose II, 20.14; Mose V, 5.18 “Tse nyɛ nu kaa a de blematsɛmɛ ɔmɛ ke, ‘Ko puɛ gba!’ 28Se imi lɛɛ i ngɛ nyɛ dee ke nɔ tsuaa nɔ nɛ hyɛɛ yo, nɛ e he peeɔ lɛ akɔnɔ ɔ, e kɛ lɛ puɛ gba momo ngɛ e tsui mi. 29#Mat 18.9; Mar 9.47 Ke o hiɔ nɔ hɛngmɛ haa nɛ o peeɔ yayami ɔ, hiaa nɛ o sake ngɔ fɔ he. E hi ha mo kaa o nɔmlɔ tso ɔ he nɔ́ ko maa laa pe nɔ́ nɛ a ma sake o nɔmlɔ tso ɔ tsuo ngɔ fɔ Abosiami a je la a mi. 30#Mat 18.8; Mar 9.43 Jã kɛ̃, ke o hiɔ nine haa nɛ o peeɔ yayami ɔ, poo nɛ o sake ngɔ fɔ he. E hi ha mo kaa o nɔmlɔ tso ɔ he nɔ́ ko maa laa pe nɔ́ nɛ a ma sake o nɔmlɔ tso ɔ tsuo ngɔ fɔ Abosiami a je la a mi.

Ní tsɔɔmi nɛ kɔɔ gba mi pomi he

(Mateo 19.9; Marko 10.11-12; Luka 16.18)

31 # Mose V, 24.1-4; Mat 19.7; Mar 10.4 “A de hulɔ ke, ‘Ke nɔ ko maa fie e yo ɔ, e ha lɛ fiemi womi.’ 32#Mat 19.9; Mar 10.11-12; Luk 16.18; Kor I, 7.10-11 Se imi lɛɛ i ngɛ nyɛ dee ke, ke nɔ ko fie e yo nɛ pi kaa yo ɔ ya bɔ ajuama a, e ha nɛ yo ɔ puɛ gba. Ke nɔ ko fie e yo ɔ, nɔ kpa nɛ ya ngɔ yo nɛ ɔ, lɛ hu e puɛ gba.

Ní tsɔɔmi nɛ kɔɔ kita kami he

33 # Mose III, 19.12; Mose IV, 30.2; Mose V, 23.21 “Tse nyɛ nu hulɔ kaa a de blematsɛmɛ ɔmɛ ke, ‘Ko ka kita yaka gu, se o ye si nɛ o wo Nyɔmtsɛ ɔ nɔ.’ 34#Yak 5.12; Yes 66.1; Mat 23.22 Se imi lɛɛ i ngɛ nyɛ dee ke nyɛ ko ka kita kulaa! Nyɛ ko ka hiɔwe, ejakaa Mawu matsɛ sɛ ji lɔ ɔ nɛ; 35#Yes 66.1; La 48.2 nyɛ ko ka zugba, ejakaa nɔ́ nɛ Mawu kɛ e nane maa nɔ ji lɔ ɔ nɛ; loo Yerusalem, ejakaa Matsɛ ngua a ma ji lɔ ɔ nɛ. 36Ko ka o yi tete, ejakaa o be nyɛe maa pee yi bwɔmi ngmelu kake po ehiɔ loo eyumu. 37Ke nɔ́ ɔ ngɛ mi ɔ, nɔ́ nɛ kɛkɛ nɛ o ma de ji, ‘Ee’; ke e be mi ɔ, de ke, ‘Dɛbi’. Ke nɔ́ kpa ko piɛ he ɔ lɛɛ Abosiami dɛ mi e je.

Ní tsɔɔmi nɛ kɔɔ peemi kɛ to nane mi he

(Luka 6.29-30)

38 # Mose II, 21.24; Mose III, 24.20; Mose V, 19.21 “Tse nyɛ nu nɛ a de ke, ‘A pɛ hɛngmɛ ngɛ hɛngmɛ nane mi, nɛ a ku lungu ngɛ lungu nane mi.’ 39Se imi lɛɛ i ngɛ nyɛ dee ke ke nɔ ko pee nyɛ yayami ɔ, nyɛ ko pee lɛ yayami ngɔ to nane mi. Ke nɔ ko gba o hiɔ ɔ nɔ tue mi ɔ, plɛ kake ɔ hu ha lɛ. 40Ke nɔ ko ya sama mo ngɛ o hiɔwe tade he ɔ, ha nɛ e ngɔ o tade klɔii ɔ hulɔ. 41Nɛ ke nɔ ko nyɛ o nɔ ke o kɛ lɛ nɛ ya si tomi kake ɔ, o kɛ lɛ nɛ ya si tomi enyɔ. 42Ke nɔ ko ba mo nɔ́ ɔ, ha lɛ; ke nɔ ko ke o pa lɛ nɔ́ ko ɔ, ko kua.

Suɔ o he nyɛli

(Luka 6.27-28, 32-36)

43 # Mose III, 19.18 “Tse nyɛ nu nɛ a de ke, ‘Suɔ o huɛ, nɛ o nyɛ o he nyɛlɔ.’ 44Se imi lɛɛ i ngɛ nyɛ dee ke nyɛɛ suɔ nyɛ he nyɛli, nɛ nyɛɛ sɔle ha nihi nɛ waa nyɛ yi mi, 45konɛ nyɛɛ pee nyɛ Tsɛ nɛ ngɛ hiɔwe ɔ bimɛ. Ejakaa e haa e pu ɔ jee ngɛ nimli yayamihi, kɛ nimli kpakpahi a nɔ; nɛ e haa hiɔmi nɛɛ ha nihi nɛ peeɔ nɔ́ nɛ da, kɛ nihi nɛ peeɔ nɔ nɛ dɛ tsuo. 46Ke nyɛ suɔ ni nɛmɛ nɛ suɔ nyɛ ɔ pɛ ɔ, mɛni hiɔwo pa ngɛ ha nyɛ? Anɛ tó tsuli ɔmɛ tete pee we ja nɔuu lo? 47Nɛ ke nyɛ ngaa nyɛ huɛmɛ ɔmɛ kɛkɛ ɔ, mɛni tsɔ lɛ nyɛ ngɛ pee pe ni kpahi? Anɛ ma je li ɔmɛ tete pee we ja nɔuu lo? 48#Mose III, 19.2; Mose V, 18.13 Lɔ ɔ he ɔ, nyɛɛ hi kɛ pi si kaa bɔ nɛ nyɛ Tsɛ nɛ ngɛ hiɔwe ɔ hi kɛ pi si ɔ!

Currently Selected:

Mateo 5: Dangme

Highlight

Copy