Mateo 23

Yesu ka mlaa tsɔɔli ɔmɛ, kɛ Farisi bi ɔmɛ a hɛ mi

(Marko 12.38-39; Luka 11.43, 46; 20.45-46)

1Enɛ ɔ se ɔ, Yesu kɛ nimli kpekpemi ɔ, kɛ e kaseli ɔmɛ tu munyu. E de mɛ ke, 2“Mlaa tsɔɔli ɔmɛ, kɛ Farisi bi ɔmɛ ji nihi nɛ a ngɔ he wami ngɔ wo a dɛ, konɛ a tsɔɔ Mose mlaa a sisi saminya. 3Lɔ ɔ he ɔ, nɔ́ tsuaa nɔ́ nɛ a de nyɛ ke nyɛɛ pee ɔ, nyɛɛ bu mɛ tue nɛ nyɛɛ pee. Se a ní peemi níhi lɛɛ nyɛ ko pee; ejakaa slo nɔ́ nɛ a peeɔ ngɛ nɔ́ nɛ a deɔ he. 4A boɔ tlomi nɛ jiɔ, nɛ e tloomi wa kɛ pueɔ nihi a konɔ; se mɛ nitsɛmɛ lɛɛ a nine nguɛ kake tete po sɛ tlomi ɔ he. 5#Mat 6.1; Mose IV, 15.38; Mose V, 6.8 Ke a ngɛ nɔ́ ko pee ɔ, kikɛ nɛ ɔ a hɛ ngɛ si poe nɛ a ngɛ hyɛe kaa nihi maa na mɛ lo. Lohwe he womihi nɛ a ngma Mawu munyu ngɛ a nɔ nɛ a fiɔ ngɛ a hɛ nya, kɛ a nine he ɔ, hyɛ bɔ nɛ a bli gbabagbabaa ha! Dekehi hu nɛ ngɛ a tade klɔii ɔmɛ a nya a, hyɛ bɔ nɛ lɔ ɔmɛ hu ka gagaaga ha! 6A suɔ okplɔɔ yi himi ngɛ ní yemi he, kɛ nikɔtɔmahi a sihi hehi ngɛ kpe he ɔmɛ; 7a suɔ nɛ a kɛ bumi nɛ nga mɛ ngɛ jua nɔ, nɛ a tsɛ mɛ ke, ‘Tsɔɔlɔ!’ 8Nyɛɛ lɛɛ, a ko tsɛ nyɛ ‘Tsɔɔlɔ’, ejakaa nyɛ tsuo pɛpɛɛpɛ nyɛmimɛ ji nyɛ, nɛ tsɔɔlɔ kake pɛ nyɛ ngɛ. 9Nyɛ ko tsɛ nɔ ko nɔ ko ngɛ zugba a nɔ ‘Tsɛ’, ejakaa Tsɛ kake pɛ nyɛ ngɛ nɛ ngɛ hiɔwe. 10Jehanɛ, a ko tsɛ nyɛ ti nɔ ko ‘Tsɔɔlɔ’ hulɔ; ejakaa tsɔɔlɔ kake pɛ nyɛ ngɛ, nɛ lɛ ji Kristo. 11#Mat 20.26-27; Mar 9.35; 10.43-44; Luk 22.26 Nɔ nɛ ji nɔmlɔ nguaa ngɛ nyɛ kpɛti ɔ, e plɛ nyɛ sɔmɔlɔ. 12#Luk 14.11; 18.14 Nɔ tsuaa nɔ nɛ woɔ e he nɔ ɔ, a maa ba lɛ si; se nɔ nɛ baa e he si ɔ, a ma wo e nɔ.

Yesu gbe a we osato peemi ɔ he guɛ

(Marko 12.40; Luka 11.39-42, 44, 52; 20.47)

13“Nyɛ mlaa tsɔɔli, kɛ Farisi bi, musu tloo nyɛ! Osatotsɛmɛ! Nyɛ ngaa hiɔwe matsɛ yemi ɔ nya ngɔ woɔ nihi, se nyɛ nitsɛmɛ lɛɛ nyɛ sɛ́ mi. Ni nɛmɛ nɛ a hlaa kaa a maa sɛ mi ɔ hu nyɛ ngmɛ́ mɛ blɔ! [ 14Nyɛ mlaa tsɔɔli, kɛ Farisi bi, musu tloo nyɛ! Osatotsɛmɛ! Nyɛ kpɔɔ yalɔyihi a wehi ngɛ a dɛ. Kɛkɛ ɔ, nyɛ ya peeɔ sɔlemi gagaaga! Enɛ ɔ he ɔ, nyɛ tue gblami ɔ maa pee gbeye.]

15“Nyɛ mlaa tsɔɔli, kɛ Farisi bi, musu tloo nyɛ! Osatotsɛmɛ! Nyɛ kuɔɔ wo, nɛ nyɛ kpaa zugbahi a nɔ kaa nyɛ maa na nɔ kake pɛ nɛ tsake pee Yuda no lo. Ke nyɛ na nɔ ko kaa ja a, nyɛ peeɔ lɛ nɔ nɛ sa Abosiami a je la a mi yami si enyɔ nɛ bla mohu pe nyɛ nitsɛmɛ po!

16“Nyɛ blɔ tsɔɔli hɛ yuyuili, musu tloo nyɛ! Nyɛ deɔ ke, ‘Ke nɔ ko kɛ sɔlemi we ɔ ka kita a, lɔ ɔ pi nɔ́ ko kulaa. Se ke e kɛ sɔlemi we ɔ sika tsu ka kita nɛ e yi nɔ ɔ, lɔ ɔ lɛɛ musu tloo lɛ.’ 17Hɛ yuyuili kuasiahi! Te nɔ́ nɛ he jua wa nɛɛ? Sika tsu ɔ, aloo sɔlemi we ɔ nɛ haa sika tsu ɔ peeɔ klɔuklɔu ɔ? 18Jehanɛ ɔ hu, nyɛ deɔ ke, ‘Ke nɔ ko kɛ bɔ sami la tɛ ɔ ka kita a, lɔ ɔ pi nɔ́ ko kulaa. Se ke e kɛ nike ní nɛ fɔɔ si ngɛ bɔ sami la tɛ ɔ nɔ ɔ ka kita nɛ e yi nɔ ɔ, lɔ ɔ lɛɛ musu tloo lɛ.’ 19Hɛ yuyuili! Te nɔ́ nɛ he jua wa nɛɛ? Nike ní ɔ, aloo bɔ sami la tɛ ɔ nɛ haa nike ní ɔ peeɔ klɔuklɔu ɔ? 20Lɔ ɔ he ɔ, ke nɔ ko kɛ bɔ sami la tɛ ɔ ka kita a, blɔɔ bɔ sami la tɛ ɔ, kɛ nɔ́ tsuaa nɔ́ nɛ fɔɔ si ngɛ nɔ ɔ e kɛ ka kita a nɛ. 21Jã kɛ̃, ke nɔ ko kɛ sɔlemi we ɔ ka kita a, blɔɔ sɔlemi we ɔ, kɛ Mawu nɛ hii lejɛ ɔ e kɛ ka kita a nɛ. 22#Yes 66.1; Mat 5.34 Ke nɔ ko kɛ hiɔwe ka kita a, blɔɔ Mawu sɛ ɔ, kɛ nɔ nɛ hii si ngɛ nɔ ɔ e kɛ ka kita a nɛ.

23 # Mose III, 27.30 “Nyɛ mlaa tsɔɔli kɛ Farisi bi! Musu tloo nyɛ! Osatotsɛmɛ! Nyɛ haa Mawu kowɛ, kɛ anisi, kɛ kumino mi dlami nyɔngmanyɔngma mi kakaaka, se níhi nɛ mlaa a tsɔɔ kaa a he hia, níhi kaa dami sane yemi, mɔbɔ nami, kɛ anɔkuale yemi ɔ, lɔ ɔmɛ lɛɛ nyɛ siɔ. Jinɛ e sa kaa nyɛɛ pee enɛ ɔmɛ, nɛ nyɛ ko si ekpa amɛ hulɔ. 24Blɔ tsɔɔli hɛ yuyuili! Ke anunu nɔ dã mi ɔ, nyɛ tsleɔ pueɔ he, se nyɛ mii afukpɔngɔ!

25“Nyɛ mlaa tsɔɔli, kɛ Farisi bi! Musu tloo nyɛ! Osatotsɛmɛ! Nyɛ fɔɔ kplu kɛ kã he, se ojo, kɛ adufude níhi hyi mɛ tɔ. 26Farisi bi hɛ yuyuili! Nyɛ fɔ kplu ɔ, kɛ kã a a mi kekle, kɛkɛ ɔ a he hu ma tsɔ!

27 # Nits 23.3 “Nyɛ mlaa tsɔɔli, kɛ Farisi bi! Musu tloo nyɛ! Osatotsɛmɛ! Nyɛ ngɛ kaa yɔkɔhi nɛ a sa a he nɛ a he pee fɛu, se a mi hyi tɔ kɛ ni gbogboehi a wuhi, kɛ ní sasɛhi. 28Kikɛ nɛ ɔ pɛ nyɛ hu nyɛ ngɛ; nihi naa nyɛ kaa nimli kpakpahi, se osato, kɛ yayami hyi nyɛ mi mi tɔ.

Yesu de ke a maa gbla Farisi bi ɔmɛ a tue

(Luka 11.47-51)

29“Nyɛ mlaa tsɔɔli, kɛ Farisi bi! Musu tloo nyɛ! Osatotsɛmɛ! Nyɛ fiaa yɔkɔhi kɛ haa gbali ɔmɛ. Nyɛ dlaa dali ɔmɛ a yɔkɔ ɔmɛ a he saminyawiiwi, 30nɛ nyɛ deɔ ke, ‘Wa nɛmɛ ɔmɛ a yi nɔ ɔ, wa ngɛ je mi jinɛ wa ko piɛ we a he kɛ pue gbali ɔmɛ a muɔ si.’ 31Enɛ ɔ tsɔɔ kaa nyɛ nitsɛmɛ nyɛ ngɛ odase yee kaa nihi nɛ gbe gbali ɔmɛ a nina ji nyɛ. 32Lɔ ɔ he ɔ, nyɛɛ ya nɔ! Ní tsumi nɛ nyɛ nɛmɛ ɔmɛ je sisi ɔ, nyɛ tsu kɛ gbe nya! 33#Mat 3.7; 12.34; Luk 3.7 Sinɔhi kɛ sinɔhi a nina! Nyɛ tue nɛ a maa gbla ngɛ Abosiami a je la a mi ɔ, kɛ nyɛ maa pee kɛ tu fo ngɛ nya kɛɛ? 34Lɔ ɔ he ɔ, ma tsɔ gbali, kɛ ní leli, kɛ tsɔɔli kɛ ba nyɛ ngɔ. Nyɛ maa gbe a ti ni komɛ, nɛ nyɛ maa sɛu ni komɛ; ni komɛ lɛɛ nyɛ maa fia mɛ kpa ngɛ nyɛ kpe he ɔmɛ, nɛ nyɛ maa wa mɛ yi mi, nɛ nyɛ maa fie mɛ kɛ je ma kake mi kɛ ya ma kake mi. 35#Mose I, 4.8; Kron II, 24.20-21 Kɛkɛ ɔ, nimli kpakpahi tsuo nɛ a pue a muɔ si ngɛ je nɛ ɔ mi, kɛ maa je Habel nɛ a pue e muɔ si yaka gu ɔ nɔ kɛ yaa su Barakia binyumu Zakaria nɛ nyɛ gbe lɛ ngɛ sɔlemi we ɔ, kɛ bɔ sami la tɛ ɔ a kpɛti ɔ nɔ ɔ a he ɔ, a maa gbla nyɛ tue. 36Niinɛ, i ngɛ nyɛ dee ke, tue gblami nɛ ɔ maa ba yi nɔ bi nɛ ɔmɛ tsuo a nɔ!

Suɔmi nɛ Yesu ngɛ kɛ ha Yerusalem

(Luka 13.34-35)

37“Yerusalem! Yerusalem! Mo nɛ o gbee gbali ɔmɛ, nɛ nihi nɛ Mawu tsɔ mɛ o ngɔ ɔ, o fiaa mɛ tɛ! Hyɛ kaa jinɛ i hla si abɔ kaa ma bua o bimɛ ɔmɛ tsuo a nya kaa bɔ nɛ kungwɔ buaa e bimɛ a nya kɛ woɔ e pɛli sisi ɔ. Se o kplɛɛ we! 38#Yer 22.5 Lɔ ɔ he ɔ, a maa je o sɔlemi we ɔ he, nɛ e maa fɔ si gu. 39#La 118.26 I ngɛ mo dee ke, kɛ je be nɛ ɔ mi kɛ yaa a, o be mi nae hu kɛ yaa si be nɛ o ma de ke, ‘A gbaa nɔ nɛ ma ngɛ Nyɔmtsɛ ɔ biɛ mi ɔ.’ ”

Currently Selected:

Mateo 23: Dangme

Highlight

Copy