Mateo 24

Yesu de ke be ma nɛ a maa ku sɔlemi we ɔ pue si

(Marko 13.1-2; Luka 21.5-6)

1Benɛ Yesu je sɔlemi we ɔ mi kɛ yaa a, e kaseli ɔmɛ ba e ngɔ, nɛ a kɛ a nine tsɔɔ lɛ tsuhi nɛ ngɛ sɔlemi we ɔ he. 2Se Yesu de mɛ ke, “Tse nyɛ ngɛ ní nɛ ɔmɛ tsuo hyɛe? Niinɛ, i ngɛ nyɛ dee ke, a maa ku tsu nɛ ɔmɛ tsuo pue si nɛ a be tɛ kake po sie ngɛ eko nɔ.”

Haomi kɛ yi mi wami

(Marko 13.3-13; Luka 21.7-19)

3Benɛ Yesu hii si ngɛ Oliv yo ɔ yi mi ɔ, e kaseli ɔmɛ ba e ngɔ ngɛ laami mi ba bi lɛ ke, “Mɛni be ní nɛ ɔmɛ tsuo maa ba mi? Mɛni okadi maa tsɔɔ o bami be, kɛ je nɛ ɔ nyagbe be?”

4Yesu he nɔ nɛ e de mɛ ke, “Nyɛɛ hyɛ nɛ hi, konɛ nɔ ko kó ba mlɔɔ nyɛ. 5Ejakaa nihi fuu maa ba, nɛ a ma ba tu munyu ngɛ ye biɛ mi ke, ‘Imi ji Kristo ɔ nɛ!’ nɛ a maa mlɔɔ nihi babauu. 6Nyɛ maa nu tahi a he, kɛ akeake hu nɛ ngɛ pɛe ngɛ tahi a he. Se nyɛ tsui ko po. Ja ní nɛ ɔmɛ tsuo ba mi; se kɛ̃, lɔ ɔ tsɔɔ we kaa nyagbe ɔ su ta. 7Ma maa te si ngɔ wo ma, nɛ matsɛ yemi maa te si ngɔ wo matsɛ yemi. Hwɔ nɛ nya wa maa ba, nɛ zugba ma mimiɛ ngɛ he tsuaa he. 8Se enɛ ɔmɛ tsuo ngɛ kaa kɔɔmi sisije kɛkɛ.

9 # Mat 10.22 “Jamɛ a be ɔ mi ɔ, a maa nuu nyɛ; nɛ a maa ngɔ nyɛ ngɔ ha nɛ a wa nyɛ yi mi nɛ a gbe nyɛ. Nɛ ye he ɔ, je ma amɛ tsuo maa nyɛ nyɛ. 10Jamɛ a be ɔ mi ɔ, nihi babauu a nane ma kpata; huɛmɛ maa tsɔɔ huɛmɛ a se blɔ, nɛ a maa nyɛ a he. 11Lakpa gbali babauu maa te si, nɛ a maa mlɔɔ nihi fuu. 12Yayami maa pɔ he ngɛ zugba a nɔ tsuo, nɛ nɔ́ nɛ ɔ ma ha nihi fuu a nine mi maa je wu. 13#10.22 Se ni nɛmɛ nɛ maa da haomi nɛ ɔmɛ a nya kɛ yaa su nyagbe ɔ, mɛɛ lɛɛ a ma he a yi wami. 14Nɛ sane kpakpa nɛ ɔ nɛ kɔɔ matsɛ yemi ɔ he ɔ, a maa fiɛ kɛ kpa je ɔ mi tsuo, bɔ nɛ pee nɛ je ma amɛ tsuo nɛ a nu; nɛ lɔ ɔ se loko nyagbe ɔ maa ba.

Ní hiemi nɔ́ nguaa a

(Marko 13.14-23; Luka 21.20-24)

15 # Dan 9.27; 11.31; 12.11 “Nyɛ maa na ‘Ni hiemi nɔ́ ngua a’ nɛ gbalɔ Daniel tu he munyu ɔ nɛ maa si ngɛ he klɔuklɔu ɔ. (Ni kanelɔ ɔ nɛ kɔ se!) 16Kɛkɛ ɔ, ni nɛmɛ nɛ ngɛ Yudea a, a tu fo kɛ ya yo ɔmɛ a nɔ. 17#Luk 17.31 Nɔ nɛ ngɛ tsu yi mi ɔ, e ko kple si ya ngɔ e níhi ngɛ we ɔ mi. 18Nyumu nɛ ngɛ ngmɔ si ɔ, e ko kpale ya ngɔ e tade. 19Jamɛ a be ɔ, yihi nɛ maa hɛɛ hɔ, kɛ ni nɛmɛ nɛ maa hi bi nyɔ hae ɔ, due ha mɛ! 20Nyɛɛ fa kue ha Mawu nɛ e ko ba mi kaa nyɛ maa tu fo fĩɛ be mi, aloo ngɛ Hejɔɔmi ligbi nɔ! 21#Dan 12.1; Kpoj 7.14 Ejakaa jamɛ a be ɔ, haomi nguaa maa ba nɛ a nɛ eko hyɛ kɛ je be nɛ a bɔ je ɔ kɛ ba si mwɔnɛ ligbi nɛ ɔ. Lɔ ɔ se hu, nɔ́ ko kaa ja be bae gblegbleegble. 22Se Mawu po ligbi ɔmɛ a nɔ kpiti momo; kaa e pee we jã jinɛ adesa ko adesa ko yi be wami nae. Mawu bimɛ ɔmɛ nɛ e hla a a he je ɔ, a maa po jamɛ a ligbi ɔmɛ a nɔ kpiti.

23“Jamɛ a be ɔ mi ɔ, ke nɔ ko de nyɛ ke, ‘Hyɛ, Kristo ɔ ngɛ hiɛ ɔ’, aloo, ‘E ngɛ lejɛ’ ɔ, nyɛ ko he ye. 24Ejakaa lakpa kristohi, kɛ lakpa gbali maa te si. A maa pee okadi nguahi, kɛ nyakpɛ níhi kɛ mlɔɔ nihi nɛ Mawu hla a tete. 25Hyɛ, i ngɛ nyɛ enɛ ɔ dee loko be ɔ nɛ su.

26 # Luk 17.23-24 “Aloo ke nihi ma de nyɛ ke, ‘Hyɛ, e ngɛ nga a nɔ’ ɔ, nyɛ ko ya lejɛ ɔ; ke a de nyɛ ke, ‘E ngɛ se tsu ɔ mi’ ɔ, nyɛ ko he ye. 27Ejakaa Nɔmlɔ Bi ɔ maa ba tlukaa kaa bɔ nɛ oslabai gbaa kɛ jeɔ beleku kɛ yaa bonyoku ɔ.

28 # Luk 17.37 “He tsuaa he nɛ gbogboe fɔɔ si ngɛ ɔ, lejɛ ɔ okpokuhi ma bua a he nya ngɛ.

Nɔmlɔ Bi ɔ bami

(Marko 13.24-27; Luka 21.25-28)

29 # Yes 13.10; 34.4; Ezek 32.7; Yoel 2.10, 31; 3.15; Kpoj 6.12-13 “Haomi nɛ maa ba jamɛ a be ɔ, ke e se po pɛ pu maa tsɔ diblii, nɛ nyɔhiɔ be kpɛe hu. Dodoehi ma tsɔ kɛ je hiɔwe ba fia si, nɛ a maa fie he wamihi nɛ bɔle je ɔ kɛ je a blɔ hehi. 30#Dan 7.13; Zak 12.10-14; Kpoj 1.7 Kɛkɛ ɔ, Nɔmlɔ Bi ɔ we okadi ɔ maa je kpo ngɛ hiɔwe. Zugba a nɔ wɛtso ɔmɛ tsuo maa na Nɔmlɔ Bi ɔ nɛ ma ngɛ hiɔwe bɔku ɔmɛ a mi kɛ he wami, kɛ hɛ mi nyami babauu. Nɛ mɛ tsuo pɛpɛɛpɛ a maa wo yana. 31Titimati nguaa a maa pɛ, nɛ Nɔmlɔ Bi ɔ maa tsɔ e bɔfo ɔmɛ kɛ ya je ɔ kɔ nya eywiɛ ɔmɛ. A ma ya bua nihi nɛ e hla a a nya kɛ maa je he kake kɛ maa ya he kake.

Ngmɔkɔ tso ɔ he ní kasemi

(Marko 13.28-31; Luka 21.29-33)

32“Nyɛɛ hyɛ ngmɔkɔ tso ɔ, nɛ nyɛɛ kase ní. Ke ngmɔkɔ tso kɔnihi plɔke, nɛ a bɔni ba tsɛ̃mi pɛ nyɛ le kaa latsa be ɔ su ta. 33Jã nɔuu, ke nyɛ hu nyɛ na ní nɛ ɔmɛ tsuo ɔ, nyɛɛ le kaa Nɔmlɔ Bi ɔ su si ta; e ngɛ agbo ɔ nya haa kɛ ma. 34Niinɛ, i ngɛ nyɛ dee ke, kikɛmɛ a yi nɔ nɛ ɔ be bee, ja ní nɛ ɔmɛ tsuo ba mi lolo. 35Hiɔwe kɛ zugba maa be kɛ ho, se ye munyu ɔmɛ lɛɛ a be bee kɛ ho gblegbleegble.

Ligbi ɔ, kɛ ngmlɛfia a, nɔ ko li

(Marko 13.32-37; Luka 17.26-30, 34-36)

36“Se jamɛ a ligbi ɔ, kɛ jamɛ a ngmlɛfia a, nɔ ko nɔ ko li. Hiɔwe bɔfo ɔmɛ li ɔ, Bi ɔ tete li; Tsɛ ɔ nɔ kake too lɛ le. 37#Mose I, 6.5-8 Nɔmlɔ Bi ɔ maa ba tlukaa kaa nɔ́ nɛ ba ngɛ Noa be ɔ mi ɔ. 38Be mi nɛ nyu kpekpemi ɔ ma ba ha zugba a hɛ mi ɔ, nihi ngɛ ngma yee, nɛ a ngɛ ní nue; nyumuhi ngɛ yihi ngɔe, nɛ yihi hu ngɛ gbae hluu kɛ ya su ligbi ɔ nɛ Noa ya sɛ lɛ ɔ mi. 39#Mose I, 7.6-24 Jamɛ a be ɔ mi tsuo ɔ, a li nɔ́ nɛ ngɛ nɔ yae kɛ ya si nyu kpekpemi ɔ ba muɔ mɛ tsuo kɛ ho. Ligbi ɔ nɛ Nɔmlɔ Bi ɔ maa ba a, kikɛ nɛ ɔ nɔuu níhi maa ya nɔ. 40Jamɛ a be ɔ mi ɔ, nyumuhi enyɔ maa hi ní tsue ngɛ ngmɔ si, nɛ a ma ba ngɔ nɔ kake, nɛ a ma si nɔ kake. 41Yihi enyɔ maa hi wɛɛe ngɛ wɛ nɔ; a ma ba ngɔ nɔ kake, nɛ a ma si nɔ kake.

42“Lɔ ɔ he ɔ, nyɛ hɛ nɛ hi nyɛ he nɔ; ejakaa nyɛ li ligbi ɔ nɛ nyɛ Nyɔmtsɛ ɔ ma. 43#Luk 12.39-40 Nyɛ ná nyɛɛ le kaa ke wetsɛ ko le nyɔ mi be tutuutu nɛ julɔ maa ba e we mi ɔ, e ko huɔ, nɛ e ko ngmɛ́ blɔ nɛ julɔ ɔ ba ju lɛ. 44Lɔ ɔ he ɔ, nyɛ hu nyɛ dla nyɛ he kɛ to; ejakaa Nɔmlɔ Bi ɔ maa ba tlukaa be mi nɛ nyɛ hɛ be nɔ.

Tsɔlɔ kpakpa a, kɛ tsɔlɔ yaya a

(Luka 12.41-48)

45“Lɛɛ mɛnɔ ji tsɔlɔ anɔkualetsɛ, kɛ ní lelɔ mɔ? Lɛ ji nɔ nɛ e nyɔmtsɛ ɔ ngɔ lɛ ngɔ to tsɔli kpa amɛ a nya, konɛ e ha mɛ a nya mi ngma ngɛ be nɛ sa mi. 46Tsɔlɔ nɛ ke e nyɔmtsɛ ɔ ba we mi, nɛ e ma ba na kaa e ngɛ jã pee ɔ, a gbaa lɛ. 47Niinɛ, i ngɛ nyɛ dee ke, nyɔmtsɛ ɔ maa ngɔ tsɔlɔ nɛ ɔ ngɔ pee e weto ní tsuo nɔ hyɛlɔ. 48Se ke tsɔlɔ yaya ji lɛ ɔ, e ma de ngɛ e yi mi ke e nyɔmtsɛ ɔ se ya fia si bɔɔ. 49Kɛkɛ ɔ, e ma bɔni nyɛmimɛ tsɔli kpa amɛ kpa fiami, nɛ e kɛ dã tɔli ma ya ye ní, nɛ a maa nu ní. 50Jamɛ a tsɔlɔ ɔ, e nyɔmtsɛ ɔ maa ba ligbi nɛ e hyɛ we lɛ blɔ, kɛ ngmlɛfia nɛ e li. 51Nyɔmtsɛ ɔ ma tsɔtslɔɔ e mi, nɛ tue gblami nɛ sa osatotsɛmɛ ɔmɛ ɔ, e ma na eko. Lejɛ ɔ nɛ e maa wo ya, nɛ e ma kpe e lungu nya ngɛ.

Currently Selected:

Mateo 24: Dangme

Highlight

Copy