Mateo 18

Mɛnɔ ji nɔmlɔ nguaa pe kulaa?

(Marko 9.33-37; Luka 9.46-48)

1 # Luk 22.24 Jamɛ a be ɔ mi ɔ, kaseli ɔmɛ ba Yesu ngɔ, nɛ a ba bi lɛ ke, “Mɛnɔ ji nɔmlɔ nguaa pe kulaa ngɛ hiɔwe matsɛ yemi ɔ mi?”

2Kɛkɛ nɛ Yesu tsɛ jokuɛ nyafii ko, nɛ e ha e ba da a kpɛti, 3#Mar 10.15; Luk 18.7 nɛ e de ke, “Niinɛ, i ngɛ nyɛ dee ke, ke nyɛ tsakee we nɛ nyɛɛ pee kaa jokuɛ tsɔwi ɔ, nyɛ be hiɔwe matsɛ yemi ɔ mi sɛe. 4Nɔ tsuaa nɔ nɛ baa e he si kaa jokuɛ nɛ ɔ, lɛ ji nɔmlɔ nguaa pe kulaa ngɛ hiɔwe matsɛ yemi ɔ mi. 5Nɛ nɔ tsuaa nɔ nɛ heɔ jokuɛyo kaa kikɛ nɛ ɔ ngɛ ye biɛ mi ɔ, imi e he ɔ nɛ.

Kami nɛ haa nɔ peeɔ yayami

(Marko 9.42-48; Luka 17.1-2)

6“Hemi kɛ yemi nɛ jokuɛ tsɔwi nɛ ɔmɛ ngɛ ngɛ ye mi ɔ, ke nɔ ko ha nɛ a ti nɔ kake hemi kɛ yemi ɔ ta a, afani nɛ a kɛ teji wɛ muɔ nɔ ɔ kuɛ, nɛ a sake lɛ kɛ fɔ wo mi he nɛ kuɔ. 7Musu tloo je ɔ kaa níhi ngɛ je ɔ mi nɛ haa nɔ peeɔ yayami! Ní nɛ ɔmɛ maa ba kɛ̃, se nɔmlɔ nɛ haa nɛ ní nɛ ɔmɛ baa a, musu tloo lɛ!

8 # Mat 5.30 “Ke o nine, loo o nane haa nɛ o peeɔ yayami ɔ, poo nɛ o sake ngɔ fɔ he! Afani nɛ o kɛ nine popoe, loo nane popoe sɛ wami mi pe nɛ o ngɛ nine enyɔ, loo nane enyɔ, nɛ a ma sake mo ngɔ fɔ neneene la a mi. 9#Mat 5.29 Jã kɛ̃, ke o hɛngmɛ haa nɛ o peeɔ yayami ɔ, hiaa nɛ o sake ngɔ fɔ he! Afani nɛ o kɛ hɛngmɛ kake sɛ wami mi pe nɛ o ngɛ hɛngmɛ enyɔ, nɛ a ma sake mo ngɔ fɔ Abosiami a je la a mi.

Abɛ nɛ kɔɔ to nɛ laa a he

(Luka 15.3-7)

10“Nyɛɛ hyɛ saminya nɛ nyɛ ko hie bimɛ tsɔwi nɛ ɔmɛ a ti nɔ ko. I ngɛ nyɛ dee ke a bɔfohi nɛ ngɛ hiɔwe ɔ daa si ngɛ Tsaatsɛ nɛ ngɛ hiɔwe ɔ hɛ mi daa. [ 11Se Nɔmlɔ Bi ɔ ba nɛ e ba he nihi nɛ laa a a yi wami.]

12“Kɛ nyɛ susuu kɛɛ? Ke nɔ ko ngɛ to lafa, nɛ a kpɛti kake laa a, anɛ e be nyingmi nɛɛ kɛ nɛɛ ɔmɛ sie ngɛ yo ɔmɛ nɔ, nɛ e ya hla nɔ́ nɛ laa a? 13Niinɛ, i ngɛ nyɛ dee ke, ke e na lɛ ɔ, e naa lɔ ɔ he bua jɔmi kulaa pe to nyingmi nɛɛ kɛ nɛɛ ɔmɛ nɛ mɛɛ a laa we ɔ. 14Jã nɔuu kɛ̃ nyɛ Tsɛ nɛ ngɛ hiɔwe ɔ sume kaa bimɛ tsɔwi nɛ ɔmɛ a kpɛti nɔ kake nɛ laa.

Nyɛmi nɛ peeɔ yayami

15 # Luk 17.3 “Ke o nyɛmi pee mo yayami ɔ, yaa nɛ o ya tsɔɔ lɛ e tɔmi ɔ, o kɛ lɛ ni enyɔ kɛkɛ. Ke e bu mo tue ɔ, kɛkɛ nyɛmi pee nyɛmi. 16#Mose V, 19.15 Se ke e bui mo tue ɔ, ngɔɔ nɔ kake, loo ni enyɔ ngɔ piɛ o he. Kɛkɛ ɔ, ni enyɔ, loo etɛ ɔmɛ maa pee odase yeli kɛ ma munyu ɔ nɔ mi. 17Se ke e bui mɛ hu tue ɔ, yaa sɛɛ ha asafo ɔ. Ke e bɛɛe bui asafo ɔ hu tue ɔ, buu lɛ kaa wɔ jalɔ, loo tó tsulɔ.

Nya tsimi kɛ blɔ ngmɛmi

18 # Mat 16.19; Yoh 20.23 “Lɔ ɔ he ɔ, i ngɛ nyɛ dee ke, nɔ́ tsuaa nɔ́ nɛ nyɛ maa tsi nya ngɛ zugba a nɔ ɔ, a maa tsi nya ngɛ hiɔwe, nɛ nɔ́ tsuaa nɔ́ nɛ nyɛ maa ngmɛ blɔ ngɛ zugba a nɔ ɔ, a maa ngmɛ blɔ ngɛ hiɔwe.

19“Jehanɛ ɔ hu, i ngɛ nyɛ dee ke, ke nyɛ kpɛti ni enyɔ ngɛ zugba nɛ ɔ nɔ maa pee nyɛ nya kake kɛ kpa nɔ́ ko he pɛɛ ɔ, Tsaatsɛ nɛ ngɛ hiɔwe ɔ maa pee ha nyɛ. 20Ejakaa he nɛ ni enyɔ, loo ni etɛ bua a he nya ngɛ ngɛ ye biɛ mi ɔ, i ngɛ a kpɛti ngɛ lejɛ ɔ.”

Abɛ nɛ kɔɔ tsɔlɔ ɔ nɛ kɛ nɔ́ ki ɔ he

21 # Luk 17.3-4 Kɛkɛ nɛ Petro ba Yesu ngɔ, nɛ e ba bi lɛ ke, “Nyɔmtsɛ, si enyɛmɛ ke ye nyɛmi tɔ ye nɔ nɛ ma kɛ pa lɛ? Si kpaago lo?”

22 # Mose I, 4.24 Yesu de lɛ ke, “Dɛbi, i de we mo ke si kpaago, se mohu si kpaago totoe nyingmi kpaago. 23Ejakaa bɔ nɛ hiɔwe matsɛ yemi ɔ ngɛ ha ji nɛ ɔ nɛ. Be ko ɔ, matsɛ ko hi si, nɛ e to kaa e maa hyɛ e tsɔli ɔmɛ a we akɔtaa mi. 24Benɛ e bɔni akɔtaa a mi hyɛmi ɔ, a kɛ tsɔli ɔmɛ a kpɛti nɔ kake nɛ hɛɛ lɛ hiɔ sika fuu nitsɛ ba. 25Se akɛnɛ e nyɛ we nɛ e wo hiɔ ɔ, e nyɔmtsɛ ɔ fa ke a jua lɛ, kɛ e yo, kɛ e bimɛ, kɛ níhi tsuo nɛ e ngɛ ɔ nɛ a kɛ wo hiɔ ɔ. 26Kɛkɛ nɛ tsɔlɔ ɔ kpla si ngɛ matsɛ ɔ hɛ mi, nɛ e de ke, ‘Nyɔmtsɛ, i kpa mo pɛɛ, na tsui ha mi nɛ ma wo mo hiɔ ɔ tsuo!’ 27Matsɛ ɔ mi mi sã lɛ ngɛ tsɔlɔ ɔ he, nɛ e kɛ hiɔ ɔ tsuo ke lɛ, nɛ e ngmɛɛ e he.

28“Se benɛ tsɔlɔ nɛ ɔ je kpo ɔ, e na e nyɛmimɛ tsɔli ɔmɛ a kpɛti nɔ kake nɛ hɛɛ lɛ hiɔ sika bɔɔ pɛ. Kɛkɛ nɛ e nu lɛ, nɛ e bɔni e kuɔ si miami ke, ‘Wó mi hiɔ nɛ o hɛɛ mi ɔ!’ 29E nyɛmi tsɔlɔ ɔ kpla si ngɛ e hɛ mi, nɛ e de ke, ‘I kpa mo pɛɛ, na tsui ha mi nɛ ma wo mo hiɔ ɔ tsuo!’ 30Se lɛɛ e kplɛɛ we; mohu ɔ, e ya wo lɛ tsu kɛ yaa si e maa wo lɛ hiɔ ɔ. 31Benɛ tsɔli kpa amɛ na nɔ́ nɛ ba a, a hao wawɛɛ, nɛ a ho matsɛ ɔ ngɔ ya, nɛ a ya bɔ lɛ nɔ́ tsuaa nɔ́ nɛ ba. 32Matsɛ ɔ ha nɛ a ya tsɛ tsɔlɔ ɔ kɛ ba, nɛ e de lɛ ke, ‘Mo tsɔlɔ yiwutsotsɛ! Akɛnɛ o kpa mi pɛɛ he je ɔ, i ngɔ hiɔ nɛ ɔ tsuo ngɔ ke mo. 33Anɛ mo hu e sɛ kaa o naa o nyɛmi tsɔlɔ mɔbɔ kaa bɔ nɛ i na mo mɔbɔ ɔ lo?’ 34Matsɛ ɔ mi mi fu, nɛ e wo tsɔlɔ ɔ tsu, nɛ́ a gbla e tue hluu kɛ yaa si e maa wo hiɔ ɔ tsuo.”

35Yesu de kɛ gbe nya ke, “Ke nyɛ ngɔɛ nyɛ nyɛmimɛ a tɔmi ngɔ pɛ mɛ kɛ je nyɛ tsui mi ɔ, bɔ nɛ Tsaatsɛ nɛ ngɛ hiɔwe ɔ maa pee nyɛ ti nɔ tsuaa nɔ ji nɛ ɔ nɛ.”

Currently Selected:

Mateo 18: Dangme

Highlight

Copy