Mateo 17

Yesu nɔmlɔ tso su tsake

(Marko 9.2-13; Luka 9.28-36)

1 # Pet II, 1.17-18 Ligbi ekpa se ɔ, Yesu ngɔ Petro, kɛ Yakobo kɛ e nyɛmi Yohane, nɛ e nyɛɛ a hɛ mi kɛ ya yo gagaa ko nɔ ngɛ he ko banee. 2Benɛ a ngɛ lɛ hyɛe ɔ, e nɔmlɔ tso su tsake; e hɛ mi ngɛ kpɛe kaa pu, nɛ e tade ɔmɛ hiɛ futaa. 3Tlukaa a, kaseli ɔmɛ na Mose, kɛ Eliya ba je a he kpo tsɔɔ mɛ, nɛ a kɛ Yesu bɔni munyu tumi. 4Kɛkɛ nɛ Petro de Yesu ke, “Nyɔmtsɛ, e hi kaa wa ngɛ hiɛ ɔ! Ke o suɔ ɔ, ma pee bo tsu etɛ ngɛ hiɛmɛ nɛ ɔ, o nɔ kake, Mose nɔ́ kake, kɛ Eliya hu nɔ́ kake.”

5 # Mose I, 22.2; Mose V, 18.15; La 2.7; Yes 42.1; Mat 3.17; 12.18; Mar 1.11; Luk 3.22 Benɛ e ngɛ munyu ɔ tue kɛ mwɔɔ ɔ, bɔku hleii ko ba ha a nɔ, nɛ gbi je bɔku ɔ mi de ke, “Ye Bi nɛ i suɔ lɛ, nɛ i naa e he tsui ji nɛ ɔ nɛ! Nyɛɛ bu lɛ tue.”

6Benɛ kaseli ɔmɛ nu gbi ɔ, a ye gbeye wawɛɛ nitsɛ, nɛ a ngɔ a hɛ mi ngɔ bu si. 7Kɛkɛ nɛ Yesu ba a ngɔ, nɛ e ba ta a he, nɛ e de ke, “Nyɛɛ te si; nyɛ ko ye gbeye!” 8Se benɛ a bli a hɛngmɛ ɔ, a nɛ nɔ ko nɔ ko ngɛ lejɛ ɔ kaa ja Yesu nɔ kake pɛ.

9Benɛ a ngɛ yo ɔ kplee ɔ. Yesu ka mɛ kita ke, “Nyɛ ko sɛɛ nina nɛ ɔ he ní ha nɔ ko kɛ yaa si a ma tle Nɔmlɔ Bi ɔ si kɛ je gbeje.”

10 # Mal 4.5 Kɛkɛ nɛ kaseli ɔmɛ bi Yesu ke, “Mɛni he je mɔ nɛ mlaa tsɔɔli ɔmɛ deɔ ke ja Eliya ba lolo ɔ?”

11Yesu he nɔ ke, “Niinɛ, Eliya ma, nɛ e ma ba to níhi tsuo blɔ nɔ ekohu. 12#Mat 11.14 Se i ngɛ nyɛ dee ke Eliya ba momo, se nihi li lɛ, nɛ a pee lɛ nɔ́ tsuaa nɔ́ nɛ a suɔ. Ja nɔuu Nɔmlɔ Bi ɔ hu maa na amanehlu ngɛ a dɛ mi.”

13Kɛkɛ nɛ kaseli ɔmɛ kɔ se kaa Yohane nɔ sɔlelɔ ɔ he munyu e kɛ mɛ ngɛ tue ɔ nɛ.

Yesu tsa jokuɛ nyumuyo ko nɛ mumi yayami ngɛ e mi

(Marko 9.14-29; Luka 9.37-43a)

14Benɛ a kpale kɛ ba nimli kpekpemi ɔ a ngɔ ɔ, nyumu ko ba Yesu ngɔ ba kpla si ngɛ e hɛ mi, 15nɛ e de ke, “Nyɔmtsɛ, naa ye binyumu ɔ mɔbɔ! Kɔkɔtsɛ ji lɛ, nɛ hiɔ ɔ deɔ nɔ́ ha lɛ wawɛɛ nitsɛ. Bɔɔ kɛkɛ e ya nɔ la mi; bɔɔ kɛkɛ e ya nɔ nyu mi. 16I ngɔ lɛ kɛ ba o kaseli ɔmɛ a ngɔ, se a nyɛ we nɛ a tsa lɛ.”

17Yesu he nɔ ke, “Nyɛ yi nɔ yayami bi nɛ nyɛ be hemi kɛ yemi! Mɛni be i kɛ nyɛ maa hi si kɛ yaa si? Mɛni be ma to ye tsui si ha nyɛ kɛ yaa si? Nyɛɛ ngɔ jokuɛ ɔ kɛ ba ye ngɔ ngɛ hiɛ ɔ.” 18Yesu nga mumi yayami ɔ yi nɛ e je e mi, nɛ a tsa lɛ jamɛ a ngmlɛfia a nɔuu.

19Kɛkɛ nɛ Yesu kaseli ɔmɛ ba e ngɔ nigii, nɛ a ba bi lɛ ke, “Mɛni he je nɛ wɔɔ lɛɛ wa nyɛ we nɛ waa hia mumi yayami ɔ?”

20 # Mat 21.21; Mar 11.23; Kor I, 13.2 Yesu he nɔ ke, “Ejakaa nyɛ hemi kɛ yemi pi. Niinɛ, i ngɛ nyɛ dee ke, ke nyɛ ngɛ hemi kɛ yemi nɛ kle kaa sinapi wu ɔ, nyɛ ma de yo nɛ ɔ ke, ‘Hiaa kɛ je hiɛ ɔ kɛ ya lejɛ ɔ,’ nɛ e maa hia. Nɔ́ ko nɔ́ ko peemi be wae ha nyɛ!” [ 21Se mumi nɛ ɔ, ja sɔlemi, kɛ ngma himi pɛ a kɛ ma nyɛ hia.]

Yesu tu e gbenɔ he munyu ekohu

(Marko 9.30-32; Luka 9.43b-45)

22Benɛ kaseli ɔmɛ tsuo a nya ba bua ngɛ Galilea a, Yesu de mɛ ke, “A miɔ nɛ a maa ngɔ Nɔmlɔ Bi ɔ kɛ wo nimli adesahi a dɛ mi 23nɛ a gbe lɛ. Se ligbi etɛ se ɔ, Mawu ma tle lɛ si.”

Nɔ́ nɛ ɔ hao kaseli ɔmɛ wawɛɛ.

Sɔlemi we ɔ he tó tsumi

24 # Mose II, 30.13; 38.26 Benɛ Yesu kɛ e kaseli ɔmɛ ba Kapernaum ɔ, sɔlemi tsu ɔ he tó tsuli ɔmɛ ba Petro ngɔ, nɛ a ba bi lɛ ke, “Anɛ nyɛ tsɔɔlɔ ɔ woɔ tó ɔ lo?”

25Petro he nɔ ke, “Ee, e woɔ.”

Benɛ Petro ba we ɔ mi ɔ, Yesu sɛ hlami bi lɛ ke, “Simon, kɛ o susuɔ kɛɛ? Zugba a nɔ matsɛmɛ ɔmɛ ɔ, mɛnɔmɛ a dɛ a heɔ tó ngɛ? Ma mi bi a dɛ, aloo ma se bi a dɛ?”

26Petro de lɛ ke, “Ma se bi a dɛ nɛ a heɔ ngɛ.”

Yesu he nɔ ke, “Saminya! Lɛɛ ma mi bi ɔmɛ yeɔ a he mɔ! 27Se bɔ nɛ pee nɛ wa ko tsɔ̃ nimli nɛ ɔmɛ a nya a, yaa wo ɔ nya nɛ o ya fɔ gbowe. Kekleekle lo nɛ ma ba mi gbowe ɔ, sá lɛ. Hyɛ lo ɔ nya mi, nɛ o maa na sika nɛ maa su i kɛ mo tsuo wa sɔlemi we ɔ he tó ɔ nya. Ngɔɔ nɛ o kɛ wo wa tó ɔ.”

Currently Selected:

Mateo 17: Dangme

Highlight

Copy