Mateo 19
19
Yesu tu gba mi pomi he munyu
(Marko 10.1-12)
1Benɛ Yesu tu munyu nɛ ɔmɛ gbe nya a, e je Galilea kɛ ba Yudea kpokpa a nɔ, ngɛ Yordan pa a se. 2Nihi fuu nyɛɛ e se, nɛ e tsa mɛ ngɛ lejɛ ɔ.
3Farisi bi komɛ ba e ngɔ ba ka lɛ, nɛ a bi lɛ ke, “Anɛ wa mlaa a ngmɛɛ blɔ kaa nyumu fieɔ e yo ngɛ nɔ́ tsuaa nɔ́ ko he lo?”
4 #
Mose I, 1.27; 5.2 Yesu he nɔ ke, “Anɛ nyɛ kane we ngmami ɔ nɛ deɔ ke sisije ɔ, bɔlɔ ɔ bɔ adesa nyumu kɛ yo lo? 5#Mose I, 2.24 Nɛ Mawu de ke, ‘Enɛ ɔ he je ɔ, nyumu ma si e tsɛ kɛ e nyɛ, nɛ e maa mɛtɛ e yo he, nɛ mɛ ni enyɔ ɔmɛ a ma plɛ pee nɔ kake.’ 6Lɛɛ a pi nimli enyɔ hu, se mohu he lo kake. Lɔ ɔ he ɔ, nɔ́ nɛ Mawu ngɔ tsa a, nɔmlɔ kó gba mi.”
7 #
Mose V, 24.1-4; Mat 5.31 Farisi bi ɔmɛ bi lɛ ke, “Mɛni he je Mose wo mlaa ke nyumu nɛ ha yo fiemi womi nɛ e ngmɛɛ e he mɔ?”
8Yesu he nɔ ke, “Mose ha nyɛ he blɔ ke nyɛɛ ngmɛɛ nyɛ yihi a he, ejakaa nyɛ tue wa; pi ja ji sane ɔ kɛ je sisije. 9#Mat 5.32; Kor I, 7.10-11 Lɔ ɔ he ɔ, i ngɛ nyɛ dee ke, nɔ tsuaa nɔ nɛ maa ngmɛɛ e yo he, nɛ pi kaa yo ɔ ya bɔ ajuama, nɛ e ma ya ngɔ yo kpa a, e puɛ gba.”
10E kaseli ɔmɛ de lɛ ke, “Ke kikɛ nɛ ɔ ji nyumu kɛ e yo sane ɔ, e he hia we kaa nyumu nɛ ngɔ yo mɔ.”
11Yesu he nɔ ke, “Tsɔɔmi nɛ ɔ, nihi nɛ Mawu ngɔ ha a, mɛ pɛ a he e kɔɔ; pi nɔ tsuaa nɔ. 12Ejakaa ní komɛ a he je nɛ nyumuhi ngɔɛ yo; ni komɛ ngɛ nɛ ja lɛ a fɔ mɛ; ni komɛ lɛɛ adesa lɛ pee mɛ ja; ni komɛ hu ngɔɛ yo ngɛ hiɔwe matsɛ yemi ɔ he. Tsɔɔmi nɛ ɔ, nɔ nɛ ma nyɛ maa pɛtɛ he ɔ, e pee ja.”
Yesu gbaa jokuɛwi
(Marko 10.13-16; Luka 18.15-17)
13Enɛ ɔ se ɔ, ni komɛ ngɔ jokuɛ tsɔwi kɛ ba Yesu ngɔ nɛ e ngɔ e nine ngɔ pue a nɔ, nɛ e sɔle ha mɛ. Se e kaseli ɔmɛ kuɛ wo ni ɔmɛ. 14Kɛkɛ nɛ Yesu de ke, “Nyɛ ha nɛ jokuɛwi ɔmɛ nɛ a ba ye ngɔ; nyɛ ko tsi mɛ blɔ, ejakaa nihi nɛ ngɛ kaa ni nɛ ɔmɛ a nɔ ji hiɔwe matsɛ yemi ɔ nɛ.”
15Kɛkɛ nɛ e ngɔ e nine ngɔ pue jokuɛwi ɔmɛ a nɔ, nɛ e je lejɛ ɔ.
Niheyo niatsɛ ɔ
(Marko 10.17-31; Luka 18.18-30)
16Ligbi ko ɔ, nyumu ko ba Yesu ngɔ ba bi lɛ ke, “Tsɔɔlɔ, mɛni nɔ́ kpakpa po ma pee nɛ ma na neneene wami?”
17Yesu hu bi lɛ ke, “Mɛni he je o ngɛ mi nɔ́ kpakpa he sane bie? Nɔ kake pɛ ji nɔ kpakpa. Ke o ngɛ hlae nɛ o sɛ wami mi ɔ, ye mlaa amɛ a nɔ.”
18 #
Mose II, 20.13-16; Mose V, 5.17-20 Niheyo ɔ bi ke, “Mɛni mlaahi?”
Yesu he nɔ ke, “Koo gbe nɔmlɔ; ko puɛ gba; koo ju; koo ye lakpa odase; 19#Mose II, 20.12; Mose V, 5.16; Mose III, 19.18 bu o tsɛ kɛ o nyɛ; suɔ o nyɛmi nɔmlɔ kaa bɔ nɛ o suɔ mo nitsɛ o he.”
20Niheyo ɔ he nɔ ke, “I ye mlaa nɛ ɔmɛ tsuo a nɔ; mɛni pa piɛ mi mɔ?”
21Yesu de lɛ ke, “Ke o ngɛ hlae nɛ o hi kɛ pi si ɔ, yaa nɛ o ya jua níhi nɛ o ngɛ ɔ, nɛ o ngɔ sika a kɛ ha ohiatsɛmɛ, nɛ o ma na juetli ngɛ hiɔwe. Kɛkɛ ɔ, kpale kɛ ba nɛ o ba nyɛɛ ye se.”
22Benɛ niheyo ɔ nu nɔ́ nɛ ɔ, e kɛ aywilɛho je lejɛ ɔ; ejakaa e ngɛ ní babauu.
23Kɛkɛ nɛ Yesu de e kaseli ɔmɛ ke, “Niinɛ, i ngɛ nyɛ dee ke, e maa wa ha niatsɛ kaa e maa sɛ hiɔwe matsɛ yemi ɔ mi. 24I ngɛ nyɛ dee ekohu ke e wa ha niatsɛ kaa e maa sɛ Mawu matsɛ yemi ɔ mi pe kaa afukpɔngɔ maa gu abui hɛngmɛ mi.”
25Benɛ kaseli ɔmɛ nu enɛ ɔ, a he mi po, nɛ a bi ke, “Lɛɛ mɛnɔ po yi wami a ma nyɛ he mɔ?”
26Yesu hyɛ mɛ too, nɛ e de mɛ ke, “Nimli be nyɛe maa pee enɛ ɔ; se Mawu lɛɛ e nyɛɔ peeɔ nɔ́ tsuaa nɔ!”
27Kɛkɛ nɛ Petro tu munyu nɛ e de ke, “Hyɛ, wɔɔ lɛɛ wa si nɔ́ tsuaa nɔ́, nɛ wa ba nyɛɛ o se. Mɛni wa ma na mɔ?”
28 #
Mat 25.31; Luk 22.30 Yesu de mɛ ke, “Niinɛ, i ngɛ nyɛ dee ke, je he ɔ mi, benɛ Nɔmlɔ Bi ɔ maa hi e nyami sɛ ɔ nɔ ɔ, nyɛ hu nyɛ maa hi matsɛ sɛ nyɔngma kɛ enyɔ nɔ, nɛ nyɛ maa kojo Israel wɛtso nyɔngma kɛ enyɔ ɔmɛ. 29Nɔ tsuaa nɔ nɛ ma si wehi, loo nyɛminyumuhi, loo nyɛmiyihi, loo e tsɛ, loo e nyɛ, loo bimɛ, loo zugba ngɛ ye he ɔ, a maa to lɛ nane mi totoe lafa, nɛ a ma ha lɛ neneene wami. 30#Mat 20.16; Luk 13.30 Se nihi fuu nɛ sɛ hlami amlɔ nɛ ɔ ma ba pee sekpɛli, nɛ sekpɛli ma ba pee hlami sɛli.
Currently Selected:
Mateo 19: Dangme
Highlight
Share
Copy

Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
Free Reading Plans and Devotionals related to Mateo 19

Matthew and Work

Navigating Singleness The Biblical Way

Faith & Love: A One Year Bible Reading Plan - Part 5
