Mateo 16

A de Yesu ke e pee nyakpɛ ní

(Marko 8.11-13; Luka 12.54-56)

1 # Mat 12.38; Luk 11.16 Farisi bi komɛ, kɛ Saduki bi komɛ ba Yesu ngɔ, konɛ a ba ka lɛ. A de lɛ ke e pee nyakpɛ nɔ́ ko kɛ tsɔɔ kaa e je hiɔwe niinɛ. 2Se e he nɔ nɛ e de mɛ ke, [“Ke pu yaa nɔ si ɔ, nyɛ deɔ ke, ‘Je mi ma tsɔ, ejakaa hiɔwe pee tsutsuu.’ 3Mɔtu ɔ, nyɛ deɔ ke, ‘Hiɔmi maa nɛ mwɔnɛ ɔ, ejakaa hiɔwe pee tsutsuu, nɛ je ɔ mi pee kaa nɔ́ nɛ hiɔmi maa nɛ.’ Niinɛ, ke nyɛ hyɛ hiɔwe pɛ nyɛ le kaa je mi ma tsɔ, loo hiɔmi maa nɛ. Se okadihi nɛ kɔɔ yi nɔ nɛ ɔmɛ a he lɛɛ nyɛ be nyɛe maa tsɔɔ sisi!] 4#Mat 12.39; Luk 11.29 Mwɔnɛmwɔnɛ yi nɔ bi yayami nɛ li Mawu! Nyɛ bi ke ma pee nyakpɛ nɔ́ ko ha nyɛ, pi jã? Dɛbi! Okadi pɛ nɛ a ma ha nyɛ ji Yona nɔ́ ɔ.”

Kɛkɛ nɛ Yesu je a he, nɛ e pue nɔ kɛ ho.

Farisi bi kɛ Saduki bi a masa a

(Marko 8.14-21)

5Benɛ kaseli ɔmɛ po mi kɛ yaa wo ɔ se ɔ, a hɛ je nɔ kaa a maa hɛɛ niye ní kɛ to dɛ. 6#Luk 12.1 Yesu de mɛ ke, “Nyɛɛ hyɛ saminya! Nyɛ hɛ nɛ hi nyɛ he nɔ ngɛ Farisi bi ɔmɛ, kɛ Saduki bi ɔmɛ a masa a he!”

7Se a tu he munyu ngɛ a kpɛti ke, “E de jã, ejakaa wa hɛɛ we niye ní kɛ bɛ!”

8Yesu le nɔ́ nɛ a ngɛ dee ɔ, lɔ ɔ he ɔ, e bi mɛ ke, “Mɛni he je nyɛ ngɛ ní sɛɛe ngɛ niye ní nɛ nyɛ hɛɛ we he ɔ? Nyɛ hemi kɛ yemi pi pɛ! 9#Mat 14.17-21 Anɛ nyɛ nɛ níhi a nya kɛ mwɔɔ? Anɛ nyɛ kai we kaa i ku abolo enuɔ mi kɛ ha nyumuhi akpe enuɔ hyɛ? Kusii enyɛmɛ a mi nyɛ kukuɔ bibliwi ɔ kɛ wo? 10#Mat 15.34-38 Abolo kpaago ɔ nɛ a kɛ lɛ nyumuhi akpe eywiɛ ɔmɛ nɛɛ, nyɛ kaii we? Kusii enyɛmɛ a mi nyɛ kukuɔ bibliwi ɔ kɛ wo? 11Mɛni he je nyɛ nui sisi kaa pi abolo he munyu nɛ i kɛ nyɛ ngɛ tue ɔ? Nyɛ hɛ nɛ hi nyɛ he nɔ ngɛ Farisi bi ɔmɛ, kɛ Saduki bi ɔmɛ a masa a he!”

12Jehanɛ lɛɛ kaseli ɔmɛ ba kɔ se kaa pi masa nɛ a kɛ woɔ abolo mi ɔ he nɛ e de mɛ ke a hɛ nɛ hi a he nɔ ɔ, se mohu, Farisi bi ɔmɛ, kɛ Saduki bi ɔmɛ a tsɔɔmi ɔ he.

Petro ye Yesu he odase

(Marko 8.27-30; Luka 9.18-21)

13Benɛ Yesu ba Kaisarea Filipi kpokpa a nɔ ɔ, e bi e kaseli ɔmɛ ke, “Mɛnɔ nihi deɔ ke Nɔmlɔ Bi ɔ ji?”

14 # Mat 14.1-2; Mar 6.14-15; Luk 9.7-8 A he nɔ ke, “Ni komɛ ke Yohane nɔ sɔlelɔ ɔ; ni komɛ ke Eliya, nɛ ni kpa komɛ deɔ ke Yeremia, aloo gbali ɔmɛ a ti nɔ kake.”

15E bi mɛ ke, “Se nyɛɛ lɛɛ kɛ nyɛ deɔ kɛɛ? Mɛnɔ ji mi?”

16 # Yoh 6.68-69 Simon Petro he nɔ ke, “Mo ji Kristo ɔ, Mawu hɛ kalɔ ɔ Bi ɔ.”

17Yesu de lɛ ke, “Simon, Yona bi, a gbaa mo! Ejakaa pi nɔmlɔ adesa nɛ je enɛ ɔ tsɔɔ mo; se Tsaatsɛ nɛ ngɛ hiɔwe ɔ. 18Lɔ ɔ he ɔ, Petro, i ngɛ mo dee ke tɛ sa ji mo, nɛ kikɛmɛ a tɛ sa nɛ ɔ nɔ ma ma ye asafo ɔ ngɛ. Nɛ gbenɔ tete po be nyɛe maa ye e nɔ. 19#Mat 18.18; Yoh 20.23 Ma ngɔ hiɔwe matsɛ yemi ɔ nya safe ɔmɛ ngɔ ha mo. Nɔ́ tsuaa nɔ́ nɛ o maa tsi nya ngɛ zugba a nɔ ɔ, a maa tsi nya ngɛ hiɔwe; nɛ nɔ́ tsuaa nɔ́ nɛ o maa ngmɛ blɔ ke a pee ngɛ zugba a nɔ ɔ, a maa ngmɛ blɔ ngɛ hiɔwe.”

20Kɛkɛ nɛ Yesu ka e kaseli ɔmɛ kita ke a ko de nɔ ko nɔ ko ke lɛ ji Kristo ɔ.

Yesu tu e we amanehlu, kɛ e gbenɔ he munyu

(Marko 8.31—9.1; Luka 9.22-27)

21Kɛ je jamɛ a be ɔ, Yesu bɔni e kaseli ɔmɛ demi paa ke ja e ya Yerusalem, nɛ e ya na amanehlu babauu ngɛ ma nimeli ɔmɛ, kɛ osɔfo nikɔtɔma amɛ, kɛ mlaa tsɔɔli ɔmɛ a dɛ mi. A maa gbe lɛ, se ligbi etɛ se ɔ, Mawu ma tle lɛ si kɛ ba wami mi ekohu.

22Petro tsɛ lɛ kɛ ya se, nɛ e bɔni e hɛ mi kami ke, “Nyɔmtsɛ, enɛ ɔ ya je ngɛ se lokoo! Mawu ko ha nɛ nɔ́ nɛ ɔ nɛ ba o nɔ kɔkɔɔkɔ!”

23Se Yesu plɛ e he nɛ e de Petro ke, “Jee ye nɔ kɛ ya se, Satan! O ngɛ ye nane kpatae. Ejakaa juɛmi nɛ ngɛ o yi mi ɔ, pi Mawu ngɔ nɛ e je, se nɔmlɔ adesa.”

24 # Mat 10.38; Luk 14.27 Jehanɛ, Yesu de e kaseli ɔmɛ ke, “Ke nɔ ko suɔ kaa e maa nyɛɛ ye se ɔ, e kua e he, nɛ e wo e sɛumi tso ɔ, nɛ e nyɛɛ ye se. 25#Mat 10.39; Luk 17.33; Yoh 12.25 Ejakaa nɔ tsuaa nɔ nɛ hlaa kaa e baa e klaa yi ɔ, e maa laa lɛ; se nɔ tsuaa nɔ nɛ ngɔɔ e wami ngɔ fɔɔ he ngɛ ye he ɔ, e nine maa su nɔ ekohu. 26Mɛni se nɔ ko ma na ke e nine su je ɔ tsuo nɔ, se e laa e klaa? Dɛbi! Nɔ́ ko be nɛ e ma ngɔ ha nɛ e kɛ kpɔ e klaa a. 27#Mat 25.31; La 62.12; Rom 2.6 Ejakaa Nɔmlɔ Bi ɔ maa ba ngɛ e tsɛ hɛ mi nyami ɔ mi, kɛ e bɔfo ɔmɛ. Jamɛ a be ɔ, e maa wo nɔ tsuaa nɔ hiɔ ngɛ e ní tsumi nya. 28Niinɛ, i ngɛ nyɛ dee ke ni komɛ daa si ngɛ hiɛ ɔ nɛ mɛɛ lɛɛ a be gboe kɛ yaa su be nɛ a maa na Nɔmlɔ Bi ɔ nɛ ma kaa matsɛ.”

Currently Selected:

Mateo 16: Dangme

Highlight

Copy