Malaki 3
3
1 #
Mat 11.10; Mar 1.2; Luk 1.76; 7.27 Yawɛ Tabohiatsɛ ɔ ke, “Ma tsɔ ye tsɔlɔ ɔ, nɛ e ma ya dla blɔ ngɔ to mi. Lɔ ɔ se ɔ, Nyɔmtsɛ ɔ nɛ nyɛ ngɛ blɔ hyɛe ɔ maa ba e we ɔ tlukaa. Tsɔlɔ ɔ nɛ nyɛ hla kaa nyɛ maa na a maa ba, nɛ e ma ba fiɛ ye somi ɔ.”
2 #
Yoel 2.11; Kpoj 6.17 Se, ligbi ɔ nɛ e maa ba a, mɛnɔ lɛ ma nyɛ maa da si? Ligbi ɔ nɛ e ma ba hia si ɔ, mɛnɔ yi ma na wami? E maa ba kaa jale nɛ nya wa, aloo la nɛ a kɛ tsuɔ dade he. 3E ma ba kojo kaa bɔ nɛ sika hiɔ ga ní tsulɔ tsuɔ sika hiɔ he ɔ. Kaa bɔ nɛ sika hiɔ, loo sika tsu ga ní tsulɔ tsuɔ sika he ɔ, ja ji bɔ nɛ Yawɛ tsɔlɔ ɔ maa tsu osɔfo ɔmɛ a he, konɛ a ngɔ nike ní nɛ sa kɛ ba ha lɛ Yawɛ ɔ. 4Nike ní nɛ Yuda ma a, kɛ Yerusalem bi ɔmɛ ma ba ha Yawɛ ɔ, ja jã loko nike ní ɔ maa sa e hɛ mi kaa sa a.
5Yawɛ Tabohiatsɛ ɔ ke, “Ma ba nyɛ ngɔ nɛ ma ba kojo, nɛ ma gbla nimli nɛ ɔmɛ a tue amlɔ: kunya yeli, gba puɛli, lakpa odase yeli, nihi nɛ sisiɔ ní tsuli nɛ a wui mɛ hiɔ susui, kɛ ni nɛmɛ nɛ waa yalɔyihi, awusahi, kɛ nibwɔhi yi mi. Ee, ma gbla nɔ tsuaa nɔ nɛ bui mi ɔ tue.” Yawɛ Tabohiatsɛ ɔ lɛ de.
Mi dlami nyɔngmanyɔngma mi kakaaka hami
6“Imi ji Yawɛ ɔ nɛ; i tsakee we. Enɛ ɔ he je nɛ nyɛ, Yakob nina a, nyɛ hɛ mi kpataa we lolo ɔ nɛ. 7Kaa bɔ nɛ nyɛ nɛmɛ ɔmɛ pee ɔ, nyɛ hu nyɛ ngmɛɛ ye mlaa amɛ a he kɛ fɔ si, nɛ nyɛ yi ye mlaa amɛ a nɔ. Nyɛɛ kpale kɛ ba ye ngɔ, nɛ i kɛ nyɛ he yayami ɔmɛ maa pa nyɛ. Se nyɛ biɔ ke, ‘Kɛ wa maa pee kɛ kpale kɛ ba o ngɔ kɛɛ?’ 8I ngɛ bie ke, Mawu ɔ, anɛ nɔmlɔ sisiɔ lɛ lo? Dɛbi! Se nyɛɛ lɛɛ nyɛ ngɛ mi sisie. Nyɛ biɔ mi ke, ‘Kɛ wa plɛ kɛ ngɛ mo sisie kɛɛ?’ Mi dlami nyɔngmanyɔngma mi kakaaka, kɛ nike ní nɛ ma a ba haa mi ɔ, nyɛ sisiɔ mi ngɛ mi. 9Gbiɛmi ngɛ nyɛ tsuo nyɛ nɔ, ejakaa ma a tsuo ngɛ mi sisie. 10#Mose III, 27.30; Mose IV, 18.21-24; Mose V, 12.6; 14.22-29; Neh 13.12 Nyɛɛ ngɔ mi dlami nyɔngmanyɔngma mi kakaaka amɛ tsuo kɛ ba nito he ɔ, konɛ niye ní nɛ hiɛ ngɛ ye we ɔ. Nyɛɛ ka mi nɛ nyɛɛ hyɛ kaa i be hiɔwe saflɛhi blie nɛ ma ha nɛ ní kpakpa babauu maa nɛ ngɔ pue nyɛ nɔ babaaba kaa hiɔmi lo? 11I be hae nɛ lohwe tsɔwitsɔwihi nɛ kpata nyɛ ngmɔ niba ní ɔmɛ a hɛ mi; nyɛ wai tso ɔmɛ hu maa wo wai yiblii kplanyakplanyaa ngɛ ngmɔ ɔmɛ a nɔ. 12Jamɛ a be ɔ mi ɔ, je ma amɛ tsuo maa na kaa a gbaa nyɛ niinɛ, ejakaa zugba a tsuo maa pee kɛ bua jɔmi sɔuu.” Yawɛ Tabohiatsɛ ɔ lɛ de.
Mawu wo si ke e maa na mɔbɔ
13Yawɛ ke, “Nyɛ tuɔ munyuhi nɛ a he wa kɛ siɔ mi. Se nyɛ biɔ ke, ‘Kɛ wa plɛ kɛ tu munyu kɛ si mo kɛɛ?’ 14Ɛ̃ɛ̃, nyɛ deɔ ke, ‘Mawu jami he be se nami; ke wa ye Yawɛ Tabohiatsɛ ɔ mlaa amɛ a nɔ, nɛ wa pee mɔbɔmɔbɔ kaa nihi nɛ a he yayami ngɛ mɛ dɔe ɔ, mɛni se wa ma na? 15Amlɔ nɛ ɔ, wa naa paa kaa he woli ji nihi nɛ a gbaa mɛ saminya; yayami peeli ji ni nɛmɛ nɛ ngɛ plɔkee ngɛ je mi; a kaa Mawu, se nɔ́ ko pee we mɛ.’ ”
16Kɛkɛ nɛ nihi nɛ yeɔ Yawɛ gbeye ɔ kɛ a sibi tu munyu, nɛ Yawɛ bu tue nɛ e nu nɔ́ nɛ a ngɛ dee ɔ. Ngɛ e hɛ mi ɔ, a ngma nihi tsuo nɛ a yeɔ Yawɛ gbeye, nɛ a buɔ lɛ ɔ a biɛ. 17Yawɛ Tabohiatsɛ ɔ de ke, “Nimli nɛ ɔmɛ maa pee imi nitsɛ ye ma. Ligbi ɔ nɛ ma tsu ní ɔ, a maa pee ye nihi pɔtɛɛ. Ma na mɛ mɔbɔ kaa tsɛ naa lɛ nitsɛ e bi nɛ sɔmɔɔ lɛ ɔ mɔbɔ. 18Jamɛ a be ɔ mi ɔ, ye ma a maa na slɔɔto nɛ ngɛ dalɔ kɛ yayami peelɔ a kpɛti; nyɛ maa na slɔɔto nɛ ngɛ nɔmlɔ nɛ sɔmɔɔ mi, kɛ nɔ nɛ sɔmɔ we mi ɔ a kpɛti.” Yawɛ Tabohiatsɛ ɔ lɛ de.
Currently Selected:
Malaki 3: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
